Be ka se isịnede

Be ka se isịnede

 UKPEPN̄KPỌ 44

Ẹbọp Temple Ẹnọ Jehovah

Ẹbọp Temple Ẹnọ Jehovah

Ke Solomon ama ekedi edidem Israel, Jehovah ama obụp enye ete: ‘Nso ke akpama nnam nnọ fi?’ Solomon ama ọdọhọ ete: ‘Ndi eyenọwọn̄, nnyụn̄ ndiọn̄ọke se n̄kpanamde. Mbọk nọ mi ọniọn̄ man nse mban̄a ikọt fo.’ Jehovah ama ọdọhọ ete: ‘Sia afo eben̄ede mi ọniọn̄, nyanam fi ọdiọn̄ọ n̄kpọ akan kpukpru owo ke ofụri isọn̄. Nyonyụn̄ nnam fi enen̄ede enyene n̄kpọ. Edieke afo edikopde uyo mi, oyodu uwem ebịghi.’

Solomon ama ọtọn̄ọ ndibọp temple. Enye akada ata nti gold, silver, eto, ye itiat ọbọp. Ata ediwak iban ye irenowo emi ẹdiọn̄ọde utom etieti ẹkebọp temple oro. Ẹkeda isua itiaba ẹbọp enye ẹma. Ekem ẹma ẹyak enye ẹnọ Jehovah. Temple oro ama enyene itieuwa. Ẹma ẹda uwa ẹkedori do, ndien Solomon ama ọtọn̄ọ edọn̄ ke iso itieuwa oro ọbọn̄ akam ete: ‘O Jehovah, temple emi iyehe nte afo akpamade, inyụn̄ ikponke ikem fi, edi mbọk nyịme utuakibuot nnyịn nyụn̄ kop akam nnyịn.’ Ndi Jehovah ama okop akam Solomon onyụn̄ enyịme temple oro? Ndondo oro Solomon ọbọn̄de akam ama, Jehovah ama anam ikan̄ oto enyọn̄ edita kpukpru uwa oro. Jehovah ama ada oro owụt ke imọ imenyịme temple oro. Ke ini nditọ Israel ẹkụtde ikan̄ oro, esịt ama enem mmọ.

Etop ọniọn̄ Solomon ama asuana ke ofụri Israel ye ke mme obio emi mîkekpereke Israel. Mme owo ẹma ẹsika ẹbịne enye ini mmọ ẹnyenede mfịna. Ọbọn̄ an̄wan Sheba ama edibụp enye n̄kpọsọn̄ mbụme man odomo enye ese. Ibọrọ Solomon ama anam enye ọdọhọ ete: ‘N̄kenịmke se ẹketịn̄de ẹnọ mi ẹban̄a fi, edi idahaemi mmokụt ke emenyene ọniọn̄ akan nte n̄kokopde. Jehovah Abasi fo ọdiọn̄ fi.’ N̄kpọ ama ọfọn ke Israel, esịt ama onyụn̄ enem nditọ Israel. Edi ekem n̄kpọ ama okpụhọde.

“Sese! se ikponde ikan Solomon odu mi.” —Matthew 12:42