Be ka se isịnede

Be ka se isịnede

 UKPEPN̄KPỌ 22

Utịben̄kpọ ke Ididuot Inyan̄

Utịben̄kpọ ke Ididuot Inyan̄

Ndondo oro Pharaoh okopde ke nditọ Israel ẹwọn̄ọ ke Egypt, enye ama atua n̄kpọfiọk nte imọ ikayakde mmọ ẹnyọn̄ọ. Enye ama ọdọhọ mbonekọn̄ esie ete: ‘Ẹtịm kpukpru chariot ekọn̄ yak ibịne nditọ Israel. Ikpakanaha iyak mmọ ẹnyọn̄ọ.’ Enye ye mbonekọn̄ esie ẹma ẹdaha ẹbịne nditọ Israel.

Jehovah ama ada adaha obubịt enyọn̄ ada ikọt esie usụn̄ uwemeyo, onyụn̄ ada adaha ikan̄ ada mmọ usụn̄ okoneyo. Enye ama ada mmọ ekesịm Ididuot Inyan̄ onyụn̄ ọdọhọ mmọ ẹbet do.

Ekem nditọ Israel ẹma ẹda ẹkụt ke Pharaoh ye udịmekọn̄ esie ke ẹdi. Ididuot Inyan̄ okodu mmọ ke iso, mbonekọn̄ Egypt ẹdu mmọ ke edem. Mmọ ẹma ẹtua ẹnọ Moses ẹte: ‘Ẹmọn̄ ẹwot nnyịn! Akpakana ayak itie do ke Egypt.’ Edi Moses ama ọdọhọ ete: ‘Ẹkûyak ndịk anam mbufo. Ẹbet ẹse nte Jehovah edinyan̄ade nnyịn.’ Moses ama enen̄ede ọbuọt idem ye Jehovah.

Jehovah ama ọdọhọ nditọ Israel ẹtọn̄ọ isan̄. Okoneyo oro, Jehovah ama anam adaha obubịt enyọn̄ edida ke ufọt nditọ Egypt ye nditọ Israel. Ekịm ama odu ke n̄kan̄ nditọ Egypt, edi un̄wan̄a odu ke n̄kan̄ nditọ Israel.

Jehovah ama ọdọhọ Moses emenede ubọk anyan ke inyan̄  oro. Ekem Jehovah ama anam ata ọkpọsọn̄ ofụm efụme ofụri okoneyo oro. Mmọn̄ inyan̄ oro ama abahade ada nte ibibene ke nnasia ye ke ufien, usụn̄ onyụn̄ odu ke ufọt. Nditọ Israel ẹma ẹyịre udịm ke miliọn ke miliọn ẹsan̄a ke nsatisọn̄ ẹbe ẹda ke n̄kan̄ eken.

Udịmekọn̄ Pharaoh ẹma ẹtiene ẹbe ẹdụk ufọt inyan̄ oro. Edi Jehovah ama etịmede mmọ, mme wheel chariot mmọ ẹnyụn̄ ẹtọn̄ọ nditon̄ode. Mmọ ẹma ẹfiori ẹte: ‘Ẹyak ifen̄e iwọrọ! Jehovah ke an̄wana ọnọ mmọ.’

Jehovah ama ọdọhọ Moses ete: ‘Nyan ubọk fo ke inyan̄ oro.’ Mmọn̄ oro ama eberede ofụk udịmekọn̄ Egypt inikiet inikiet. Pharaoh ye udịmekọn̄ esie ẹma ẹkpan̄a. Owo mmọ ndomokiet ikọbọhọke.

Udịmowo emi ẹkebede ẹda ke n̄kan̄ oko ẹma ẹkwọ ikwọ ẹtoro Abasi ẹte: “Ẹkwọ ẹnọ Jehovah, koro enye okon̄de etieti. Enye omotop enan̄-mbakara ye andiwat enye ọduọk ke inyan̄.” Nte mmọ ẹsụk ẹkwọde ikwọ oro, iban ẹma ẹnek unek ẹnyụn̄ ẹmia ekọmọ. Esịt ama enem kpukpru mmọ ndiwọrọ ke ufụn.

“Ntre nnyịn imekeme ndinen̄ede nnyene uko ndọhọ nte: ‘Jehovah edi andin̄wam mi; ndifeheke ndịk. Nso ke owo ekeme ndinam mi?’ ”—Mme Hebrew 13:6