Be ka se isịnede

Be ka se isịnede

 UKPEPN̄KPỌ 28

Ass Balaam Etịn̄ Ikọ

Ass Balaam Etịn̄ Ikọ

Ekpere ndisịm isua 40 tọn̄ọ nditọ Israel ẹkedu ke wilderness. Mmọ ẹn̄wana ẹkan ediwak n̄kpọsọn̄ obio. Idahaemi mmọ ẹdu ke unaisọn̄ Moab, ke edem usiahautịn Akpa Jordan. Ibịghike mmọ ẹmọn̄ ẹbe ẹdụk Isọn̄ Un̄wọn̄ọ. Idem ama enyek Balak edidem Moab sia enye ekekere ke nditọ Israel ẹmọn̄ ẹdimen Moab. Ntre enye ama okot ete kiet emi ekekerede Balaam ete edi Moab edisụn̄i nditọ Israel ọnọ mmimọ.

Edi Jehovah ama ọdọhọ Balaam ete: ‘Kûka ukusụn̄i nditọ Israel.’ Ntre Balaam ikakaha. Balak ama afiak ọdọn̄ ẹkekot enye onyụn̄ ọdọhọ ke iyọnọ enye se enye oyoyom. Edi Balaam ikosụk imaha ndika. Ekem Abasi ama ọdọhọ enye ete: ‘Ka, edi se ndidọhọde fi kpọt ke editịn̄.’

Balaam ama awat ass esie aka Moab. Enye ama aduak ndikosụn̄i nditọ Israel, kpa ye oro Jehovah ọkọdọhọde enye okûsụn̄i mmọ. Angel Jehovah ama ọwọrọ ada ke usụn̄ utịm ikata. Ass Balaam kpọt okokụt angel oro. Akpa ini emi ass oro okụtde angel oro, ass ama awaha odụk ikọt. Ọyọhọ ikaba, ass oro ama adian idem ke ibibene tutu efịk Balaam ukot adian ke ibibene oro. Akpatre ini angel afiakde ada ke usụn̄, ass oro ama osụhọde ana ke ufọt usụn̄. Ofụri ikata emi, Balaam ke ada eto eyịbi ass oro.

Ke akpatre Jehovah ama anam ass oro etịn̄ ikọ. Ass oro ama obụp Balaam ete: ‘Ntak emi eyịbide mi?’ Balaam ama ọbọrọ ete: ‘Koro afo emesuene mi. N̄kpowot fi ekpedi mmakama akan̄kan̄.’ Ass oro ama ọdọhọ enye ete: ‘Amawat mi ke ediwak isua idahaemi. Ndi akanam mmanam fi ntem?’

Jehovah ama anam Balaam okụt angel oro ndien. Angel oro ama ọdọhọ enye ete: ‘N̄kọ Jehovah ama ọdọhọ fi okûsụn̄i nditọ  Israel.’ Balaam ama ọbọrọ ete: ‘Mmedue. Mmọn̄ mfiak nnyọn̄.’ Edi angel oro ama ọdọhọ enye ete: ‘Emekeme ndika Moab, edi se Jehovah edidọhọde fi kpọt ke editịn̄.’

Ndi se iketịbede oro ama ekpep Balaam n̄kpọ ndomokiet? Ihih. Enye ama odomo ndisụn̄i Israel ofụri ikata, edi Jehovah ama anam enye akabade ọdiọn̄ mmọ. Nte ini akakade, Israel ẹma ẹken̄wana ye mbon Moab ẹnyụn̄ ẹwot Balaam. Ndi ukereke ke ọkpọkọfọn ye Balaam edieke enye okpokokopde uyo Jehovah?

“Ẹkpeme idem ke kpukpru orụk edisịn esịt ke n̄kpọ owo, koro idem ke ini owo enyenede n̄kpọ barasuene, uwem esie itoho ke mme n̄kpọ emi enye enyenede.” —Luke 12:15