Be ka se isịnede

Be ka se isịnede

 UKPEPN̄KPỌ 77

N̄wan Kiet Edi Obube Mmọn̄

N̄wan Kiet Edi Obube Mmọn̄

Ke ndusụk ini ama ekebe tọn̄ọ usọrọ Passover okokụre, Jesus ye mbet esie ẹma ẹsan̄a usụn̄ Samaria ẹnyọn̄ Galilee. Ini mmọ ẹkperede obio Sychar, Jesus ama etie ekpere obube mmọn̄ Jacob ọduọk odudu; mbet esie ẹma ẹdụk obio ẹka ndidep udia.

N̄wan kiet ama edi ndikoi mmọn̄ ke obube oro. Jesus ama ọdọhọ enye ete: “Nọ mi mmọn̄ n̄n̄wọn̄.” N̄wan oro ama ọdọhọ enye ete: ‘Nso inam etịn̄ ikọ ye ami? Ndi n̄wan Samaria. Mbufo mme Jew isitịn̄ke ikọ ye mbon Samaria.’ Jesus ama ọdọhọ enye ete: ‘Edieke ọkpọdiọn̄ọde owo emi ndide, ekpeben̄e mi ndien n̄kpọnọ fi odu-uwem mmọn̄.’ N̄wan oro ama ọdọhọ ete: ‘Edida ke m̀mọ̀n̄? Unyeneke bọket mmọn̄.’ Jesus ama ọdọhọ enye ete: ‘Owo ekededi emi ọn̄wọn̄de mmọn̄ oro idikopke nsatitọn̄ aba.’ Enye ama ọdọhọ Jesus ete: ‘Ete, nọ mi mmọn̄ oro.’

Jesus ama ọdọhọ enye: ‘Ka kokot ebe fo di.’ Enye ete: ‘Nnyeneke ebe.’ Jesus ama ọdọhọ ete: ‘Etịn̄ akpanikọ. Ama ọdọdọ ebe ition; idem eren emi odụn̄de kiet idahaemi idịghe ebe fo.’ N̄wan oro ama ọdọhọ enye ete: ‘Mmokụt ke afo edi prọfet. Nnyịn inịm ke imekeme ndituak ibuot nnọ Abasi ke obot emi, edi mme Jew ẹdọhọ ke ekpedi ke Jerusalem kpọt. Mmenịm ke Messiah ama edi, enye eyekpep nnyịn nte ikpatuakde ibuot inọ Abasi.’ Jesus ama etịn̄ n̄kpọ emi enye mîketịn̄ke inọ owo ndomokiet akpa, ete: ‘Ami ndi Messiah.’

 N̄wan oro ama ọsọsọp odụk obio ọkọdọhọ ete: ‘Etie nte mmokụt Messiah, ẹdi ẹdise. Enye ọdiọn̄ọ kpukpru n̄kpọ aban̄a mi!’ Mmọ ẹma ẹtiene enye ẹka obube mmọn̄ oro ẹkekop ukwọrọikọ Jesus.

Mbon Samaria ẹma ẹdọhọ Jesus edidu ye mmimọ. Jesus ama okodu usen iba ekpep mmọ n̄kpọ, ediwak mmọ ẹnyụn̄ ẹbuọt idem ye enye. Mmọ ẹma ẹdọhọ n̄wan oro ẹte: ‘Se nnyịn ikopde anam ifiọk ke owo emi edi andinyan̄a ererimbot.’

“‘Di!’ Yak owo eke itọn̄ asatde edi; yak owo eke amade edibọ mmọn̄ uwem ke mfọn.”—Ediyarade 22:17