Be ka se isịnede

Be ka se isịnede

 UKPEPN̄KPỌ 64

Ẹsịn Daniel ke Obube Ekpe

Ẹsịn Daniel ke Obube Ekpe

Owo en̄wen emi akakarade Babylon ekedi Darius owo Media. Enye ama okụt ke Daniel okpụhọde ye ikpọ owo eken. Ntre enye ama ọnọ Daniel itie emi okponde akan eke kpukpru mmọ. Mmọ ẹma ẹyat esịt ẹyom usụn̄ ndiwot Daniel. Mmọ ẹma ẹdiọn̄ọ ke Daniel esibọn̄ akam ọnọ Jehovah ikata ke usen, ntre mmọ ẹma ẹkedọhọ Darius ẹte: ‘O edidem, yak ẹnịm ibet emi ọdọhọde kpukpru owo ẹbọn̄ akam ẹnọ fi ikpọn̄. Ẹyetop owo ekededi emi abiatde ibet emi ẹsịn ke obube ekpe.’ N̄kpọ emi ama enem Darius, enye ama onyụn̄ esịn ubọk ke n̄wed ibet oro.

Ndondo emi Daniel okopde obufa ibet emi, enye ama ọnyọn̄ ufọk ekeberede window ọtọn̄ọ edọn̄ ọbọn̄ akam ọnọ Jehovah. Mbon idiọkesịt oro ẹma ẹbụmede ẹdụk ufọk esie ẹkekụt nte enye osụk ọbọn̄de akam. Mmọ ẹma ẹfehe ẹbịne Darius ẹkedọhọ ẹte: ‘Daniel ọsọn̄ ibuot ye afo. Enye osụk ọbọbọn̄ akam ọnọ Abasi esie ikata ke usen.’ Darius ikoyomke ẹwot Daniel sia enye ama ama Daniel etieti. Ofụri usen oro, enye ama oyom usụn̄ ndinyan̄a Daniel, edi ọkọsọsọn̄ sia edidem ke idemesie ikesikemeke ndikpụhọde ibet emi enye ama ekesịn ubọk. Ntre enye ama ọdọhọ ẹmen Daniel ẹketop ẹsịn ke obube ekpe.

 Darius ama ekere Daniel ofụri okoneyo oro tutu ikemeke ndide idap. Ke eyo ama ekesiere, enye ama efehe aka obube oro okofiori okot Daniel ete: ‘Ndi Abasi fo anyan̄a fi?’

Darius ama okop uyo Daniel! Daniel ama esịne do ọdọhọ enye ete: ‘Angel Jehovah ama edikụbi mme ekpe inua. Mmọ inamke mi n̄kpọ ndomokiet.’ Esịt ama enem Darius etieti. Enye ama ọdọhọ ẹsọsọp ẹsio Daniel ke obube oro. Nde unan ndomokiet ikodụhe Daniel ke idem. Edidem ama ọdọhọ ẹmen kpukpru mbon emi ẹkedoride Daniel ikọ ẹketop ẹsịn ke obube oro. Mme ekpe oro ẹma ẹta kpukpru mmọ.

Ekem Darius ama owụk kpukpru ikọt esie ete: ‘Ana kpukpru owo ẹbak Abasi Daniel. Enye akanyan̄a Daniel osio ke inua ekpe.’

Ndi emesibọn̄ akam ọnọ Jehovah kpukpru usen nte Daniel ekesibọn̄de?

“Jehovah ọfiọk nte anyan̄ade mbon oro ẹten̄ede Enye osio ke idomo.”—2 Peter 2:9