Be ka se isịnede

Be ka se isịnede

 UKPEPN̄KPỌ 82

Jesus Ekpep Mbet Nte Ẹkpebọn̄de Akam

Jesus Ekpep Mbet Nte Ẹkpebọn̄de Akam

Mme Pharisee ẹma ẹsima ndida se ededi emi mmọ ẹnamde n̄wụt idem. Mmọ ẹkesinam nti n̄kpọ ẹnọ mme owo man ẹda mmọ nte nti owo. Mmọ ẹma ẹsima ndida ke eferife mbọn̄ akam man mme owo ẹkụt. Mmọ ẹma ẹsimụm nnyan akam ẹdọn̄ ke ibuot, ẹnyụn̄ ẹsida ke synagogue ye ke efak ẹbọn̄ akam oro man ediwak owo ẹkụt mmọ. Idem ama akpa mme owo ke ini Jesus ọkọdọhọde mmọ ete: ‘Ẹkûsubọn̄ akam nte mme Pharisee. Mmọ ẹkere ke uwak ikọ edinam Abasi okop akam mmimọ; Abasi isikopke utọ akam oro. Akam fo ekpedi sụk afo ye Jehovah. Kûyịre utịn̄ n̄kpọ kiet ufiak utịn̄. Jehovah oyom fi esitịn̄ se isịnede fi ke esịt ọnọ imọ.’

Jesus ama ọdọhọ ete: ‘Ẹsibọn̄ akam ntem: “Ete nnyịn emi odude ke heaven, yak ẹnam enyịn̄ fo asana. Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄  kpasụk ntre.”’ Jesus ama ọdọhọ mmọ ẹsiben̄e Abasi udia usen, ẹdọhọ enye efen idiọkn̄kpọ mmimọ, ẹnyụn̄ ẹsitịn̄ se ededi emi afịnade mmọ ẹnọ Abasi.

Jesus ama ọdọhọ mmọ ete: ‘Ẹkûtre ndibọn̄ akam. Ẹka iso ẹben̄e Jehovah, Ete mbufo, nti n̄kpọ. Mme ete ye eka ẹsima ndinọ nditọ mmọ nti n̄kpọ. Edieke eyen fo eben̄ede fi bred, ndi ọkpọnọ enye itiat? Edieke enye eben̄ede fi iyak, ndi ọkpọnọ enye urukikọt?’

Man ikọ esie an̄wan̄a mmọ, enye ama ọdọhọ ete: ‘Edieke mbufo ẹdiọn̄ọde ndinọ nditọ mbufo nti n̄kpọ, Jehovah emi edide Ete mbufo ayanam se ikande oro, onyụn̄ ọnọ mbufo edisana spirit esie. Ẹkam ẹben̄e enye sia enye iditreke ndinọ mbufo.’ Ndi emesinam item Jesus emi? Nso ye nso ke afo esibọn̄ akam eben̄e?

“Ẹka iso ẹben̄e, ndien ẹyenọ mbufo; ẹka iso ẹyom, ndien mbufo ẹyekụt; ẹka iso ẹkọn̄, ndien ẹyeberede ẹnọ mbufo.”—Matthew 7:7