Esther ekedi eyen Jew. Enye okodụn̄ ke obio Shushan ke Persia. Ediwak isua ke edem, Nebuchadnezzar ama akan Jerusalem onyụn̄ emen mme ete ete esie ọnyọn̄. Mordecai eyen eyeneka ete esie emi ọkọbọkde enye akanam utom ọnọ Edidem Ahasuerus owo Persia.

Edidem oro ama oyom obufa ọbọn̄ an̄wan. Ntre, mme asan̄autom esie ẹma ẹmen Esther ye ndiye iban eken ke ofụri idụt mmọ ẹdi enye ese. Ke otu kpukpru mmọ, Esther ke edidem ekemek ọbọn̄ an̄wan. Mordecai ama ọdọhọ Esther okûdọhọ owo ke idi Jew.

Ọbọn̄ kiet do emi ekekerede Haman ama okpon itie akan mbọn̄ eken, onyụn̄ atan̄ idem etieti. Enye okoyom kpukpru owo ẹtuak ibuot ẹnọ imọ, edi Mordecai ikamaha ndituak. N̄kpọ emi ama ayat enye tutu enye oyom ndiwot Mordecai. Ke ini enye ọdiọn̄ọde ke Mordecai edi Jew, enye ama aduak ndiwot kpukpru mme Jew ke ofụri idụt oro. Enye ama ọkọdọhọ edidem ete: ‘Mme Jew ẹsọn̄ ibuot etieti; ana osobo mmọ.’ Edidem ama ọdọhọ enye anam se enye okụtde ke ọfọn, onyụn̄ ọnọ enye odudu ọbọp ibet. Haman ama ọbọp ibet ete ẹwot kpukpru mme Jew ke ọyọhọ usenọfiọn̄ 13, ke ọfiọn̄ Adar. Edi Jehovah ama okụt kpukpru oro.

Esther ikọdiọn̄ọke se ikade iso. Ntre Mordecai ama ọnọ n̄wed ibet oro ẹsọk enye, onyụn̄ ọdọhọ enye eketịn̄ ikọ ye edidem. Enye ama ọdọhọ ete: ‘Ẹsiwowot owo ekededi emi akade ebịne edidem ke ini edidem mîkotke enye. Usen 30 edi emi enye ikotke mi! Edi nyaka. Edieke enye anyande esan̄ ubọn̄ ọnọ mi, owo idiwotke mi. Edi enye mînyanke, ẹyewot mi.’

Esther ama odụk aka okụre edidem. Edidem ama anyan esan̄ ubọn̄ ọnọ enye ke ini okụtde enye. Esther ama asan̄a  ebịne enye, ndien enye obụp Esther m̀mê enye oyom inam nso inọ enye. Esther ama ọdọhọ ete: ‘Nyom afo ye Haman ẹdi ndia.’ Ke itie ndia oro, Esther ama okot mmọ ndia efen edem usen. Ke ini ndia oro, edidem ama afiak obụp Esther m̀mê inam nso inọ enye. Esther ama ọdọhọ enye ete: ‘Enyene owo emi oyomde ndiwot mi ye mbon nnyịn. Mbọk nyan̄a nnyịn.’ Edidem ama obụp m̀mê anie ke edi. Esther ama ọdọhọ enye ete: ‘Haman ibak emi ke edi.’ Esịt ama ayat edidem etieti, enye onyụn̄ ọdọhọ ẹwot Haman inikiet inikiet.

Edi owo ndomokiet ikekemeke ndikpụhọde ibet Haman oro; edidem n̄ko ikekemeke. Ntre enye ama anam Mordecai okpon itie akan kpukpru mbọn̄ eken onyụn̄ ọnọ enye odudu ọbọp obufa ibet. Mordecai ama ọbọp ibet ete mme Jew ẹn̄wana ye mbon emi ẹdidide en̄wan ye mmọ ke ọyọhọ usenọfiọn̄ 13, ke ọfiọn̄ Adar. Mme Jew ẹma ẹkan mme asua mmọ. Tọn̄ọ ini oro, mme Jew ẹma ẹsidia usọrọ edikan emi ke usenọfiọn̄ oro kpukpru isua.