Be ka se isịnede

Be ka se isịnede

 UKPEPN̄KPỌ 102

Ẹyarade N̄kpọ Ẹnọ John

Ẹyarade N̄kpọ Ẹnọ John

Ini apostle John ekedide owo n̄kpọkọbi ke isuo Patmos, Jesus ama owụt enye se iditịbede ke ini iso ke nsio nsio n̄kukụt 16. Ẹma ẹwụt enye nte ẹdinamde enyịn̄ Jehovah asana, nte ẹdinamde Obio Ubọn̄ esie edi, ye nte ẹdinamde uduak esie ke isọn̄ ukem nte ẹnamde ke heaven.

Ke n̄kukụt kiet, John ama okụt Jehovah etiede ke ebekpo esie emi ọyọhọde ye ubọn̄ ke heaven, onyụn̄ okụt mbiowo 24 emi ẹsịnede mfia ọfọn̄ ẹnyụn̄ ẹyarade anyanya gold, ẹkande ebekpo oro ẹkụk. Enye ama okụt nte emịnen̄mịnen̄ ye obuma asiahade akanade ebekpo oro. Mbiowo 24 oro ẹma ẹnụhọ ke isọn̄ ẹtuak ibuot ẹnọ Jehovah. Ke n̄kukụt en̄wen, John ama okụt akwa otuowo emi ẹtode kpukpru idụt ẹnyụn̄ ẹsemde kpukpru usem nte ẹnamde n̄kpọ Jehovah. Jesus emi edide Eyenerọn̄ Abasi ekpeme mmọ onyụn̄ ada mmọ aka obube mmọn̄ uwem. Enye ama okụt ke n̄kukụt en̄wen nte Jesus ye mbiowo 24 ẹtọn̄ọde ndikara nte ndidem ke heaven. Ke n̄kukụt en̄wen, John ama okụt nte Jesus an̄wanade ekọn̄ ye dragon, emi edide Satan, ye  mme demon. Jesus ama ebịn mmọ osion̄o ke heaven ọduọn̄ọ ke isọn̄.

Ekem John ama okụt Eyenerọn̄ Abasi ye owo 144,000 ẹdade ke Obot Zion. Emi ama eye tutu. Enye ama okụt n̄ko nte angel kiet efede akanade ofụri isọn̄ ọdọhọ mme owo ete ẹbak Abasi ẹnyụn̄ ẹnọ Enye ubọn̄.

N̄kukụt en̄wen emi John okokụtde ekedi eke ekọn̄ Armageddon. Enye ama okụt nte Jesus ye udịmekọn̄ esie ẹsobode idiọk ererimbot Satan emi ẹfep. Akpatre n̄kukụt esie akaban̄a nte ẹnamde kpukpru owo ke enyọn̄ ye ke isọn̄ ẹdiana kiet. Enye ama okụt nte ẹsobode Satan ye ofụri ikọt esie, ye nte kpukpru owo ke enyọn̄ ye isọn̄ ẹkponode enyịn̄ Jehovah ẹnyụn̄ ẹtuakde ibuot ẹnọ Jehovah ikpọn̄.

“Nyesịn usua ke ufọt fo ye n̄wan ye ke ufọt mfri fo ye mfri esie. Enye ayanuak fi ibuot, afo oyonyụn̄ anuak enye nditịn̄ikpat.”—Genesis 3:15