Be ka se isịnede

Be ka se isịnede

 UKPEPN̄KPỌ 69

Gabriel Otobo Mary Etop

Gabriel Otobo Mary Etop

Enyene n̄kaiferi kiet emi ekedide iman Elizabeth. Enye ekekere Mary, okonyụn̄ odụn̄ ke Nazareth ke Galilee. Joseph emi ekedide kapenta okoyom ndidọ enye. Ini idịbi Elizabeth ekedide ọfiọn̄ itiokiet, angel Gabriel ama aka ebịne Mary ọkọdọhọ enye ete: ‘Mary, mmọkọm-o. Afo omokụt mfọn ke iso Jehovah.’ Ikọ Gabriel ikan̄wan̄ake Mary. Gabriel ama ọdọhọ enye ete: ‘Afo oyoyomo onyụn̄ aman eyen erenowo; edisio enye Jesus. Enye edidi Edidem. Ukara esie edidi ke nsinsi nsinsi.’

Mary ama ọdọhọ enye ete: ‘Edi mfiọkke erenowo akanam. Ndinam didie mman eyen?’ Gabriel ama ọdọhọ ete: ‘Idụhe se isọn̄de ikan Jehovah. Edisana spirit oyodoro fi ke idem, oyonyụn̄ aman eyen erenowo. Elizabeth iman fo emi ama ọkọsọn̄, oyomo n̄ko.’ Mary ama ọdọhọ ete: ‘Ndi ofụn an̄wan Jehovah. Akpakam etịbe ntre ọnọ mi.’

 Mary ama ekese Elizabeth ke obio kiet ke n̄kan̄ obot obot. Ke ini enye ọkọmde Elizabeth, eyen emi ekesịnede Elizabeth ke idịbi ama ọfrọ. Edisana spirit ama ọyọhọ Elizabeth idem, enye onyụn̄ ọdọhọ ete: ‘Mary, Jehovah ọdiọn̄ fi. Edi n̄kpọ ukpono eka Ọbọn̄ mi ndidi ufọk mi.’ Mary ama ọdọhọ ete: ‘Mmọkọm Jehovah ke ofụri esịt mi.’ Mary ama odu ye enye ọfiọn̄ ita, ekem afiak ọnyọn̄ Nazareth.

Ke ini Joseph ọkọdiọn̄ọde ke Mary oyomo, enye ikoyomke ndidọ enye aba. Edi angel ama edidọhọ enye ke ndap ete: ‘Kûyak ndịk anam fi ndidọ Mary. Mary inamke idiọkn̄kpọ ndomokiet.’ Ntre Joseph ama emen Mary ọdọ.

“Jehovah amanam kpukpru n̄kpọ oro enye amade ndinam ke enyọn̄ ye ke isọn̄.”—Psalm 135:6