Be ka se isịnede

Be ka se isịnede

 UKPEPN̄KPỌ 86

Jesus Anam Lazarus Eset

Jesus Anam Lazarus Eset

Lazarus ye nditọeka esie iba, Mary ye Martha, ẹkedụn̄ ke Bethany. Mmọ mbita ẹkedi ata ufan Jesus. Usen kiet, ke ini Jesus odude ke Perea, Mary ye Martha ẹma ẹdọn̄ ẹkedọhọ enye ọsọsọp edi ke idem Lazarus ọdiọk etieti. Edi Jesus ikọsọpke ika. Enye ama ayak usen iba ebe, ekem ọdọhọ mme mbet esie ete: ‘Ẹdi ika Bethany. Lazarus ke ede, nyom ndika n̄kedemede enye.’ Mme apostle esie ẹma ẹdọhọ enye ẹte: ‘Ekpedi Lazarus edede, oro ayanam idem ọsọn̄ enye.’ Jesus ama osio ndien etịn̄ ke Lazarus akpa.

Jesus ekedisịm Bethany ke usen inan̄ ama ekebe tọn̄ọ ẹkebụk Lazarus. Mme owo ẹma ẹdi ndidọn̄ Martha ye Mary esịt. Ke ini Martha okopde ke Jesus edisịm, enye ama efehe aka okosobo ye enye onyụn̄ ọdọhọ enye ete: ‘Ọbọn̄, ekpedi ama odu mi, eyeneka mi ikpakakpaha.’ Jesus ama ọdọhọ enye ete: ‘Martha, eyeneka fo eyeset. Ndi emenịm se ntịn̄de?’ Martha ama ọbọrọ ete: ‘Mmenịm ke enye eyeset ke ini ẹdinamde mme akpan̄kpa ẹset.’ Jesus ama ọdọhọ ete: “Ami ndi ediset ye uwem.”

Martha ama ọkọdọhọ Mary ete: ‘Jesus edisịm.’ Mary ama efehe aka ndikụt Jesus, otuowo ẹnyụn̄ ẹtiene enye. Enye ama ọkọduọ Jesus ke ukot atua onyụn̄ ọdọhọ ete: ‘Ọbọn̄, ekpedi ama odu mi, eyeneka mi ikpakakpaha.’ Mbọm esie ama anam Jesus tutu enye etiene atua. Ke ini otuowo ẹkụtde emi, mmọ ẹdọhọ ẹte: ‘Se adan̄a nte enye akamade Lazarus.’ Edi mbon en̄wen ẹdọhọ ẹte: ‘Ntak emi enye mîkanyan̄ake ufan esie?’ Nso ke Jesus edinam idahaoro?

Jesus ama aka udi Lazarus. Ẹkeda akamba itiat ẹberi inua udi oro. Enye ama ọdọhọ ẹkpat itiat oro ẹsio. Edi Martha ama ọdọhọ enye ete: ‘Okpo esie ọmọn̄ etebe sia usen inan̄ edi emi tọn̄ọ ẹkebụk enye.’ Edi ẹma ẹkpat itiat oro ẹsio, Jesus ama onyụn̄ ọbọn̄ akam ete: ‘Ete, sọsọn̄ọ nte okopde akam mi. Mmọfiọk ke emesikop uyo mi kpukpru ini; edi ntịn̄ yak mbon emi  ẹkop man mmọ ẹnịm ke afo okosio mi ọdọn̄.’ Ekem enye ofiori ke ọkpọsọn̄ uyo ete: “Lazarus, wọrọ di!” Lazarus ama ọwọrọ edi ye ọfọn̄ emi ẹkedade ẹwan̄ enye. Ata utịben̄kpọ ekedi oro. Jesus ama ọdọhọ ete: ‘Ẹtat enye yak ọnyọn̄.’

Ediwak mbon emi ẹkekụtde utịben̄kpọ emi ẹma ẹbuọt idem ye Jesus. Edi ndusụk owo ẹma ẹketịn̄ ẹnọ mme Pharisee. Tọn̄ọ ke usen oro, mme Pharisee ẹma ẹyom usụn̄ ndiwot Lazarus ye Jesus. Apostle Jesus emi ekekerede Judas Iscariot ama edịbe aka ebịne mme Pharisee ọkọdọhọ ete: ‘Okụk ifan̄ ke ẹdinọ mi edieke nnamde ẹmụm Jesus?’ Mmọ ẹma ẹdọhọ ke iyọnọ enye mbak silver 30. Ntre Judas ama ọtọn̄ọ oyom usụn̄ ndinam mme Pharisee ẹmụm Jesus.

“Ata Abasi edi Abasi emi anyan̄ade nnyịn; ndien Jehovah kpa Akakan Ọbọn̄ Andikara ọmọfiọk usụn̄ ndinam owo oto n̄kpa ọwọrọ edi.”—Psalm 68:20