•  Sa ki Labib i dir

•  Ki mannyer en vyerz ti kapab ganny en pti baba?

•  Akoz i ti neseser ki en vyerz ki donn nesans Mesi?

•  Eski Mari ti reste vyerz?

•  Eski Mari ti ne san pese, en krwayans ki apel “Imakile Konsepsyon”?

•  Ki mannyer nou devret konsider Mari?

 Labib i dir ki Mari, manman Zezi, ti annan sa gran privilez pour donn nesans Zezi ler i ti ankor vyerz. Labib ti predir sa mirak dan liv Izai e son lakonplisman i ganny trouve dan Levanzil Matye ek Lik.

 Dan en profesi lo nesans Mesi, Izai ti predir: “En zenn fiy i ansent e i pou [ganny] en garson.” (Izai 7:14) Anba gidans lespri sen, dan son Levanzil, Matye ti aplik sa profesi Izai lo Mari. Apre ki i ti’n ekri ki Mari ti’n tonm ansent atraver en mirak, Matye ti dir: “Anfet, tousala ti arive pour akonpli sa ki Zeova ti’n dir atraver son profet: ‘Ekoute! Sa fiy vyerz a pou tonm ansent e i pou ganny en garson ki zot pou apel Emanyel,’ ki ler i ganny tradwir i vedir, ‘Bondye i avek nou.’”​—Matye 1:22, 23.

 Dan son Levanzil, Lik ti osi koz lo ler Mari ti tonm ansent atraver en mirak. I ti ekri ki Bondye ti anvoy lanz Gabriyel “kot Mari en fiy vyerz ki ti’n fiyanse avek Zozef en zonm ki ti en desandans David.” (Lik 1:26, 27) Mari li menm ti dir ki i en vyerz. Apre ki i ti’n konnen ki i ti pou vin manman Mesi, Mari ti demande: “Mon ankor en vyerz, ki mannyer sa pou arive?”​—Lik 1:34.

 Mari ti tonm ansent gras a lespri sen, setadir lafors aktif Bondye. (Matye 1:18) Lanz Gabriyel ti dir Mari: “Lespri sen pou desann lo ou e sa Enn Tre O pou kouver ou avek son pwisans. Se pour sa rezon ki sa enn ki pou ne pou ganny apele sen e Garson Bondye.” b (Lik 1:35) Atraver en mirak, Bondye ti transfer lavi son Garson dan vant Mari e i ti tonm ansent.

 Bondye ti servi en vyerz pour donn nesans Zezi, pour ki Zezi i ganny en lekor parfe pour li kapab sov limanite dan pese ek lanmor. (Zan 3:16; Ebre 10:5) Bondye ti transfer lavi Zezi dan vant Mari. Apre, lespri sen ti protez sa pti baba dan vant Mari ki ti fer li ne konman en imen parfe.​—Lik 1:35.

 Alor, Zezi ti parfe ler i ti ne zis parey Adan ti ete avan i ti fer pese. Labib i dir ki Zezi “pa ti fer okenn pese.” (1 Pyer 2:22) Konman en imen parfe, Zezi ti kapab pey sa ranson pour liber bann imen dan pese ek lanmor.​—1 Korentyen 15:21, 22; 1 Timote 2:5, 6.

 Labib pa dir ki Mari ti reste vyerz tou son lavi. O kontrer, i montre ki Mari ti annan lezot zanfan.​—Matye 12:46; Mark 6:3; Lik 2:7; Zan 7:5.

 Non. New Catholic Encyclopedia i dir ki lansennyman lo Imakile Konsepsyon i en krwayans ki Lavyerz Mari pa’n erit PESE ki bann desandans Adan in erite. Par kont, larestan bann imen in erit pese . . . Me par LAGRAS Bondye, Mari ti ganny proteze pour ki i pa erit pese.” c

 Me napa okenn par dan Labib ki dir ki Mari pa ti erit pese. (Psonm 51:5; Romen 5:12) Anfet, Mari ti montre ki i ti annan pese ler i ti ofer sakrifis ki Lalwa Moiz ti demande pour bann manman ki fek ganny en pti baba. (Levitik 12:2-8; Lik 2:21-24) New Catholic Encyclopedia i dir: “Labib pa vreman koz lo sa lansennyman Imakile Konsepsyon . . . Legliz ki ansenny sa.”

 Mari in kit en bon legzanp akoz i ti obeisan, annan lafwa, limilite e i ti kontan Bondye en kantite. I parmi bann Kretyen fidel ki nou devret imite.​—Ebre 6:12.

 Menm si i ti en gran privilez pour li vin manman Zezi, Labib pa dir ki nou devret ador oubyen priy avek Mari. Zezi pa ti dir ki nou devret onor son manman dan en fason spesyal e i pa ti zanmen demann son bann disip pour fer sa. Anfet, apard sa ki nou lir dan bann levanzil lo Mari e en verse dan liv Akt, Mari pa ganny mansyonnen dan sa larestan 22 liv ki ganny apele Nouvo Testaman.​—Akt 1:14.

 Labib pa dir ki Mari ti ganny okenn latansyon spesyal oubyen menm ganny adore par bann Kretyen dan premye syek. O kontrer, Labib i dir ki bann Kretyen i devret ador zis Bondye.​—Matye 4:10.