Aprann avek Parol Bondye

Ki pou arive Zour Zizman?

Sa lartik i soulev bann kestyon ki petet ou’ n deza demande e i montre kote ou kapab trouv larepons sa bann kestyon dan ou Labib. I pou en plezir pour Temwen Zeova ed ou pour trouv larepons sa bann kestyon.

1. Kwa sa Zour Zizman?

Parey sa portre lo kote drwat i montre, bokou dimoun i krwar ki ler Zour Zizman pou arive nanm bann dimoun pou ganny anmennen devan tronn Bondye pour zot ganny zize pour bann keksoz ki zot in fer dan lepase. Serten pou ganny rekonpanse pour viv dan lesyel, tandis ki lezot pou ganny tourmante dan lanfer. Me Labib i montre ki bi Zour Zizman, se pour sov imen kont lenzistis. (Psonm 96:13) Zezi in ganny apwente konman Ziz par Bondye e i pou reetabli lazistis pour limanite.​—Lir Izai 11:1-5; Akt 17:31.

2. Dan ki fason Zour Zizman pou reetabli lazistis?

Ler Adan ti volonterman rebel kont Bondye, i ti fer tou son desandans vin anba lefe pese, soufrans ek lanmor. (Romen 5:12) Pour koriz sa lenzistis, Zezi pou redonn lavi oubyen resisit plizyer bilyon dimoun. Liv Revelasyon i montre ki sa pou ariv pandan sa mil an kot Zezi Kri pou dirize.​—Lir Revelasyon 20:4, 11, 12.

Bann dimoun ki pou resisite pa pou ganny zize baze lo sa ki zot in fer avan zot ti mor, me dapre sa ki zot fer ler konteni “bann liv” mansyonnen dan Revelasyon sapit 20 i ganny devwale. (Romen 6:7) Zapot Pol ti dir ki “dimoun bon konman move” pou retourn vivan e ganny sa loportinite pour aprann konn Bondye.​—Lir Akt 24:15.

  3. Ki Zour Zizman pou akonpli?

Bann ki’n mor e pa’n ganny sans konn e servi Zeova pou ganny sa loportinite pour sanze e fer sa ki byen. Si zot fer sa, zot “pou resisite pour resevwar lavi.” Me i pou annan serten ki pa pou anvi aprann fason azir Zeova e zot “pou resisite pou ganny kondannen.”​—Lir Zan 5:28, 29; Izai 26:10; 65:20.

Zour Zizman pou dir pour mil an e a lafen sa peryod letan, Zeova pou’n fer bann imen obeisan revin parfe parey o konmansman. (1 Korentyen 15:24-28) Pa sa i en zoli lespwar pour tou bann ki obeisan! Limanite pou pas dan en dernyen tes ler Satan i ganny large kot i pou’n ganny anprizonnen pour mil an. Satan pou esey fer dimoun rezet Zeova ankor, me bann ki detourn zot ledo avek Satan pou rezwir lavi lo later pour touzour.​—Lir Izai 25:8; Revelasyon 20:7-9.

4. Ki lezot zour zizman ki pou anmenn byenfe pour limanite?

Dan Labib sa lekspresyon “zour zizman” i osi refer avek sa levennman ki pou met lafen avek sa move lemonn. Sa zour zizman pou ariv en sel kou parey sa Deliz dan letan Noe, ki ti detrir sa move zenerasyon. Erezman, destriksyon bann “move dimoun” ki pros pour arive, pou anmenn en nouvo sosyete imen “kot pou annan lazistis.”​—Lir 2 Pyer 3:6, 7, 13.

Pour plis lenformasyon, vwar paz 213-215 dan liv Ki Labib i vreman dir? pibliye par Temwen Zeova.

[Portre lo paz 16]

“The Last Judgement,” par Gustave Doré, 1832-1883

[Sorti kot lo paz 16]

Portre grave par Doré