1. (a) Ki serten byenfe nou gannyen ler nou batize? (b) Ki nou pou vwar dan sa lartik?

 ESKI ou’n dedye ou lavi avek Zeova e montre ou dedikasyon par batize? Si ou’n fer sa, sa i vedir ki ou’n demann Bondye pour annan en konsyans kler. (1 Pyer 3:21) Ou’n kit en bon legzanp pour bann zenn ek bann nouvo ki pe asiste renyon alor ou’n fer en bon desizyon. Me ki ou pou fer si ou pa ankor batize? San dout ou kontan Zeova e ou anvi fer son lavolonte. Ou konnen ki batenm i enportan pour ou kapab ganny pardonnen ou pese e pour ganny laprouvasyon Zeova. (Akt 2:38-40) Me kantmenm sa, i kapab ki ou vwar li difisil pour fer sa desizyon pour batize. Kwa ki kapab ed ou? Dan sa lartik, nou pou vwar (1) akoz serten i ezite pour batize, (2) akoz i saz pour gard antet ki lafen lemonn Satan i pros e (3) bann byenfe ki ou pou gannyen si ou pa tarde pour fer zefor pour batize.

AKOZ SERTEN I EZITE POUR BATIZE?

2. Akoz serten i ezite pour batize?

² Serten i ezite pour batize parski zot per. Par egzanp menm si zot anvi servi Zeova, zot per ki zot pa pou zanmen kapab fer li plezir. Si ou santi koumsa, vwar bann verse Labib ki kapab konvenk ou ki Zeova pa ekspekte ki ou parfe e i kontan ki ou donn ou meyer ler ou ador li. (Ps. 103:13, 14; Kol. 3:23) Si ou per ki lezot pou opoz ou, demann Zeova pour ed ou santi parey sa psalmis ki ti dir: “Zeova i dan mon kote, mon pa pou per. Ki dimoun i kapab fer mwan?”—Ps. 118:6.

3. Kwa ankor ki kapab anpes en dimoun batize? (Vwar portre.)

³ Serten ki kontan Zeova i ezite pour batize parski zot krwar ki zot pa konn ase konsernan Zeova ek bann lansennyman ki dan Labib. Me ki kantite ou bezwen konnen?  Annou vwar en legzanp dan Labib. Apre ki i ti’n annan en tranblemandter kot sa prizon kot Pol ek Silas ti ete, zot ti rann temwannyaz avek sa gard prizon ek son fanmir. I tre probab ki sa msye ek son fanmir ti konpran ki Bondye ti’n fer en mirak. Osi, sa zour swar zot ti aprann serten lenformasyon enportan konsernan Zeova ek Zezi alor, zot ti deside pour batize “deswit.” (Akt 16:25-33) Si ou konn Zeova, ou kontan li avek tou ou leker, ou annan en konnesans de baz lo bann lansennyman ki dan Labib, ou’n repantir pour ou bann pese e ou determinen pour kontinyen viv dapre son bann standar, alor, sa i vedir ki ou’n pare pour batize.—Mark 12:30.

4. Ki en lot rezon akoz serten i ezite pour batize? (Vwar portre.)

⁴ Serten ki anvi fer plezir Bondye i krwar ki i pour tro difisil pour fer bann sanzman neseser. Byensir, i saz pour mazin lo lefe ki en desizyon i kapab annan dan ou lavi. (Lik 14:27-30) Me serten i enkyet ler zot mazin bann sakrifis ki zot pou bezwen fer pour zot kapab servi Bondye. I koumsa ki ser ki apel Candace ti santi. I ti konn laverite ler i ti pe grandi me ler i ti adilt i ti ganny ofer en letid Labib. I dir: “Mon konnen ki mon ti devret pe fer pour Zeova me mon ti kontan lafason ki mon ti pe viv menm si mon konnen ki i pa ti pe fer plezir Zeova. Mon ti konnen ki i ti pou difisil pour mwan sanz mon fason viv.” Lezot i enkyet ki apre ki zot in batize, zot pa pou kapab viv dapre bann standar Zeova. Zot enkyet ki apre zot batenm, zot pou fer en pese grav e ganny tire dan kongregasyon. Me ki ou kapab fer si ou osi ou pe enkyet konsernan sa bann keksoz?

5. Ki nou devret reflesir lo la si nou pe ezite pour batize? (Matye 13:44-46)

⁵ Ler nou oule aste en keksoz, nou gete konbyen i pou koute me osi valer sa keksoz. Si sa keksoz i annan plis valer ki son pri, i tre probab nou pou aste sa keksoz deswit. Pareyman, ler nou pe deside si nou pou batize, nou pa devret zis gete ki kantite zefor nou bezwen fer pour kalifye pour batize me nou devret konsantre lo lefet ki en bon relasyon avek Zeova i annan en kantite valer. Zezi ti servi de legzanp pour eksplik sa pwen. (Lir Matye 13:44-46.) Dan sak sa bann legzanp, en zonm ti kontan pour vann tou sa ki i ti  annan pour li aste en keksoz ki i ti’n trouve ki ti annan valer. Ou osi ou’n trouv en keksoz ki annan en kantite valer. Sa i laverite lo Rwayonm. Alor, si ou pa asire ki i vo lapenn fer tou sa zefor pour viv an armoni avek laverite, reflesir lo sa de legzanp Zezi. Ou kapab demann ou lekor: ‘Eski mon asire ki sa ki monn trouve i annan bokou valer? Eski sa relasyon ki mon annan avek Zeova, sa lespwar ek sa fanmir ki i’n donn mwan i annan bokou valer pour mwan?’ Ou larepons pour sa bann kestyon pou ed ou konnen si ou bezwen devlop plis lapresyasyon pour laverite oubyen i pou ed ou vwar kwa ki pe anpes ou met an pratik sa ki ou pe aprann.

6. Kwa ki kapab ed nou pour met an pratik sa ki nou pe aprann?

⁶ Dan sa legzanp en fermye ki ti senm lagrenn, Zezi ti montre ki sa ki dan leker en dimoun i kapab anpes li fer bann progre spirityel. Zezi ti osi dir ki bann ki annan “en leker bon e pir” pou aksepte mesaz Rwayonm dan zot lavi. (Lik 8:5-15) Si ou enkyet parski dan ou leker ou pa tro anvi aplik sa ki ou pe aprann, pa bes lebra. Bondye i kapab ed ou “annan en nouvo leker,” setadir i kapab ed ou pour annan sa bon motivasyon pour ou anvi obeir li. Priy Zeova pour li ed ou kontan sa ki ou pe aprann e pour ou met li an pratik.—Ezek. 18:31, not; 36:26.

7-8. Akoz serten zenn pa arive progrese ziska batenm? (Vwar portre.)

⁷ Serten zenn ki kontan Zeova pa arive progrese ziska batenm akoz lenfliyans lezot. Par egzanp, serten ansenyan kot lekol i kapab demann bann etidyan pour “annan en lespri ouver” konsernan bann standar moral menm si sa bann standar i al kont standar Bondye. Me bann konsey koumsa i kapab fer en dimoun pas dan problenm. (Ps. 1:1, 2; Prov. 7:1-5) Ou kapab evit sa bann problenm si ou swiv sa ki sa psalmis ti dir Zeova: “Mon annan plis bon zizman ki tou mon bann ansenyan, parski mon medit lo ou bann rapel.”—Ps. 119:99.

⁸ I paret ki serten paran Temwen i dekouraz zot zanfan pour batize. Sa bann paran i konsantre tro bokou lo ledikasyon ek karyer ki zot zanfan pou annan oubyen zot pa ed zot zanfan pour annan bann lobzektif spirityel. Ki ou kapab fer si ou santi ki ou pa pe ganny sa led ki ou bezwen pour ou progrese avek ou paran? Akoz ou pa koz avek zot lo sa size? Ou kapab asire ki nenport ki laz ki ou annan, ou kapab annan en bon lanmitye avek Zeova.—Prov. 20:11.

9. Akoz serten i espere pour batize?

⁹ Serten dimoun ki kalifye pour batenm i espere pour batize akoz presyon lezot oubyen akoz zot pe espere pour batiz ansanm avek en dimoun ki zot pros avek. Par egzanp, i kapab ki zot ti pou kontan batiz menm zour avek en zanmi oubyen en dimoun ki zot kontan. Byensir i napa nanryen mal pour batiz menm zour avek en dimoun ki nou kontan. Me eski sa i devret en rezon pour nou pa batize la konmela? Pa oubliye ki dedye ou lavi avek Bondye i en desizyon personnel. Ou batenm pa depan lo sa ki lezot i fer.—Rom. 14:12.

GARD ANTET KI LAFEN SA LEMONN I PROS

10. Akoz serten i tarde pour fer bann progre spirityel?

¹⁰ An plis ki sa bann rezon ki fek ganny mansyonnen, i kapab ki serten i tarde  pour fer progre spirityel akoz zot krwar ki zot ankor annan en kantite letan avan lafen i vini. Eski sa i saz? Zezi ti averti son bann disip: “Met zot pare parski Garson zonm pe vin en ler ki zot pa pe ekspekte.”—Lik 12:40.

11. Dapre Psonm 119:60, ler nou aprann plis lo Zeova, ki sa i motiv nou pour fer e akoz?

¹¹ Nou dedye nou lavi avek Zeova akoz nou kontan li. Pli nou aprann konn nou Bondye, pli nou pou vwar ki kantite i kontan nou. Sa pou fer nou pli kontan son lalwa e nou pou obeir son bann lalwa dek ki nou konpran ki i sanmenm sa ki Bondye i anvi nou fer. (Lir Psonm 119:60.) Disip Zak ti donn en lot rezon enportan akoz nou devret obeir bann lalwa Zeova san tarde: Personn pa konnen sa ki pou ariv li demen. I kapab ki nou napa ni menm en lot zour pour “fer sa ki byen,” alor nou devret fer sa ki Zeova i anvi nou fer la konmela.—Zak 4:13-17.

12. Ki nou kapab aprann avek legzanp ki Zezi ti donnen konsernan plantasyon rezen?

¹² Ki nou aprann avek legzanp ki Zezi ti donnen konsernan plantasyon rezen? Dan sa legzanp, Zezi ti eksplike ki serten ti pou travay pour zis enn erdtan me kantmenm sa, zot ti pou ganny menm lapey avek bann ki ti’n travay en lazournen antye. Me remark rezon akoz serten travayer ti travay zis erdtan e pa pli boner. Zot ti dir: “Parski personn pa’n anploy nou.” Sa bann travayer pa ti pe fer pares me i zis ki personn pa ti’n anploy zot. Me dek ki en dimoun ti demann zot pour vin travay, zot ti ale. (Mat. 20:1-16) Ozordi, Zezi in demann nou pour vin son disip e pour partisip dan sa travay Rwayonm. Alor dek ki nou ganny sa lenvitasyon, nou devret aksepte.

13. Ki nou kapab aprann avek sa ki ti arive avek madanm Lot?

¹³ Serten i deside pour espere avan zot fer bann progre spirityel parski zot krwar ki zot pou kapab fer bann sanzman zis avan lafen i arive. Me pli ou espere, pli i pou difisil pour fer sa bann sanzman. Zezi ti konn sa e i ti averti son bann disip: “Rapel sa ki ti arive avek madanm Lot.” (Lik 17:31-35) Madanm Lot ti konn byen ki Bondye ti pros pour detrir lavil Sodonm ek Gomor. Me i paret ki i ti vwar li difisil pour abandonn bann keksoz ki i  ti’n kit deryer. (Zen. 19:23-26) Sa ki ti arive avek madanm Lot i fer nou rapel ki Zeova in fikse en dele letan pour dimoun kapab fer bann sanzman neseser pour servi li. Ler sa letan i arive, i pou’n tro tar.—Lik 13:24, 25.

14. Ki lefe bann profesi konsernan lafen i devret annan lo ou?

¹⁴ Sak zour ki pase, nou vwar ki bann profesi Labib konsernan lafen sa lemonn pe ganny akonplir. Menm si ou pa pe direkteman ganny afekte par sa bann keksoz ki pe arive, ler ou vwar bann move keksoz ki pe arive dan en landrwa apre lot, sa i devret motiv ou pour progrese ziska batenm san tarde. Annou vwar en legzanp ki ti arive dan premye syek. Zapot Pyer ti ankouraz bann Kretyen pour “reste vizilan” oubyen “alert” akoz “lafen tou keksoz [ti’n] vin pli pros.” (1 Pyer 4:7, not.) I paret ki sa “lafen” ki zapot Pyer ti pe koz lo la ti pe refer avek destriksyon Zerizalenm ek son tanp. Sa let ki Pyer ti ekri ti pour bann dimoun ki reste lwen avek Zerizalenm. Alor zot pa ti pou direkteman ganny afekte avek destriksyon sa lavil. (1 Pyer 1:1) Me ler zot ti pou vwar sa profesi ganny akonplir, sa ti pou fer zot annan konfyans ki tou lezot promes Zeova ti pou ganny akonplir. Pareyman ler ou vwar bann profesi ki annan pour fer avek lafen pe ganny akonplir, sa pou ed ou pour reste vizilan e kontinyen progrese ziska batenm.

15. Ki mannyer nou kapab montre ki nou pare pour zour zizman Zeova? (2 Pyer 3:10-13)

¹⁵ Dan son dezyenm let enspire par Bondye, Pyer ti eksplike ki mannyer nou devret prepar nou pour zour zizman Zeova ki pe vini. Pour bann Kretyen ki ti pe viv dan premye syek, zour Zeova ti pou ariv bokou letan pli tar. Kantmenm sa, Pyer ti demann zot pour “toultan gard antet” zour Zeova setadir kontinyen esper sa zour. (Lir 2 Pyer 3:10-13.) Nou kapab gard antet zour Zeova ler nou pare  e nou vreman anvi ki sa zour i arive. Nou montre ki nou pe vreman esper sa zour ler nou “annan en kondwit sen ek bann aksyon ki demontre ki [nou] annan devosyon pour Bondye.” Zeova pou vreman kontan pour vwar nou pe fer “bann aksyon ki demontre ki [nou] annan devosyon pour [li].” I pou vreman kontan pour vwar ou pe dedye ou lavi avek li e batize.

AKOZ I BYEN POUR BATIZE LA KONMELA?

16. Ki sa pli bon moman pour fer zefor pour batize? (2 Korentyen 6:1, 2) (Vwar portre.)

¹⁶ La i sa pli bon moman pour fer zefor pour batize. (Lir 2 Korentyen 6:1, 2.) Sa o zofisye Etyopyen ki Filip ti rankontre ti konpran ki i ti devret azir deswit. Dek ki i ti konpran sa bon nouvel e i ti ganny loportinite pour batize, i pa ti mazinen: ‘Mon ti pou kontan konn plis lo sa bon nouvel avan. I pou annan ankor lezot landrwa kot i annan delo kot mon pou kapab batize.’ O kontrer i ti demann Filip: “Kwa ki anpes mwan batize?” (Akt 8:26, 27, 35-39) Pa sa i en zoli legzanp! Apre ki sa o zofisye Etyopyen ti’n batize, i ti “kontiny son semen dan lazwa.”

17. Ki ou kapab asire?

¹⁷ Si ou pe ezite pour batize, ou kapab asire ki Zeova i anvi ed ou pour annan en bon lanmitye avek li. (Rom. 2:4) I kapab ed ou pour sirmont lafreyer, lenkyetid oubyen bann move lenfliyans ki anpes ou progrese. Ler ou’n batize e ou’n ganny en konsyans kler devan Bondye, ou pou vwar ki bann keksoz ki ou’n kit “deryer” i nepli enportan pour ou. (Fili. 3:8, 13) Apre sa, ou pou kapab esper avek enpasyans “bann keksoz ki devan” setadir sa letan kot Zeova i akonpli bann promes ki i’n fer avek bann ki’n dedye zot lavi avek li e batize.—Akt 3:19.