Premye let Pyer 3:1-22
3 Dan menm fason, zot bann madanm soumet avek zot msye,+ koumsa si serten pa obeir parol Bondye, san ki zot dir nanryen, zot msye i a kapab ganny persyade pour obeir parol Bondye gras a zot kondwit,+
2 parski zot pou’n vwar ki zot annan en kondwit pir+ ek bokou respe.
3 Fodre pa ki zot labote i zis annan pour fer avek laparans, parey bann stil seve trese, bann bizou annor+ ouswa zoli lenz,
4 me zot labote i devret annan pour fer avek sa ki zot ete anndan dan zot leker, ki pa kapab gate, parey demontre en leta lespri trankil e dous,+ ki annan en gran valer dan lizye Bondye.
5 Parski koumsa ki dan lepase bann madanm sen ki ti annan lespwar dan Bondye ti montre zot labote e zot ti soumet avek zot msye,
6 parey Sara ti obeir Abraam e i ti apel li senyer.+ Zot in vin bann zanfan Sara, a kondisyon ki zot kontinyen fer sa ki byen e ki zot pa les nanryen fer zot per.+
7 Dan menm fason, zot bann msye, kontinyen tret* zot madanm avek konsiderasyon.* Onor zot madanm+ parey zot ti pou pran swen avek en resipyan ki pli frazil, parski zot madanm osi pou ganny lavi avek zot+ gras a labonte ekstraordiner Bondye e pour ki nanryen pa anpes Bondye ekout zot lapriyer.
8 Finalman, zot tou, annan menm fason panse,+ konpran santiman lezot, kontan* kanmarad parey bann frer ek ser, demontre tandres ek konpasyon+ e osi limilite.+
9 Pa rann mal pour mal,+ lensilt pour lensilt,+ me plito, fer dibyen pour zot,*+ parski zot in ganny swazir par Bondye pour beni lezot pour ki Bondye i osi beni zot.
10 Parski, “sa ki kontan lavi e ki anvi viv en lavi ere, i devret veye ki son lalang pa dir sa ki mal+ e ki son labous pa koz manti.
11 I devret aret fer sa ki mal+ e fer sa ki byen.+ I devret rod lape e kontinyen viv anpe.+
12 Parski lizye Zeova* i vey lo bann dimoun ki fer sa ki byen e son zorey i ekout zot siplikasyon,+ me Zeova* i vir ledo avek bann ki fer sa ki mal.”+
13 Vreman, lekel ki pou fer zot ditor si zot devoue pour fer sa ki byen?+
14 Zot ere, menm si zot bezwen soufer akoz ladrwatir.+ Me pa bezwen enkyet ni per sa ki fer lezot dimoun per.*+
15 Me dan zot leker, aksepte Kris konman Senyer e konman sa enn ki sen. Zot devret toultan pare pour defann zot lafwa avek nenport dimoun ki kestyonn zot konsernan sa lespwar ki zot annan, me fer li avek ladouser+ ek bokou respe.+
16 Gard en konsyans kler,+ pour ki ler dimoun i koz an mal lo zot dan nenport ki fason, akoz zot annan en bon kondwit konman bann disip Kris, sa bann dimoun pou onte.+
17 Parski si i lavolonte Bondye ki zot soufer, i pli bon ki zot soufer akoz zot pe fer sa ki byen+ ki akoz zot pe fer sa ki mal.+
18 Kris, en dimoun ki fer sa ki byen* ti mor enn fwa pour tou pour bann dimoun ki fer sa ki mal.+ I ti fer sa pour retir pese+ e gid zot ver Bondye.+ I ti ganny met amor konman en imen+ me i ti reganny lavi konman en lespri.*+
19 Konman en lespri, i ti al anons en mesaz avek bann lanz ki dan prizon,+
20 ki ti’n dezobeir Bondye dan letan Noe.+ Dan sa letan, Bondye ti pe esper avek pasyans, pandan ki lars ti pe ganny konstri.+ Dan sa lars, en ptigin dimoun, setadir wit zot* ti ganny anmennen sen e sof lo delo.+
21 Batenm i parey e i pe sov zot. Batenm pa vedir tir salte lo lekor, me i vedir demann Bondye pour annan en konsyans kler,+ gras a rezireksyon Zezi Kri.
22 I dan kote drwat Bondye,+ parski i’n al dan lesyel e bann lanz, lotorite ek pouvwar in soumet anba li.+
Bann not
^ Oubyen “viv avek.”
^ Oubyen “dapre konnesans,” “kontinyen konpran zot.”
^ Oubyen “annan lafeksyon pour.”
^ Oubyen “beni zot.”
^ Vwar Lezot lenformasyon A5.
^ Vwar Lezot lenformasyon A5.
^ Oubyen posibleman, “pa per zot bann menas.”
^ Oubyen “i ti reganny lavi pour viv dan lesyel.”
^ Oubyen “en zonm drwat.”
^ Literalman, “nanm.”
