Kadaghan hisgoti sa Kristohanon Gregong Kasulatan ang Romanong senturyon. Kana ang ranggo sa opisyal sa kasundalohan nga nagdumala sa pagpatay kang Jesus. Ranggo sab kana ni Cornelio, ang unang Hentil nga nahimong Kristohanon. Senturyon sab ang opisyal nga nagdumala sa paglapdos kang apostol Pablo, ug mao man sab si Julio nga miuban kang Pablo ngadto sa Roma.—Marcos 15:39; Buhat 10:1, 22:25; 27:1.

Ang senturyon sagad komandante sa 50 ngadto sa 100 ka sundalo. Lakip sa iyang responsabilidad ang pagbansay ug pagdisiplina sa iyang mga sakop, pagsusi sa ilang uniporme ug hinagiban, ug paghatag nilag instruksiyon panahon sa gubat.

Ang senturyon mao ang kinatas-ang ranggo nga mahuptan sa ordinaryong sundalo. Ang hatagan niini nga trabaho maoy permanenteng sundalo nga maayong lider. Nagdepende niya ang pagkadisiplinado ug pagkahanas sa Romanong mga sundalo. Sumala sa usa ka reperensiya, ang senturyon “ang labing eksperyensiyado ug kinadaghanag nahibaloan diha sa kasundalohan.”

Dili sama sa salamin karon nga mabuak, ang mga salamin kaniadto hinimo sa sinaw kaayong metal nga sagad bronse, pero posible sab nga tumbaga, plata, bulawan, o sinubong. Sa Bibliya, unang nahisgotan ang salamin panahon sa pagtukod sa tabernakulo, ang unang sentro sa pagsimba sa Israel. Ang mga babaye naghatag ug mga salamin aron mahimo ang sagradong dulang nga tumbaga ug ang tungtonganan niini. (Exodo 38:8) Lagmit ang mga salamin tunawon alang niana.

Kasagaran, ang mga salamin nga nakubkoban sa mga arkeologo diha sa Israel ug sa palibot niini dunay kaubang alahas ug ubang pangdayandayan sa mga babaye. Sagad kana nga mga salamin lingin, nga nindot ang mga kaptanan nga gama sa kahoy, metal, o ivory ug gipormang lawas sa babaye. Ang likod sa salamin nga dili sinaw wala ra panindota.

Ang karaang mga salamin hanap kon itandi sa mga salamin karon. Tingali kini ang rason kon nganong si apostol Pablo miingon: “Sa pagkakaron kita nagpakakita sa hanap nga dagway pinaagig metal nga salamin.”—1 Corinto 13:12.