Usa ka Importanteng Pakigsabot

AKO may usa ka importante kaayong pakigsabot. Usa ko ka batan-ong inahan nga Katsila, ug akong isaysay kon nganong nahimo ko kana.

Walay kalinaw ug pagsinabtanay ang panimalay sa akong mga ginikanan. Hilabihan ang kaguol sa among pamilya sa dihang namatay ang kuwatro-anyos nga manghod kong lalaki tungod sa aksidente. Dugang pa, wala kaayo magmalipayon ang akong inahan sa iyang kaminyoon tungod sa daotang mga bisyo sa akong amahan. Bisan pa niana, ako ug ang akong magulang nga lalaki gitudloan sa among inahan ug mga prinsipyo bahin sa moral.

Ngadtongadto, naminyo ang akong magulang nga lalaki, dayon ako. Wala madugay human niadto, ang akong inahan nadayagnos nga may kanser nga maoy iyang gikamatyan. Apan iya kaming gibinlan ug bahandi sa wala pa siya mamatay.

Giestoryahan siya sa usa niya ka kaila bahin sa Kasulatanhong paglaom sa pagkabanhaw, ug iyang gidawat ang gitanyag nga pagtuon sa Bibliya. Tungod sa mensahe sa paglaom nga anaa sa Bibliya, siya nagtinguhang mabuhi pa ug natabangan nga magmalipayon sa ulahing yugto sa iyang kinabuhi.

Sa nakita namo ang maayong epekto sa mensahe sa Bibliya diha kaniya, ako ug ang akong magulang nga lalaki misugod usab pagtuon sa Pulong sa Diyos. Ako nabawtismohan ingong Saksi ni Jehova usa ka bulan una matawo ang ikaduha kong anak, usa ka matahom nga batang babaye nga ginganlan namog Lucía.

Hinungdanon kaayo kanako ang adlaw sa akong bawtismo. Usa ka katarongan mao nga ako gipanag-iya na ni Jehova, kay ako nang gipahinungod ang akong kaugalingon sa pag-alagad kaniya hangtod sa kahangtoran. Ang laing katarongan mao nga ikapaambit ko na ang akong pagtuo sa minahal kong anak nga lalaki ug babaye.

Nabalda lang hinuon kanang ikaduhang katarongan sa akong kalipay. Pag-edad ni Lucía ug kuwatro, siya misugod sa pagbatig grabeng sakit sa tiyan. Human sa ubay-ubayng pagsusi, gipatin-aw sa radiologist nga may samag kahil kadako nga tumor nga mitapot sa iyang atay. Gisaysay sa doktor nga siya may neuroblastoma, usa ka kusog-motubo nga kanserosong tumor. Kadto ang sinugdanan sa pito ka tuig nga pagpakigbisog ni Lucía batok sa kanser, lakip ang tagdugay nga pag-estar sa ospital.

Nagasakripisyo-sa-Kaugalingon nga Espiritu

Sulod nianang lisod nga mga katuigan, ako kanunayng gipalig-on ni Lucía pinaagig mabinationg mga gakos ug mga halok. Nakadayeg usab ang mga kawani sa ospital kon giunsa niya pagsagubang ang iyang sakit. Siya gustong motabang kanunay sa mga nars sa paghatod ug yogurt, juice, ug uban pang butang ngadto sa mga batang pasyente sa duol nga mga kuwarto. Ang mga nars mihatag pa gani kang Lucía ug puting dyaket ug lapel badge nga nagpaila kaniya ingong “tig-ayuda sa nars.”

“Natandog gayod ni Lucía ang akong kasingkasing,” nahinumdom ang usa ka kawani sa ospital. “Siya aktibo, mamugnaon, ug hilig modrowing. Siya bibo ug hamtong gayod ug linihokan.”

Ang Pulong sa Diyos nakapalig-on ug nakapakalma kang Lucía. (Heb. 4:12) Kombinsido siya nga sa bag-ong kalibotan, “ang kamatayon mawala na, ni may pagbangotan ni pagtiyabaw ni may kasakit pa,” sumala sa gisaad sa Pulong sa Diyos. (Pin. 21:4) Kay interesado man siya sa ubang mga tawo, siya andam kanunayng mopaambit sa mensahe sa Bibliya. Ang lig-ong paglaom ni Lucía sa pagkabanhaw mao ang nakatabang kaniya nga magpabiling lig-on ug mangayaon bisan pag gamay kaayo ang posibilidad nga siya maulian. (Isa. 25:8) Kana ang iyang tinamdan hangtod siya namatay.

 Kadto mao ang adlaw nga ako may importante kaayong pakigsabot. Halos dili na mabuka ang mga mata ni Lucía. Ang usa niya ka kamot gikuptan sa iyang amahan ug ako ang nagkupot sa pikas. “Ayawg kabalaka, di ti ka biyaan,” ako siyang gihunghongan. “Hinaya ang imong pagginhawa. Inigmata nimo, maayo na kag lawas. Dili na ka sakitan, ug magkauban na unya ta.”

Kinahanglang tumanon ko ang maong pakigsabot. Nasayod ko nga dili sayon ang paghulat sa pagkabanhaw. Apan nasayod sab ko nga kon ako magpailob ug mosalig kang Jehova samtang magpabilin akong matinumanon kaniya, tua unya ko didto sa dihang banhawon na siya.

Kabilin ni Lucía

Ang panig-ingnan ni Lucía sa kalig-on ug ang talagsaong tabang sa kongregasyon, dulot nga nakapatandog sa akong bana, nga niadto dili pa Saksi ni Jehova. Sa adlaw nga namatay si Lucía, giingnan ko niya nga kinahanglan siyang mamalandong. Paglabay sa pipila ka semana, mihangyo siya sa usa ka ansiyano sa kongregasyon nga dumalahan siyag pagtuon sa Bibliya. Sa wala madugay, misugod na ang akong bana sa pagtambong sa tanang tigom. Mihunong siya sa pagpanigarilyo sa tabang ni Jehova, nga wala gayod niya mahimo kanhi.

Wala pa bug-os mahanaw ang akong kaguol tungod sa pagkamatay ni Lucía, apan ako mapasalamaton gayod kang Jehova tungod sa iyang kabilin. Ako ug ang akong bana naghupayay sa usag usa pinaagi sa talagsaong paglaom sa pagkabanhaw, nga among handurawon ang panahong makita na usab namo si Lucía—ang iyang magilakon ug lingin nga mga mata ug ang mga kandiis sa dihang siya mopahiyom.

Ang mapait nga kaagi sa akong anak nga si Lucía nakapatandog usab sa usa ka babaye sa silinganan. Samtang nag-ulan usa niana ka buntag sa Sabado, usa ka babaye kansang anak lalaki eskolmet ni Lucía miduaw sa among balay. Ang iyang laing anak lalaki, nga niadto 11 anyos, namatay sa samang sakit. Sa pagkahibalo niya sa nahitabo kang Lucía, siya nangita ug miduaw kanamo. Gusto niyang masayran kon giunsa ko pagsagubang ang pagkamatay ni Lucía ug siya misugyot nga magporma kamig organisasyon nga maghupay sa ubang mga inahan nga may samang kasinatian.

Akong gisaysay kaniya nga ako mibati nag tinuod nga kahupayan tungod sa usa ka saad sa Bibliya, nga labaw pa gayod kay sa bisan unsa nga ikatanyag sa mga tawo. Migilak ang iyang mga mata samtang akong gibasa kaniya ang mga pulong ni Jesus nga nasulat sa Juan 5:28, 29. Siya midawat ug pagtuon sa Bibliya ug sa wala madugay iyang gibati “ang kalinaw sa Diyos nga labaw sa tanang panghunahuna.” (Filip. 4:7) Samtang magtuon sa Bibliya, kasagarang mohunong mi ug maghanduraw nga tua na kami sa bag-ong kalibotan, nga nagsugat sa among nabanhaw nang mga minahal.

Sa tinuoray, adunay kabilin nga molungtad hangtod sa kahangtoran ang mubong kinabuhi ni Lucía. Tungod sa iyang pagtuo, ang among pamilya nagkahiusa diha sa pag-alagad sa Diyos ug ako nahimong mas determinado nga magpabiling lig-on sa pagtuo. Sa walay duhaduha, kitang tanan nga namatyag mga minahal nga mahimong pagabanhawon may importante kaayong pakigsabot.

[Hulagway sa panid 20]

Paraiso nga gidrowing ni Lucía