Nahinumdom Ka Ba?

Gipabilhan mo ba ang imong nabasahan sa bag-ong mga gula sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

• Unsa ang upat ka paagi nga gipadapat sa Kristohanon Gregong Kasulatan ang pulong “kongregasyon”?

Ang unang paagi mao nga gipadapat kini sa grupo sa dinihogang mga Kristohanon (si Kristo gilakip diha sa pipila ka teksto). Ang ikaduhang paagi mao nga ang “kongregasyon sa Diyos” gipadapat ngadto sa tanang Kristohanon nga nagkinabuhi sa usa ka tinong panahon. Ang ikatulong kapadapatan maoy sa tanang Kristohanon diha sa usa ka dapit. Ug ang ikaupat gipadapat ngadto sa mga tawo nga naglangkob sa usa ra ka lokal nga kongregasyon.—4/15, panid 21-3.

• Kanus-a natapos ang pagpanawag sa mga Kristohanon nga may langitnong paglaom?

Ang Bibliya wala maghatag ug tinong tubag. Ang maong pagpanawag nagsugod sa 33 K.P. ug nagpadayon hangtod sa modernong mga panahon. Tapos sa 1935, ang paghimog mga tinun-an gisentro sa pagpanigom sa dakong panon. Ang pipila nga nabawtismohan tapos sa 1935 gipamatud-an sa balaang espiritu nga sila may langitnong paglaom, mao nga dili kita makahatag ug espesipikong petsa kon kanus-a natapos ang maong pagpanawag. Kadtong tinuod nga mga dinihogan wala makabaton ug mas daghang balaang espiritu sa Diyos kay sa ilang kaubang ubang mga karnero, ug wala usab sila magdahom ug linaing pagtagad. Bisag unsa pay ilang paglaom, ang mga Kristohanon kinahanglang magmatinumanon ug padayong magbuhat sa kabubut-on sa Diyos.—5/1, panid 30-1.

• Sa dihang nanaad si Jepte, andam ba siyang mohalad sa iyang anak nga babaye ingong halad-nga-sinunog ngadto sa Diyos?

Dili. Ang gipasabot ni Jepte mao nga ang tawo nga mosugat kaniya iyang ipahinungod ngadto lamang sa pag-alagad sa Diyos, nga usa ka kahikayan sa Moisesnong Balaod. (1 Samuel 2:22) Sa pagtuman sa panaad sa iyang amahan, ang anak nga babaye ni Jepte padayong nag-alagad sa tabernakulo, nga usa ka dakong sakripisyo tungod kay nagkahulogan man kini nga dili gayod siya magminyo.—5/15, panid 9-10.

• Sa unsang paagi ang codex nahimong bahin sa Kristiyanidad sa unang mga siglo niini?

Lagmit nga ang mga Kristohanon naggamit gayod ug linukot nga basahon hangtod sa kataposan sa unang siglo K.P. Sa ikaduhang siglo, may panagbangi ang mga tigpaluyo sa codex ug ang sa linukot nga basahon. Nagtuo ang mga eksperto nga tungod sa paggamit sa mga Kristohanon sa codex, kini kaylap nga gidawat.—6/1, panid 14-15.

• Unsa ang Kalendaryong Gezer?

Kini maoy gamayng papan sa anapog nga nadiskobrehan niadtong 1908 didto sa siyudad sa Gezer. Daghan ang nagtuo nga usa ka batang estudyante ang nagsulat sa maong papan ingong bahin sa leksiyon sa tunghaan. Ang papan naghubit ug pinayanong bersiyon sa usa ka tuig nga yugto sa pagpanguma sugod sa pagpangani sa bulan nga katumbas sa Septiyembre/Oktubre, ug kini naghisgot ug lainlaing mga abot sa uma ug mga kalihokan sa pagpanguma.—6/15, panid 8.

• Unsay kahulogan sa pagkasala batok sa balaang espiritu?

Posible nga makasala batok sa balaang espiritu ni Jehova, usa ka sala nga dili mapasaylo. (Mateo 12:31) Ang Diyos maoy magtino kon kita ba nakahimog sala nga dili mapasaylo, ug siya makakuha sa iyang espiritu gikan kanato. (Salmo 51:11) Kon kita naguol pag-ayo bahin sa usa ka sala, lagmit gayod nga kita sinserong naghinulsol ug mao nga wala kita makasala batok sa espiritu.—7/15, panid 16-17.

• Sanglit si Haring Saul nakaila na man kang David sa miagi, nganong nangutana man siya kon kang kinsang anak si David? (1 Samuel 16:22; 17:58)

Si Saul dili lamang interesado nga masayod sa ngalan sa amahan ni David. Kay nakakita man si Saul sa dakong pagtuo ug kaisog ni David nga bag-o pang nakapildi kang Goliat, buot mahibaloan ni Saul kon unsang matanga sa tawo ang nagmatuto sa maong batan-on. Lagmit si Saul naghunahuna nga idugang sa iyang kasundalohan si Jese o ang ubang membro sa iyang pamilya.—8/1, panid 31.