Ang mga Tigpaluyo sa Matuod nga Pagsimba—Kaniadto ug Karon

NAHINUMDOM ka ba sa ngalan sa tawo nga mihilak tungod sa karaang siyudad sa Jerusalem? ‘Si Jesus,’ moingon ka tingali—ug, sa pagkatinuod, gihimo kana ni Jesus. (Lucas 19:28, 41) Hinunoa, mga siglo sa wala pa si Jesus mabuhi dinhi sa yuta, may lain pang matinumanong alagad sa Diyos nga mihilak usab tungod sa Jerusalem. Ang iyang ngalan mao si Nehemias.—Nehemias 1:3, 4.

Unsay nakapasubo pag-ayo kang Nehemias nga iya mang gihilakan ang Jerusalem? Unsay iyang gibuhat alang sa kaayohan sa siyudad ug sa mga molupyo niini? Ug unsay atong makat-onan gikan sa iyang panig-ingnan? Aron matubag kana, atong sublion ang pipila ka hitabo sa iyang adlaw.

Usa ka Tawong Mabination ug Andam Molihok

Si Nehemias gitudlo nga gobernador sa Jerusalem, apan una pa niana, siya maoy usa ka taas-ug-ranggo nga opisyal diha sa palasyo sa Persia sa siyudad sa Susan. Bisan pa niana, ang iyang haruhay nga pagkinabuhi wala magpamenos sa iyang kahingawa alang sa kaayohan sa iyang mga igsoong Hudiyo didto sa halayong Jerusalem. Gani, ang unang butang nga iyang gihimo sa dihang mibisita sa Susan ang usa ka delegasyon sa mga Hudiyo gikan sa Jerusalem mao ang ‘pagpangutana kanila bahin sa mga Hudiyo, kadtong mga nakaikyas, nga nahibilin gikan sa pagkabinihag, ug usab bahin sa Jerusalem.’ (Nehemias 1:2)

 Sa dihang mitubag ang mga bisita nga ang katawhan sa Jerusalem “anaa sa daotan kaayong kahimtang” ug ang paril sa siyudad “nalumpag,” si Nehemias “milingkod ug mihilak ug nagbangotan sulod sa daghang adlaw.” Human niana iyang gipahayag ang iyang kasubo pinaagi sa kinasingkasing nga pag-ampo ngadto kang Jehova. (Nehemias 1:3-11) Nganong naguol man pag-ayo si Nehemias? Tungod kay ang Jerusalem mao ang sentro sa pagsimba kang Jehova dinhi sa yuta, ug kini gipasagdan. (1 Hari 11:36) Gawas pa, ang alaot nga kahimtang sa siyudad nagbanaag sa dili maayong espirituwal nga kahimtang sa mga molupyo niini.—Nehemias 1:6, 7.

Ang kahingawa ni Nehemias alang sa Jerusalem ug ang iyang kaluoy alang sa mga Hudiyo nga nagpuyo didto mao ang nagtukmod kaniya sa pagtabang. Sa dihang gitugotan siya sa hari sa Persia nga mopalta sa iyang mga katungdanan, si Nehemias misugod sa pagplano sa taas nga biyahe paingon sa Jerusalem. (Nehemias 2:5, 6) Buot niyang ihatag ang iyang kusog, panahon, ug mga kahanas aron sa pagpaluyo sa gikinahanglang buluhaton sa pag-ayo. Sulod sa pipila ka adlaw human sa iyang pag-abot, naandam na niya ang plano alang sa pag-ayo sa enterong paril sa Jerusalem.—Nehemias 2:11-18.

Gibahinbahin ni Nehemias ang dakong tahas sa pag-ayo sa paril taliwala sa mga pamilya, nga ang tanan nagtambayayongay. a Kapin sa 40 ka lainlaing grupo ang giasayn sa pag-ayo sa usa ka “sinukod nga bahin” kada usa. Ang resulta? Tungod kay daghan kaayo ang mga trabahante—lakip na sa mga ginikanan nga giubanan sa ilang mga anak—nga naghatag sa ilang panahon ug kusog, ang morag lisod kaayong tahas nahimo ra. (Nehemias 3:11, 12, 19, 20) Sulod sa duha ka bulan nga way-hunong nga trabaho, ang enterong paril naayo! Si Nehemias misulat nga bisan kadtong misupak sa pag-ayo nga buluhaton napugos sa pag-ila nga “kining buhata nahimo gumikan sa among Diyos.”—Nehemias 6:15, 16.

Usa ka Panig-ingnan nga Angayng Hinumdoman

Si Nehemias mihatag ug labaw pa kay sa iyang panahon ug organisasyonal nga katakos. Gigamit usab niya ang iyang materyal nga kahinguhaan sa pagsuportar sa matuod nga pagsimba. Iyang gigamit ang kaugalingon niyang salapi sa pagpalit pag-usab sa iyang mga igsoong Hudiyo gikan sa pagkaulipon. Nagpahulam siya ug salapi nga walay tanto. Wala gayod niya ‘pabug-ati’ ang mga Hudiyo pinaagi sa pagpangayog rasyon ingong gobernador, butang nga takos niyang pangayoon. Hinunoa, ang iyang balay kanunayng bukas aron sa pagpakaon sa “usa ka gatos ug kalim-an ka tawo, ug kadtong mga nanganhi kanamo gikan sa kanasoran sa palibot namo.” Kada adlaw mag-andam siyag “usa ka torong baka, unom ka piniling mga karnero ug mga langgam” alang sa iyang mga bisita. Dugang pa, kas-a sa kada napulo ka adlaw iyang idalit kanila nga “dagaya ang tanang matang sa bino”—iyang gasto tanan.—Nehemias 5:8, 10, 14-18.

Pagkatalagsaong panig-ingnan sa pagkamahinatagon ang gipakita ni Nehemias alang sa tanang alagad sa Diyos kaniadto ug karon! Kining maisogong alagad sa Diyos kinabubut-ong migamit sa iyang materyal nga kahinguhaan sa pagtabang sa mga trabahante aron sa pagpalambo sa matuod nga pagsimba. Haom siyang makahangyo kang Jehova: “Hinumdomi . . . Oh Diyos ko, alang sa kaayohan, ang tanan nga gibuhat ko alang niini nga katawhan.” (Nehemias 5:19) Tinong buhaton gayod kana ni Jehova.—Hebreohanon 6:10.

Gisundog ang Panig-ingnan ni Nehemias Karong Adlawa

Makapadasig nga makita ang katawhan ni Jehova karong adlawa nga nagpasundayag ug susamang mainiton nga pagbati, pagkaandam molihok, ug nagasakripisyo-sa-kaugalingon nga tinamdan alang sa matuod nga pagsimba. Kon makabalita kita nga ang atong mga isigkamagsisimba nag-antos sa mga kalisdanan, kita mabalaka pag-ayo sa ilang kahimtang. (Roma 12:15) Sama kang Nehemias, modangop kita kang Jehova diha sa pag-ampo agig pagpaluyo sa atong naglisod nga mga igsoon sa pagtuo, nga mohangyo kaniya: “Palihog, himoang matinagdanon ang imong igdulungog sa pag-ampo sa imong alagad ug sa pag-ampo sa imong mga alagad nga nahimuot sa pagkahadlok sa imong ngalan.”—Nehemias 1:11; Colosas 4:2.

Bisan pa niana, ang atong kabalaka alang sa espirituwal ug pisikal nga kaayohan sa atong Kristohanong mga igsoon ug alang sa pag-uswag sa matuod nga pagsimba wala lamang magtandog sa atong mga pagbati. Magtukmod usab kini kanato sa paglihok. Kadtong kansang mga kahigayonan motugot,  gitukmod sa gugma sa pagbiya sa kaharuhay sa ilang mga balay ug, sama gayod kang Nehemias, mibalhin ngadto sa ubang mga dapit aron sa pagtabang niadtong nanginahanglan. Kay wala mapaluya sa dili kaayo komportableng mga kahimtang sa pagkinabuhi nga mahimong atubangon sa maong mga boluntaryo diha sa pipila ka dapit sa kalibotan, sila nagpaluyo sa pag-uswag sa matuod nga pagsimba didto, nga nag-alagad kauban sa ilang Kristohanong mga igsoon. Dalayegon gayod ang ilang gipakita nga espiritu sa pagsakripisyo sa kaugalingon.

Pagbuhat sa Atong Bahin Diha sa Atong Komunidad

Masabot nga kadaghanan kanato dili makabalhin sa laing dapit. Kita magpaluyo sa matuod nga pagsimba diha sa atong komunidad. Giilustrar usab kana diha sa basahon sa Nehemias. Matikdi ang detalye nga gidugang ni Nehemias bahin sa pipila ka matinumanong mga pamilya nga nakig-ambit sa pagpang-ayo nga buluhaton. Siya misulat: “Si Jedaia nga anak nga lalaki ni Harumap naghimog pagpang-ayo atubangan sa iyang balay . . . si Benjamin ug si Hasub naghimog pagpang-ayo sa atubangan sa ilang balay. Sunod kanila si Azarias nga anak nga lalaki ni Maaseias nga anak nga lalaki ni Ananias naghimog pagpang-ayo duol sa iyang balay.” (Nehemias 3:10, 23, 28-30) Ang maong mga lalaki ug ang ilang mga pamilya dakog natabang sa pagpalambo sa matuod nga pagsimba pinaagi sa pagbuhat sa ilang bahin diha sa pagpang-ayo nga buluhaton sa ilang komunidad.

Karong adlawa, daghan kanato ang nagpaluyo  sa matuod nga pagsimba diha sa atong komunidad sa nagkalainlaing mga paagi. Kita nakig-ambit diha sa mga proyekto sa pagpanukod ug mga Kingdom Hall, paghatag ug mga hinabang panahon sa katalagman ug, labing hinungdanon, sa buluhatong pagsangyaw sa Gingharian. Dugang pa, personal man kitang makapakigbahin sa buluhatong pagpanukod o sa paghatag ug mga hinabang o dili, kitang tanan adunay kinasingkasing nga tinguha sa pagpaluyo sa matuod nga pagsimba pinaagi sa atong materyal nga mga kahinguhaan, sama kang Nehemias nga mahinatagong nagbuhat niini sa iyang adlaw.—Tan-awa ang kahon nga “Mga Kinaiya sa Boluntaryong Pagpanghatag.”

Malisod usahay ang pagpangita sa gikinahanglang pondo nga salapi aron masuportahan ang atong nagakadako nga kalihokan sa pag-imprenta, paghatag ug hinabang, ug daghang uban pang mga serbisyo nga gihimo sa tibuok kalibotan. Apan, hinumdomi nga ang tahas sa pag-ayo sa dakong paril sa Jerusalem morag malisod usab. (Nehemias 4:10) Bisan pa niana, tungod kay ang tahas gibahinbahin man taliwala sa daghang andam nga mga pamilya, nahuman ang buluhaton. Susama usab karong adlawa, makaplagan nato ang daghang kahinguhaan nga gikinahanglan sa pagpalampos sa atong tibuok kalibotang kalihokan kon ang matag usa kanato magpadayon sa pagbuhat sa usa ka bahin sa buluhaton.

Ang kahon nga “Mga Paagi sa Paghatag nga Gipili sa Uban” nagpakita sa pipila ka paagi diin ang buluhaton sa Gingharian masuportahan sa pinansiyal nga paagi. Sa miaging tuig, daghan taliwala sa katawhan sa Diyos ang mihatag sa maong  pagsuportar, ug ang Nagamandong Lawas sa mga Saksi ni Jehova buot mogamit niini nga kahigayonan sa pagpahayag sa ilang halalom nga pagpasalamat sa tanan kansang kasingkasing nagtukmod kanila sa pagpakig-ambit niining boluntaryong pagpanghatag. Labaw sa tanan, gipasalamatan nato si Jehova tungod sa iyang dagayang pagpanalangin sa kinasingkasing nga mga paningkamot sa iyang katawhan sa pagpalambo sa matuod nga pagsimba sa tibuok kalibotan. Oo, kon pamalandongon nato kon sa unsang paagi ang kamot ni Jehova naggiya kanato latas sa katuigan, matukmod kita sa pagpatugbaw sa mga pulong ni Nehemias, kinsa mapasalamatong miingon: ‘Ang kamot sa akong Diyos, kini maayo kanako.’—Nehemias 2:18.

[Footnote]

[Kahon/Mga hulagway sa panid 28, 29]

Mga Paagi sa Paghatag nga Gipili sa Uban

MGA AMOT ALANG SA TIBUOK-KALIBOTANG BULUHATON

Daghan ang naggahin, o nagbadyet, ug salapi nga ilang ihulog diha sa mga kahon sa kontribusyon nga gimarkahan ug “Contributions for the Worldwide Work—Matthew 24:14.”

Matag bulan, ipadala sa mga kongregasyon kining maong salapi ngadto sa tibuok-kalibotang hedkuwarter sa mga Saksi ni Jehova o sa lokal nga sangang buhatan. Ang kinabubut-on nga mga donasyong salapi mahimong ipadala usab nga direkta ngadto sa Treasurer’s Office, Watch Tower Bible and Tract Society of the Philip­pines, P.O. Box 2044, 1060 Manila, o sa sangang buhatan nga nag-alagad sa inyong nasod. Ang alahas o ubang mahalong mga butang mahimong idonar usab. Ang mubong sulat nga nagpahayag nga kana maoy direkta nga gasa angayng ilakip sa maong mga amot.

KONDISYONAL-DONASYON NGA KAHIKAYAN

Ang salapi mahimong idonar ubos sa linaing kahikayan diin, engkaso ang nagdonar dunay personal nga panginahanglan, ang donasyon mahimong ibalik kaniya. Alang sa dugang impormasyon, palihog kontaka ang Treasurer’s Office sa adres nga gitala sa itaas.

PAGPLANO ALANG SA BUHAT SA KALUOY

Dugang pa sa direkta nga mga gasang salapi ug kondisyonal nga mga donasyong salapi, adunay ubang mga paagi sa paghatag aron makabenepisyo ang buluhaton sa Gingharian sa tibuok kalibotan. Kini nag-apil sa:

Insyurans: Ang Watch Tower Society mahimong himoon nga benepisyaryo sa usa ka polisa sa life insurance o sa pagretiro/pensiyon nga programa.

Mga Kuwenta sa Bangko: Ang mga kuwenta sa bangko, mga sertipiko sa deposito, o indibiduwal nga mga kuwenta sa pagretiro mahimong ibutang nga in trust for o himoong payable on death to sa Watch Tower Society, nga nahiuyon sa mga kinahanglanon sa lokal nga bangko.

Stocks and Bonds: Ang mga stock o aksiyones ug mga bond ikadonar ngadto sa Watch Tower Society ingong direkta nga gasa.

Balay ug Yuta: Ang ikabaligya nga balay ug yuta mahimong idonar ngadto sa Watch Tower Society pinaagi kaha sa deretsong paghatag isip gasa o pagreserba sa balay o yuta samtang buhi pa ang nagdonar, kinsa mahimong magpadayon sa pagpuyo diha niana panahon sa iyang pagkinabuhi. Kontaka ang sangang buhatan sa inyong nasod sa dili pa buhatag papeles ang bisan unsang balay o yuta.

Wills and Trusts: Ang propiedad o salapi mahimong ikabilin ngadto sa Watch Tower Society pinaagi sa usa ka legal nga pagkabuhat nga testamento, o ang Watch Tower Society mahimong nganlan nga benepisyaryo sa usa ka trust agreement. Ang trust nga mapanunod sa usa ka relihiyosong organisasyon mahimong adunay pipila ka bentaha sa buluhisan.

Ingon sa gipasabot sa terminong “pagplano alang sa buhat sa kaluoy,” kining mga matanga sa donasyon kasagarang manginahanglan ug pagplano sa bahin sa nagdonar. Aron maabagan ang mga indibiduwal nga nagtinguhang makabenepisyo sa tibuok-kalibotang buluhaton sa mga Saksi ni Jehova pinaagi sa usa ka matang sa pagplano alang sa buhat sa kaluoy, gihimo ang Iningles ug Kinatsila nga brosyur nga nag-ulohang Charitable Planning to Benefit Kingdom Service Worldwide. Gisulat ang brosyur ingong tubag sa daghang pangutana bahin sa mga gasa, wills, ug trusts. Naundan usab kini ug dugang mapuslanong impormasyon sa pagplano bahin sa balay ug yuta, sa pinansiyal, ug sa buhis. Gipahibalo niini ang mga indibiduwal sa nagkalainlaing mga paagi nga himoon ang mga gasa karon o magbilin ug panulondon inigkamatay. Kining brosyura mahimong mabatonan pinaagi sa paghangyo ug kopya nga direkta gikan sa Sangang Buhatan sa mga Saksi ni Jehova.

Human mabasa ang brosyur ug makonsulta ang Sangang Buhatan sa mga Saksi ni Jehova, daghan ang nakaabag sa mga Saksi ni Jehova sa tibuok kalibotan ug, sa samang higayon, nakapadako sa mga benepisyo sa buhis sa pagbuhat sa ingon. Ang Sangang Buhatan sa mga Saksi ni Jehova angay nga pahibaloon ug makadawat ug kopya sa bisan unsang dokumento maylabot sa bisan hain niining mga kahikayana. Kon ikaw interesado sa bisan hain niining mga kahikayan sa pagplano alang sa buhat sa kaluoy, ikaw angayng mokontak sa Sangang Buhatan sa mga Saksi ni Jehova, pinaagi kaha sa sulat o sa telepono, diha sa adres nga gilista sa ubos o sa opisina sa mga Saksi ni Jehova nga nag-alagad sa inyong nasod.

Sangang Buhatan sa Mga Saksi ni Jehova

Watch Tower

186 Roosevelt Avenue, San Francisco del Monte

1105 Quezon City

Telepono: 411-6090

[Kahon sa panid 30]

Mga Kinaiya sa Boluntaryong Pagpanghatag

Diha sa iyang mga sulat ngadto sa mga taga-Corinto, si apostol Pablo naghisgot ug tulo ka talagsaong mga kinaiya sa boluntaryong pagpanghatag. (1) Sa dihang nagsulat bahin sa pagpangolektag salapi, si Pablo nagsugo: “Matag unang adlaw sa semana ang matag usa kaninyo diha sa iyang kaugalingong balay kinahanglang magagahin.” (1 Corinto 16:2a) Busa, ang paghatag kinahanglang planohong daan, ug kinahanglang himoon kini sa sistematikong paagi. (2) Nagsulat usab si Pablo nga ang matag usa angayng maghatag “sumala sa iyang kinitaan.” (1 Corinto 16:2b, New International Version) Sa ato pa, ang usa ka tawo nga buot makig-ambit sa boluntaryong pagpanghatag makahimo niana sumala sa iyang nabatonan. Bisan pag diyutay lang ang kinitaan sa usa ka Kristohanon, ang gamayng kantidad nga iya tingaling iamot pabilhan ni Jehova. (Lucas 21:1-4) (3) Si Pablo misulat pa: “Ipabuhat sa matag usa ang sumala sa iyang gihukom diha sa iyang kasingkasing, dili nga kontragusto o pinugos, kay gihigugma sa Diyos ang malipayong maghahatag.” (2 Corinto 9:7) Ang sinserong mga Kristohanon magahatag gikan sa ilang kasingkasing—nga malipayon.

[Mga hulagway sa panid 26]

Si Nehemias maoy usa ka tawong mabination ug andam molihok

[Mga hulagway sa panid 30]

Ang boluntaryong mga amot nagsuportar sa mga kalihokan sa pag-imprenta, paghatag ug hinabang, pagpanukod ug Kingdom Hall, ug uban pang mapuslanong mga serbisyo sa tibuok kalibotan