Usa ka Tawong Edukado

“INYONG nakita ang iyang pagtawag kaninyo, mga igsoon, nga dili daghang manggialamon sa unodnong paagi ang gitawag, dili daghang makagagahom, dili daghang may hamiling pagkatawo.” (1 Corinto 1:26) Sumala sa gipaila niining mga pulonga, may kapeligrohan ang pagkamatuphan ug kalibotanong kaalam o pagbaton ug taas nga posisyon sa katilingban. Kanang mga butanga mahimong babag sa pagdawat sa usa sa maayong balita.​—Proverbio 16:5; Marcos 10:25.

Bisan pa niana, sa adlaw ni Pablo pipila nga manggialamon sa unodnong paagi midawat sa kamatuoran, ug usa kanila mao si Pablo mismo. Si Pablo, nga edukado kaayo ug morag gikan sa pamilyang ilado, maoy madasigong magwawali sa maayong balita. Sa ingon gipakita niya nga ang mga tawong nabulahan niining kalibotana makaalagad kang Jehova kon ang ilang kasingkasing matarong. Makagamit pa sila sa ilang sekular nga mga katakos diha sa pag-alagad kang Jehova.​—Lucas 16:9.

Usa ka Nitibo sa Tarso

Si Pablo natawo sa Tarso, “usa ka bantogang siyudad,” sumala sa iyang pagbatbat niana sa ulahi. (Buhat 21:39) Lagmit nga didto niya naangkon ang kahibalo sa mga pinulongan​—ilabina ang pagbatid sa Grego—​nga bililhon kaayo sa iyang misyonaryong buluhaton. Ang kinabuhi sa Tarso mahimong nagladlad kang Pablo dili lamang ngadto sa Hudiyohanong mga paagi kondili sa Hentil nga kultura usab, eksperyensiya nga iyang gigamit sa ulahing katuigan ingong apostol ngadto sa kanasoran. Siya nahibalo kon unsaon sa pagpahayag sa kamatuoran sa paagi nga ilang hisabtan. (1 Corinto 9:21) Ingong pananglitan, tagda ang iyang pakigpulong ngadto sa mga taga-Atenas nga gitaho diha sa Buhat kapitulo 17. Didto, sa kahanas gitagik niya ang mga kasayoran sa relihiyon sa taga-Atenas ug bisan ang usa ka kinutlo gikan sa usa sa ilang mga magbabalak ngadto sa iyang presentasyon sa kamatuoran.

 Usa ka Romanong Lungsoranon

Si Pablo may laing kalibotanong bentaha. Siya usa ka Romanong lungsoranon, ug gigamit usab niya kini sa pagpalapnag sa maayong balita. Sa Filipos, siya ug iyang mga kauban gibunalan ug gibilanggo nga walay paghusay. Supak sa balaod ang pagbuhat niini sa usa ka Romanong lungsoranon, ug sa gipaila ni Pablo ang maong kamatuoran sa pagtagad sa mga awtoridad, gitugotan nila siya sa pagpabilin ug pag-alagad sa kongregasyon una pa molakaw paingon sa sunod niyang destinasyon.​—Buhat 16:37-40.

Sa ulahi, sa miatubang kang Gobernador Festo, gipahimuslan ni Pablo ang iyang Romanong pagkalungsoranon sa pag-apelar sa iyang kaso ngadto kang Cesar. Sa ingon, nahimo niya ang pagpanalipod sa maayong balita sa atubangan sa kinalabwang awtoridad sa Romanhong Imperyo.​—Buhat 25:11, 12; Filipos 1:7.

Si Pablo midawat ug pagbansay sa praktikal nga paagi nga sa ulahi napamatud-ang puslanon. Natudloan siya sa pagbuhat ug tolda, lagmit sa iyang amahan. Tungod niini, siya nakabuhi sa iyang kaugalingon diha sa ministeryo sa dihang nihit na ang salapi. (Buhat 18:1-3) Nadawat usab niya ang dakong relihiyosong edukasyon. Siya gimatuto ingong “usa ka Pariseo, usa ka anak sa mga Pariseo.” (Buhat 23:6) Sa pagkatinuod, siya nagtuon sa tiilan ni Gamaliel, usa sa labing bantogan sa Hudiyong mga magtutudlo. (Buhat 22:3) Ang maong edukasyon, tingali sama sa de-kalidad nga edukasyon sa unibersidad karong adlawa, nagpaila nga ang iyang pamilya maoy ilado.

Usa ka Hustong Hunahuna

Ang kagikan ug pagbansay ni Pablo nanaad ug sanag nga kaugmaon sa Hudaismo. Magmalamposon unta kaayo siya diha niana. Ugaling, sa dihang siya midawat kang Jesus ingong Mesiyas, nausob ang mga tumong ni Pablo. Sa misulat ngadto sa mga taga-Filipos, iyang gihisgotan sa daklit ang pipila sa iyang kanhi kalibotanong mga bentaha ug miingon: “Bisan unsang mga butang ang naangkon ko, sila giisip ko nga kapildihan tungod kang Kristo. Aw, kon bahin niana, sa pagkatinuod giisip ko usab ang tanang butang nga kapildihan tungod sa kinalabwang bili sa kahibalo kang Kristo Jesus nga akong Ginoo.”​—Filipos 3:7, 8.

Ang maong edukadong tawo wala molingi nga mapangandoyon sa butang iya untang mabuhat tungod sa iyang kalibotanong edukasyon; ni iyang gigamit ang iyang “dakong kinaadman” sa pagpahingangha sa uban. (Buhat 26:24; 1 Corinto 2:1-4) Hinunoa, sa pagbutang ug bug-os nga pagtuo kang Jehova nga Diyos, iyang gitumong ang iyang nangaging mga palaaboton, nga miingon: “Sa paghikalimot sa mga butang sa luyo ug sa pagpangab-ot sa mga butang sa unahan, ako nagadalagan padulong sa tumong sa ganti sa Diyos nga mao ang pagkatinawag sa itaas pinaagi kang Kristo Jesus.” (Filipos 3:13, 14) Gimahal ni Pablo ang espirituwal nga mga butang.

Bisan pa niana, gigamit ni Pablo ang maong nangaging pagbansay diha sa pag-alagad kang Jehova. Sa miingon siya mahitungod sa mga Hudiyo, “Ako nagapamatuod nga sila adunay kadasig alang sa Diyos,” siya nagsulti gikan sa kaugalingong kasinatian. (Roma 10:2) Ingong usa ka nagatuman nga Pariseo, siya tinong may kadasig alang sa Diyos ug alang sa Kasulatan. Sa pagkahimo ni Pablo nga Kristohanon, ang iyang kadasig natimplahan ug tukmang kahibalo, ug siya nakagamit sa iyang unang edukasyon alang sa matarong nga katuyoan. Pananglitan, sa basahong Hebreohanon gigamit niya ang iyang dakong kahibalo sa Israelinhong kasaysayan ug pagsimba sa templo aron sa pagpasundayag sa pagkalabaw sa Kristohanong sistema.

Karong adlawa ang pipila nga makinaadmanon sa unodnong paagi nagasanong usab sa maayong balita. Ang mga tawo sa tanang matang sa edukasyonal nga mga kuwalipikasyon, ingon man sa tanang matang sa propesyon ug mga kahanas sa pangabuhi, nagdawat sa kamatuoran ug nagagamit sa ilang nangaging pagbansay diha sa pag-alagad kang Jehova. Bisan pa niana, bisan unsa ang ilang sekular nga edukasyon, ang mga Kristohanon dili gayod mahikalimot sa kamatuoran nga ang hinungdanong mga kuwalipikasyon mao ang espirituhanon. Kini sila mao “ang labi pang hinungdanong mga butang” tungod kay sila mahimong moagak kanato ngadto sa kinabuhing walay kataposan.​—Filipos 1:10.