Ang Hunahuna sa Bibliya

Unsay Mahitabo sa Dihang Mamatay ang Tawo?

WALA lalanga sa Diyos ang iyang tawhanong mga anak aron mamatay. (Roma 8:20, 21) Gani, sa dihang naghisgot si Jehova ug kamatayon sa unang higayon ngadto kang Adan, Siya wala maghisgot nga mao gayod kini ang dangatan sa tanang tawo, kondili ingong silot sa pagsupak sa Diyos. (Genesis 2:17) Si Adan nakasabot kon unsa ang kamatayon kay siya lagmit nakakita nag mga mananap nga nangamatay.

Si Adan nakasala, ug bugti niini siya namatay sa edad nga 930 anyos. (Genesis 5:5; Roma 6:23) Tungod sa iyang pagsupak, siya wala na isipa ingong anak sa Diyos. (Deuteronomio 32:5) Ang Bibliya nag-ingon bahin sa mapait nga dulnganan sa tawo: “Ang kamatayon mikaylap sa tanang tawo tungod kay silang tanan nakasala man.”—Roma 5:12.

 Unsay Mahitabo sa Atong Panghunahuna?

Ang Bibliya nag-ingon usab: “Usa ang dangatan sa mga anak sa tawo ug usa ang dangatan sa mananap, ug sila managsama ang dangatan. Ingon nga ang usa mamatay, mao man usab ang lain mamatay; ug silang tanan adunay usa lamang ka espiritu, mao nga dili labaw ang tawo sa mananap, kay ang tanan kakawangan. Ang tanan mangadto sa usa ka dapit. Silang tanan gikan sa abog, ug silang tanan mobalik sa abog.” (Ecclesiastes 3:19, 20) Unsay buot ipasabot nga ang tawo mobalik sa abog?

Ang ekspresyon nga “mobalik sa abog” nagpahinumdom kanato sa giingon sa Diyos ngadto sa unang tawo: “Abog ikaw ug sa abog ikaw mopauli.” (Genesis 3:19) Kini nagpasabot nga ang tawo, sama sa mananap, maoy unodnong linalang. Kita dili mga espiritu nga nagsul-ob ug unodnong lawas. Ang atong panghunahuna mahanaw sa dihang kita mamatay. Kon ang tawo mamatay, ang Bibliya nag-ingon: “Mogula ang iyang kataposang gininhawa, siya mobalik sa abog; ug nianang taknaa ang iyang tanang panghunahuna matapos.”—Salmo 146:4, The New English Bible.

Kon mao, unsa may kahimtang sa patay? Tin-aw kaayo ang tubag sa Pulong sa Diyos: “Ang mga buhi nasayod nga sila mamatay; apan bahin sa mga patay, sila walay nahibaloan nga bisan unsa.” (Ecclesiastes 9:5) Ang kamatayon dili usa ka higala nga moagak kanato sa mas maayong kinabuhi kondili, sumala pa sa Bibliya, kini mao ang “kataposang kaaway,” kay inigkamatay, ang tawo wala nay mahimo. (1 Corinto 15:26; Ecclesiastes 9:10) Nagpasabot ba kini nga wala nay paglaom ang mga patay?

Maayong Balita Bahin sa Kamatayon

Ang milyon-milyong patay mora lag nangatulog nga mahimong pukawon. Kas-a giingnan ni Jesus ang iyang mga tinun-an bahin sa ilang higalang namatay: “Si Lazaro nga atong higala nagpahulay, apan moadto ako didto aron pukawon siya gikan sa pagkatulog.” Sa nagpaingon si Jesus sa lubnganan, iyang nasugatan ang mga tawong nagbangotan. Pag-abot niya sa lubnganan, iya kining gipaablihan ug dayon siya misinggit: “Lazaro, gula ngari!” Ang tawo nga upat ka adlaw nang patay migula. (Juan 11:11-14, 39, 43, 44) Kay nagkadugta na man ang lawas ni Lazaro, gipasundayag ni Jesus nga ang Diyos makahinumdom sa tanang bahin sa tawo—sa iyang kinaiya, sa iyang panumdoman, ug sa iyang panagway. Siya makabuhi kanila pag-usab. Sa laing okasyon si Jesus miingon: “Ang takna nagsingabot nga ang tanan nga anaa sa handomanang mga lubnganan makadungog sa iyang tingog [ni Jesus] ug manggula.”—Juan 5:28, 29.

Dugang pa, ang Bibliya nag-ingon: “Ingong kataposang kaaway, ang kamatayon pagawagtangon.” (1 Corinto 15:26) Wala na gayod unyay mga tawong magbangotan nga moadtog sementeryo sa paglubong sa ilang minahal nga namatay. Ang Bibliya nag-ingon: “Ang kamatayon mawala na.” (Pinadayag 21:4) Dili ka ba mouyon nga makapahupay ang giingon sa Bibliya bahin sa kon unsay mahitabo sa dihang mamatay ang tawo?

NAKAPAMALANDONG KA BA?

◼ Duna bay panimuot ang mga patay?—Ecclesiastes 9:5.

◼ Wala bay paglaom ang tawong namatay?—Juan 5:28, 29.

[Blurb sa panid 29]

“Mogula ang iyang kataposang gininhawa, siya mobalik sa abog; ug nianang taknaa ang iyang tanang panghunahuna matapos.”—Salmo 146:4, “The New English Bible”