Ang Hunahuna sa Bibliya

Ang Diborsiyo ba Mao ang Solusyon?

SA Britanya usa ka ministro ang nag-abiabi niadtong nanambong sa usa ka sagradong rituwal. Sa iyang atubangan nagtindog ang usa ka parisan, kauban sa suod nga mga higala ug mga anak. Usa ba kini ka malipayong kasal? Dili! Kining maong seremonyas maoy pag-ila sa kataposan sa ilang kaminyoon. Oo, ang diborsiyo nahimong komon na kaayo nga ang ubang mga relihiyon nagsagop ug mga seremonyas para sa diborsiyo!

Nagplano ka bang magdiborsiyo? Kon mao, motultol ba gayod sa mas malipayong kinabuhi ang pagtapos sa imong kaminyoon? Aduna bay praktikal nga mga lakang nga imong mahimo aron makab-ot ang kalipay uban sa imong kapikas?

“Sila Mahimong Usa ka Unod”

Sa dihang ang unang tawhanong magtiayon gikasal, ang Diyos miingon nga ang lalaki “kinahanglang moipon sa iyang asawa ug sila mahimong usa ka unod.” (Genesis 2:24) Busa, ang kaminyoon maoy usa ka permanenteng bugkos. Mao nga si Jesus sa ulahi miingon nga ang “pakighilawas” mao lamang ang pasukaranan sa Kasulatanhong diborsiyo nga posibleng maminyo pag-usab.​—Mateo 19:​3-9. a

Kini nagpasiugda nga gikinahanglan ang pagkamaunongon diha sa kaminyoon. Apan komosta kon ang mga problema sa imong kaminyoon seryoso kaayo?

Ang Diborsiyo ba Mao ang Maalamong Dalan?

Si Jesus naghatag ug prinsipyo nga pinaagi niana atong matimbangtimbang ang atong mga lihok  sa dihang siya miingon: “Ang kaalam mapamatud-ang matarong pinaagi sa mga buhat niini.” (Mateo 11:19) Unsay gipakita sa daghan kaayong diborsiyo karon nga walay lig-ong pasukaranan?

“Gipasobrahan ang mga bentaha sa diborsiyo,” miingon ang sosyologo sa University of Chicago nga si Propesora Linda Waite, kinsa maoy nanguna sa tem sa mga eskolar nga nagtuon bahin sa dili-malipayong mga kaminyoon. Sa susama, human mogugol ug 11 ka tuig sa pag-analisar sa mga tubag sa libolibo ka tawo, si Propesor Michael Argyle sa Oxford nakakaplag nga “ang labing dili malipayon sa katilingban mao kadtong nagdiborsiyo o nagbulag.” Nganong ingon man niana?

Bisan tuod ang diborsiyo magwagtang tingali sa pipila ka problema, makapatungha usab kini ug sunodsunod nga makapaguol nga mga hitabo nga basin dili nimo kaayo makontrolar. Sa pagkatinuod, ang panukiduki nagpakita nga ang diborsiyo kasagarang dili makapamenos sa mga simtoma sa depresyon o makapausbaw sa pagtamod sa kaugalingon.

Bisan pag wala nimo mahupti ang “hingpit nga kaminyoon,” ang pag-unong sa imong kapikas adunay mga bentaha. Daghan nga determinadong mihimo niana nakakaplag ug kalipay. Si Propesora Waite nag-ingon: “Daghang problema ang masulbad sa paglabay sa panahon, ug ang mga minyo may tendensiya nga mahimong mas malipayon.” Gani, usa ka pagtuon nagpakita nga duolan sa 8 sa 10 ka tawo nga “wala gayod magmalipayon” sa ilang kaminyoon apan wala magdiborsiyo nakakaplag nga sila “nagmalipayon sa kaminyoon” paglabay sa lima ka tuig. Bisan pag adunay grabeng mga suliran, mas maayo nga ang mga magtiayon dili magdalidali pagdiborsiyo.

Praktikal nga mga Lakang

Kadtong nagplanong magdiborsiyo kinahanglang mangutana sa ilang kaugalingon kon ang ilang mga panahom bahin sa kaminyoon realistikanhon ba. Ang media nagpasiugda sa larawan sa usa ka romantikong relasyon nga mosangko sa usa ka maluho nga kasal ug human niana sila magmalipayon hangtod sa hangtod. Human sa kasal, sa dihang ang taas nga mga panahom dili matuman, ang moresulta nga kahigawad makapatungha ug panagkabingkil. Samtang magkagrabe ang tensiyon, motungha ang situwasyon diin ang kahiubos maoy maghari. Ang gugma molubad ug, ngadtongadto, pulihan kini sa kasuko ug pagdumot. Ilalom sa maong mga sirkumstansiya, ang uban mobati tingali nga ang bugtong kapilian mao ang diborsiyo.​—Proverbio 13:12.

Imbes tugotan ang negatibong mga pagbati nga makaapektar sa imong panglantaw, pakig-uban niadtong nagmaunongon sa ilang kaminyoon. Ang mga Kristohanon giawhag nga “magpadayon sa paghupay sa usag usa.” (1 Tesalonica 5:11) Segurado nga kadtong anaa sa gubot nga mga kaminyoon nagkinahanglan ug pagdasig gikan sa mga isigkamagtutuo.

Ang Pagkahinungdanon sa Diyosnong mga Hiyas

“Isul-ob ninyo ang malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob,” mitambag si apostol Pablo. (Colosas 3:12) Ang diyosnong mga hiyas makapanalipod sa panagtiayon panahon sa magubot nga panahon.

Pananglitan, si Pablo misulat: “Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain.” (Colosas 3:13) Ang sikologo sa University of Michigan nga si Christopher Peterson miingon: “Ang pagpasaylo mao ang hiyas nga nalangkit pag-ayo sa kalipay.”

Ang kalulot, kalumo, ug pagpasaylo motultol sa gugma, “usa ka hingpit nga bugkos sa panaghiusa.” (Colosas 3:14) Sa walay duhaduha, ikaw malipayon nga nahigugma usa niana ka panahon. Mapasig-uli ba nimo ang gugma nga imong gibati kanhi? Bisan unsa tingali ka lisod ang imong mga sirkumstansiya, magmadasigon. Adunay paglaom. Sa pagkatinuod, ang pag-inunongay ug pagpadapat sa mga prinsipyo sa Bibliya mahimong moresulta sa mas dakong kalipay kay sa imong nahunahuna nga posible. Segurado nga ang imong mga paningkamot niining bahina makapalipay kang Jehova nga Diyos, ang Tagmugna sa kaminyoon.​—Proverbio 15:20.

[Footnote]