Ang Pagtambal nga Imong Mapili

SA IYANG libro bahin sa kapuli nga pagtambal, si Dr.  Isadore Rosenfeld nagpasiugda niining puntoha: “Ang bisan unsang paagi sa pagtambal o panagang nga gihimo ngadto sa dili-sistematikong gipili nga grupo sa mga indibiduwal si kinsa gipasaligan nga ‘mosaler’ kana mahimong moresulta nga moarang-arang ang katunga sa mga kaso.”

Kini gitawag nga epektong placebo, nga nagpasabot nga bisan ang usa ka pildorang ginama sa asukar maepektibo kon ang tawo motuo nga kini epektibo. Ang epektong placebo makahuwas sa giisip nga mga simtoma, lakip ang kaul-ol, pagkakasukaon, pagkakapoy, pagkalipong, kahigwaos, ug depresyon. Unsay ginapadayag niining kamatuorana?

Sa usa ka bahin, nagpadayag kini nga ang pagsalig sa bisan unsang pagtambal nga ginadawat sa usa ka tawo sa daghang kaso maoy dakong  hinungdan nga moarang-arang ang panglawas. Sa samang panahon, maalamon nga susihon kon ang usa ka matang sa pagtambal nagatambal sa hinungdan sa sakit ug dili lamang sa mga simtoma. Mahimo kini pinaagi sa pagsukod sa dili-madapigong paagi sa mga epekto sa pagtambal, sama sa mga pagsusi sa laboratoryo ug mga X ray. 

Bisan pa niana, dako pa ang mahimo sa usa ka tawo sa dihang magapilig usa ka matang sa medikal nga pagtambal.

Hinungdanong mga Lakang nga Himoon

Maalamon nga himoon ang pagpanukiduki una modesisyon. Himoa ang pagsukitsukit. Unsang mga resulta ang mahimong dahomon? Unsay mga bentaha, mga kadaot, ug gidahom nga galastohan ug gidugayon sa pagtambal? Pakigsulti sa mga tawong nakasinati o nakaagi na sa gihunahunang pagtambal. Suknaa sila kon nakatabang ba kana. Bisan pa niana, hinumdomi nga ang gisugilon lamang nga ebidensiya mahimong malinglahon.

Ang usa ka matang sa dili naandang terapiya dili maayo kon magpahinabo kini nga langanon sa usa ka tawo ang pagtambal nga may rekord sa kalamposan, bisan pag ang proporsiyon sa kalamposan sa naandang terapiya gamay. Ang ebidensiya bahin sa kadaot nga mahimong mosangpot napadayag sa usa ka taho sa The New England Journal of Medicine. Ang magasin nagbatbat sa paggrabe sa kanser sa duha ka pasyenteng batan-on nga midumili sa naandang mga terapiya samtang nagagamit sa kapuli nga mga pagtambal. Namatay ang usa sa maong mga pasyente.

Ang mga tawo nga may milaygay na o nagpameligro-sa-kinabuhi nga mga sakit maalamon nga mahimong igmat kanunay sa kamatuoran nga sila dali-mabiktimang mga puntirya sa mini nga mga mananambal nga nagpasiugdag malansisong mga terapiya. Pagbantay sa bisan unsang produkto nga mosaad nga makaayo sa nagkadaiyang mga sakit. Usa ka pananglitan sa dili pa dugay naglangkit sa usa ka bag-ong bitamina nga giingong “nakatabang sa paghupay sa tanan gikan sa mga kalisod sa pagginhawa ug pagkaluya ngadto sa nagpameligro-sa-kinabuhi nga mga sakit.” Ang usa ka pagsusi nakadiskobre nga ang “bitamina” maoy asgad lamang nga tubig.

Walay duhaduha nga ang pipila ka matang sa kapuli nga mga terapiya mahimong makatabang sa maayong panglawas. Bisan pa niana, magmatinud-anon sa imong mga pagdahom. Maalamon nga ihatag ang bug-os nga pagtagad sa pagkaog sustansiyadong pagkaon, pagbaton ug igong tulog, pagbaton ug igong ehersisyo, ug pag-amping sa dihang magpilig medikal nga pagtambal.

Natuman ang Tinguha

Dayag, walay tawhanong terapiya ang makapapas sa tanang sakit ug sa moresultang kamatayon. Tungod kay kini napanunod man gikan sa atong orihinal nga ginikanan, ang unang tawo, si Adan. (Job 14:​4; Salmo 51:​5; Roma 5:12) Daghang medikal nga mga pagtambal​—bisan kon unsang matang​—tingali makatabang, apan sila maoy mantinil nga mga lakang lamang nga mahimong makapataas sa kinabuhi ug maghimo niining mas kahimut-anan sulod sa limitadong panahon. Bisan pa niana, adunay tinong tambal sa suliran sa dili-maayong panglawas, ug kana nadiskobrehan na sa minilyon.

Ang maong tambal gitagana na sa atong Maglalalang, si Jehova nga Diyos, ang Dakong Mananambal. Pinaagi sa pagpasundayag ug pagtuo diha kaniya ug pagpahimulos sa nagatabon-sa-sala nga merito sa halad lukat sa iyang Anak, si Jesu-Kristo, ikaw makatagamtam sa hingpit nga panglawas ug kinabuhing walay kataposan diha sa walay-sakit nga kalibotan! (Mateo 20:28) Ang Bibliya nagsaad nga nianang bag-ong kalibotan, “walay molupyo ang moingon: ‘Ako masakiton.’”​—Isaias 33:24.

[Blurb sa panid 12]

Nakaplagan sa minilyon ang bugtong seguradong paglaom sa hingpit nga panglawas