Nakatabang Kini sa Pagluwas sa Iyang Kinabuhi

Ang Disyembre 22, 1999, isyu sa “Pagmata!” nagpadayag sa panghapin nga ulohang “Pagpangidnap​—Kon Nganong Usa ka Tibuok-Yutang Hulga.” Si William Louis Terrell miingon nga kining isyuha sa “Pagmata!” nakatabang sa pagluwas sa iyang kinabuhi.

LAPAS ra gayod ug diyutay sa alas diyes sa buntag sa Biyernes, Marso 10, 2000, si Terrell gikidnap nga tinionan ug pusil ni Joseph C. Palczynski, Jr. gikan sa iyang balay. Ang mga artikulo sa Pagmata!, nga matod ni Terrell kanunay niyang gihinumdoman panahon sa iyang mapait nga kasinatian, naundan sa mosunod nga tambag gikan sa mga eksperto bahin sa kon unsay buhaton sa dihang kidnapon:

“Kooperar; likayi ang kagawiang pagkagahian. Ang mabatokon nga mga bihag sagad makaagom ug kapintasan, ug mas dako ang ilang risgo nga patyon o pilion alang sa pagsilot.

“Ayawg katarantar. Hinumdomi nga ang kadaghanang biktima maluwas ra gikan sa pangidnap.”

“Kon mahimo makigsulti nga ginagmay ug sulayi ang paghimog kontak. Kon makita ka sa mga kidnaper isip indibiduwal, mas lagmit nga dili ka nila dagmalan o patyon.

“Ipahibalo [sa mga kidnaper] ang imong mga panginahanglan sa matinahurong paagi.”

“Ang pagpakiglabot sa usag usa nagsilbing panalipod sa gikidnap, sumala sa gisaysay sa librong Criminal Behavior:  ‘Kon mas magkailhanay ang biktima ug ang kidnaper, mas lagmit nga sila magkaangay sa usag usa. Ang maong panghitabo nagpaila nga human sa usa ka yugto sa panahon ang kidnaper lagmit dili modaot sa bihag.’”

Si William Terrell, kinsa 53 anyos ug usa sa mga Saksi ni Jehova, naghimo sa iyang maarangan sa pagsunod nianang tambaga sa panahon sa duolag 14 ka oras nga pagkabihag niya, nga kadaghanan sa panahon tinionan ug pusil. Ang mapait nga kasinatian nagsugod dayon human manuktok si Palczynski sa pultahan sa balay ni Terrell diha sa balangay duol sa Interstate Highway 95, diin ang sakyanang gikawat ni Palczynski nahutdan ug gasolina.

Sa pagkabati sa kahimtang sa estranghero, gipahayag ni Terrell ang tinguha sa pagtabang kaniya. Si Palczynski nangayo ug usa ka basong tubig ug nga siya idrayb paingon sa Baltimore, Maryland,  T.B.A. Miingon si Terrell nga hikayon niyang may makadrayb kaniya paingon sa siyudad sa Fredericksburg, Virginia, diin siya makasakay ug bus aron makaabot sa iyang dulnganan. Sa pagbalik ni Terrell nga may dalang usa ka basong tubig alang sa estranghero, ang usa ka pusil gition na kaniya. Mimando si Palczynski nga ihatod siya ni Terrell sa sakyanan paingon sa iyang destinasyon.

Pagsunod sa Tambag

Panahon sa pagdrayb ubay sa I-95, gisunod ni Terrell ang mga direksiyon ni Palczynski nga mentinahon ang limite sa katulinon ug dili magdrayb sa paagi nga makakuhag pagtagad nganha kanila. Nga nagpabiling kalmado, nakig-estorya si Terrell sa 31-anyos nga si Palczynski, nga nagpahayag ug tiunayng interes kaniya ingong persona ug sa mga kahimtang nga mitultol sa ilang panagtagbo. Si Palczynski miasoy nga tulo ka adlaw nga miagi siya nakigkita sa iyang trato nga si Tracy, kinsa nakigbulag kaniya. Didto iyang gipusil ug gipatay ang magtiayon nga mga higala ni Tracy ug ang usa ka silingan nga misulay pagbalda sa iyang pagdala kang Tracy uban niya. Sa ulahi si Tracy nakaeskapo.

Sa sunod nga gabii, panahon sa pagsingkamot ni Palczynski nga ilogon ang usa ka sakyanan, ang usa ka dos-anyos nga batang lalaki naigo sa usa sa iyang mga bala, nga nagbuak sa apapangig sa bata. Ang usa ka kotse nga gidrayb ni Jennifer Lyn McDonel naigo usab. Ikasubo, napatay siya sa usa ka bala, ug ang lain nakaigo sa bakanteng lingkoranan sa kotse sa ilang usa ka tuig nga anak. Si Jennifer ug ang iyang bana, si Thomas, nagpaingon sa Kingdom Hall sa mga Saksi ni Jehova, diin silang duha mohatag sa ilang mga bahin sa tigom nianang gabhiona. Si Sarah Francis, ang inahan ni Jennifer, misaysay: “Kadto lamang ang gabii nga wala nila dad-a kadtong bataa sa Kingdom Hall. [Kon nadala pa nila] magbangotan unta kami alang sa duha ka tawo.”

Samtang si Terrell malumong nagpadayon sa pagpakig-estorya sa iyang kidnaper, si Palczynski miingon nga dili gayod niya tuyo nga daoton si bisan kinsa ug nga gihigugma gayod niya si Tracy ug buot nga makauban kaniya. Si Terrell misaysay: “Giingnan ko siya nga dili na siya makausob sa nangagi apan siya makausob sa ugma-damlag, ug gidasig ko siya nga mosurender sa awtoridad. Giingnan ko siya nga duawon nako siya sa prisohan ug tun-an ko siyag Bibliya.” Gitaho sa ulahi nga sukad sa pagkahuman sa hayskul sa 1987, gigugol ni Palczynski ang tibuok niyang kinabuhi gawas lang sa napulo ka bulan, diha sa bilanggoan o sa mga institusyon alang sa buang o diha sa probasyon.

Nga gigamit ang iyang kasinatian ingong dugay nang Kristohanong ansiyano, si Terrell mipadayon sa pagpukaw sa pagkamabination sa batan-ong lalaki nga gubot sa emosyon pinaagi sa paggamit ug tinuod-kinabuhing mga panig-ingnan gikan sa Bibliya. Pananglitan, giasoy niya ang kasinatian sa usa ka buotang tawo, si Haring David sa Israel, kinsa naibog kaayo sa asawa ni Urias, usa sa mga sundalo sa kasundalohan ni David. Sa napamabdosan ni David ang babaye, gihikay niya nga mamatay si Urias sa panggubatan. Sa dihang ang mga sala ni David mataktikanhong gipresentar kaniya, tim-os siyang naghinulsol ug naangkon niya pag-usab ang pabor sa Diyos.​—2 Samuel 11:​2–​12:14.

Naugmad ni Terrell ang maayong relasyon uban sa layas, nga gitawag siya pinaagi sa iyang anggang si Joby. Sa mihunong sila sa usa ka tindahan ug si Terrell gisugo nga mopalit ug pagkaon ug usa ka madaladalang telebisyon, si Palczynski miingon nga siya mopatay ug mas daghang tawo kon mosulay siya sa pagpasidaan kang bisan kinsa. Kay nakaamgo sa dili maayong pangisip sa layas, si Terrell misugot. Sa kadugayan, human sa pagtan-aw sa usa ka sibya bahin sa mga krimen ni Palczynski sa balita sa alas 11, gihalog ni Palczynski si Terrell ug hilom nga nahanaw paingon sa hilit nga dapit sa Baltimore.

Mga usa ka semana sa ulahi, si Palczynski nababoy diha sa usa ka balay diin iyang gihuptan ang mga bihag. Si Terrell, nga gihisgotan sa layas, gipatawag sa pagtabang sa mga pakigsabot. Gikasubo, kini wala molampos, ug niadtong Marso 22, si Palczynski namatay nga gipusil sa mga polis nga miatake sa residensiya. Walay lain nga nasamdan.

Human niadto si Terrell mikuhag mga 600 ka kopya sa isyu sa Pagmata! nga iyang gituohang nakatabang sa pagluwas sa iyang kinabuhi. Iyang gipaambit ang ginatos niini sa uban. Si Terrell mapasalamaton nga iyang gihimong batasan ang pagbasa sa bililhong impormasyon diha sa Pagmata!, ug gibati namo nga ikaw magmapasalamaton usab.

[Hulagway sa panid 26]

Si William Terrell