Lafet blong Ista i no kamaot long Baebol. Sipos yu stadi gud long histri blong Ista, bambae yu kasem save se lafet ya i stanap long wan olfala kastom blong bifo we i blong mekem ol man mo anamol oli gat plante pikinini, mo blong garen i karem plante kakae. Traem tingbaot sam samting ya.

1.   Nem: Buk ya Encyclopædia Britannica, i talem se: “Yumi no save stret se nem ya Ista long Inglis (Easter) i kamaot olsem wanem, be wan pris we nem blong hem Venerable Bede mo we i laef long ol yia 7 handred, i tekem nem ya long woman god blong ol man Briten bifo, we nem blong hem Eostre.” Sam narafala man oli ting se nem ya i kamaot long woman god blong ol man Fonisia, we nem blong hem Astate. Hem i woman god we i mekem olgeta laef samting oli gat plante pikinini. Ol man Babilon oli singaot woman god ya se Ista.

2.   Rabet: Hem i saen blong ol laef samting we oli karem plante pikinini. Saen ya “i kamaot long ol olfala kastom blong Yurop bifo, mo blong ol hiten man long Medel Is taem oli mekem lafet long taem we ol tri oli putum flaoa.”—Encyclopædia Britannica.

3.   Eg: Folem wan buk (Funk & Wagnalls Standard Dictionary of Folklore, Mythology and Legend), taem ol man oli stap lukaotem Ista eg we Ista rabet i karem i kam, hemia “i no wan pleplei blong ol pikinini nomo, be hem i rili wan kastom we i blong mekem se ol laef samting oli karem plante pikinini.” Long sam kantri, ol man oli bilif se Ista eg we oli flasem gud, hem i “save mekem ol man oli hapi, oli gat plante samting, oli gat gudfala helt, mo oli stap sef.”—Traditional Festivals.

4.   Werem niufala klos long Ista: “Bifo, ol man oli ting se sipos yu no werem ol niufala klos long taem blong Ista, hemia i min se yu no gat respek long woman god ya Ista we ol man Skandinavia oli wosipim, mo samting ya i save karem badlak i kam.”—The Giant Book of Superstitions.

5.   Prea long taem we san i girap: Hemia i joen wetem olfala kastom ya we ol man oli stap mekem wosip “blong welkamem san mo bigfala paoa blong hem, we i givimbak niufala laef long ol samting we oli stap gru, long taem ya we dei mo naet i longfala sem mak.”—Celebrations—The Complete Book of American Holidays.

 Buk ya The American Book of Days i tokbaot stamba blong Ista i se: “I klia se taem Jos i jes stat, hem i karem ol olfala hiten kastom i kam long jos, mo i putum wan mining long olgeta blong mekem i laenap wetem Kristin skul.”

 Baebol i givim woning from fasin ya blong wosipim God folem ol kastom we hem i no laekem nating. (Mak 7:6-8) Seken Korin 6:17 i soemaot tok we Jehova i talem i se: “Yufala i mas kamaot long olgeta, yufala i mas stap yufala nomo mo olgeta oli mas stap olgeta nomo, mo yufala i no mas tajem ol samting we oli no klin.” Yes Ista, hem i wan holide blong ol hiten man, taswe olgeta we oli wantem mekem God i glad, oli no mas joen long lafet ya.