Taem yu tingbaot wan man we i stap wari, a maet yu tingbaot wan man we i fraet tumas nao i no moa save mekem wan samting, wan man we i fraet blong girap long moning, o wan man we oltaem hem i tokbaot ol wari blong hem.

 Sam man oli olsem taem oli wari. Be ol man blong mekem risej oli faenemaot se sam narafala—speseli ol man—oli defren. Wan ripot i talem se plante taem, ol man “oli dring alkol o tekem drag blong winim wari blong olgeta, so maet yu ting se problem blong olgeta hemia dring, be rili tingting blong olgeta i trabol from wan samting. Mo tu, ol man we oli wari oli save kam kros isi nomo.”

 I tru, olgeta man oli no sem mak. Be nating se oli soemaot wari blong olgeta long wanem rod, hem i wan problem we i stap kam antap long taem ya we ‘laef i strong tumas mo i had.’ (2 Timoti 3:1) Sipos yu yu stap wari, ?Baebol i save givhan long yu?

 I gat plante gudfala advaes long Baebol we i save givhan long yumi taem yumi wari. Traem tingbaot tri eksampol.

1.  1. “Yufala i no mas wari tumas from ol samting blong tumoro. Ol wari blong tumoro oli blong tumoro. Trabol blong wan dei hem i naf finis blong dei ya.”—Matiu 6:34.

    Mining: Yumi waes taem yumi no wari tumas long samting we i save hapen long fiuja. Plante taem, samting we yumi wari from i no hapen. Samtaem, yumi sek se ol samting oli jenis i kam moa gud.

    Traem hemia: Yu traem tingting bak long wan taem we yu bin ting se wan nogud samting bambae i hapen—be i no kamtru olsem. Taswe i gud yu skelem ol wari blong yu naoia, mo yu traem luk sipos oli save kam wan bigfala problem o nogat.

2.  2. “Wan man i save sapenem fren blong hem, olsem we aean i sapenem aean bakegen.”—Ol Proveb 27:17.

    Mining: Ol narafala oli save halpem yumi blong winim ol wari blong yumi, sipos yumi letem olgeta. Maet oli save givim sam gudfala advaes folem ol samting we i hapen long laef blong olgeta, o oli save givhan long yumi blong luk problem ya long wan narafala wei.

    Traem hemia: Yu traem tingbaot wan man we i save givim gudfala advaes long yu, olsem wan fren we i fesem sem problem olsem yu. Yu save askem long hem wanem i bin givhan long hem.

3.  3. “Yufala i mas lego ol wari blong yufala long hem, from we hem i kea long yufala.”—1 Pita 5:7.

    Mining: God i wari long olgeta we oli stap safa. Hem i wantem se yumi prea long hem mo talemaot ol wari blong yumi long hem.

    Traem hemia: Yu mekem wan lis blong ol samting we oli mekem yu yu wari. Nao yu save prea long God from, yu eksplenem wanwan problem, mo yu askem help blong hem blong yu save winim olgeta.

 Baebol i no givim advaes nomo long saed blong winim wari. Hem i talemaot tu se i no longtaem, ol wari blong yumi bambae oli lus olgeta. ?Olsem wanem samting ya bambae i hapen?

 Kingdom blong God bambae i finisim ol samting we oli mekem yumi wari. (Revelesen 21:4) Aninit long rul blong Kingdom ya, ol memori we yumi gat long ol wari blong yumi, olgeta tu bambae oli lus.—Aesea 65:17.

 Hemia fiuja we “God ya we i givim pis” i wantem givim long yu. (Rom 16:20) Hem i talem se: “Mi mi save gud ol tingting we mi stap tingbaot blong mekem long yufala, hemia tingting blong givim pis, be i no trabol, blong givim wan fiuja mo wan hop long yufala.”—Jeremaea 29:11.