1 Timoti 4:1-16

  • Woning agensem tijing blong ol rabis spirit (1-5)

  • Olsem wanem blong kam wan gudfala man blong wok blong Kraes (6-10)

    • Fasin blong trenem bodi, mo fasin ya blong holemstrong long God (8)

  • Yu mas lukaot gud long ol tok we yu stap tijim ol man long hem (11-16)

4  Be tok ya we i kamaot long spirit blong God i talemaot klia se long fiuja bambae samfala oli lego bilif, from we oli lesin long sam giaman tok we i kamaot long ol spirit,* mo long ol tijing blong ol rabis spirit,  mo long ol giaman tok blong ol man we oli gat tu fes. Ol man ya, tingting blong olgeta i no moa stikim olgeta, olsem se wan aean we i hot i bonem tingting ya, nao mak blong hem nomo i stap.  Olgeta ya bambae oli blokem man blong i no mared, mo oli putum loa se sam kakae i tabu, man i no save kakae. Be God i mekem ol kakae ya, nao olgeta we oli bilif mo oli save gud trutok, oli save talem tangkiu long hem from, mo oli kakae.  Hemia from we olgeta samting we God i mekem oli gud nomo, mo i no gat wan samting we man i save talem se i nogud. Man i save kakae evri samting, sipos hem i prea blong talem tangkiu long God from,  hemia from we prea olsem mo tok blong God i mekem kakae ya i kam klin.  Sipos yu stap talemaot advaes ya long ol brata, bambae yu yu wan gudfala man blong wok blong Kraes Jisas, mo bambae yu fidim tingting blong yu long ol tok we yumi bilif long hem, mo long ol gudfala tijing we yu stap folemgud.  Be yu mas sakemaot ol giaman stori we oli daonem God, olsem ol stori we ol olfala woman oli stap talem. Yu mas trenem yu blong yu kasem mak ya, hemia blong yu holemstrong long God.  Fasin ya blong trenem bodi,* i save givhan long man blong smoltaem nomo. Be fasin ya blong holemstrong long God, i save givhan long man long evri samting, from we hem i save mekem man i kasem olgeta blesing long laef naoia mo long fiuja tu.  Hemia wan tok we yumi save trastem. 10  Yumi putum hop blong yumi finis long God ya we i laef mo i Sevia blong ol defdefren kaen man, be antap moa, blong ol man ya we oli holemstrong long hem. Hemia nao from wanem yumi stap wok had we yumi stap taetem bun blong yumi from. 11  Yu mas gohed blong givim advaes ya long olgeta mo blong tijim olgeta. 12  Yu no mas letem man i luklukdaon long yu from we yu yu yangfala. Be long fes blong ol man we oli holemstrong long God, yu mas soemaot gudfala eksampol long ol toktok blong yu, mo long samting we yu mekem, mo long fasin blong yu blong lavem ol man, mo long bilif blong yu, mo long fasin blong yu blong stap klin. 13  Go kasem taem we bambae mi kamtru, yu mas gohed blong mekem bes blong yu long wok ya blong ridim Baebol long ol man, mo blong givim advaes long ol man,* mo blong tijim olgeta. 14  Yu no mas ting nating long presen ya we God i givim long yu, hemia samting we olgeta profet oli talem blong tokbaot yu taem ol elda oli putum han long yu. 15  Yu mas tingting plante* long ol samting ya, mo yu putum tingting blong yu i stap fulwan long hem, nao olgeta man bambae oli luk klia nomo se yu stap gohed gud. 16  Yu mas lukaot gud long fasin blong yu, mo long ol tok we yu stap tijim ol man long hem. Oltaem yu mas mekem olgeta samting ya. Sipos yu mekem olsem, bambae yu sevem yu, wetem olgeta we oli lesin long yu.

Ol futnot

PT: “ol spirit we oli lidim man i go krangke.”
NT: “Fasin ya blong eksesaes.”
NT: “mo blong leftemap tingting blong ol man.”
NT: “Yu mas tingting dip.”