1 Timoti 2:1-15

  • Prea from ol defdefren kaen man (1-7)

    • Wan God, mo wan man nomo we i stap long medel blong God mo ol man (5)

    • Wan ransom we i stret gud blong pemaot olgeta man (6)

  • Advaes i go long ol man mo woman (8-15)

    • Putum klos we i stret nomo (9, 10)

2  Fas samting we mi wantem talem i olsem: Mi mi askem strong se plis, evriwan i mas prea long God from ol defdefren kaen man, yufala i mas krae long hem blong i givhan long olgeta, mo yufala i mas askem samting long hem long bihaf blong olgeta, mo yufala i mas talem tangkiu long hem from olgeta.  Mo yufala i mas prea from ol king mo ol haeman,* blong yumi save stap gud, yumi gat pis, mo yumi wosipim God long fulhat blong yumi mo yumi tinghevi long hem.  Fasin blong prea olsem i gud tumas, mo God ya we i Sevia blong yumi, i glad long hem.  God ya i wantem se ol defdefren kaen man oli mas kasem laef, mo i wantem we olgeta man oli kasem stret save long trutok.  I gat wan God nomo i stap, mo i gat wan man nomo we i stap long medel blong God mo ol man. Man ya, hemia Kraes Jisas,  we hem i givim hem wan olsem wan ransom* we i stret gud blong pemaot olgeta man.* Ol man bambae oli witnes long samting ya long stret taem blong hem.  Blong soemaot samting ya, God i putumap mi blong mi kam wan man blong prij mo wan aposol, hemia blong mi tijim ol man blong ol narafala neson long fasin blong bilif mo trutok. Tok blong mi i tru, mi no giaman.  Nao mi wantem se long evri ples, ol man oli mas gohed blong stap tabu mo oli leftemap han blong olgeta blong prea, we oli no stap kros mo oli no stap agiu.  Long sem fasin, mi wantem se taem ol woman oli flasem olgeta, oli mas putum ol klos we i stret nomo,* mo oli mas soemaot se oli gat respek mo stret tingting,* mo oli no mas tanem hea blong olgeta long ol stael we i flas tumas mo putum gol mo perel long hem, mo oli no mas werem ol klos we praes blong olgeta i antap tumas. 10  Be oli mas flasem olgeta long fasin we i stret long ol woman we oli stap talem se oli wosipim God. Oli mas mekem ol gudfala wok mo hemia nao i flasemgud olgeta. 11  I gud ol woman oli no toktok taem oli stap lanem samting, mo oli mas putum olgeta oli stap aninit long ol man. 12  Mi mi no givim raet long ol woman blong oli tij mo blong oli bos long ol man. Oli no mas toktok, 13  from we God i mekem Adam fastaem, mo biaen i mekem Iv. 14  Mo tu, i no Adam we Setan i trikim hem, be hem i trikim gud woman ya, nao hem i brekem loa blong God. 15  Be taem ol woman oli karem pikinini, hemia bambae i givhan long olgeta blong oli stap gud, sipos oli gohed blong holem bilif, mo oli gohed blong gat lav, mo oli gohed blong stap tabu, mo oli gohed blong gat stret tingting.*

Ol futnot

NT: “mo olgeta we oli gat paoa blong rul.”
NT: “pei blong pembak wan man.” Yu luk Diksonari.
NT: “pemaot ol defdefren kaen man.”
NT: “klos we i soemaot respek.”
NT: “mo naf blong skelem samting; mo tingbaot tingting blong narafala.”
NT: “mo oli naf blong skelem samting; mo oli tingbaot tingting blong narafala.”