Talinhaga 14:1-35
14 An babaying tunay na madunong pinapasarig an saiyang harong,+Pero an sarong mangmang ginagaba iyan paagi kan saiyang mga kamot.
2 An tawong naglalakaw sa katanusan may pagkatakot ki Jehova,Pero an saro na an mga dalan tuso* naghahamak sa Saiya.
3 An pamakol nin kapalangkawan yaon sa nguso kan mangmang,Pero an mga ngabil kan mga madunong maprotektar sa sainda.
4 Kun mayo nin mga baka malinig an bahugan,Pero an kusog nin torong baka nagtatao nin abundang ani.
5 An mapagtitiwalaan na testigo dai magpuputik,Pero an putikon na testigo nagpuputik sa kada paghangos.+
6 An paratuya naghahanap nin kadunungan asin mayo siyang nakukua,Pero an kaaraman madali sanang makua kan tawong may pakasabot.+
7 Rumayo ka sa tawong mangmang,Huling mayo kang manunumpungan na kaaraman sa mga ngabil niya.+
8 Paagi sa kadunungan, nasasabutan kan tawong alisto an isip an dalan na saiyang linalakawan,Pero an mga mangmang nadadaya* kan saindang kamangmangan.+
9 Pigngingisihan lang kan mga mangmang an pagkakasala,*+Pero sa tahaw kan mga matanos, igwa nin pagigin andam na makipaghusay.*
10 An puso an nakakaaram kan sadiri kaining kapaitan,*Asin mayo nin ibang tawo an puwedeng makihiras sa namamati kaining kaugmahan.
11 An harong kan mga maraot malalaglag,+Pero an tolda kan mga matanos mag-uuswag.
12 Igwa nin dalan na garo baga tama sa paghiling nin sarong tawo,+Pero kagadanan an puro kaiyan.+
13 Dawa nagngingisi, an puso tibaad nakukulgan,Asin an kaugmahan puwedeng sumagkod sa grabeng kamunduan.
14 An saro na may sutil na puso mag-aani kan mga resulta kan mga dalan niya,+Pero an marahay na tawo mag-aani nin balos sa mga ginigibo niya.+
15 An tawong inosente sa buhay* pinapaniwalaan an lambang tataramon,Pero an saro na alisto an isip pinag-iisipan an lambang lakad.+
16 An sarong madunong maingat asin rinarayuan an karatan,Pero an sarong mangmang dai nag-iingat* asin sobra an kumpiyansa.
17 An saro na madaling maanggot minahirong may kamangmangan,+Pero an tawong pinag-iisipan an mga bagay-bagay* kinakaungisan.
18 An mga tawong inosente sa buhay* magmamana nin kamangmangan,Pero an mga alisto an isip nakokoronahan nin kaaraman.+
19 An mga tawong maraot maduruko nanggad sa atubangan kan mga marahay,Asin an mga tampalasan maduruko sa mga trangkahan kan matanos.
20 An tawong pobre ikinakaungis dawa kan saiyang pagtaraid,+Pero dakul an amigo kan mayaman na tawo.+
21 Nagkakasala an saro na naghahamak sa saiyang kapwa,Pero maugma an siisay man na nagpapahiling nin pagkahirak sa mga tawong hamak.+
22 Bako daw na malalagalag an mga nagpapakana nin nakakadanyar na bagay?
Pero mag-aako nin maimbod na pagkamuot asin kaimbudan an mga determinadong gumibo nin marahay.+
23 May pakinabang sa gabos na klase nin pagpapagal,Pero an puro lang taram pasiring sa katikapuhan.+
24 An korona kan mga madunong iyo an kayamanan ninda;Pero an kamangmangan kan mga mangmang kamangmangan sana.+
25 An onestong testigo nagliligtas nin buhay,*Pero an tawong madaya nagpuputik sa kada paghangos.
26 May makusog na kumpiyansa an tawong may pagkatakot ki Jehova,+Asin magigin pailihan iyan para sa mga aki niya.+
27 An pagkaigwa nin pagkatakot ki Jehova burabod nin buhay,Tanganing mairayo an saro sa mga siod nin kagadanan.
28 Kamurawayan nin sarong hadi an dakulon na namamanwaan,+Pero mabagsak an sarong namamahala na mayong mga nasasakupan.
29 An saro na dai tulos naaanggot may hararom na pakasabot,+Pero an daing pasensiya pigpapahiling an kamangmangan niya.+
30 An kalmadong puso nagtataong buhay* sa hawak,Pero an pagkauri* kalapaan sa mga tulang.+
31 An saro na nandadaya sa hamak nang-iinsulto sa saiyang Kaggibo,+Pero an siisay man na nagpapahiling nin pagkahirak sa pobre nagpapamuraway sa Saiya.+
32 An maraot ibabagsak kan sadiring karatan niya,Pero an matanos makakanumpong nin pailihan sa integridad niya.+
33 An kadunungan silensiyo lang na yaon sa puso nin saro na may pakasabot,+Pero gusto kan mga mangmang na ihinahayag iyan.
34 Nagtataong onra sa sarong nasyon an katanusan,+Pero kasusupgan sa sarong banwaan an kasalan.
35 Nauugma an hadi sa sarong lingkod na minahirong may pakasabot,+Pero angguton siya sa saro na minagawi nin makasusupog.+
Mga Nota
^ O “tiko.”
^ O posibleng “nadadaya an iba paagi.”
^ O “pakikipag-areglo.”
^ O “igwa nin marahay na buot.”
^ O “kan kapaitan kan kalag kaini.”
^ O “daing eksperyensiya.”
^ O “an sarong mangmang angguton (agresibo).”
^ O “tawong may kakayahan na mag-isip.”
^ O “daing eksperyensiya.”
^ O “mga kalag.”
^ O “marahay na salud.”
^ O “selos.”
