Tipa gupai nga ani gbia undo ti pasio Yesu na kureko, si naida ani du na idapase kuti motumo tumorii. Gu momu re fu dungu aboro. (Ef. 1:7) Agu aboro Yesu aya tipa yo “gu kura akandoro” aringa gu kpakuto na ki mbiri gu imekakue du pati Ga Gbia Riahe te. (Yo. 10:16) Ono tie, i nagbia undo agbia ti pasio Yesu Kristo na kureko. I namanga gipai re nidu yo na idapase kuti motumo tumori nga ga Yesu gbiati gu wene apai si aye na ni. (Yo. 6:53) Ono agu aboro si aida i ri kpakuto na ki mbiri imekakue nayugo gupai nga i nga papara vovo Ndiko na i na gu maabangirise nga ga zogarago rogo ga Mbori Kindo. Sidu, singia ani nga mbedimbedi aKristano watadu gu kura akandoro, ani dunduko si aida ani du na nyanyaki idapase kuti motumo tumorii tipa ka raka nyeanye kindi. w24.12 13 ¶14, 16

Ti regbo Ga Gbia Riahe, Yesu afu kpakuto zanga agbooro rogoho fu gako amokedi na ki pe gupai fuyo nga si narukuba kpotoko. Fuo gure, ko ki fu imekakue fuyo i mbirihe na ki pe gupai nga si narukuba ‘Kureko nga ga ndika.’ (Mk. 14:​22-25; Rk. 22:20; 1 Kor. 11:24) Gupai ko apehe tipa ndiko na nyanyakipaha gbe. Ko ayambuhe nga “vovo ndika” na kina agu aboro nika zogarago na Yesu rogo gako Kindo du rogo gi vovo ndiko re, angianga aboro dunduko ya. (Eb. 8:​6, 10; 9:15) Agu apai Yesu apehe ti regbo Ga Gbia Riahe adu fu “umba rika aboro” watadu umba avusende. Gi tooni badona re atona na gako ruru amokedi nga aguyo naadu na ko ti gu regbo re. I du Yesu asana yo i ri kpakuto na ki mbiri imekakue rogo gu nyemu re. Si adu nga agu aboro nika da ni papara gi badona re kusa nika ri gu kpakuto re na ki mbiri gu imekakue re a ho i nikaa manga Ga Gbia Riahe ni. I du nga agu aboro nika gbia ba ngbangbaturũ yo na Yesu. w24.12 11 ¶9-10

Boro sa dagba mbembedi abakurea Yesu yo akusi ko. Tifuoho, avurako ki ziko, ki senge ko, na ki kitingbanga ko na agu apai ko aamanganga ha ya. I ape gupai nga Yesu rẽ na kina kpio, na i ki asi ko ti ngbunduru-ngua. Niyangaraha, abanzengere abanga Yesu kuti ngbunduru-ngua ka imo ko. Wa ko aahi gu kere igirã re niruru ko, kura boro kinaho si aimisi ni kisusi. Yekova Mbori du nadu. Yekova aima du na ome gbiati rengba ka rugusa gu rungosiro Wiriko aasusa rogoho, ono ko aamanganga ha wo te. Yekova aima kpinyemu wiriko ni bakerehe gbe, sidu tie, tipagine ko ambuko ti ni ko rungo na ki kpi? Bambiko Yekova ima kpinyemu rani. Ga Yesu motumo nga bakere gopai nayugo gupai nga Yekova ima kpinyemu atita aAdamu na Eva. Si nayugo bakio wai Yekova nakpinyemu ro. Ko afu gu bangisa wiriko ko aima kpinyemuko gbe na ki hi bakere imisiri tipa ka batasa ro. (1 Yo. 4:​9, 10) Ii, ko naida ka undo rani nibasasa ani sovura kuti ingapai—na ki dibehe! w24.08 6 ¶13-14

Ani rengbe ka rugatirani na pa wai Yekova nakpinyemu rani ho ani aberãpa gu gberãrago ni ko adu rogoho ka bi Wiriko ko ni mbu. Satana ape gupai nga, ga Yekova moyambu arengbanga ka nye niruru ni fu Ko ho duhe ni ni kpakarakpakaraha ka mangaha wo te. Tipa gupai nga Yekova yuguhe nga Satana nga iraziree, ko ambu Yesu ko rungo mbata fu ko kpi. (Eyo. 2:​1-5; 1) Yekova abi aboro i ni sawia Yesu, abanzengere kini ta ko, na i ki banga ko kuti ngbunduru ngua. Na Yekova abi Wiriko ko ni kpi ngba kere iigirã gene. (Mt. 27:​28-31, 39) Yekova adu na kina ome beko ka rugusa agi apai re dunduko ti ai regbo. Ni kpiapai, ho aboro ape gupai ni nga: “Ka Mbori kpi nyemu ko ko bátasi ko awere,” ka Yekova aima batasa ko. (Mt. 27:​42, 43) Ono ka ko amangi gupai re, ka Yesu adunga na rengba ka fu unga ko ni motumo te na ka ani dunga na maabangirise a te. Sidu, Yekova ambu Wiriko ko hi rungosiro daho ko akpi ni. w25.01 22 ¶7

Rogo Nisana 16, 33 F.B.K. ga Yesu abawiriki na gberãrago na kini gunde agunde. Aguyo ue guari Yerusarema yo ka ndu ku Emau yo. Agi akumba re na bakere gberãrago bambiko i ima imo Yesu nga gu kumba i anaapeka ko. Kumba gbia abawiriki na i kini ndu na ko gene wa sa. I nape gu kereapai fuko namangi Yesu. Sidu, gi kumba re tona kaa peka agu apai fuyo bangiriyo aarengbanga ka go ti ni ya. Ko nafura tipa Ziazia Kekeapai na sangbaanebi tipa ka saka ndu gupai si aidi Masiya rungo ti ni na ki kpi. Ho i nada ni Emau yo, i ye ka ino gupai nga gi kumba re nga Yesu Mbori nazingisi ko! (Rk. 24:​13-35) Yesu ayugu tiko fu gako abawiriki rogo gu gako yangara arame 40 ko adu auru kpotosende. Yesu angarasi gu gako abawiriki nadu na gberãrago na kini gunde re. Na i aye kadu na ngbarago gbiati wingbaduse ka tungusapai na kini yugu gu wene pangbanga du tipa ga Mbori Kindo. w24.10 12 ¶1-3

Gude ima rengba kaa sona wa regbo nikaa susa, ono boro ho rengbe ka sonosa gani pagume na Yekova zanga ni mangi ome amanga tipa ka sonosaha te. Ni kpiapai, agu awirina naadu Korinda yo aidi wene pangbanga, ki zi bapatiza, ki gbia ziazia toro, na ki wiriki dungu apai ti agu apai gu mokedi nangia Pauro ayuguhe fu yo. (Amo. 18:​8-11) Ono tie, bete agarã kusa tingbafuo zio yo bapatiza, badunguyo aanyakanga kindi rogo toroyo te. (1 Kor. 3:2) Tipa ka nyaka rogo toroyo, ani duwa ka ani sonosi nyemu ka sona rogo toroyo. Agu aboro nakpinyemu ka du ni “azangainahe,” na naida ka nye ni agude rogo toroyo, amanganga sonakumbatayo te. (Snz. 1:22) Ani aidanga kadu wa agu aboro niima sona ono kini ndu kumbatayo kindi kaa kido kuti avunguyo i naamanga adiaberã fuyo te. Kuba gure, gaani sunge du ngaha tipa ka manga sonakumbatayo rogo toroyo. Ka si dunga mo namanga ome kindi ka nyaka rogo toroyo, mo kpari fu Yekova ko “fu nyemupai na ome foro tipa mo mangipai.”—Frp. 2:13. w24.04 4 ¶9-10

Yekova nape pa wai furani du ko ho da ha ni tipa sarangbanga aboro. (Yeze. 33:11) Yekova regerege ka gbarasa boro bara sa kindi te, kinagu ka si du nga ko na wene ndupai beko tipa ka mangaha wo. Ko nga boro nunga, na ko nayugo nunga ti ai gu regbo si aida i yugu nunga ti ni. Ginipai ani nainihe tipa agu aboro i nikaa zingisanga yo be kpio ya? Baibiri fura tipa kina wiri bete akpiapai. Yesu ape gupai nga i azingisanga Yuda Keriota te. (Mk. 14:21; oni bi Yoane 17:12 a.) Yuda aima inopai wenengai na ki mangi gupai naadu kia kuti gupai Yekova Mbori na Wiriko akpinyemuhe. (Oni bi Marako 3:29 na w07 8/1 kpe. 7) Wakina gure a, Yesu aya tipa agu agbia pambori nga aguyo naasoga ko nga i nika kpi zanga gu maabangirise nga ga zingabekpio. (Mt. 23:33) Na gu mokedi nangia Pauro afu zahe nga i azingisanga agu asamungu re te.—Eb. 6:​4-8; 10:29. w24.05 4 ¶10-11

Ho ani anye ni mbembedi na Yekova, Satana arengbanga ka manga gupai rengbe ka imisa rani nyeanye kindi te. (1 Yo. 3:8) Rogo vovo zegino yo, Yekova nikaa ndu kindi kumbatayo kaa banda ruru abakureako angianga kina be gupai rengbe ka gbarasapa yo rogo toro yo ya, ono zavura be kpio a. (Yugo. 21:4) Si ni bakerepa mamu kadu ni gino tii ga Yekova bamburoko yo—ani ima rengba kadu na mbembedi pagume na ko nga gu rengbe ka nyeanye kindi. (Yeze. 37:27) Ginipai si aida ani mangihe ka ani aida kaa ndu kumbatayo kindi kaa du ni gako agino? Ka si du nga i yambu ro kurogo kporo, mo du na nyemu ka ino gupai ka mo mangihe ka sa ngbarago ti gamo irakporo. Wakina gure a, ani na nyemu ka ino gupai Yekova aidaha be agu aboro naida kaa ndu kumbatayo kindi kaa du ni gako agino. Gaani nyemuse tipa Yekova nasarani ani mangi agu apai rengbe ani ka mangaha nga gu ko “akpi nyemu he.” (Koro. 1:10) Si aidanga bangirani go ti gupai nga si naida ani du na dudunguro irisa koyo du ko ni te. Gi ngbatunga dudunguro irisa re nika undo rani ani zanga mangapai gupai rengbe ka ba gberãrago tiko. Ti aregbo duduko, ani na nyemu “ka ta ni umbasitise” na gaani Mbori.—Mika 6:8. w24.06 4 ¶8-9

Yekova asana Abarayama tipa ko fu wiriko nangia Yisaka ni motumo. Gipai re aima fuda Abarayama nikerehe tigaha. Ono ko aima giasangba Yekova. Ho Abarayama aaida ka imo wiriko ni, Mbori arugusi ko. Wa si avura duwo, gu kpiapai re nayugo nyanyakipa rengo fu agu aboro dunduko du na idapase. Yekova aima du na nyemu ka fu bangisa wiriko ko aima kpinyemuko gbe ni motumo. Yekova aima kpinyemu aboro ni bakerehe. (Bam. P. 22:​1-18) Ho Yekova afu Ndiko ni fu aYisaraere, ko ape gupai fuyo nga, si naida i fu motumo tipa wa ka ko mbupai fuyo ti gayo aingapai. (Pa Mot. 4:​27-29; 17:11) Ngbatunga agu amotumo re aayugopa bakere motumo nga gu nika batasa aboro dunduko be ingapai. Mbori ape gupai fu gako anebi nga, i kepai tipa gu tita dee i akidopa ko. I asaki gupai nga bangisa Wiri Mbori nika rungo na i ki imiko tipa ka batasa aboro—kodihe na mo—be ingapai na kpio!—Yes. 53:​1-12. w24.08 4 ¶7-8

Ho mo ageda averesi ni, mo berẽpa wai rengbe mo ka mangapai kutini. Wa mo nikaa geda papara Fugo Mbori, mo sananga tiro nga, ‘Waigu rengbe mi ka mangasunge na gipai re awere watadu barambeda kumbatayo?’ Tipa ka yugo gipai re na kpiapai, mo berẽnga gupai nga mo nageda 1 ATesaroniko 5:​17, 18. Tingbafuo geda mo agu averesi du ue re, mo ima rengba ka ru na ki berẽ tipa bara wai mo naamanga kparakpee na pa wai mo naakusuko kpotoro yo. Na berewe a, mo ima rengba ka berã tipa agu apai du mo na ngbarago tipaha. Si ima rengba kadu nga mo diberã ka tambua Yekova tipa apai biata. Zavura ka mo vura dia kina wiri bete aminiti ka berãkurii agu apai mo nawirikihe rogo Baibiri yo, si nika undo ro mo gi rogo Fugo Mbori yo na ki mangi gupai si apehe. Mo berẽnga gupai nga aˈuru dunduko mo amanga gupai mo agedaha rogo Baibiri yo, vuru bete aregbo yo, mo nika da ni bawene moyambu nga ga Yekova. w24.09 4-5 ¶9-10

Yekova akusi rani ani du na bakere ngbarago ho ani agamahe ni kisusi ho ani agbia he ni. Ani nadu na ngbarago ho du ani ni na rengba ka undo akuarani aidipase. Na ani nadu na ngbarago ho i afu tambuahe ni. Ono ka si vura du vurũ nga gu boro ani naundo ni gasi tambuahe watadu ni agasanga ha te, ani ima rengba kadu na ngbarago nga ani mangi gupai du ni ruruhe. Ka bangiro ya gonga ti gupai nga, ai guhe mo afuhe, “Yekova rengbe ka fu bakere he foro ki susi gure” ya. (2 Peka 25:9) Sidu, mo arengbanga ka fuhe ni bakerehe kisusi Yekova te! Na bakere ngbarago ho rengbe boro ka gbiaha kisusi gu nga Yekova fu mosoro fu ni te. Ani dinga berã adia tie kaa ndu kindi kumbatayo kaa wirika gu sino nga ga gamahe du ti gu Barani du ngbangbaturũ yo. w24.09 31 ¶20-21

Yekova na inapai na nunga. (Tam. 103:13; Yes. 49:15) Ho du ani ni na gberãrago, ko a na gberãrago. (Zek. 2:8) Ko naundo rani ani mbedi na ko na ki da ni abakureako. (Tam. 25:14; Amo. 17:27) Na ko na umbasitise; ‘ko nangana agu ahe du ngbangbaturũ yo na ku auru kpotosende no a. Ko natumba rurungbura boro nvutu yo.’ (Tam. 113:​6, 7) Ani naida ka fu taarimo fu gaani Mbori mbiko agi andu-apai re. Ani nafu taarimo fu Yekova mbiko ani naida kura aboro ini ko. Badungu aboro ainongo gu rengo du tipa Yekova te. Tipagine? Bambiko Satana ima kiso bangiriyo ni gbaraga ko kere aziree tipa Ko. (2 Kor. 4:4) Satana ima sa aboro i idi kuti gupai nga Yekova nga zingizingi Mbori, na ko aberãnga pa rani te, na ko du si aida i birako tipa gu bakere rungo du rogo zegino. Ono ani ima ino gu rengo du tipa gaani Mbori! Ani na gu momu berani nga ga pepa gu ngbatunga Mbori nga ko nzunzu fuyo na ki undo yo i fu taarimo fuko a.—Yes. 43:10. w25.01 3 ¶6-7

Wa vura duhe nga Yesu angia wiri Mbori na ki ngia rengberengbe boro na ki mangi dungu iiriwoapai, Satana amangisunge na kura aboro tipa i gbaragi ziree tipa ko. Ni kpiapai, agbia pambori ape gupai fu aboro nga gu ome Yesu aamangasunge na ni ka danda adaimona aaye vurube “gbia adaimona.” (Mk. 3:22) Ho i aasarangbanga Yesu ni, agbia pambori akitingbanga ko nga ko agberẽ ngbako yo na ki sa rimbasa aboro i pe gupai nga i imi ko. (Mt. 27:20) Kusa, ho apefuo Kristo aatungusa wene pangbanga ni, agu aboro naasoga yo ‘azingisi kpoto aGendiria yo’ tipa i rungosi agu aKristano re. (Amo. 14:​2, 19) Nibipa Amokedi 14:​2, gu Ngbaõbambu Sinziri nangia ga Banduru 1, 1998, ape gupai nga: “Mbiko gupai nga rago angbanga tiyo na kina ká gu pangbanga re gbua te, agu airasogote nangia aYudo re atona ka manga tua nga ga kitangbangase, kini asadi ka zingisa badungu aGendiria kuti aKristano.” Satana nandu kindi kumbatayo kaa pe ziree da ku areme. Areme, ko kindi ‘nga banangi aboro kpotosende no dunduko.’ w24.04 11 ¶15-16

Pa ga boro nyenye unga kumbatayo arunga rii pa gu regbo ni nika kpi ti ni te. Yekova nga rengberengbe Basapungbanga—gako adiaberã ti aregbo dunduko ni ruruhe na ni wenehe. (Tam. 33:​4, 5) Ani ima rengba kadu na gu kido nga, “Basapungbanga zegino dunduko” nika manga gupai nika kadu ni ruruhe. Si re are tie ani idi kuti gupai nga, padu boro na momu ka raka nyeanye kindi arunga riipa gu rago ni araka rogoho te. Yekova asapanga ngbanga amirioni aboro wa “ameme” mbiko gupai nga i naraka rogo agu adagbarago adunga yo na rengba ka wirika wene pangbanga rogoho ya te. (Mt. 25:46) Wangia ko ruru Basapungbanga zegino dunduko, ko naberã payo aberã ni basasa kisusi wai ani aberã payo. Ani ainongo wai Yekova nika mangaapai ti regbo bakere gberãngbi te. Isoke, gupai i nika bihe ti regbo bakere gberãngbi ima rengba ka fõ kpotoyo yo i du na idapase kuti Yekova ho ko nika ziasi rimoko ni auru kpotosende dunduko.—Yeze. 38:16. w24.05 12 ¶14-15

Ga Yekova aboro ima kpinyemu undo akurayo. (2 Kor. 8:4) Ono ti kura aregbo, si naida aida na wingbaduse tipa ka mangaha wo. Ni kpiapai, ho du vura ni, agu abaakumba du rogo gu dagbarago re nabi gupai nga awirinayo naida na ngarasaro, undo, isoke gbiati agu ahe nga ga toro na ga borose. Abaakumba ima kpinyemu awirinayo. Si du nga ndu gupai i afu agu ahe ti ni fuyo du yo na zingoho, zavura ho si naima rengba kadu ni ni kere kpakarakpakaraha ka mangaha wo. Rogo ngbatunga apai wa gure, si naida ani nye ni kodikodi rani. Ani mangipai kuti agu arugapai naye be gu be-basunge du rogo gaani dagbarago. (Eb. 13:17) Si naida abaakumba ninaafugö agu arugapai dedede du tipa wai ka mbakadatise tipa gberãngo na gupai si aida boro mangihe ho du gberãngo ni. (1 Kor. 14: 33, 40) Ani du na wingbaduse ono kidu na rubangirise. (Snz. 22:3) Mo berẽ mbata fu mo mangipai. Mo nibanda tiro wa rengbehe. Mo kido kuti Yekova. Ko ima rengba ka undo ro tipa mo undo awirinamo wenengai. w24.07 4 ¶8; 5 ¶11

Bakindo Davide aini Yekova na kini kido kuti Ko. Ho Bakindo Saura gbiati kura aboro aˈasada ni ka imo Davide, ko akpari fu Yekova tipa undo. Tingbafuo Mbori karagapai kuti ga Davide kparakpee na ki batasi ko, ko aya: “Yekova du ni ungako!” (Tam. 18:46) Ginipai Davide aaida ka pehe? Gu kura buku sa nape gupai nga Davide aanyakasa gupai nga, Yekova nga gu ndikidi Mbori naundo gako amoyambu ti aregbo dunduko. Davide aima ino gupai nga gako Mbori aima ino gupai ko aasusa rogoho na ko adu regerege tipa ka undo ko. Gupai re nangarasi ko tipa ko naandu kumbatayo kindi kaa iriso Yekova na kini tambua ko. (Tam. 18:​28, 29, 49) Pa du ani na gu kido nga Yekova nga unga Mbori ima rengba ka undo rani tipa ani du zaaza ka irisiko. Ani nika du na ome ka hi aasada na kidu na nyemu kaa ndu kindi kumbatayo kaa manga gako sunge nyanyaki. Ani nika diaberã a tipa ka nye mbembedi na Yekova. w24.06 20-21 ¶3-4

Ginipai rengbe ani ka wirikaha ti afugo gu mokedi nangia Pauro fu aTesaroniko? Ho ani agia gupai ni nga gu adunga na ngbanya kuti agu apai ani nawirikihe rogo Baibiri yo ya watadu gu pangbanga du ni iiriwoho, si naida ani mangipai na tatamana. Rogo gu Soviet Union naadu mbata, avurarani afu waraga fu awirina nga gu i aya si aye rogo rii-basunge nga ga zegino. Gu waraga re aangarasa awirina i kusi kura riigbu nga gu naadu kia. Gu waraga re aangera wa ka i ya kina boro rengo du si apehe nzunzu. Ono i ananganga agu awirina naadu ni ruru yo te. I abi gupai nga gupai naadu rogo gu waraga re yo adunga na ngbanya na gupai i awirikihe te. Areme, avura rengo namangasunge ti kura aregbo na ahe wa Internet na aũfugo dagbase ka ye na vunduvundu apai ku dagba rani na ka kparaka rani. Kuba gupai nga ka ‘wó ti gaani berã,’ ani nabanda tirani ni wisigo ani pai sirisiri singia gupai ani agiaha na kini gedihe na ngbanya dagbaha na agu arengo ani awirikihe.—2 Tesa. 2:2; 1 Yo. 4:1. w24.07 12 ¶14-15

Gu nyanyakipa diaberã rengbe boro ka mangaha nga ka diaberã ka kpara gani raka fu Yekova na ki da ni ga Yekova papara aborokporo. Yekova nakpinyemu aboro dunduko mangihe wo. Tipagine? Ko naida i du na wene pabakure na ko na ki raki nye anye kindi. (Pa Rug. 30:​19, 20; Gara. 6:​7, 8) Ono tie, Yekova amanganga aboro ngbaome tipa i irisiko te. Ko nambu gene fu aboro dunduko i diberã tipa gupai i nika mangaha. Ginipai si aida abaakumba mangihe ka si du nga gu Kristano niima zio bapatiza mangi kere ingapai? Ka si dunga ni asanga berã te, si naida i kusi ni kusayo rogo dungurati. (1 Kor. 5:13) Ono ka i vura kusa gu boro re kusayo rogo dungurati, Yekova kindi naida nzunzu gu boro re saberã na kidu na mbembedi pagume na Ko berewe. Ni rengo, gu nyanyakipa ndupai Yekova afu motumo tumorii ti ni nga wa ka ko du na rengba ka mbupai fu agu aboro saberã yo ti gayo aingapai. Yekova nga Mbori nyemuse nazungodi agu aboro mangi kere ingapai tipa i saberã yo.—Zek. 1:3; Rom. 2:4; Yak. 4:8. w24.08 14 ¶1-2

Ti gu regbo gu mokedi nangia Yoane ake gako biata waraga, gu kura aboro aayugo aziree na kini ye na zangagiatise ku rogo dungurati. Ono tie, agu akurayo aandu kindi kumbatayo kaa ‘ta rogo rengo’ yo. I agisangba Yekova na ‘kini ta kuti gako rugute.’ (2 Yo. 4, 6) Gi ruru aKristano re aima sa Yoane gbiati Yekova i du na bakere ngbarago. (Snz. 27:11) Ginipai ani awirikaha? Du ni ruruse naye na ngbarago. (1 Yo. 5:3) Ni kpiapai, ani na ngbarago mbiko ani nasa ngbarago ti Yekova. Yekova na bakere ngbarago ho ani ane manga gupai ni du ni gbegberẽhe na ki gisangba gako arugute. Amaraika ngbangbaturũ yo a nadu na ngbarago. (Rk. 15:10) Ani nadu na ngbarago a ho ani abi awirinarani ni i ninye ni ruruyo. (2 Tesa. 1:4) Na ho i nika gbarasa ga Satana zegino ni, ani nika du na ngbarago nga ani anye ni rururani fu Yekova. w24.11 12 ¶17-18

Bagizo regbo wai rengbe mo ka wisigo boro mbata fu mo pepa gamo nyemupai fu ni? Ka mo fura na boro tipa rogatise ni kina wiri ipo, ni ima rengba ka berã gupai nga mo aberãnga wenengai kuriipai mbata fu mo mangi adiaberã te. (Snz. 29:20) Ono tie, ka gu kura boro re bihe nga mo na nyemupai koyo du ni ni, na mo kini di bakere regbo ka zanga pehe fu ni, ni ima rengba ka berẽ gupai nga mo na bakere kapa mbata fu mo mangi adiaberã. (Batu. 11:4) Mo tingidi gupai nga, mbata fu mo fura na boro tipa rogatise, si aidanga mo du na gu kido nga mo nika dia gu boro re adia te. Ono si naida mo du na gu kido nga mo ima du regerege tipa rogatise na gu boro re ima du ni gu boro mo aberãha nga ni ima rengba kadu ni wene badiarogatise foro. Ginipai tie rengbe mo ka mangaha ka mo bihe nga kura boro naida ka ino ro wenengai? Ka si du nga nyemu gupai nga oni inidi tironi wenengai tiro te, mo asadi ka yugoho gbaiga rogo gamo mangaapai yo. Si arengbanga kadu wenengai tipa mo sa gu boro re ni berẽ gupai nga mo ima rengba kadu na nyemu oni tona mbakadapa rogatise baraho adunga mo ni na nyemuhe ya te.—Ef. 4:25. w24.05 22-23 ¶9-10

Kina gu ndikidi ruru mbedimbedi aKristano Yesu nika dia yo ku rogo gu Kindo nga ga ngbangbaturũ. Gu mbedimbedi aKristano nikaa nyenga kaa ngera angera kindi rogo toro yo ya, i adianga yo ku ngbangbaturũ yo na “siasia aboro” te. (Mt. 24:31) Gipai re nabi ga Mbori aboro abi dunduko zanga bipa gu maabangirise du yo na ni, si naida i naabi afugo Yesu ni zahe ki nye kaa ngera angera kindi na ki nye ni ruruyo. Ani ima ino Yekova wenengai na ani nakido nga gupai ko amangaha ni ruruhe. Ani abakanga bangirani ka Yekova sia ka mbeda boro ni mbedimbedi Kristano ti gi gaani regbo re te. Ani natingida gupai Yesu apehe tipa agu abamangisunge naye saa bisue nyemu rogo gako kpiapai du tipa ati bakakue. (Mt. 20:​1-16) Agu aboro i ayambu yo tipa i ye ka mangasunge ati bakakue yo nyemu agbia kina gu bangisa marã agu aboro natona mangasunge wiso agbiaha. Wakina gure a, zanga bipa gu regbo i asia mbedimbedi aKristano ti ni, i nika gbia gayo mosoro nga ga ga ku ngbangbaturũ yo ka i nye ni ruruyo. w24.09 24 ¶15-17

Yesu amoi bawene kpiapai nga ga wai ka mangapai kuti iraira mangaapai. Dungu aboro anaamanga fuko gbegberẽ kodihe na gako aborokporo a. Agu agumeko naangianga aidipase ya akitingbanga ko nga iranzanga nga ko, abangbembatayo rogo pambori yo aya ko agbia gako ome be adaimona, na agu abanzengere nangia ga Roma yo asawiako, ki rungosiko, na ki imiko. (Mk. 3:​21, 22; 14:55; 15:​16-20, 35-37) Wa si avura du wo, Yesu ahi gu iraira mangaapai re dunduko, gu nasusi tie gbe nga, ko aamanganga gbegberẽpai kuba gbegberẽpai te. Ginipai rengbe ani ka wirikaha ti gako kpiapai? (1 Pet. 2:​21-23) Yesu amoi wene kpiapai furani tipa wai ka mangapai ho kura aboro amanga rani ni ngba gbegberẽ gene. Ko aima ino gini regbo si anaida ko ongo ti ni na gu regbo si anaida ko fura ti ni. (Mt. 26:​62-64) Ko anaakaraga nga apai dunduko sa agu aziree i anaapehe tipa ko te. (Mt. 11:19) Na ho ko anaafura ni, ko anaasenganga agu aboro nanaarungosi ko watadu ka serekpo yo te. w24.11 4-5 ¶9-10

Mo berẽnga gupai nga mo nafu kparakpara gamahe fu gu boro mo akpinyemuni nga gu du ni bawenehe na kidu na bakere sunge ti ni. Mo ima rengba kadu na gberãrago ka gu boro re moi gu gamahe re ku rogo sanduki gbua na bangirini ki go ti ni koyo! Ono tie, mo ima rengba kadu na bakere ngbarago ka gu boro re mangisunge na gu gamahe re na ki fu tambuahe foro tipaha. Waigu du gi kpiapai re na ngbanya dagbaha na gu ga Yekova gamahe nga ga motumo? Yekova aima fu wiriko tipa ko kpi tipa rani. Sidu, Yekova na bakere ngbarago ho ani ayugo tambuahe ni tipa gu bawene gamahe re na gako nyemuse, nga gu nafõngbadu ko yo tipa ko fu motumo! (Yo. 3:16; Rom. 5:​7, 8) Wa agarã nikaa susa, ani ima rengba ka tona zanga du na tambuahe tipa motumo. Ono ka ani zanga du na tambuahe tipa motumo, si ima rengba kadu wa ka i ya ani namaa gu bawene gamahe Yekova afuhe furani re ku rogo gu ba ka ani abingo ho rogoho ya watadu ka ani aberãnga paha ku rogoho ya. Tipa ka gupai re mangingo ya, si naida ani naazambuasi gaani tambuahe dedede tipa gupai Mbori na Kristo namangihe furani. w25.01 26 ¶1-2

Gu wirina rẽ kada ni bakumba, si aida nga ko du ni ni vovo ko rogo rengo yo te. Wa vura duhe nga si aidanga mo di kina badungu agarã tifuo zio mo bapatiza te, si naida regbo aida tipa mo da ni gu Kristano niima nyaka rogo toro yo. Wakina Yesu, si naida mo du na umbasitise na kidu na nyemu ka iriso Yekova ngba ai gene. Mo du na zerangbaduse kini pidi kina Yekova tipa ko fu dungu asunge foro rogo dungurati. (Mt. 20:23; Frp. 2:​5-8) Mo ima rengba ka yugo gupai nga mo ‘ziazia’ watadu niruru ro ni kpatakara mo kuti Yekova na gako ruru arugute du tipa ruru mangapai na nipeka mo fuo agu arugapai gako riigbu afuhe. Ziazia Kekeapai nayugo gupai ziazia nga babiapai du ni gu boro ‘rengbe na yugo pai.’ Ya mo gipai re nayugo gupai nga mo du ni wene bagumbapai? Oó. Anga abaakumba dunduko namanga gumbapai ni bawenehe te. Ono tie, ho abaakumba atungusapai ni na kini ndu kaa bi akandoro, si naida i du na rengba ka mangasunge na Baibiri wenengai tipa ka yugopai na ka ngarasa awirinayo. w24.11 23-24 ¶14-15

Ho mo ageda pai ni rogo Baibiri yo nga gu mo aruganga tiro na ni ya, mo mangi wetekapai. Na rogo gu uru re dunduko, mo naaberãkurii gupai mo nawisigihe na gu mo nawirikihe tipa Yekova, Wiriko, gbiati gayo nyemuse tipa ro. (Tam. 119:97) Ka si du nga mo agbianga vovo pai ti ai gu regbo mo asungo ka gedapai watadu ka wetekapai te, ka rago gberẽnga tiro ya. Mo berẽpa tiro wa gu boro naˈasada ka gbia dahabu. Dedede, si naaida gu boro nagbata dahabu di badungu asaa watadu aˈuru mbata fu ni gbia bete dahabu. Ono ni ambunga gbataha te na ni nandu kindi kumbatayo kaa gbataha ni zerangbaduse mbiko ai gu papara dahabu ni abihe, ka si vura du kina tooni vurũ, si na nyanyakipaha funi. Pa gu vovo arengo ani awirikaha rogo Baibiri yo ima nyaka kisusi dahabu! (Snz. 8:10) Sidu, mo naandu kindi kumbatayo kaa geda Baibiri na kini gbata vovo apai kindi tipa ka wirikaha.—Tam. 1:2. w25.01 25 ¶14-15

Yekova naida gupai nga ani du regerege ka mbupai fu agu aboro naimisa rani. (Tam. 86:5; Rk. 17:4; Ef. 4:32) Gupai boro apehe watadu ni amangaha ima rengba ka imisa rani nikerehe ka si du nga gu boro re nga mbembedi bakurearani watadu gaani borokporo. (Tam. 55:​12-14) Ti kura aregbo, ani ima rengba kadu na bakere zinga watadu gberãrago si kidu wa ka i ya i ru rani na kina boro sape. (Snz. 12:18) Ani ima rengba ka asada ka õka gaani bipai tipa gupai gberẽ tirani. Ono mangaha wo ima rengba kadu wa ka i ru rani na sape na ki mbu gu sape re kina ku rogo rani yo. Wakina gure a, ani arengbanga kadu wenengai ka si du nga ani amanganga pai kuti gaani aimisiri te te. Ho boro aimisa rani ni, gu bambatapai rengbe ka ye ku rogo rani yo nga ani zingi. Baibiri nape gupai nga ani ima rengba ka zinga. Ono tie, Baibiri nazahe ti gupai nga ka ani nyenga na zinga ya. (Tam. 4:4; Ef. 4:26) Tipagine? Bambiko zanga gupai nga ga zinga niipo naye na wene asangbanapai. (Yak. 1:20) Oni tingidi gupai nga aboro dunduko rengbe arengba ka zinga, ono panye na zinga nga ga boro siapai. w25.02 15 ¶4-6

Yesu apepa gu pangbanga nga gu nayugo gupai nga, ka boro aigo marã ono “ka ni akumuko nga fu Mbori ya,” ni nga iramungo. (Rk. 12:​16-21) Boro ho ini gupai nika manga gba te. (Snz. 23:​4, 5; Yak. 4:​13-15) Gu kura akpakarapai kinaho ani agbiatirani na ni wangia ani apefuo Kristo. Yesu ape gupai nga, ka ani aida kadu ni apefuoko, si naida ‘ani mbupa’ gaani ahe dunduko tipa kadu ni gako abawiriki. (Rk. 14:33) Gere nga gupai namangi tipa agu AKristano naadu Yuda yo ti regbo Amokedi. Na i adu regerege ka mbupa gayo ahe. (Eb. 10:34) Ti gi gaani regbo re, dungu awirina aima zanga gayo ahe mbiko gupai nga i aidanga ka songoda gupai nga ga birĩ-zogarago te. (Yugo. 13:​16, 17) Ginipai naundo yo i mangi gupai re? I adu nakido kuti ga Yekova akidohe nga: “Mi ahe nga unda ro wa sa te, mi ambú nga ro a wa sa te.” (Eb. 13:5.) Ani namanga gupai rengbe omerani na ni tipa gaani raka kumbatayo, na ani na gu kido nga Yekova nika undo rani aundo ka gupai mangi ani aaberãnga paha ya. w25.03 29 ¶13-14

Yekova aidanga gupai berani nga ani mangi sonakumbatayo rogo toroyo kina nisarani te. Ko ima fu ababanda akandoro na abayugupai rogo dungurati nga agu yo naundo rani ani da ni agu aboro ‘niima nyaka’ rogo toroyo kidu na nyanyaki pagume na Yekova, “sa rengba na sona gu hibepai nga ga Kristo.” (Ef. 4:​11-13) Yekova ima fu gako ziazia toro a tipa si undo rani ani du “na ga Kristo berã ti rani.” (1 Kor. 2:​14-16) Kurii gure, Mbori afu agu aKitabu Wene Pangbanga du biama tipa si yugu wai furani Yesu aaberã, kini fura, na kini mangipai ho ko adu ni auru kpotosende ane. Ni wirika mo gu gene Yesu aaberã ngbaha na kini mangipai, mo ima rengba kada ti gu gamo sasa nga ga du ni gu Kristano niima nyaka rogo toroyo. Ono tipa gupai nga ani nyaki rogo toroyo, ani du wa ka ani “mbú gumba pai tie tipa bambata tonatona apai nga ga Kristo,” nga gu bangua ayugopai nga ga aKristano. w24.04 4-5 ¶11-12

Aˈuru dunduko si aida ani mangi adiaberã. Betehe ima du taata ka mangaha, wa gu nga gine boro nika rihe wiso watadu gini regbo si aida boro ndu ka pi ti ni. Gu kura apai ima kpakara tipa boro mangi diaberã tipaha. Si ima rengba kadu na maapai kuriipa kpotorani, gaani ngbarago, kurii agu aboro ani akpinyemu yo, watadu kurii gaani irisombori. Ani naida gaani adiaberã undo rani na ki undo gaani aborokporo. Gu nyakipaha tie gbe nga, ani na gu kido nga gaani adiaberã nika sa ngbarago ti Yekova. (Rom. 12:​1, 2) Gu nyanyakipa diandue duho tipa ka manga wene diaberã nga ka inopai tipa agu arengo dunduko si aidaha. Tipagine du gipai re ti ni na nyanyakipaha? Mo berẽnga gupai nga boro kaza ndu fuo munganga mbiko ni na kere kpakarapai nga ga kaza. Ya mo munganga amanga diaberã tipa gini dawa si aida i fuhe mbata fu niwisigi borokaza watadu ka sana ni na asanahe? Wagusa te. Mo ima rengbe a ka manga wene adiaberã kina gu sa ka mo berẽ wenengai mbata kuriipa agu arengo du tipa gupai du mo rogoho re. w25.01 14 ¶1-3

Ginipai ani nainihe tipa ga Yekova inapai? Waigu ko na yuguhe nga “ko akpi nga nyemu aboro kpi wa sa te”? (2 Pet. 3:9) Oni bingo wai ko ayugu nunga fu agu aboro namangi kere aingapai. Bakindo Davide amangi kere aingapai, kodihe na manga bari na imo boro. Ono wa si avura duwo, Davide asaberã ko na Yekova ambupai fuko. (2 Sam. 12:​1-12) Bakindo Manase amangi kere gbegberẽ apai rogo gako raka yo. Ono tie, zavura wa ko avura manga gupai naadu ni kere gbegberẽhe, Yekova ayugu nunga fuko na ki mbupai fu Manase bambiko ko asa berãko. (2 Peka 33:​9-16) Agi akpiapai re natingida rani na gupai nga Yekova nayugo nunga ho ko abi gupai ni nga ndu pai kinaho si aida ko mangihe ti ni. Ko nika zingisa ngbatunga agu aboro re bambiko i aima ino gupai nga i amangi kere ingapai na i ki saberã yo. w24.05 4 ¶12