Agu awirina nga akumba du na gu wene asino tiyo nga ga aKristano, i na nyanyakipa yo fu dungurati. Gu kumba du yee watadu du na rugatinapai, namanga ome nyanyaki ka banda zereda na kura aboro na ka undo kura aboro i du na zereda dagbayo. Berewe a, gu kumba du na rugatinapai nadegatuko fu kura aboro na ki asadi ka rugatiko na gu gene i aberã ngbaha. Ni kpiapai, ka si dunga dungu abaakumba mangi diaberã nga gu du na ngbanya kuti gu bangua arengo nga ga Baibiri, ya mo mo rengbe ka songoda gayo diaberã ka si vura du vurũ nga mo nidu na berãpai tipa kura pai kia? Ka mo akonga nga kina kuti gupai sa nga gamo gene mangaapai du ni ruruhe te. Mo du na tambuahe tipa gu bipai a nga ga kura aboro. (Bam. P. 13:​8, 9; Snz. 15:22) Gipai re nayugo gupai nga mo amanganga fu aboro rogo zanga irisa yo watadu kaa paya na yo te. Kuba gure, mo nadu na weneringise ko yo du yo ni. Mo namanga ome nyanyaki ka du na zereda na kura aboro zavura rogo kpakarakpakara apai vurũ. (Yak. 3:​17, 18) Mo naafura rogo wene gene fu kura aboro na si naundo yo ka i dunga na zinga gbe ya zavura agu aboro aidanga kuti gaani aida ya.—Abasa. 8:​1-3; Snz. 25:15; Mt. 5:​23, 24. w24.11 23 ¶13

Si nirengo nga Yesu akpi “bara sa,” ono ko namanga dungu apai kindi furani. (Rom. 6:10) Gini apai ko amanga furani? Ko nandu kindi kumbatayo kaa mangasunge tipa ka fu dungu wene ahe furani nga gu ani agbiaha awere mbiko motumo tumorii. Oni bingo gupai ko andu kumbatayo kaa mangaha. Ko namangasunge ni gaani Bakindo, Gbiamotumo, na ni barii dungurati. (1 Kor. 15:25; Ef. 5:23; Eb. 2:17) Ko du nangera kurii gu sunge nga ga dungura mbedimbedi aKristano gbiati bakere rimbasa aboro, nga gu sunge nika digo mbata fu bakere gberãngbi digi. (Mt. 25:32) Na ko naundo ruru kangara moyambu a i naandu kumbatayo kindi kaa fu agu ahe furani nga gu ani aidaha tipa kaa iriso Yekova ni rururani rogo gi yangara arame re. (Mt. 24:45) Na ho ko nikaa zoga rani ni ti regbo agarã sa kutu, ko nikaa ndu kindi kumbatayo kaa manga apai furani. Ho Yekova afu Wiriko ni tipa rani, anga gu yangarapai Ko afu ko ti ni nga ko kpi tipa rani te, ono tipa ko mangi dungu apai furani! w25.01 24 ¶12

Ho Yekova ambupai ni furani ti gaani aingapai, si nadu wa ka i ya ani aamanganga ingapai te na ani ima rengba kadu na gu kido nga ko afunga mbusa furani kumbatayo te. Gipai re nambu gene furani ani du na wene pagume na gu Barani du ngbangbaturũ yo. Ono tie, ani ima ino gupai nga ndikidi mbupai be Yekova nga gu gamahe ko afuhe furani mbiko ko ima kpinyemu rani na ko nga boro gamahe, angianga mbiko ani ima rẽ na gako mbupai ya. Ani na bakere tambuahe nga Yekova nambupai furani! (Tam. 130:4; Rom. 4:8) Ono ka ani aida Yekova mbupai furani, si naida ani mangi nyanyakipa pai. Oni bingo gupai Yesu apehe: “Ka oni avu nga aboro ti gayo ingaapai ya, Baroni avú nga roni ti gaoni ingaapai a te.” (Mt. 6:​14, 15) Sidu, si naida ani wiriki Yekova na kini mbupai fu kura aboro. w25.02 13 ¶18-19

Oni bingo gupai nadu tipa agu aboro Yekova aimi yo Sodomo yo na Amora yo. Gu ruru kumba rimoko angia Roto araki kina dagba agu aboro naadu Sodomo yo re. Ono ya mo ani inihe singia Roto atungusipai fuyo dunduko? Ani ainongo ho te. I angia gbegberẽ aboro, ono ya mo i dunduko naainongo gupai du ni wenehe na gupai du ni gbegberẽhe ya? Oni tingidi gupai nga rogo gu gbata re du akumba aida ni ka pi na ga Roto agino ngbaome. Baibiri nape gupai nga agu akumba naida ka pi na ga Roto agino ngbaome re angia “aparanga na gbinza yo a.” (Bam. P. 19:4; 2 Pet. 2:7) Ya mo ani inihe nzunzu singia gu Mbori nunga nga Yekova aima sarangbanga agi aboro re sa kpio zanga gu maabangirise nga ga zingabekpio? Kina rengo du Yekova apehe fu Abarayama nga ruru aboro aadunga rogo gu gbata re kandara bawe te. (Bam. P. 18:32) Sidu, i angia iraira aboro na Yekova asaringbanga yo ni kina ruruhe tipa gayo mangapai. Ya mo ani rengbe ka pe gupai na kido nga anga boro ho sa dagba agu aboro re nika zinga rago ‘zinga be kpio nga ga iraira yo’ te? Oó, ani arengbanga ka pehe wo te! w24.05 2 ¶3; 3 ¶8

Bambiko agu aariapai namanga nibipa zingo mosoro, kura aboro aima ida pa gu sunge nga gu nadia yo kusayo pati gayo aborokporo tuturũ, ono kusa i aye ka bi gupai nga wene diaberã nangiaha te. Mbata fu mo idi pa sunge, ka mo berẽnga kina pa gu marã mo nika gbiaha ya, ono mo berẽpa singia si aundo ro na gamo aborokporo mo nye mbembedi na Yekova. (Rk. 14:28) Mo sana tiro nga: ‘Ginipai rengbe ka manga tipa gaani rogatise ho ka mi mere ni? Ya mo mi adu na rengba kadu pati adunguratise dunduko, tungusapai, na kini di regbo na awirinami?’ Ka si du nga agude kina bero, mo ima rengba ka sana tiro na gi nyanyakipa sanahe re: ‘Waigu rengbe mi ka sonosa awire “ni ga Gbia rabahe na rugahe” ka si du nga mi pati yo te?’ (Ef. 6:4) Ho mo amanga diaberã ni, mo mangipai kuti gupai Yekova aidaha, angianga kuti agu apai agumero watadu abakureamo apehe nga aguyo amanganga pai kuti gupai Baibiri apehe ya. w25.03 29 ¶12

Ono tipa agu aKristano nye zanga nyaka rogo toroyo, si taata tipa i “biriki” yo na ki “nangi yo.” Ni ima rengba ka ida kuti gu ziree apangbanga nagbandaka na agu aziree du rogo internet. Watadu abasamungu kuti ndikidi pambori ima rengba ka nanga ni. Ni ima rengba kaa kpi kura aboro, kadu na tagbagapai dagba ni na kura aboro, watadu rago ima rengba kaa gberã tini ni ipo. Dedede, ni ima rengba ka manga gupai du ni irairaha ho ka ni gbia tini ni na asada. (1 Kor. 3:3) Ziazia Kekeapai naringbisapa wai boro asona rogo toroyo kuti wai boro naasona kada ni kuru boro. (Ef. 4:15) Badungu apai duho gude naainongo pai tipaha ya, si naida sosono boro du aduho ka ngbembatayo funi. Tipa ka yugoho na kpiapai, nagude ima rengba ka sana wiiri tipa ri zadi beri ho i agu ni rii gene. Wa gi degude re nikaa sona, nari ima rengba ka mbu gene furi tipa ri naagu rii gene nisari, ono ri ima rengba ka tingida ri na gupai nga si naida ri ngere kubani na kubani tipa ka bi gupai nga atarambiri ho naye te. Ho gu gude re ada ni ni sosono boro, ri nane ngbatunga gi kereapai re nitiri. Wakina gure a, ho aKristano anyaka rogo toro yo, i naberã dudunguro kurii gupai Baibiri apehe tipa wa ka i rengbe ka bi ga Yekova berãpai tipa gupai re, fuoho, i ki mangi gupai du ni ruruhe. w24.04 3 ¶5-6

Tipa dungu agarã, ga Mbori agino angia kina agu aboro naaraka na ko ngbangbaturũ yo. Kusa, ko akusi aboro na i ki da ni gako agino a. Fuo bete regbo kusa, agu aboro naadu dagba agu agino re angia Enoka, Noa, Abarayama na Eyobo. I nasakapai tipa gu ndikidi airisimbori re nga, i angia abakurea Mbori watadu i “anata na Mbori.” (Bam. P. 5:24; 6:9; Eyo. 29:4; Yes. 41:8) Vuru dungu agarã, Yekova nandu kumbatayo kindi kaa yamba abakureako i du ni gako agino. (Yeze. 37:​26, 27) Ni kpiapai, rogo gu sangbaanebi yo nga ga Yezekere, ani nawirika gupai nga Mbori nakpinyemu gupai nga ruru airisiko du na mbembedi pagume na ko. Ko nakidohe ka manga “mokido nga ga zereda na yo.” Gu sangbaanebi re nafura tipa gu regbo agu aboro du na gu maabangirise nga ga ga ku ngbangbaturũ yo na aguyo du na gu maabangirise nga ga raka auru kpotosende nika du ni kodikodi yo rogo ga Yekova bamburoko wa ‘rimbasa akandoro sa.’ (Yo. 10:16) Gu regbo re nga awere! w24.06 2 ¶2, 4; 3 ¶5

Wangia ani ga Yekova aboro, ani nasongoda ga Mbori Kindo na kpotorani yo dunduko, ono dedede, si naaida aida ani du na wingbaduse tipa ka mangaha wo. (Mt. 6:33) Ni kpiapai, rogo gi gbegberẽ zegino re, si naida ani du na wingbaduse tipa ka raka ringbisihe kuti ga Yekova arugute, na kini tungusi gu wene pangbanga nga ga Kindo. Na berewe a, zegino ima du na bakere kparakaro rogoho mbiko agu apai nga ga birĩ-zogarago. Sidu, ani naida na wingbaduse tipa ka zanga ngbe na kura birĩ-zogarago watadu kaa tikango tipaha. (Yo. 18:36) Dungu ga Yekova aboro ima gbiatiyo na agu akpakarapai nga ga zingo marã, watadu i ima ta yo, watadu ka ba yo ku bambukiso yo mbiko i amanganga agu apai nga ga birĩ-zogarago watadu ka rimo sunge abanzengere te. Ani nagbia ome gbiati ngarã ho ani awisigo agu akpiapai ni nga ga agu aboro nasongodi ga Yekova zogarago na wingbaduse. Gaani Bakindo Kristo Yesu, aima ka gu soapai nga ga rimiso tiko kurogo agu apai nga ga birĩ-zogarago rogo gi ga Satana sino raka nga ga gi zegino re. (Mt. 4:​8-11; Yo. 6:​14, 15) Ko anaakido kuti Yekova ti aregbo dũ tipa ome. w24.07 3 ¶4; 4 ¶7

Yekova amoi gi nyanyaki pangbanga re ku rogo Baibiri tipa ani rugutirani na nyanyakipa pai. Si naundo rani ani rugutirani na ndu gupai ko nasogo ingapai ti ni nikerehe. Ingapai nagbarasa gaani pagume na Yekova na si ki ye na kpio. (Yes. 59:2) Si du nga ndu gupai Satana asoga Yekova gbiati aboro ti ni. Gure du nga ndu gupai ko aˈasadi aAdamu na Eva i ingipai ti ni, na ko nandu kumbatayo kindi areme kaa asada aboro. Sidu, ho aAdamu na Eva aingipai ni, si nawiraha wa Satana aima berã gupai nga ko ima gbarasa ga Yekova ringbisapai tipa aboro. Ono ko aaruganga tiko na pa wai du Yekova na nyemuse te. Mbori aˈarianga gako ringbisapai tipa atita Adamu na Eva te. Yekova ima kpinyemu aboro, sidu, ko amangi mbakadapai nibasa tipa ka fu maabangirise fu aboro dunduko. (Rom. 8:​20, 21) Yekova aima ino gupai nga, aboro nika du kinaho nika sia ka kpinyemuko na ka giasangbako. Yekova asaha taata fuyo tipa i mbedi na ko na ki batasiyo be ingapai na kpio. w24.08 3 ¶3-4

Ga Yekova aboro na dungu apai i amangaha. Ani namangasunge tipa ka ngerafuo tirani na gaani aborokporo. (1 Tim. 5:8) Dungu aKristano nangerafuo agu agume yo du na kaza watadu aguyo gbinza. Na ani dunduko si aida ani ngerefuo kpotorani a, na gipai re nadia bakere regbo. Na kupati agi asunge du berani re, ani a na asunge berani ka mangaha rogo dungurati. Gu nyanyakipa sunge du berani nga gu si aida ani mangihe nga tungusa wene pangbanga. Geda Baibiri nga agu ‘apai ngba’ watadu gupai nyakipaha kisusi fu aKristano, sidu, si naida ani saha si du ni bambatapai rogo gaani raka yo. Nibipa gu boro du na maku watadu ngbarago, bambata papara atambuahe nape gupai nga: “Gani ngbarago du rogo gu rugute nga ga Yekova, ni namakia pa gako rugute uru na yuru.” (Tam. 1:​1, 2) Si tie ziazia nga, si naida ani di regbo adia kaa geda Baibiri. Gini regbo du ni wenehe tipa geda Baibiri? Ani dunduko ni basasa ima rengba ka sia gu regbo ani abihe nga si ni wenehe furani. Ono gupai nyakipaha nga si naida ani sia gu regbo nika undo rani ani naageda Baibiri dedede. w24.09 3 ¶5-6

Ya mo gu wirina niima nyaka rogo toroyo naida na undo be ai boro? Ii. Ti kura aregbo, agu aboro niima nyaka rogo toroyo ima rengba ka sanahe tipa undo. Gu boro nasona kindi rogo toroyo ima rengba ka sana kura aboro tipa i pe gupai funi si aida ni mangihe watadu i mangi gu diaberã funi si aida kina boro ni mangihe nitini. Gu kparakparapai du tipa gu Kristano niima nyaka rogo toroyo nga, ni nasana kura aboro tipa undo nga aguyo du na tatamana na ki ima manga ngbatunga agu adiaberã re, kini ini gupai nga ni du nika manga diaberã ni tini na ki inihe nga ni nika “kpida kina gani pai.” Kina wai sosono aboro ni naangera nga dunduko kina sa ya, agu aKristano niima nyaka rogo toroyo na asinoyo a ni bakiakia. Ni kpiapai, bete agu yo ima rengba kadu ni airatatamana, agu akurayo kidu na wingbaduse. Aguyo ima rengba kadu ni aboro gamahe na agu yo kidu na bakere nunga. Kurii gure, ho nyanyaki aKristano ue rogo toroyo agbiatiyo ni na bangisapai, i ima rengba ka manga agu adiaberã du ni bakiakia ono nga gu du mburuhe kina rii Ziazia Kekeapai. Dedede, gipai re ninaamanga ho si aida aKristano mangi diaberã ni nibipa gayo sangbakpotoseyo. Sidu, i asapanga ngbanga akurayo ka si du nga gayo adiaberã ni bakiakia te. Kuba gure, i nagbeberãyo kurii  gupai nika sayo i nye ni kodikodi yo.—Rom. 14:10; 1 Kor. 1:10. w24.04 4 ¶7-8

Ginipai rengbe mo ka mangaha ka mo bi tiro nga sunge tiro te? Mo gedi agu averesi nga ga Baibiri nga gu nafu gu kido foro nga nyakipa ro anyaka fu Yekova na mo ki berẽkuriihe. Ka mo ringbisinga tiro na kura aboro ya na ka mo moingo berãro kuti gupai adunga mo na rengba ka mangaha ya. Yekova aidanga gupai bero nga mo mangi bakere apai kisusi gu rengbe omero na ni ya te. (Tam. 103:​13, 14) Ka singia boro aima manga foro gbegberẽ kusayo, gamo ingahe nga ni te. Mo tingidi gupai nga Yekova nika sapangbanga agu aboro namanga fu akurayo gbegberẽ, ono ko ki undo agu aboro i amanga yo gbegberẽ. (1 Pet. 3:12)Ka mo ya dunga na kapa nga Yekova ima rengba ka mangasunge na mo mo undo kura aboro ya. Ko ima fu gu bakerepa momu foro nga oni mangisunge tungusapai wa sa na ko. (1 Kor. 3:9) Mbiko gu kpakaraapai mo nasusi rogoho rogo raka yo, si ima rengba kadu taata gbe foro mo rugutiro na wai du agu aboro narungo. Mo ima rengba ka undo yo ni bakerehe. w24.10 7-8 ¶6-7

Yekova naida aboro mangi rani ngba wene gene na ho aboro amanga rani ni gbegberẽ, ko nabihe abi. “Yekova nakpi nyemu ruru sarangbanga.” (Tam. 37:28) Yesu nakido rani nga Yekova nika ‘káragapai ni ngarã’ ho wene regbo nika da ni tipa ko mangihe wo. Na barambeda, ko nika dia agu apai dunduko nasarani ani naarungo na ko ambu nga rani berewe ani naarungo be iraira mangaapai te. (Tam. 72:​1, 2) Si naida aida ani pidi gu regbo Yekova nika digiso akpakarapai dunduko ti ni. Zavura awere, ko naundo rani aundo ho kura aboro amanga rani ni gbegberẽ. (2 Pet. 3:13) Ni kpiapai, ko nayugopai furani tipa wai ka mangapai ho i amanga rani ni gbegberẽ tipa wa ka ani ne akpakarapai. Gene sa ko amanga gipai re ngbaha nga ni yugo ko wai furani vuru Baibiri yo Wiriko anaamangapai ho i anaamanga ko ni ngba gbegberẽ gene. Yekova a nafu arugute furani vuru Baibiri yo tipa gupai rengbe ani ka mangaha ho aboro amanga rani ni ngba gbegberẽ gene. w24.11 2-3 ¶3-4

Pa gumba Yesu gupai nga i fu riahe fu rimbasa aboro aima du ni kpakarapai mbiko akumba aduho nga 5,000. Na kodihe na adee na agude, bange aboro aima rengba kadu nga 15,000 si aaida i rigi yo. (Mt. 14:21) Andarea aya: “Gude du re, na udiudi kpokuta ngungo he wa ga mapunga be ko bisue na atĩo ue; ono he nga gere fu dungu aboro wa gere?” (Yo. 6:9) Rungorungo aboro na kura aboro nanaari kpakuto ngungo he wa mapunga na si nawiraha wa i aima be kpoto gu rukutu atĩo re na tikpo ki ugusi ra. Ono gu bakio riahe nadu be gu gude re aarengbanga ka riga dungu aboro te.Yesu aaida ka yugo weneringise fu aboro, sidu, ko asanayo tipa i sungu rogo abadona rii nvuo. (Mk. 6:​39, 40; Yo. 6:​11-13) Ani nageda gupai nga Yesu afu tambuahe fu Bako tipa kpakuto na atĩo. Ni manga ko ho wo, ko ayugu gupai nga Mbori du nafu riahe na ko adu na tambuahe tipa gu riahe re. Si ni wenepai furani ka pekafuo ga Yesu kpiapai ni manga ani kparakpee mbata fu riahe. Fuoho, Yesu afu riahe i kparakaha, aboro ki riahe ki mbiki. w24.12 2-3 ¶3-4

Ho Yesu adu ni auru kpotosende, ko afu taarimo fu Bako nipe ko gupai fu aboro nga Yekova du nafu ome fuko ko naamanga iiriwo apai. (Mk. 5:​18-20) Yesu aye na taarimo fu Yekova a ngba gu gene ko aafura ngbaha tipa Bako na gu gene ko amangipai ngbaha na aboro. Ti kura regbo sa, Yesu aayugopai bambutiria yo. Dagba agu aboro naadegatuyo, dee adu kinaho daimona adu na maapai kuri ri tipa agarã 18. Gu daimona re aima sa gu dee re ri naandu ni nugonugo ri ka ri arengbanga ka tumba rogoriyo kuari ya. Yesu aima rugatiko na gupai nga ri aima du na bakere gberãrago ni kerehe na ri kini idi na undo. Sidu, ko andu fuo ri na ki fura na ri ngba wene gene. Ko aya furi wẽ: “Na, i zaki ro ti ga kaza.” Na ko ki moi beko ri ri na ri ki ru kuari nzunzu na nibasa “ki taasi rimo Mbori,” kpotori angba wenengai na ri ki gbia irisa! (Rk. 13:​10-13) Gu dee re aima du na wene ndupai ka fu taarimo fu Yekova, na kina wo du ani na wene ndupai areme a. w25.01 2-3 ¶3-4

Ani arengbanga nitirani ka karaga agu ahe dunduko aAdamu na Eva aingisihe te. (Tam. 49:​7-9) Zanga na undo, ani aarengbanga kadu na maabangirise tipa ka raka nyeanye kindi kumbatayo watadu tipa zingabekpio kumbatayo te. Nirengo, ka gaani kpio du wakina ga anya, ka ani adunga na maabangirise tipa ka raka berewe te. (Batu. 3:19; 2 Pet. 2:12) Gu Barani nga boro nyemuse nga Yekova ima fu gu gamahe furani nga gu natumo gu bape nga ga ingapai ani adihe ti Adamu re. Yesu asaki rogo yo ngba gi gene re nga: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yo. 3:16) Kurigure, gi gamahe re ima sa gupai nga ani du na wene pagume na Yekova. Ani ima rengba ka gbia undo ti gi bawene gamahe re na i ki mbupai furani ti gaani ingaapai watadu “bape.” w25.02 3 ¶3-6

Ginipai naundo Saura tipa ko zi bapatiza? Ho Yesu afura ni fu Saura ngbangbaturũ yo, bakere imarago asa Saura ni iravurari. (Amo. 9:​3-9) Ko agino riahe tipa aˈuru biata, na si nawiraha wa ko aima berã dudunguro kurii gupai namangiko re. Nirengo, Saura aima du na gu kido nga Yesu du nangia Masiya na apefuoko aamanga ndikidi pambori. Apai kinaho rengbe ani ka wirikaha be Saura. Ko aima rengba ka mbu rukö watadu gunde be aboro si ká na ko ti zio bapatiza. Ono ko aambunga gupai re si mangi te. Saura aima du na nyemu ka da ni Kristano wa si avura du vurũ nga i nika rungosiko arungosi. (Amo. 9:​15, 16; 20:​22, 23) Tifuo gako bapatiza, ko aandu kumbatayo kindi kaa kido kuti Yekova tipa ko undoko ko hi dungu aasada. (2 Kor. 4:​7-10) I ima rengba ka asada gamo idapase watadu mo ima rengba ka gbiatiro na rungosiro ho mo nika zio bapatiza ni na ki da ni boro sa dagba aDezire Yekova. Ono tie, mo ima rengba kadu na gu kido nga Mbori gbiati Kristo nika fu gu undo afu foro ti aregbo dunduko mo nika idaha tipa ka nye niruru ro.—Frp. 4:13. w25.03 4 ¶8-9

Geda Baibiri nga gu wene sasa si aida ani mangihe. Ono gu kura pai kinaho si aida ani mangihe susi gu nga ka geda Baibiri ka ani aida ka gbia undo ti ni. Oni berẽnga kurii gi ringbisapai re: Kurukuru ahe naida na ime tipa ka raka. Ono ka mai na ni bakerehe vuru wiri umba regbo yo, sende ima rengba kadu dunduko nga kina ime. Ho mai ana ni ni bakerehe, si arengbanga ka rimo ti sende na kurukuru ahe ki gbia undo ti ni te. Si ni wenehe ho mai ana ni yee na ki rimi ti sende na si ki undo kurukuru ahe tipa si sono. Wakina gure a, si aidanga ani gedi Baibiri ni kina boro wiri ipo na ka ani adu nga na regbo tipa ka berãkurii gupai ani agedaha ya te. (Yak. 1:24) Ya mo mo abingo gupai nga ti gu kura aregbo mo nageda Baibiri ni kina boro ipo? Ginipai si aida mo mangihe? Mo zogosi tiro kaa gedaha zezeredi tipa gupai nga kadu na rengba ka berãkurii gupai mo agedaha. Mo ima rengba ka dia regbo ni gbangaha tipa gamo geda Baibiri wa ka mo berẽkurii gupai mo agedaha. w24.09 4 ¶7-9

Ho abaakumba agbia rugapai ni be riigbu, si naida i gedihe wenengai na ki mangi ai gupai rengbe yo ka mangaha tipa ka mangapai kuti ni. I agbianga arugapai sa tipa kina wai rengbe yo ka manga papara adunguratise na kini mangi kparakpee rogo dungurati te, ono i nagbia arugapai agbia a tipa wai ka ngerafuo ga Kristo akandoro. Ho abaakumba amangapai ni kuti agu arugapai naye be riigbu, awirina nabi tiyo nga Yekova ima kpinyemu yo na ko nangera angerafuo yo. Ho ani agbia arugapai ni be abaakumba, si naida ani mangipai kutini na nyemuhe. Ni manga ani he wo, ani nasaha taata fu agu aboro nangbembatayo i nimangi gayo sunge. Baibiri nangarasa rani ani du nagiasangba gbiati ranigose fu agu aboro nangbembatayo. (Eb. 13:7) Ti kura aregbo, gipai re ima rengba kadu ni kpakarakpakaraha. Tipagine? Bambiko agi akumba re nga kpakpa aboro. Sidu, ka ani moiberãrani kina kuti gu gbegberẽ asino du tiyo kuba maa ani berãrani kuti wene asino yo, gure nga ani nikaa undo avurarani. Ngba gini gene? Avurarani naida ani tona du na kapa kuti gupai nga Mbori namangasunge na gako riigbu kaa ngbe furani kumbatayo. Sidu, ka ani aaberã gbegberẽ tipa abaakumba, ani ima rengba ka tona berã gbegberẽ tipa riigbu a na ki zanga kido kuti ga Yekova riigbu. w24.04 10 ¶11-12

Ya mo agu aboro dunduko nika kpi ti regbo bakere gberãngbi adunga na gu maabangirise berewe nga ga zingabekpio te? Ziazia Kekeapai ima pe gupai gbaiga nga agu aboro nikaa soga Yekova nga aguyo ko nika imo yo na gako abasovura ti regbo Aramegido azinganga be kpio te. (2 Tesa. 1:​6-10) Ono na ginipai nika du tipa kura aboro, ni kpiapai, aguyo ima rengba ka kpi ti regbo bakere gberãngbi mbiko kaza, gbinza, béno, watadu gu kura aboro imi yo? (Batu. 9:11; Zek. 14:13) Ya mo si rengbe kadu nga bete agi aboro re nika du dagba gu “iraira” aboro i nika zingisayo rogo vovo zegino? (Amo. 24:15) Ani ainongo ho te. Ono ani ima ino dungu apai tipa agu apai nika manga kumbatayo. Ni kpiapai, ani ima ino gupai nga ti regbo Aramegido, i nika sapangbanga aboro ringbisihe kuti wai i amangipai na awirina Kristo. (Mt. 25:40) Na agu aboro i nika sapangbanga yo wa akandoro nika ima yugoho rogo gayo mangaapai yo nga i nasongoda mbedimbedi aKristano na Kristo.—Yugo. 12:17. w24.05 10-11 ¶9-11

Baibiri nape gupai nga, ani naraka ti “gbegberẽ rago.” (2 Tim. 3:1) Ga Yekova aboro nagbiatiyo na akpakarapai wakina gu kura aboro du rogo gi ga Satana gbegberẽ zegino re agbiatiyo na ni. Ono i narungosi rani arungosi a mbiko ani nairiso Yekova. Ginipai naundo rani tipa ani naairiso Yekova ani ki vura kaa gbiatirani na agi akpakarapai re vurũ? Bangua ndupai sa nga, ani ima bi ga Yekova undo na ki ini gupai nga ko “nga unga Mbori.” (Yere. 10:10; 2 Tim. 1:12) Yekova nabi agu akpakarapai abi dunduko ani agbiatirani na ni na ko naida aida ka undo rani. (2 Peka 16:9; Tam. 23:4) Ho ani atingida gupai ni nga gaani Mbori nangera angera fuo rani na ko ti aregbo dunduko regerege ka undo rani, si ima rengba ka fu ome furani tipa ani hi ai aˈasada. Ani bingo wai gupai re adu ni rengo tipa Bakindo Davide. w24.06 20 ¶1-2

Ani ima rengba ka banda gaani kido kuti ga Yekova riigbu. Ho daha ni ziazia nga si naida i mangi ariapai rogo gaani giarogopai yo nga ga gu rengo nga ga Baibiri watadu pai tipa wai ani airiso Yekova, agu aboro nangbembatayo na ndundu tipa ka manga aˈariapai te. I namanga gipai re wo bambiko gupai nyakipaha gbe fuyo nga, i naida ka sa ngbarago ti Yekova. I namanga ome nyanyaki a tipa ka maa mburu gayo adiaberã rii Fugo Mbori, nga gupai ga Yekova aboro naima rengba ka mangapai kutini. Gu Mokedi nangia Pauro afu rugute ki ya: ‘Mo ká kuti kpia wene apai.’ (2 Tim. 1:13) “Gu wene apai” fura yo ane tipaha re nabi agu ayugopai nga ga aKristano du mburuhe rii Baibiri. (Yo. 17:17) Ngbatunga agu ayugopai re nga mburu agu apai dunduko ani naidi kutini. Ga Yekova riigbu ima yugo gupai furani nga si naida gaani aida du rii mburu agi apai re. A wa ani kaa mangaha wo, kina wo a ani nikaa gbia amaku. w24.07 11-12 ¶12-13

Gu mokedi nangia Petero aima rugatiko na pa wai duhe tipa ka saberã na i ki mbupai fu boro. Sidu, ko ayugu gupai fu kura aboro nga gu ko awirikihe. Tifuo bete aregbo fuo gu pumbo nangia ga Pendekote, Petero asaki gupai fu gu badungu aYudo naadu ho nga i aimi Masiya. Wa si avura du wo, ko angarasi yo ni nyemuse nga: “Oni zúngadi tironi bambiko gere ki sa tironi berewe, i gbandaka gaoni ingaapai, zereda ye yo du Gbia ni.” (Amo. 3:​14, 15, 17, 19) Petero ayugu gupai nga boro ingapai namanga saberã ni mbu ni gani ingapai. Gipai re nayugo gupai nga ni nambu gani iraira aberã, ki mbu manga gupai du ni gbegberẽhe, na ki tona manga gupai nafu ngbarago fu Mbori. Gu mokedi re ayugu gupai fuyo a nga Yekova nika mbupai fuyo. Si ki du wa ka i ya ko di agu aingapai re kusayo dunduko, na si aamanganga te. Ho ani asaberã rani ni ti gaani aingapai, ka si vura du vurũ nga si ni kere ingaapai, si ni pa wasa ka ino gupai nga Yekova nambupai furani ti ni dunduko! w24.08 12 ¶14

Ka ani du na nyanyaki idapase nga Yekova ima mbeda ka gbarasa gi gbegberẽ zegino re, sidu, ani aberãnga gupai nga du na bakere marã watadu ahe nyakipaha te. Ti regbo bakere gberãngbi, sunge adu nga ti marã te, Baibiri nape gupai nga aboro nika ‘bafa gayo feda ku ngba agene bakporo’ bambiko i nika ino gupai nga “gayo feda na gayo dahabu arengba nga ka batasa yo rago gu uru nga ga ga Yekova dingidingi ngbaduse te.” (Yeze. 7:19) Kuba gupai nga kaa gbeberã rani tipa ka manga bakere marã, si naida ani mangi adiaberã nga gu nika undo tipa ani ngerefuo tirani na gaani aborokporo na si ki mbu gene furani ani irisi Yekova. Si adu nipa mungo ka mangasunge na bakere marã susi gu du berani na ka mangasunge na gaani regbo ni bakere tipa kaa ngerafuo gaani azingo. Si naida ani du a na rubangirise ka zanga mbu aũborose si da na nyanyakipaha rogo gaani raka yo. (Mt. 6:​19, 24) Wa ani nikaa mbeda kuti digido gi sino raka re, si nika ida ani sia singia ani nakido kuti Yekova watadu ani nakido kuti gaani aũborose. w24.09 11 ¶13-14

Si nawiraha nga, ani ima rengbe ka diabe bete kura gaani arungbura dunduko. Ono ani ima rengba ka nye kaa sovura kindi kuti kura gaani arungbura tipa gbanga regbo. Oni bingo gupai nadu tipa gu mokedi nangia Petero. Ko aoro rimo Yesu bara biata bambiko ko aagunde agunde be aboro. (Mt. 26:​69-75) Kusa, si aangera wa ka i ya Petero aima diabe gako gunde ho ko atungusipai ni na wingbaduse barabangiri ga aYudo aboro rondo. (Amo. 5:​27-29) Ono tifuo bete agarã kusa, ko ambu rihe na agu aKristano naangianga aYudo ya bambiko ko aagunde agunde be gupai ‘agu yo nangia aYudo’ nika berãha tipa ko. (Gara. 2:​11, 12) Petero aima tona gunde berewe. Isoke, ko aadianga behe dunduko te. Ani ima rengba ka gbia tirani rogo ngbatunga pai wa gure. Ono tie, ani ima rengba ka diabe gu sino re ni peka ani fuo gu ga Yesu rugute du tipa nye kaa ‘ngera.’ Zavura ho mo abihe ni nga mo nyanyaki, mo naandu kindi kumbatayo kaa ne agu apai rengbe ka ba ro ku rogo ingapai. Mo naamanga agu apai kindi nasa gupai nga ka mo mangingo ingapai ya.—2 Pet. 3:14. w24.07 18-19 ¶17-19

Boro ho naundo aboro kisusi wai Yesu aundo aboro te. Ho ko adu ni auru kpotosende, ko amangisunge na gu ome nadu beko tipa ka manga iiriwoapai ka undo kura aboro. (Rk. 9:​12-17) Ko afu bakere gamahe kisusi nga unga ko tipa rani. (Yo. 15:13) Natona kina ti gu regbo i azingisi Yesu, ko nandu kumbatayo kaa undo rani. Ko ima kpara fu Yekova tipa ko fu gako ziazia toro furani si yugupai na ki fu wasa furani kina wai ko akidohe tipaha. (Yo. 14:​16, 17; 16:13) Na vurube gaani adunguratise, Yesu nandu kumbatayo kindi kaa fu guhe furani ani aida na ni tipa wa ka ani du na rengba ka yugopai fu aboro rogo zegino dunduko tipa Baibiri na ki sa aboro ni abawiriki. (Mt. 28:​18-20) Gu mokedi nangia Pauro ake gupai nga, tingbafuo Yesu ga ku ngbangbaturũ yo, ‘ko afu agamahe rogo aboro yo.’ (Ef. 4:​7, 8) Pauro asaki gupai nga, Yesu fu agi akumba re furani tipa i undo dungurati ngba dungu agene. (Ef. 1:​22, 23; 4:​11-13) Rengo ngaha nga agi akumba re nga kpakpa aboro, sidu, i namanga aingahe amanga. (Yak. 3:2) Ono gaani Gbia nga Yesu Kristo namangasunge na agi akumba re tipa ka undo rani, i nga agamahe beko furani. w24.10 18 ¶1-2

Davide ape gupai fu wiriko nga ko ni kadu na diabese sa kina gu ka ko aagiasangba Yekova Mbori. Si nipa gberãrago tie nga, ho Soromo ada ni ni sosono boro, ko atona ka iriso kura ambori. Yekova aakpingo nyemu gupai re te, na ko ambu fu tatamana fu Soromo tipa ko zogo aboro ngba wene gene. (1 Aba. 11:​9, 10; 12:4) Ginipai ani awirikaha? Giasangba naye na diabese. (Tam. 1:​1-3) Ono tie, anga Yekova kidohe ka sarani ni airakumuko na ni abaworimo wa gu Soromo adu te. Ono ka ani gisangba gaani Mbori, ko nika fu gu tatamana furani nika sarani ani mangi wene adiaberã. (Snz. 2:​6, 7; Yak. 1:5) Ga Yekova arugute ima rengba ka undo rani ho ani amanga adiaberã ni tipa sunge, sukuru, marã, na gupai ani amangaha tipa ka gbia ngbarago. Ka ani pekefuo gako arugute, ani nika banda gaani pagume na ko na ki gbia nyenye unga. (Snz. 2:​10, 11) Ani ima rengba kadu na wene abakure berani. Na gaani aborokporo nika du na ngbarago. w24.11 10-11 ¶11-12

Mo ningere tipa amomu ka fura na wiro tipa Baibiri watadu idapase kuti Mbori. Mo rengbe kadu na rengba ka yugopai fu awiro tipa agi apai re ka si du nga mo nandu ku rogo aba wa bambu banda kuru ahe tipa yugoho. Ni kpiapai, ho mo andu ni ku bambu banda kuru ahe yo tipa yugoho, singia mo ndu andu ko yo watadu mo bihe rogo vidio, mo ima rengba ka yugo he fu wiro watadu gupai namangi nga gu du na ngbaya dagbaha na gupai namangi mbata kusayo rogo Baibiri yo. Gipai re nika undo wiro tipa ni bi gupai nga gupai Baibiri apehe nga rengo. Isoke, mo ima rengba ka yugopai fu wiro tipa gu mbia nga ga aMoabo. Gi mbia re ima raka awere tipa agarã wa 3,000 na rimo Yekova ni kekehe ti ni. Gu bambu banda kuru ahe tipa yugoho du rogo Rii-basunge Nga ga Zegino Nga ga aDezire Yekova du Warwick, New York yo du na ngbatunga gu Mbia rogoyo nga ga aMoabo i ayugoho nga “Ziazia Kekeapai na Rimo Mbori.” Ga aMoabo Mbia nape gupai nga Bakindo Mesa nga ga aMoabo ko asamungu kuti aYisaraere. Na gure a nga gupai Baibiri apehe. (2 Aba. 3:​4, 5) Ho wiro nika bi gu gopai ni nga gupai Baibiri apehe nga rengo, si nika nyakasa gani idapase. w24.12 14 ¶4; 15 ¶6