Ani ni naageda pai rogo Baibiri yo tipa agu aboro naadu ni ruruyo na kusa i ki da ni iraira aboro. Bakindo Soromo nga boro sa dagba agu aboro re. Ko aima ino Yekova wenengai na wai ka iriso Ko, na Yekova aima fu bakere maku fuko. Ono kusa, Soromo atona ka iriso kungbo ambori. Gipai re asa bakere gberãrago ti Yekova, na gu riko aboro dunduko nangia ga aYisaraere yo agbia ambusa tipa dungu kama agarã tipa ga Soromo aingapai. Rengo ngaha nga, Ziazia Kekeapai nape gupai tipa Soromo nga ko “ki kpi fuo atitako, i ki kpisidi ko,” fuo gu ruru akumba nadu wa Bakindo Davide. (1 Aba. 11:​5-9, 43; 2 Aba. 23:13) Gipai re ayugongo gupai nga agu aboro dunduko kpiki i nika zingisa yo te. Na kurigure, anga si nga bambiko gupai nga boro kpi, si nayugo gupai nga ni ima du na rengo beni tipa ka raka berewe te. Zingabekpio nga gamahe be Mbori. Ko nafuhe fu agu aboro ko aida ka fu gu mamu fuyo nga ga irisoko nyeanye kindi. (Eyo. 14:​13, 14; Yo. 6:44) Ya mo Soromo agbia gu ngbatunga gamahe re? Kina Yekova sa ini karagapai kuti gu sanahe re, ani ainongo ho te. Gupai ani nainihe nga Yekova nika manga gupai du ni ruruhe. w24.05 4 ¶9

Ti agu aregbo i ake Baibiri ti ni, ga boro bamburoko angia gu ba ni anirengbe ka ongoda rogoho na ki du ni bandabanda ni be agu apai du pati ni. Ho boro anidu ni ni gino rogo ga boro bamburoko, gu gino re anidu na gu maabangirise nga irakporo nika ngerafuo ni wenengai. Ho ani akpara gaani raka ni fu Yekova, ani nada ni agino rogo gako bamburoko. Ani nagbia ngbarago ti gu riahe nga ga toro du kpaima na ani ki da ni abakurea agu aboro du ni ga Yekova agino a. Aboro rogo aringara dunduko rengbe kadu ni agino rogo ga Yekova bamburoko yo. Ga Yekova bamburoko rogo ai gu ba du gako ruru amoyambu rogoyo. ( Yugo. 21:3) Na ginipai tigaha du tipa gu ruru aboro naima kpiko? Ya mo ani rengbe kada kuti gu digisopai nga i kindi ni agino rogo ga Yekova bamburoko? Ii! Tipagine rengbe ani ka pehe ti ni wo? Bambiko Yekova natingidapa yo wenengai, i bangiriko ni kina unga yo. Yesu ape gupai nga: “Gu nga i azingisa aboro be kpio kina Mose ayugu he, rogo gu pai nga ga zigidiri ngua, ho ko aya ni ti Gbia ko nga ga Abarayama Mbori, nga ga Yisaka Mbori, nga ga Yakoba Mbori. Were ga kangba aboro Mbori nga ko te, ga unga aboro Mbori nga ko; bambiko bangiri ko aboro dunduko du ni unga yo.”—Rk. 20:​37, 38. w24.06 3 ¶6-7

Anga gu yangarapai Sadoka andu ti ni ku Eburone yo nga ka manga pumbo pa maa Davide ni bakindo te. Ko adi gako aũvura na kidu regerege tipa ka sovura. (1 Peka 12:38) Ko aima du na nyemu ka ndu na Davide tipa sovura na ka banda aYisaraere be avurayo. Sadoka aarengbanga kadu na inohe tipa sovura wa banzengere te. Ono ko angia gu kumba naadu na bakere wingbaduse. Wari gu boromotumo wa Sadoka awiriki wai ni kadu na bakere wingbaduse? Ko aima ino dungu agu akumba naadu na ome na kidu na wingbaduse. Zanga kapa, ko aima gbia undo ti gayo kpiapai. Ni kpiapai, mbiko gupai nga Davide adu ni gu bangbembatayo nadu na bakere wingbaduse na ki ngia bawene basovura, aYisaraere dunduko naaida ka maa ko ni bakindo. (1 Peka 11:​1, 2) Davide anaakido kuti Yekova ti aregbo dunduko tipa undo be avurako. (Tam. 138:3) Sadoka aima wirikapai a be gu kura akumba naadu na wingbaduse—akumba wa Yoyada gbiati wiriko nangia Benaya nangia kere basovura gbiati agu akumba nadu dagba agu angbatunga yo naadu 22 naundo Davide.—1 Peka 11:​22-25; 12:​26-28 w24.07 3 ¶5-6

Pauro nangia boro Taruseu anaarungosi apefuo Kristo. Si nawiraha wa dungu aKristano naberẽ gupai nga ko asanga berãko rogo gako raka yo te. Ono Yesu aima ino gupai nga Pauro ima rengba ka manga ariapai na ki saberã ko. Ko gbiati Bako aima bi wene asino ku rogo Pauro yo. Yesu aya: “Mi kpara ko, ko ndu na rimore ku barangba aGendiria na abakindo.” (Amo. 9:15) Zavura Yesu amangisunge na iiriwoapai tipa ka sa Pauro ko saberã ko. (Amo. 7:58–8:3; 9:​1-9, 17-20) Pauro asaberã ko na ki da ni Kristano. Yesu afu sunge fuko ko mangihe ni mokedi. Pauro anaape pa wai dedede ko anidu na bakere tambuahe nga Yekova na Yesu ayugu weneringise na inapai fuko. (1 Tim. 1:​12-15) Ti kura regbo sa, Pauro agi gupai nga gu dungurati naadu Korinda yo ambu kumba nga gu ko naamanga wasiwasi kodaba ko nye rogo dungurati. Ginipai Pauro apehe fuyo i mangihe? Ti gupai Pauro apehe, ani nawirika wai Yekova ayugo nyemuse ho ko afu rugute ni fu gako amoyambu na kini yugu inapai fuyo ho i asaberã yo ni. Na ani nawirika wai rengbe ani ka wirika ko. w24.08 13 ¶15-16

Yeeye, Yekova ayugo gu gene gbaiga aboro ingapai narengbe ka mbeda na ko ngbaha. Gu ue wiri Adamu na Eva nangia Ebere, nangia gu bambata boro nadu na idapase kuti Yekova tingbafuo gu samungu namangi ati Edene yo. Ebere afu motumo fu Yekova bambiko ko aaida ka manga gupai nangba ti Ko na ka mbeda na ko. Ebere angia babanda akandoro, sidu, ko adi kura gako paranga akandoro, ki yere gorayo, na ki fu ra ni motumo fu Yekova. Waigu Yekova adu? “Bi Ebere na gako motumo angba angba bangiri Yekova.” (Bam. P. 4:4) Yekova adu na ngbarago na agu amotumo nangia ga kura aboro nakpinyemu ko na kini kido kutiko—wa Noa. (Bam. P. 8:​20, 21) Pa ida Yekova na agu amotumo re ayugu gupai nga aboro ingapai ima rengba ka ngba bangiriko na ki mbedi na ko. w24.08 3 ¶5-6

Rago ima rengba ka gberã tirani na ani ki du ni fudifudi rani be iraira mangaapai. (Batu. 7:7) Kina gu bangisapai re a namangi gu ruru amoyambu nadu mbata wa Eyobo gbiati Abakuka. (Eyo. 6:​2, 3; Abak. 1:​1-3) Wa vura duhe nga si rẽarẽ boro du wo, si naida ani du na rubangirise tipa wai ani amangapai tipa gupai nga ka ani amanganga gupai du ni gbegberẽ he ya na ki gbirisi apai kina kumbatayo. Ho agu aboro amanga agu apai ni du ni irairaha si kini ngere wa i agbianga mbusa te, ani ima rengba ka tona kaa berã gupai nga undo ho ti manga gupai du niruru he te. Ga Yekova moyambu sa abi wene aboro, gbegberẽ aboro kini mangiyo gbegberẽ, ono si kini ngere wa gu gbegberẽ aboro re aagbia ngbarago agbia rogo raka yo. Ko aya, “Agi yo re nga gbegberẽ aboro; wa du yo zezeredi dedede.” (Tam. 73:12) Ko adu na bakere gberãrago mbiko gu iraira mangaapai re, na ko aberẽ gupai nga ndupai ho tipa kaa iriso Yekova te, ko aya: “Ho mi aberẽ pai ni ya waĩ ka mi rugu tire na ni, si adu ni fudifudipai bangire ki susi.”—Tam. 73:​14, 16. w24.11 3 ¶5-7

Ani nafu taarimo fu Yekova mbiko ani na bakere irisa koyo du ko ni. Badungu ndu apai du berani tipa kadu na irisa koyo du ko ni. Yekova na ome tiko ka manga ai gupai ko aida ka mangaha, na ko ambunga te. (Tam. 96:​4-7) Gako bakere tatamana ni yuguyuguhe rogo agu ahe yo ko amangihe. Ko ima fu unga furani na agu ahe dunduko ani aidaha tipa kaa raka. (Yugo. 4:11) Ko ni ruruko. (Yugo. 15:4) Agu apai dunduko ko amangaha nadu na diabese, na ko ninaabanda gako akidohe ti aregbo dunduko. (Yos. 23:14) Si du nga ndu gupai gu nebi nangia Yeremaya ape gupai ti ni tipa Yekova nga: “Dagba agu airatatamana nga ga arikaaboro yo na rogo gayo angbi dunduko a nga boro yo sa du wa mo te”! (Yere. 10:​6, 7) Badungu ndu apai duho si aida ani du ti ni na irisa koyo du gu Barani ni du ngbangbaturũ yo. Ono ani afunga kina irisa sa fu Yekova te. Ani ima kpinyemu ko. Na gu susi gbe nga, ani nafu taarimo fu Yekova bambiko ani ima kpinyemuko. w25.01 3 ¶5-6

Avura Mbori naˈasada ka sa agu apai du ni wenehe tipa ga Mbori riigbu si naangera wa gupai du ni gbegberẽhe. Ni kpiapai, ani ima wirika gupai rogo Ziazia Kekeapai yo nga Yekova naida ani banda kpotorani si du ni gigirihe, gaani sino mangapai, na gaani iriso du ngba gu gene ko aida na ni. Ko nape gupai nga gu boro nga guni namanga gupai du ni gbegberẽhe na ka ni aidanga ka aria sino ni ya, i kusi ni kusayo rogo dungurati. (1 Kor. 5:​11, 12; 6:​9, 10) Ani namangapai kuti gu zinahe nga ga Ziazia Kekeapai re. Mbiko pa manga ani pai kuti gi zinahe re, asogorani nape gupai nga, ani akpinga nyemu aboro te, ani na kitangbanga aboro na ani aidanga gu boro du na gani bipai kia du dagbarani te. Satana Bakitingbanga du na gbaraga ziree tipa ga Yekova riigbu. “Irazire nga ko, nga baha.” (Yo. 8:44; Bam. P. 3:​1-5) Si rẽarẽ tie ani idi kuti gupai nga Satana nikaa mangasunge na avurarani i ni gbaragi aziree tipa Yekova na gako riigbu. w24.04 10-11 ¶13-14

Zavura tingbafuo bakere gberãngbi tona, gu kura aboro nga agu yo nikaa bi wai i nika gbarasa “Babera Duna Bakere Ome Ti Ni” nika tingida gupai atingida nga aDezire Yekova aima digo nipe gipai re tipa dungu agarã nga si nika manga. Ya mo si rengbe kadu nga, pa bi kura aboro wai i nikaa gbarasa Babera Duna Bakere Ome Ti Ni asa yo tipa i du na idapase kuti Yekova? (Yugo. 17:5) Ka pai wa gure mangi, si du wakina gupai namangi Ezipeta yo ti rago Moize. Oni tingidi gupai nga “bakere rimbasa kungba aboro” akoditiyo na aYisaraere ka kura Ezipeta yo. Si nawira gupai nga bete agi aboro re aima tona ka sonosa idapase kuti Yekova ho i abi gupai ni nga ga Moize zahe tipa agu Ambusa Nadu Bawe aima da ti rengo. (Gate 12:38) Ka ngbatungapai wa gure mangi tingbafuo i gbarasi Babera Duna Bakere Ome Ti Ni, ya mo rago agberã tirani nga aboro nika du na rengba ka kodatiyo na ani ngbutuko mbata fu Aramegido? Wagusa te! Ani naida ka yugo sino gu Barani du ngbangbaturũ yo nga gu “Mbori du adu na nunga aboro na undahe ti ko, du ni bayee ko tipa zinga, ki du na inapai kpaima na rengo.”—Gate 34:6. w24.05 11 ¶12-13

Ginipai rengbe ka manga ka si du nga ani amaanga mburu gaani aida berewe rii ‘wene apai’ te? Oni bingo gi kpiapai re. Rogo bambata sa kama agarã, gu kura aKristano aagbaraga ziree apangbanga nga ga Yekova uru ima da. Si rengbe kadu nga waraga adu kinaho—nga gu si adu wa ka i ya gu mokedi nangia Pauro nakehe—nga gu nape ngbatunga pai wa gure. Kura aKristano Tesaronike yo adianga regbo tipa ka wisigo gi waraga re wenengai te, i aidi kuti gu ziree re na i ki tona pehe a fu kura aboro. Ka i atingidi agu apai Pauro ayuguhe fuyo ho ko adu ni na yo, ka i adunga ni nanginangi yo te. (2 Tesa. 2:​1-5) Pauro afu zahe fu awirinako nga ka idinga kuti agu apai dunduko i agiaha ya. Na tipa ka undo yo kumbatayo, Pauro adigisi gako ue waraga fu agu awirina naadu Tesaronike yo re na agi afugo re: “Gimi paa kuti boro du re, nga Pauro, ni kina bere, si nga ngbaanga ti keke awaraga dunduko; wo mi nake he.”—2 Tesa. 3:17. w24.07 12 ¶13-14

Si aaida agu aKristano nangia aEbere hipai tipa gayo idapase wa apai aagberã kina kumbatayo Yuda yo. Wa vura duhe nga bete aguyo aima gbiatiyo na kere arungosiro mbata kusayo, badungu aguyo aagbianga tiyo na ni te. Gu mokedi nangia Pauro atingidiyo tipa i mbakadi tiyo tipa bakere rungosiro na kidu regerege ka nye ni ruruyo dati kpio wagu Yesu amangihe. (Eb. 12:4) Badungu aYudo nadu ni kere zingizingi yo na kini mangipai na zuu bambiko badungu aboro naada ni aKristano. Bete agarã kusayo, AYudo bangeyo aima susa 40 ‘akpamia tiyo ki zunga he niya, i ari nga riahe ki mbiri he wa sa te da kina ho i ka imo Pauro ni.’ (Amo. 22:22; 23:​12-14) Wa vura duhe nga i aasoga aKristano asoga na kini rungosiyo, si aaida i nindu kumbatayo kindi kaa irisombori, kaa tungusa wene pangbanga, na kini banda gayo idapase nyanyaki. w24.09 12 ¶15

Yoane angia mbembedi bakurea Yesu na kingia gako mokedi. (Mt. 10:2) Yoane adi bakere regbo a na Yesu kaa tungusapai na ko aima biko ko nimangi iiriwoapai. Ko anye ni ruruko fu Yesu ti kpakarakpakara aregbo. Ko aima bi wai i aimi Yesu na ki ima bi ko tifuo ko zingi be kpio. Ko aima bi gu dungurati nga ga aKristano a si ni sono. Yoane aima raka ni gbangaha gbe ki bi wene pangbanga ‘ini tungusihe rogo arago tii ngbangbaturũ yo dũ.’ (Koro. 1:23) Ho Yoane adu ni ni ba gbinzako, ko adu na gu momu nga ga ke gu bawene buku nga Yugoti. (Yugo. 1:1) Ko aima ke buku sa rogo Kitabu Wene Pangbanga yo du na rimo ko kuriihe. Yoane ake kura awaraga berewe biata, nga gu i ayambaha awere nga bambata Yoane, ue Yoane, na biata Yoane. Ko ake gako biata waraga fu gu ruru Kristano rimoko angia Gayo, nga gu ko Yoane akpinyemuko wakina wiriko. (3 Yo. 1) Gupai gi ruru kumba re akehe ima ngarasa apefuo Yesu dunduko da kuti gi gaani regbo re. w24.11 12 ¶15-16

Gu kumbakudee nakpinyemu diako nabi ri na nyanyakipa ri. Ko nabi ri wa nyanyakipa gamahe be Yekova. (Snz. 18:22; 31:10) Ni sangbanaha, ko namangapai na ri rogo wene gene na rogo irisayo, kodihe na ho i amanga kodaba ni. Ko amanganga ri ngbaome ri mangi ai gupai rengbe ka sa ri ka ri dunga wenengai ya watadu ka manga ri ri mangi gupai nika mbusa gari sangbakpotoseyo ho i amanga kodaba ni ya te. Zavura ko a, si aidanga ko mangi ai gupai nika mbusa sangbakpotokoyo ho i amanga kodaba ni te. (Amo. 24:16) Yekova na ngbarago ho ko abi gupai ni nga oni naˈasada na omeroni dunduko ka yugo irisa fu adiaroni rogo agu apai oni apehe na kini mangihe. Mo dinga berã adia ka zanga manga ai gupai rengbe ka imisa ri na mo kidu na weneringise, irisa, gbiati nunga koyo du ri ni. Ka mo mangihe wo, mo nika yugo gupai nga mo ima kpinyemu ri na mo nabi ri na nyanyakipa ri. Mo yugu irisa fu diaro, na mo nika banda gu nyanyaki pagume du bero nga—gamo pabakure na Yekova.—Tam. 25:14. w25.01 13 ¶17-18

Ga Yekova amoyambu na gu bakere nyemupai nga ga tungusa wene pangbanga na i namanga asadatise nyanyaki ka mangaha wo. Gipai re nasayo i du kia ti gu kura aboro naya i nga aKristano. Ginipai rengbe ka undo rani ani banda gaani nyemu sunge tungusapai kakaka watadu ka kiisoho? Ani ima rengba ka wirikapai ti ga Yesu kpiapai tipa wai kaa mangasunge tungusapai kakaka. Ho Yesu adu ni auru kpotosende, ko aambunga mangasunge nyanyaki tipa ka tungusapai fu aboro te. Ti regbo gako sunge tungusapai, ko aambunga mangasunge kakaka te. Ka yugoho na kpiapai, Yesu aringbisi gako sunge kuti ga babanda bakakue sunge, nga gu ko namangisunge nyanyaki tipa agarã biata ka ngerafuo gako vurumo, ono ka si akusanga zuzuhe ya. Wakina gure a, Yesu adi agarã biata kaa tungusapai fu aYudo, ono dungu yo aadanga ni gako abawiriki te. Wa si avura du wo, Yesu aambunga tungusapai fuyo te. Ko adu wakina gu babanda bakakue naadu kindi na mabangirise nga vurumo nika kusa rindihe akusa. (Rk. 13:​6-9) Ka ani awirikapai ti gupai ko ayuguhe na gupai ko amangihe, si nika undo rani ani nye zaaza areme. w25.03 14-15 ¶1-4

Ginipai rengbe ka manga ka si du nga mo berẽ gupai nga gu kura boro ima rengba kadu ni wene badiarogatise foro? Ya mo si naida mo pepa gamo nyemupai niipo fu gu boro re? Baibiri nape gupai nga, boro tatamana nagbia inohe mbata fu ni mangipai. Sidu, si ni patatamana ka wisigo gu boro re wenengai tipa bete regbo mbata fu mo pepa gamo nyemupai fu ni. Waigu rengbe mo kaa wisigo gu kura boro ni tatamana? Ti regbo adunguratise watadu ti regbo asungo, mo ima rengba ka bi agu apai du tipa wai du gu boro re rogo toroyo, asino ni, na gani mangaapai. Ada nga abakureani na gini apai ni afura tipaha? (Rk. 6:45) Ya mo gani asasa nandu sa na gamo? Mo ima rengba ka sana agu abaakumba du rogo gani dungurati watadu gu kura nyanyaki aKristano nga aguyo ini ni wenengai. (Snz. 20:18) Mo ima rengba ka sanahe tipa wai du rimo ni dagba aboro gbiati asino ni. (Ruta 2:11) Wa mo nikaa wisigo gi boro re, mo ne gupai nga ka sa ni ka ni dunga wenengai ya. Mo du na irisa tipa gani abipai ki zanga ka ida ka ino gani wiri futufutuapai dunduko. w24.05 22 ¶7-8

Abaakumba nawirika Yesu na i agunga kuti gu digisopai nga gu boro re aidanga ka aria gani berã watadu mangapai ya te. Kura aboro ima rengba ka saberãyo ti gu bambata regbo abaakumba asungo na yo. Ono kura aboro ima rengba ka ida na bakere regbo. Sidu, abaakumba ima rengba ka manga mbakadapai tipa ka sungo na gu boro mangi ingapai susi bara sa. Isoke tifuo gayo bambata sungo, gu Kristano mangi ingapai nika tona ka bera nikerehe tipa gupai abaakumba ni pehe funi. Ni ima rengba ka yugo umbasitise na ki sana Yekova tipa ko mbupai funi ti gani ingapai. (Tam. 38:18) Rogo gi gene re, rogo gayo ue sungo, si nawiraha wa niima rengba kadu na kura toro tini kia ti gu ni ayuguhe mbata ti regbo gayo bambata sungo. Tipa gupai nga abaakumba undo gu boro mangi ingapai ni saberã, si naida i yugu nunga gbiati weneringise. I nakpara fu Yekova ko fu maku kurii gayo asadatise na kidu na gu kido nga wirinayo nika bi gani ingahe abi na ki saberã ni.—2 Tim. 2:​25, 26. w24.08 22-23 ¶12-13

Gini apai ani nawirikihe rogo gu kekeapai bisue du rogo gi magazini re? Yekova aidanga gupai nga i gbarasi ai boro te! Ko naida aboro ingapai saberã yo. (2 Kor. 5:20) Si du nga ndu gupai Yekova ni naazungodi gu gako aboro ti ni mbuko i sa gayo berã ki karagatiyo fuo ko. Abaakumba rogo dungurati namangasunge wa sa na Yekova ka undo agu aboro mangi kere aingapai i sa gayo berã. (Rom. 2:4; 1 Kor. 3:9) Oni berẽnga pa gu bakere ngbarago du ngbangbaturũ yo ho aboro ingapai asa gayo berã ni! Gu Barani du ngbangbaturũ yo nga Yekova nidu na bakere ngbarago ti ai gu regbo gu gako kandoro naingi akaraga ti ni ku rogo dungurati. Gaani nyemuse tipa Yekova nasona gbe ho ani aberã ni kuriipa gako nunga, inapai, na gu weneringise arẽnga ani tipaha ya.—Rk. 1:78. w24.08 31 ¶16-17

Ka Yesu ambuyo i moi ko ni bakindo, ka ko aima rimiso tiko ku rogo gu birĩ-zogarago nga ga aYudo, nga aguyo naadu tii gu zogarago nga ga ARomo. Yesu andu nisako kurii bagangara yo. Sidu, wa ko avura kaa gbiatiko na soapai be kura aboro, ko aarengbanga ka rimiso tiko ku rogo birĩ-zogarago yo te. Nga gu bawene wirikapai furani! Rengo ngaha nga, aboro asananga rani tipa ani kusi riahe ngba iiriwo gene, ani husi kaza, watadu ani da ni gayo bazogo te. Ono i ima rengba ka sana rani tipa ani bawaraga watadu ani songodi gu boro i aberãha nga ni rengbe kadu ni wene bazogo. Ono tie, ga Yesu kpiapai ima du gbaiga. Ko aima ká ka rimiso tiko ku rogo agu apai nga ga birĩ-zogarago na zavura ki pe gupai kusa nga: “Gi ngbi aenga nga rogo gi zegino te re.” (Yo. 17:14; 18:36) Wangia ani aKristano, si naida ani berẽ ngba gu gene Yesu aaberã ngbaha na ki wiriki gako kpiapai. Wakina ko, ani nasongoda ga Mbori Kindo. Ani nape paha fu kura aboro na kini kpari tipa si ye.—Mt. 6:10. w24.12 4 ¶5-6

Sidu, mo naandu kindi kumbatayo kaa geda Baibiri na kini gbata vovo apai ka wirikaha. Ni kpiapai, mo wiriki ga Yekova ruru sarangbanga ni manga mo pai na aboro ni ruruhe ki zanga kparakaro. Mo wiriki ga Yesu nyemuse tipa Bako ni du mo na nyemu ka manga gupai Yekova aidaha na kini undo kura aboro ka si vura du vurũ nga si nika sa raka ni kere kpakarakpakaraha foro ti kura aregbo. Mo wiriki Yesu ni manga mo dezirepai fu kura aboro tipa wa ka i gbia gu momu a nga ka ino pai tipa gu bawene apai Yekova aima digo ni mangihe fu aboro na i kidu na idapase kuti motumo. Ka ani aandu kindi kumbatayo kaa wirikapai tipa motumo, si nika sa gupai nga ani kpinyemu aYekova na Yesu ni bakerehe gbe. Na mbiko gupai nga ani nakpinyemu yo ni bakerehe, i nika kpinyemu rani ni bakerehe a. (Yak. 4:8) Sidu, ani mangisunge na agu ahe Yekova nafuhe furani tipa kaa ndu kumbatayo kindi kaa wirikapai tipa motumo tumorii. w25.01 25 ¶16-17

Ngba kura gene, gu veresi nga ga areme rengbe kadu nga: “Mo ima dia gimi ingaapai dunduko kusayo barabangiro.” Gipai re nayugo gupai nga Yekova naba agu aingapai kusayo nga ga agu aboro sa gayo berã na ko abingo ho berewe te. I ima rengba ka mangasunge a na gi fugo re ngba gi gene re: “Mo sa [gimi aingapai] si ki du wa ka i ya si aamanganga te.” Baibiri nanyakasa kina ngbatunga gipai re rogo kura kpiapai, nga gu du ni kekehe rogo Mika 7:​18, 19. Agu averesi re nape gupai nga Yekova naba gaani aingapai ku dudunguro baime yo. Ti agu aregbo naadu mbata kusayo, i anaabingo guhe berewe i anaaba ha ku rogo dudunguro baime te. Baibiri nayugo gupai ziazia nga, ho Yekova ambupai ni furani, ko nadia gaani ingapai kusayo dunduko ka si aidanga berewe ani du na gberãrago tipaha ya. Nirengo, wakina gupai Davide apehe, ‘aboro maku nga agu yo vu yo yo ti gayo ingaapai, nga agu yo dadi yo gayo gbegberẽ apai.” Gure nga ndikidi mbupai! w25.02 9 ¶7-8

Paradizo kinaho nga gu narukuba kurapai areme auru kpotosende nga gu niima hi be aboro nga aguyo namanga weneapai. Si na dungu mirioni aboro rogoyo nga aguyo nagbia ngbarago ti ndikidi zereda. Agu aboro niima du rogo gi paradizo re ima diaberã nga i aida nga ka kura rogoho te. Na i naida dungu aboro ye ka kodatiyo na yo rogo gi wenepai re. Ginipai du ngaha? Gu paradizo nga ga toro! Ngba iiriwo gene, Yekova ima mbakada ba nga gu narukuba kurapai kia nga gu du gako aboro rogoyo rogo zereda na ni kodikodi yo wa vura duhe vurũ nga i naraka rogo gi gbegberẽ zegino nga ga Satana aboro asoga akurayo rogoho re. (1 Yo. 5:19; Yugo. 12:12) Gaani Mbori nyemuse nabi wai abi gi sino raka re aimisa aboro ono ko sa gako amoyambu ba yo du wenengai tipa wa ka i aandu kindi kumbatayo kaa irisoko na ngbarago. Fugoko nasakapai tipa gi paradizo nga ga toro re nga, si wa “bagbuko” na “tuditudi ati.” (Yes. 4:6; 58:11) Mbiko ga Yekova amaku, agu aboro naraka rogo gi paradizo re na ngbarago na ni bandabanda yo rogo gi kere kpakarakpakara aregbo nga ga yangara arame re.—Yes. 54:14; 2 Tim. 3:1. w24.04 20 ¶1-2

Ka si du nga mo naida ka manga rogatise, si nirengo nga, mo ima manga kparakpee tipa ha. Ono Yekova akidongo he ka fu badiarogatise fu ai boro te. Ono ko naberãpa gamo nyemupai gbiati gamo biapai aberã na ko ima rengba ka undo ro ho mo aˈasada ni ka gbia badiarogatise. Sidu, mo naandu kindi kumbatayo kaa pe pa gamo nyemuapai gbiati abipai fuko. (Tam. 62:8) Mo mangi kparakpee tipa hipai gbiati tatamana. (Yak. 1:5) Zavura ka mo aavuranga gbia badiarogatise awere ya, Yekova kidohe tipa kaa ndu kumbatayo kindi kaa ngerafuo gamo azingo nga ga borose gbiati gamo nyemu apai. (Tam. 55:22) Ono mo du na rubangirise tie ka zanga mbu gupai nga ga gbata badiarogatise si da ni nyanyakipa pai kisusi rogo gamo raka yo. (Frp. 1:10) Ndikidi ngbarago arunga riipa manga mo rogatise watadu pa zanga mo manga rogatise ya te, ono si naru riipa gamo pagume na Yekova. (Mt. 5:3) Na ho mo ata manganga rogatise ni ya, mo ima rengba kadu na bakere ranirii bero ka kiiso gamo sunge tungusapai. (1 Kor. 7:​32, 33) Mo mangisunge wenengai na gi regbo re. w24.05 21 ¶4; 22 ¶6

Bagizo regbo wai si aida mbakadapa rogatise dihe? Dedede, gu diaberã boro amangaha ni wiri ipo ninaaye aye na gbegberẽ sangbanaha. (Snz. 21:5) Si naida gaoni mbakadapa rogatise di wiri regbo adia tipa oni iniditiro ni wenengai. Ono tie, si aidanga oni di bakere regbo a kisusi kaa mbakadapa rogatise kisusi wai rẽhe te. Baibiri nape gupai a nga: “Ima na pa maabangirise nafu kaza ngbaduse.” (Snz. 13:12) Ginipai rengbe kura aboro ka mangaha ho kura aboro ambakada pa rogatise ni? Ani ima rengba ka yamba yo tipa riahe, tipa irisombori nga ga aborokporo, watadu tipa zambuasitise. (Rom. 12:13) Isoke, mo ima rengba ka undo nimera mo na yo, ka zubo rogo bangisa tarambiri sa na yo, watadu ka yamba yo ku kpuro yo i sungu ka fura dagbayo tipa gupai nga ka i dunga ni kina ni sa yo rogo ba sa ya. (Gara. 6:10) Ka si du nga agu aboro nambakada pa rogatise sanaro mo di regbo na yo, mo ima rengba ka berãpa gipai re nga si nga nyanyakipa gene ka undo yo ngbaha. Mo du na rubangirise ka zanga mbu agi aboro nambakada pa rogatise re ni kina ni sa yo ya, ono mo du a na tatamana ka ino gu regbo si aida mo mbu regbo fuyo tipa i fura dagbayo ni sa yo. w24.05 30 ¶13-14

Abaakumba naasada ka ino agu adiaberã gu boro mangi ingapai re adihe mbata fu ni mangi ingapai. Ni kpiapai, ginipai du rungburasi gani pagume na Yekova? Ya mo ni aima rugusa gani wisigo Baibiri dedede watadu nduge tipa tungusapai? Ya mo ni aima mbu manga kparakpee dedede fu Yekova? Ya mo ni aima mbu nyemu gbegberẽ apai si du na maapai kurii ni? Da ni naadia regbo na ni? Gini aũngbarago ni naasiaha? Waigu agu asiapai re nadu na maapai kurii gani aberã na nyemu apai? Ya mo ni rugutini na wai gu Bani nga Yekova abi gupai ni namangihe re? Abaakumba ima rengba ka sana ni na asanahe nga gu nika undo ni ni ini agu apai zeresi gani pagume na Yekova na ki sani ni mangi ingapai. I namanga gipai re ngba wene gene na ki zanga ka sana ni tipa gbugbuapai nga gu si aidanga abaakumba ini pai tipaha ya. (Snz. 20:5) Berewe a, abaakumba ima rengba ka mangasunge na kpiapai tipa ka undo gu boro re ni berẽkurii gani amangapai na ki ini ndu gupai ni adu ti ni nga ingahe. Isoke, ti bambata gayo sungo na ni, ni ima rengba ka tona du na gberãrago tipa agu adiaberã ni amangihe gbiati gu gene ni aberã ngbaha. Ni ima rengba ka saberã ni ni basa kinaho. w24.08 22 ¶9-11

Yesu atungusi “gu wene pangbanga nga ga ga Mbori ngbi” kakaka bambiko ko aima ino gupai nga gu sunge re angia gu sunge Mbori aaida ko mangihe. Yesu amoi sunge tungusapai ni bambatapai rogo gako raka yo. Zavura kusa ti regbo gako tungusapai, ko aata “dagba abaakporo na akporo” kini yugupai fu kura aboro. (Rk.13:22) Ko araba kura abawiriki a tipa i nimangisunge na ko ni abatungusipai. (Rk. 10:1) Areme a, sunge tungusapai nga gu bambata sunge aYekova na Yesu aida ani mangihe. (Mt. 24:14; 28:​19, 20) Ani rengbe ka nyakasa gaani nyemu sunge tungusapai nibi ani aboro kina wai Yekova abiyo. Ko naida dungu aboro wiriki gu rengo du tipa ko na ki mangipai kutini. (1 Tim. 2:​3, 4.) Bambiko gi wene pangbanga re ima rengba ka batasa ga aboro raka, Yekova naundo rani ani mbakadi gu gene ani afura fu aboro tipaha ngbaha. Ka si vura du nga aboro atonanga iriso Yekova awere te, i aduadu na mamu ka mangaha wo mbata fu digido bakere gberãngbi. w25.03 15-16 ¶5-7

Ai Kristano si aida ni mangisunge na gu sangbakpoto ni yo ni narabaha kuti Baibiri nibipa gupai ni nika mangaha. Gu kura aboro ima rengba ka bihe nga si wenengai fuyo i fu sene fu gu boro i akusi ni kusayo rogo dungurati re watadu ka yamba gu boro re tipa dunguratise. Ono tie, si aidanga ani zi fugo na gu boro re watadu kaa dia regbo na ni kaa manga kura apai te. Gu kura aboro ima rengba ka bakabangiriyo nga, ‘Ono anga ya mo Baibiri nape gupai nga gu Kristano nafu sene fu gu ngbatunga boro re ni ti gani gbegberẽpai na ni te?’ (2 Yo. 9, 10) Ono tie, agu apai du tipa gu veresi re nayugo gupai nga gi boro re rengbe kadu nga basamungu kuti ndikidi pambori watadu ai gu boro naasada ka sa kura aboro i mangi gupai Baibiri apehe nga si ni irairaha. (Yugo. 2:20) Sidu tie, ka boro aandu kumbatayo kaa gbataka ziree ayugopai watadu mangaapai, si aidanga abaakumba ndu ka bi gu boro re te. Ono tie, maabangirise kinaho nga ni ima rengba ka saberã ni. Da ho ni nika saberã ni ni, ani afunga sene fu gu ngbatunga boro re watadu ka yamba ni tipa gu dunguratise nga ga dungurati te. w24.08 30-31 ¶14-15

Tifuo Yesu rigi rimbasa aboro, ko aya fu gako amokedi i mbu gu rago re na ki karagatiyo ku Kaparanauma yo rogo kurungba na ko ki ndu tigako kurii bagangara yo, rogo gi gene re, ko aane gu ome rimbasa aboro aamangaha tipa ka maa ko ni bakindo. (Yo. 6:​16-20) Ho amokedi aandu ni bangiri ime, baime atona ka sungburo be bayuge. Fuoho, Yesu aye fuo yo kini ndu rii ime. Na ko ape gupai fu Petero nga ko ndu rii ime a. (Mt. 14:​22-31) Ho Yesu arimi ni ku kurungba yo, bayuge aru. Ngba abawiriki azere na i ki ya: “Wiri Mbori nga mo ni rengo.” (Mt. 14:33) Kina ngba nazera nga abawiriki ape gipai re tifuo Yesu ndu rii ime, na angianga tifuo ko kusi riahe ngba iiriwo gene ya. Oni bingo gupai Marako akehe tipa gu bangisa regbo re. Ko aya: ‘[Amokedi] ki nigunde agunde bambiko i aruga nga tiyo na pa kpokuta te.’ (Mk. 6:​50-52) Abawiriki aruganga tiyo na gupai nga Yekova afu ome fu Yesu ko mangi bakere apai susi gu nga ga kusa kpakuto te. w24.12 5 ¶7

Ani ima rengba ka yugo gaani tambuahe tipa ga Yekova nyemuse ni manga ani ai gupai rengbe ani ka mangaha rogo agu aposo du mbata fu Tingida Pakpio Yesu na agu ngbefuoho ka yugoho fu Yekova nga ani na tambuahe tipa motumo. Kupati mbakadatirani kadu pati Tingida Pakpio Yesu, ani ima rengba ka yamba kura aboro i ye kadu pati ni. Mo sakipai tipa gupai nika manga pati Tingida Pakpio Yesu fu agu aboro mo nayambuyo. Si adu ni wenepai foro mo yugu agu avidio fuyo du rogo jw.org nga Tipagine Yesu Akpi Ti Ni? na Tingida Pakpio Yesu. Si naida abaakumba yambu agu aboro niima zera rogo toroyo. Mo berẽnga pa gu ngbarago rengbe kadu ngbangbaturũ yo na auru kpotosende ka si dunga ga Yekova ingiingi kandoro karaga tini ku dagba gako aboro! (Rk. 15:​4-7) Ti regbo Tingida Pakpio Yesu, ani moingo ho amaa ni gaani sasa ka fu sene angianga sa fu kina akuarani ya ono gbe fu agu aboro du ni vovo yo watadu agu aboro naadunga pati ni ya tipa gbanga regbo. Ani naida ka sayo i bi tiyo nga i ima dia yo kugume!—Rom. 12:13. w25.01 29 ¶15

Gu kura sino kinaho nafõngbadu Yekova yo ko kedi Yesu ko ye ka kpi tipa rani: Si nga gako nyemuse tipa rani. (Yo. 3:16; 1 Yo. 4:9) Yekova akedi wiriko ko ye ka kpi tipa rani mbiko ko naida ani raki nyeanye kindi na mbiko ko naida a ani du ni papara gako aborokporo. Ho Adamu amangi ingapai ni, ko aarengbanga kadu ni papara ga Yekova aborokporo berewe te. Ni sangbanaha, i aavunganga rani a ni papara ga Yekova aborokporo te. Ono mbiko wa i aima afu motumo tumorii, agu aboro dunduko du na idapase kuti Mbori na kini gisangbako ima rengba kadu ni papara gako aborokporo rogo kura uru. Zavura awere, Yekova ima rengba ka mbupai furani ti gaani aingapai na ani ima rengba kadu na mbembedi pagume na ko gbiati awirinarani. Ni rengo, Yekova ima kpinyemu rani nzunzu!—Rom. 5:​10, 11. w25.01 21 ¶6

Yekova afu nyanyakipa gamahe gbe furani ho ko akedi Wiriko ni ko kpi tipa rani! (2 Kor. 9:15) Mbiko gupai nga Yesu akpi tipa rani, mo ima rengba ka da ni bakurea Yekova. Mo ima rengba a ka ngera kumbatayo tipa ka raka nyeanye kindi. Badungu nduapai du berani tipa kadu na tambuahe fu Yekova nga gu ko nafu motumo tumorii mbiko ko ima kpinyemu rani ni bakerehe! (Rom. 5:8) Tipa ka undo rani ani nye kindi na tambuahe bangirani ki zanga go ti gupai aYekova na Yesu amangihe furani, Yesu afu zinahe furani ani du pati Tingida Pakpio ko nga gu ninaamanga na agarã dunduko. (Rk. 22:​19, 20) Rogo gi garã re, i nika manga Tingida Pakpio Yesu Rago Biama, Zerekpe 2, 2026. Zanga kapa, ani dunduko namanga mbakadapai tipa kadu pati ni. Ani nika gbia undo ni bakerehe ka ani di regbo ti agu aregbo ninaandu kuti Tingida Pakpio Yesu ka berãkurii gupai aYekova na Wiriko namangihe furani. w25.01 20 ¶1-2

Mo ima rengba kaa wirikapai kindi tipa gu nyemuse Yekova Mbori na Kristo Yesu nayuguhe furani ni ndu mo kumbatayo kindi kaa berãkuriihe. Rogo agu aposo yo du mbata fu Tingida Pakpio Yesu na tifuoho rogo gi garã re, mo ima rengba ka geda Kitabu Wene Pangbanga sa watadu ni dunguhe sirisiri. Ka mo asadingo ka geda dungu akapita ti bangisa regbo sa ya. Kuba gure, mo gedihe zezeredi na kini ngere tipa gu kura nduapai si aida ani kpinyemu aYekova na Yesu ti ni. Na kini pe agu apai fu aboro mo na wirikihe ti regbo gamo gedapai. Ka si ngia mo ima du rogo rengo yo tipa dungu agarã, mo ima rengba ka bakabangiro singia vovo apai kindi ho foro si aida mo wirikihe tipa ga Mbori ruru sarangbanga, gako nyemuse, na motumo tumorii. Nirengo, ani nikaa wirika vovo apai kindi tipa agi apai re. Sidu, ginipai rengbe mo ka mangaha? Mo gedi na ki wisigi gu wene apai du rogo gaani awaraga nga gu du mburuhe ri Baibiri. w25.01 24-25 ¶13-15