Abaakumba nika asada ka wirika Yekova nga gu ko nayugo nunga fu agu aboro i nakusi yo kusayo rogo dungurati. Ni kpiapai, mbata kusayo, Yekova aasungo ngo asungo tipa gako aboro nangia aYisaraere saberã yo mbata fu ko asadi ka undo yo te. Kuba gure, ko akedi gako anebi fuo yo, zavura mbata fu i mangi saberã. Yekova ape gupai fu Osea nga ko mbupai fu diako na ki di ri berewe wa si avura du vurũ nga ri aamanga ingapai kindi. Ngba gi gene re, Yekova ayugu gupai fu gako aboro nga ko na bakere nunga tiko. (Osea 3:1; Mara. 3:7) Agu aKristano nga abaakumba nawirika Yekova ni kpiyo nyemu gupai nga boro ingapai sa gani berã na ki karaga tini ku rogo dungurati, na i asangaha fu ni ni kpakarakpakaraha ni mangihe wo te. Ga Yesu sanza nga ga ingiingi, paranga, bako aoro “ki ti ku goko yo, ki dungo (wiriko) gbe.” (Rk. 15:20) Oni bingo gupai nga, ba gi paranga re aasungudongo wiriko tipa ko ye mbata ka ho mbupai te. Ono ba gu paranga re azubo koyo du wiriko ni mbiko ko aima kpinyemu ko. w24.08 28 ¶7-8

Gipai re nayugo gupai nga Yekova akánga na gako tatamana kina tipa tiko te. Ko nagamaha agama kpaima fu kura aboro. Yakoba ape gupai berewe a nga ho Yekova afu tatamana ni, ko namangaha wo ka ko “azinga nga fu boro ya,” watadu “zanga bi kina gu gbegberẽpai du ti boro.” Ko aidanga gupai nga ani du na gberãrago ho ani asanako ni tipa gako ngbembatayo te. Nirengo, ko nazungodi rani nga ani gbataha. (Snz. 2:​1-6) Na ginipai tigaha du tipa rani? Ya mo ani rengbe ka wirika Yekova ni gama ani gaani tatamana? (Tam. 32:8) Ga Yekova aboro na dungu amomu beyo ka pe gupai i nawirikihe. Ni kpiapai, ani ni naaraba vovo aboro araba ti kura aregbo gene tungusapai yo. Abaakumba ninaaundo amoundo abaakumba ni zerangbaduse gbiati agu awirina nga akumba niima zio bapatiza tipa i wiriki wai ka manga agu asunge i afuhe fuyo rogo dungurati. Na agu aboro du na bakere inohe rogo sunge meka arago gbiati bandaha naundo agu aboro adunga na bakere inohe ya tipa i mangisunge mekaarago nga ga siokrasia. w24.09 28-29 ¶11-12

Awirina, tipa oni rẽ ka da ni bakumba, si naida oni du ‘zanga pai ti rimoroni,’ naida ka ya, oni du na wene rimo rogo dungurati bambiko si naida gaani mangaapai du ni wenehe zanga gbarasa rimo. (1 Tim. 3:2) Kurii gure, si naida dezirero du ni wene he bangiri agu yo du zegi yo. Nirengo, agu aboro airisongo Yekova ya ima rengba ka fura gbegberẽ bara gamo aida. Ono si aidanga i du na ndupai ka kapa kuti gamo padu ni ruruse na kuti gamo padu ni wene boro te. (Dan. 6:​4, 5) Mo sananga tiro nga, ‘Ya mo mi na wene rimo rogo dungurati na awirina na zavura na agu aboro airisongo Yekova ya?’ Ka singia mo nga gu boro ‘nakpi nyemu gupai ngba angba,’ mo nikaa ngera kina tipa wene apai rogo aboro yo na kini tambua yo tipa gayo wene asino. (Tito 1:8) Mo nadu a na ngbarago ka manga wene apai fu kura aboro, zavura ka manga gupai si naida nga mo mangihe ya. Tipagine du gu sino re ti ni na nyanyakipaha fu abaakumba? Bambiko i namangasunge gbe na gayo regbo du na nyanyakipaha ka ngerafuo akandoro rogo dungurati na ka ngerafuo kura asunge. (1 Pet. 5:​1-3) Wa vura duhe wo, gu ngbarago i agbiaha ti undo kura aboro ima susa pa ai agu apai i ambupaha.—Amo. 20:35. w24.11 20 ¶3; 21 ¶4-5

Amoundo abaakumba namanga nyanyakipa sunge rogo dungurati. Gu mokedi nangia Pauro abi gi ruru awirina re na nyanyakipa yo. Ni kpiapai, ho Pauro aakepai ni fu agu aKristano nadu Firipoi yo, ko afu sene fu amoundo abaakumba gbiati abaakumba. (Frp. 1:1) Badungu agu awirina nga akumba niima zio bapatiza nagbia ngbarago ti sunge moundo abaakumba ka si vura du nga i nga paranga aboro watadu sosono aboro. Ni kpiapai, Devan adu na garãko nga 18 ho ko ada ni ni moundo abaakumba. Ono Luis ada ni moundo abaakumba ho garãko asusi 50 ni. Waigu ko abi mangasunge ni moundo abaakumba? Ko aya: “Mi na bakere ngbarago ka mangasunge fu awirinami rogo dungurati ngba gi gene re. I ima yugo bakere nyemuse fere, na awere, mi ima rengba ka yugo gimi nyemuse fuyo. Badungu amoundo abaakumba du na kina gu bipai re!” Ka si du nga mo nga gu wirina nga kumba niima zio bapatiza na ata danga ni moundo abaakumba ya, ya mo mo rengbe ka mangaha ni gamo sasa ka da ni moundo abaakumba? w24.11 14 ¶1-3

Bakindo Izikiya nangia ga aYudo ko aawoka nikerehe. Gu nebi nangia Yesaya agumbapa ga Yekova pangbanga tipa Izikiya nga ko nika kpi akpi be gako kaza. (2 Aba. 20:1) Si aangera wa maabangirise aadunga ho berewe tipa Izikiya te. Rago agberẽ nikerehe ti Izikiya na gu pangbanga re si ki sa ko ko kpari ni bakerehe. Ko azungodi Yekova tipa undo. Ho Yekova agi ga Izikiya kpee ni na ki bi gako aume, nungako aziko na ko ki ya fuko: “Mi gi ga kpee. Mi nibi aumero. Mo ngére, mi ahusa ro.” Vurube gu nebi nangia Yesaya, Yekova akidohe ka yugo inapai fu Izikiya nigizosi ko rame ko na ki batasi Yerusarema be aAsuro. (2 Aba. 20:​4-6) Ginipai rengbe mo ka mangaha ka si du nga mo na kaza tiro si angera wa zigaha ti ni te? Mo ndu ko yo du Yekova ni rogo kparakpee yo, zavura kini kpari ni aume. Baibiri nakido rani nga “Ba inaapai, nga Mbori wasa dunduko” afu wasa furani rogo gaani aasada dunduko.—2 Kor. 1:​3, 4. w24.12 24 ¶15-17

Nairiwo gu pa ngbarago nika ngiaha re ka dia agu aboro kugume i nika zingisayo be kpio! Mo berẽnga pa wai a mo nika gbia ngbarago ti wirikapai tipa Yekova ni wirika mo pai tipa gu badungu ahe ko akusihe. (Tam. 104:24; Yes. 11:9) Na gu ngba angba kisusi nga, mo amanganga ingapai te, sidu, mo nika du na rengba ka iriso Yekova na ka mo asananga ko tipa mbupai ya! Ya mo mo naida ka mbu pa agi amaku du kumbatayo re ka “ngi tipa rago ngbutuko rogo gu ngbarago nga ga ingaapai”? (Eb. 11:25) Wagusa te! He ho rogo gi zegino re awere ngba kisusi gu bawene raka ani nika gbiaha kumbatayo te. Mo tingidi gupai nga pa Paradizo auru kpotosende anyenga kindi ni gupai ani nikaa maa bangirani tipaha te. Niyangaraha, si nika ngia gu ba ani nikaa raka rogoho na aˈuru dunduko. Na gipai re nika manga bambiko Yekova aima kpinyemu rani na ki fu Wiriko ko kpi tipa rani! w25.01 29 ¶12

Gu buku nga AEbere fura tipa dungu aboro nga aguyo naadu na idapase kuti Yekova. Boro sa dagba agu aboro re naadu na bakere idapase nga Moize. (Eb. 3:​2-5; 11:​23-25) Mbori aima ngerefuo yo, Ko afu riahe na ime fuyo tipa gupai nga i raki mbikoho ngbakungbo yo nga gu ba ahe akuranga gbe rogoho ya. (Gate 15:​22-25; Tam. 78:​23-25) Ono tifuo garã sa kusa, wa vura duhe nga Moize adu na gi nyanyaki idapase re na ki kusi aYisaraere Ezipeta yo, Moize atona ka kapa singia Yekova afu pasio fuyo a wa gu Ko apehe. Moize ainongo wai ka Yekova arengbe ka fu pasio si ki rengbe na gi dungu amirioni aboro naadu ngbakungba yo re te. Yekova afu karagapai fu Moize ni sanako ko na gu sanahe nga: “Be Yekova ni guru he?” (Geda 11:​21-23.) Gupai Yekova aasana Moize na ni nga, ‘Ya mo mo naberã gupai nga ka mi mangingo gupai gumba mi he nga mi nika mangaha te?’ w25.03 26 ¶1-2

Ya mo si rẽarẽ ani pe gupai nga agu apai dunduko namangi ti regbo Ime Akangbii aarukuba gupai nika manga kumbatayo? Karagapai nga oó. Tipagine? Bambiko Baibiri apenga ha wo te. Kina rengo ngaha nga, Yesu aringbisi gu rago nangia ga Noa kuti paye ko. Ono ko aapenga gupai nga agu apai dunduko namangi ti rago Noa nika du na bakere digisidigisi sangbaha kumbatayo wagu nga wai Yekova akisi ngbadimo bakere kurungba te. Ginipai Noa amangihe ho ko agi gu zahe ni Yekova afuhe? Ko ayugu gupai nga ko adu na idapase ni mbakada ko kurungba. (Eb. 11:7; 1 Pet. 3:20) Wakina gure a, agu aboro nagia gu wene pangbanga du tipa ga Mbori Kindo du wa ka i yugu gayo idapase rogo mangaapai yo. (Amo. 3:​17-20) Petero ayambu Noa nga “batungusi rurupai.” Areme, ani naˈasada tirani zaaza ka tungusapai fu aboro dunduko rogo zegino. Ono ka ani vura manga asadatise amanga wai vurũ, ani adunga na rengba ka tungusapai fu aboro dunduko mbata fu digido zegino ye te. w24.05 9-10 ¶4-5

Si naida ani nangera tipa agene ka yugo weneringise na irisa fu abakurea Yekova. (Rom. 12:10) Ngba gini gene? Gene sa dagba agu akuraha yo du mburuhe ri Atambuahe 15:4 nga, gu gino du rogo ga Yekova bamburoko yo, “ni nazunga he ka si vura mbusa ni, ni asa nga ha te.” Ka ani aadigisongo gaani akidohe ya, ani nika ba gberãrago ti kura aboro. (Mt. 5:37) Ni kpiapai, Yekova naida kumbakuadee na dereakumba kakuti gu gayo mozunga i amangihe ho i aamanga rogatise ni. Ko na ngbarago a ho ko abi avunguagude ni i ni kakuti agu akidohe i amangihe fu awiriyo. Mbiko gupai nga ani ima kpinyemu Mbori na kura aboro, ani nika manga gupai rengbe omerani na ni ka kakuti gaani akidohe. Gu kura gene ani ayugo irisa fu abakurea Mbori ngbaha nga, ni dia ani yo kugume na ki ngia aboro gamahe. (Rom. 12:13) Dia regbo na awirinarani angianga kina ti regbo adunguratise na tungusapai sa ya, ima rengba ka nyakasa gaani pabakure na yo gbiati Yekova. Kurigure, ho ani adia aboro ni kugume, gure nga ani nawirika Yekova. w24.06 12 ¶15-16

Yekova nayugo bara rengo fu agu aboro du na umbasitise. (Mt. 11:25) Mbiko umbasitise, ani naida na gu undo nga ga wirika rengo. (Amo. 8:​30, 31) Ono wa vura duhe wo, si naida ani du na rubangirise tipa zanga du na rũko. Ho du ani ni na rũko, ani ima rengba ka tona kaa bi gupai nga gaani abipai du ni ruruhe kina wai du agu abangua rengo nga ga Baibiri gbiati agu arugapai naye be ga Yekova riigbu. Tipa ka nye na umbasitise, si naida ani tingidipa wai du ani tooni ka i ringbisi rani kuti Yekova. (Tam. 8:​3, 4) Ani ima rengba a ka sana Yekova ko undo rani tipa ani du na umbasitise na ni agu aboro naida ka wirikapai. Yekova nika undo rani ani bi gako aberãpai na nyanyakipaha nga gu ani awirikaha vurube Fugoko na vurube gako riigbu susi gaani aberãpai. Ti regbo gamo geda Baibiri, mo ngere tipa agu agopai nayugo gupai nga Yekova nakpinyemu umbasitise na kini sogo rũko, zinga na enda. Na si naida mo asadi nyanyaki a ka du na umbasitise ho mo agbia gu sunge ni nga gu nasa ro mo du na pagbia bero watadu gu nika sa gupai nga dungu aboro inipai tipa ro. w24.07 10 ¶8-9

Natona rogo 1919, Yesu ima mangasunge na tooni badona nga ga aKristano tipa i naangbembatayo rogo sunge tungusapai na kini fu riahe nga ga toro fu apefuoko ti ragoho. (Rk. 12:42) Si tie ziazia nga, Yekova nafu maku afu kurii gu sunge nga ga gu badona re. (Yes. 65:​13, 14) Ka ani adunga ni mbakadimbakadi rani ya, ani arengbenga ka manga gu sunge Yesu nafuhe furani ani mangihe te. (Mt. 28:​19, 20) Ni kpiapai, ka si du nga awirina ho ka yugo gu ba si aida ani tungusipai rogoho te; ka boro naatungusapai rogo ai gu ba ni aida ka tungusaha rogoho. Ani ima rengba ka tungusapai bara dunguhe kina rogo bangisa dagbarago sa, na ka ani atungusanga ha rogo gu kura adagbarago ya. Ya mo mo rengbe ka berã tipa gu kura agene nga gu rengbe ani ngbaha ka gbia undo ni du ani ni mbakadimbakadi rani? Kina wai Yesu ambakadi apefuo ko ho ko adu ni auru kpotosende ane, ko nandu kindi kumbatayo areme a kaa mbakada ga Mbori aboro. w24.04 8-9 ¶2-4

Kaina nangia bambata wiri Adamu na Eva. Wakina kura awiri aAdamu na Eva dunduko, Kaina adi nyemu manga gupai du ni irairaha be avunguko. Kurii gure, Baibiri nape gupai tipa ko nga: “Gako mangaapai nangia gbegberẽapai.” (1 Yo. 3:12) Isoke, si du nga ndu gupai bibi “Kaina na gako motumo angba nga” bangiri Yekova ti ni ho ko afu he ni ya. Kuba gupai nga ko aria gako mangapai, “Kaina ki zingi azinga gbe, kpakpuko ki du na ngbandua.” Ginipai Yekova amangihe fuo gure? Ko afura na Kaina. (Bam. P. 4:​3-7) Oni ini gupai nga Yekova afura ngba wene gene na Kaina na ki pe gupai fuko nga ko nika fu maku afu fuko ka ko mangi gupai du ni wenehe. Yekova afu zahe fu Kaina a nga gako zinga ima rengba ka sa ko ko mangi gbegberẽpai. Si nipa gberãrago nga Kaina aima ká ka giapai. Ko aambunga Yekova ko undo ko tipa ko saberã te. Mbiko gupai nga Kaina aˈadeganga tuko fu Mbori te, ya mo Yekova adiberã nga ko aˈasadanga berewe ka undo ai boro ni mangi saberã te? Ko aamanganga ha wo te. w24.08 10 ¶8

Gu rikaaboro nangia aYisaraere aima du na wene apai kumbatayo si aaida i ngere tipaha. Na ga Yekova amaku, aYisaraere aima rengba ka raka ni gbangaha rogo gu ringara i akidopaha fuyo. Na gu ringara re aima du ni bawenehe na si ki kusi dungu ariahe! Moize asakipai fuyo tipa ha ki ya: “Bakere abaakporo ni wene he, nga gu oni adudua nga ha ya, na abambu hi ahi na wene ahe, nga gu oni ahisa nga ha na ni ya, na agu adueime ni getekegeteke he, oni ageteka nga ha ya, aati bakakue na angua aeraya, nga gu oni arũka nga ha a ya (Pa Rug. 6:​10, 11) Moize aima fu zahe a fu aYisaraere. Tipa i naandu kindi kumbatayo kaa raka rogo gayo bawene ringara, si aaida i naamangapai kuti ga Yekova arugute. Moize azungodi yo i “sía unga” ni degayó tuyo fu Yekova na kini ‘ka kuti ko.’ (Pa Rug. 30:20) Ono tie, aYisaraere aagianga sangba Yekova te. Sidu, wa regbo aasusa, Mbori ambu aSuro na kusa, aBabera i dibeyo na ki di yo kusayo rogo gayo ringara.—2 Aba. 17:​6-8, 13, 14; 2 Peka 36:​15-17, 20. w24.11 9 ¶5-6

Badungu aboro areme nape gupai nga i na idapase kuti Yesu na kini yambu ko nga gayo batasi. (Yo. 6:29) Ono kura dungu apai kinaho si aidaha. Badungu aboro adu kinaho Gariraya yo nape gupai ti tonatonaha nga i na idapase kuti Yesu ono i aima mbu pekafuo ko. Tipagine i ambu pekafuo ko ti ni? Badungu aboro dagba gu rimbasa re aapekafuo Yesu mbiko ko afu guhe fuyo i aaidaha. I aaida ko husi yo, kini fu riahe fuyo, na kini pe agu apai fuyo i aakpinyemu ka giaha. Ono Yesu ayugu gupai nga, kura dungu apai kinaho si aidaha be ndikidi apefuoko. Anga gu yangarapai ko aye tipaha ku auru kpotosende nga ka mbisa ga aboro nyemupai nga ga borose te. Si aaida i ye fuoko, nayugo gupai nga i degetuyo fuko na kini mangi pai kuti agu apai dunduko ko ayuguhe.—Yo. 5:40. w24.12 12 ¶12-13

Ginipai rengbe ka undo kumbakudee ni dibe gbegberẽ mangapai na agu apai nayugo zanga irisa? Niima rengba ka manga ome ka wirika Yesu. Gu gene ko aamangapai na gako abawiriki ngbaha nga wene kpiapai tipa wai si aida kumbakudee mangipai na diako. Ani wisigingo gupai rengbe kumbakuadee ka wirikaha ti gu gene Yesu anaamangapai na gako amokedi na ti gu gene ko afura na yo ngbaha. Yesu anidu ti aregbo dunduko na wene sino koyo du gako amokedi ni na ko anaamangapai na yo rogo irisayo. Ko aamanganga pai na yo na zinga watadu ngba gbegberẽ gene te. Yesu aamanganga sunge na gako ome ka sa yo i naabi tiyo nga i rurungbura watadu ka sayo i naagunde beko te. Kuba gure, ko du nanaamangapai fuyo ni umbasitise. (Yo. 13:​12-17) Ko aya fu gako abawiriki wẽ: Oni “wiriki pare; bambiko bayee boro nga mi nga irazerangbaduse, oni ki bi ongoda tipa mbisimoroni.” (Mt. 11:​28-30) Ani ini gupai nga Yesu angia bayee boro. Anga bayee boro nga rurungbura boro te. Ni ngangarã tipa ka zatini ti kura apai. Ho aboro amanga gupai ni ka sa ni nizingi, ni nanye zezeredi na ki zatini. w25.01 10 ¶10-11

Wa digido gi sino raka re ambeda, ani ima rengba kadu na gu kido nga zingo marã nikaa kio kina kumbatayo. Agu akpakarapai nga ga birĩ-zogarago, vura dagba abanzengere, gberãngo, watadu vovo riri kaza ima rengba ka sa gupai nga ani mangisunge na marã ni bakerehe watadu ani ima rengba ka zanga gaani sunge, agu ahe du berani watadu kpurani. Ginipai rengbe ka undo rani tipa ani mangi agu adiaberã nga gu nika yugo gupai nga ani nakido kuti Yekova? Si ni nyanyakipa pai mo peke pa gamo akpakarapai fu Yekova. Gipai re nika undo ro ni bakerehe. Mo sana ko tipa tatamana tipa ka manga agu adiaberã du ni wenehe na tipa ko undo ro mo nye zezeredi na ka zanga ‘saka pai kpotoro yo’ tipa gamo pai. (Rk. 12:​29-31) Mo naasana ko kindi tipa ko undo ro mo rengbe kina be agu ahe du bero. (1 Tim. 6:​7, 8) Mo mangi wetekapai rogo gaani awaraga yo tipa ka gbia agu aberãpai rengbe mo ka mangapai kutini ho du mo ni na zingo marã. Dungu aboro ima pe gupai nga agu avidio na kekeapai du rogo jw.org tipa marã ima undo yo. w25.03 28-29 ¶10-11

Kusa, gu mokedi nangia Petero ayugu gupai nga ko aaida ka berã wagu Yekova aberã. Ga Yekova regbo aima da tipa aboro rogo kura angbatunga da ni papara gako aboro. Mbori anungusi Petero ko ndu ka tungusapai fu Korunerio nga gu bambata Gendiria nada ni Kristano. Dedede, aYudo anaane aGendiria ane, sidu, si aaida Petero mangi ariapai ti gako berãpai tipa wa ka ko du na rengba ka tungusapai fu aGendiria. Ho Petero aini ga Mbori berãpai ni tipa aGendiria, ko amangi ariapai ti gako bipai. Ni sangbanaha, ho i akedi sunge ni fuo ko, ko andu “ka pai adu nga ya” watadu ka pai adunga ho ka ká nako ti nduge ya. (Amo. 10 29) Ko atungusipai fu Korunerio na gako aborokporo na i ki zi bapatiza. (Amo. 10:​21-23, 34, 35, 44-48) Fuo agarã kusa, Petero angarasi aKristano tipa ini berẽ “kina ku bani sa.” (1 Pet. 3:8) Ani rengbe kaa berã kina ku bani sa na awirinarani ka si dunga ani nika wirika gu gene Yekova aberã ngbaha nga gu ani awirikaha rogo Baibiri yo. w25.03 9-10 ¶7-8

Gu gene aboro aberã ngbaha ima da kia ti wai Yekova aberã. (Snz. 17:15) Sidu tie, si ni nyanyakipa pai furani tipa ani ini iraira aberã na ki ká ha. Si aidanga ani mbu asogorani tipa i sarani ani zanga gaani wingbaduse na ki mbu iriso Yekova te. Ani nadia gu rugute kugume na ngbadurani yo dũ gu mokedi nangia Pauro afuhe fu agu aKristano nangia aEbere nga ka susa kumbatayo dati nyaka rogo toroyo. Gure nakoda wisigo gu dudunguro inohe nga ga rengo na kini berẽ ngba gu gene Yekova aberã ngbaha. Si naida ani naamanga gipai re amanga kindi zavura tifuo zio ani bapatiza. Ka si vura du nga ani ima dia gbanga regbo kurogo rengo yo, ani dunduko si aida ani naagedapai na kini wisigi Fugo Mbori. (Tam. 1:2) Wisigo Baibiri dedede nika undo rani tipa ani nyakasi gaani idapase, nga gu sino Pauro apehe fu agu aKristano nangia aEbere nga si naida i du na ni.—Eb. 11:​1, 6. w24.09 10 ¶7-8

Ka ani du na mbembedi pabakure na Yekova, si nika du furani taata tipa ani nye ni rururani fuko. Gure nga gupai namangi tipa Yosefa. Ko aru nyanyaki ka kà wasiwasi kodaba. Ko aima inoho nga si nika ba gberãrago ti Yekova. (Bam. P. 39:9) Tipa kadu na mbembedi pabakure na Yekova, si naida ani gbia regbo ka kpara fuko na ka wisigo Fugoko. Rogo gi gene re, gaani pabakure na ko nika sona. Ka gaani pabakure du mbembedi na Yekova wa ga Yosefa, ani adunga na nyemu ka manga gupai nika ba gberãrago tiko te. Agu aboro mbu kido kuti Yekova, si taata fuyo i zanga du ni ruruyo fuko. Ani bingo gupai namangi tipa aYisaraere ho i adu ni ngbakungbo yo. I aima ino gupai nga Yekova kina ti ni, ono i atona kaa kapa singia ko rengbe ka ngerafuo gayo azingo. (Gate 17:​2, 7) Ni sangbanaha, i asamungu kuti Mbori. Nirengo, ani aidanga ka pekafuo gayo gbegberẽ kpiapai te.—Eb. 3:12. w24.06 24 ¶14-15

Digido gi sino raka nga ga gi zegino re ima mbeda, na si naida ani ini gupai nga dungu akpakarapai nika du nga gu nika imisa rani na ani kini kpari. A wa ani nibihe ti agu akpiapai nangia ga Ana, Davide, gbiati Bakindo Izikiya, Yekova nabi rani abi ho ani akpara ni, na ko nadu na gberãrago. Gaani aume nirengo na nyanyakipa ra fuko. Sidu, ho ani agbiatirani ni na agu apai nafuda rani, nirengo, si naida ani kusuko kpotorani yo fu Yekova rogo kpee yo. Ka ani ya kparanga tirani ti agu awirinarani nga aboro nyemuse du rogo dungurati ya. Na ani naandunga andu kindi kumbatayo kaa gbia wasa ti gu wene afugo du rogo Baibiri yo re. Ani ima rengba kadu na gu kido nga ka ani aandu kindi kumbatayo kaa hipai niruru rani, Yekova nika fu mosoro afu furani. Gipai re nakoda gu wene akidohe nga kumbatayo, ko awega agu aume ti bangirani naye mbiko arungo, ho boro asamungu ni kuti rani, gbiati zanga du na maabangirise. (Yugo. 21:4) Tifuo gure, ani nikaa kpara ni kina agu aume nga ga ngbarago ra. w24.12 20 ¶3; 25 ¶19

Yekova ima sia rani tipa ani du ni gako aDezire, na ko nakidohe tipa ka undo rani ani du na wingbaduse. (Yere. 43:​10, 11) Ani bingo agene biama ko amanga gupai re ngbaha. Bambataha nga, Yesu na ani ti agu aregbo dũ ani atungusa wene pangbanga. (Mt. 28:​18-20) Uepai nga, Yekova ima sia amaraika tipa i undo rani. (Yugo. 14:6) Biatapai nga, Yekova ima fu ziazia toro tipa si du ni gaani moundo tipa ka tingida rani na agu apai ani nawirikihe. (Yo. 14:​25, 26) Biama pai nga, Yekova ima fu awirinarani ani naandu na yo gene tungusapai yo. Na ga Yekova undo gbiati gu undo nga ga awirinarani, ani na agu ahe dunduko berani si aidaha tipa kadu na wingbaduse na kaa tungusapai kindi. Ka si du nga rago ni naagberã tiro ho mo abi kina bete aboro ni tiikporo mo sananga tiro nga: ‘Wari du aboro ni awere rogo gimi dagbarago?’ (Amo. 16:13) ‘Ya mo i basunge yo watadu bangbeahe yo?’ Kangia wo duhe, ya mo mo rengbe ka gbia dungu aboro ka mo amanga dezirepai bangiri gene? w24.04 17 ¶10-11

Ka singia mo nga kumbakudee na mo naida ka rẽ ka da ni bakumba, si naida gamo aborokporo du a ni wene kpiapai fu kura aboro. Sidu, si naida mo ‘nazoga kpuro tigamo wenengai.’ Gipai re nayugo gupai nga, si naida mo naangerafuo gamo aborokporo rogo nyemuse yo na kini mangi wene adiaberã fu gamo aborokporo. Gipai re nakoda ngbembatayo rogo manga agu apai nabipa gaoni irisombori. Ka singia mo nga baagude, si naida mo nizogo rukutu awiro ni ‘zera.’ (1 Tim. 3:4) Si naida mo yugupai fuyo na kini rabayo rogo nyemuse yo. Rengo nga ha nga, mo naida i du na ngbarago, na kini momu, na kini ngi mbaro kina wai si naaida agude du. Ono si naida aida a mo yugupai fuyo i naagia sangbaro, kini irisi kura aboro na kini mangipai ngba wene gene. Berewe, si naida mo undo awiro i sonosi wene pagume na Yekova, i naaraka ringbisihe kuti gu bangua arengo nga ga Ziazia Kekeapai, na i mangi sonakumbatayo tipa ka zio bapatiza. w24.11 22 ¶10-11

Kina wai ani nikaa ndu gene tungusapai yo, kinawo a ani nika bi wai Yekova aundo rani na gaani kido kutiko nika nyaka gbe. (1 Kor. 3:9) Yekova aringbisanga gupai mo amangaha kuti gupai kura aboro amangaha te. Ko na tambuahe tipa gu nyemuse du mo na ni tipa ko. Ko na ngbarago ho ko abi wai ni du mo na tambuahe tipa gu gako nyanyakipa gamahe nga motumo. (1 Sam. 16:7; Mk. 12:​41-44) Motumo nasaha taata furani tipa i rengbe ka mbupai furani ti gaani aingapai, ani ki rengbe kadu ni abakurea Yekova, na kidu na maabangirise ka raka nyeanye kindi. Ani yugungo gaani tambuahe ayugo fu Yekova tipa gako nyemuse nga gu nafõngbadu ko yo tipa ko fu agi amaku re furani. (1 Yo. 4:19) Ani yugungo gaani tambuahe ayugo a fu Yesu nga guko nakpinyemu rani ni bakerehe na ki fu ungako tipa rani! w25.01 31 ¶16-18

Oni bingo wai bake papara Atambuahe 73 abi tiko. Ko abi agu aboro naairisongo Yekova wa ka i ya kpotoyo adu wenengai, i ki ngia airakumuko, na si kini ngere wa akpakarapai ho i aagbia tiyo na ni te. (Tam. 73:​3-5, 12) Ho ko abi gupai ni nga si aangera wa raka yo adu ni bawenehe, si asako ko bihe nga sunge aadunga ti gu ome ko aamangaha ka iriso Yekova te. Ko adu ni ‘mbusimbusi ko na aˈuru pitipiti’ be gi gbegberẽ berã re. (Tam. 73:​13, 14) Waigu ko amangipai kuti gi iraira bipai re? Gu bake papara Atambuahe re andu ku rogo ga Yekova kparakpara ziazia ba. (Tam. 73:​16-18) Yo du ko arengbe ka berã ni wenengai. Ko arugutiko na gupai nga, wa vura duhe nga kura aboro aaraka wene raka, i aadunga na maabangirise ka raka kumbatayo te. Sidu, ko aadunga berewe na gberãrago te na ko aima du na gu kido nga iriso Yekova nangia gu bawene diaberã ko amangihe. Ni sangbanaha, ko azambuasi gako diaberã tipa kaa ndu kumbatayo kindi kaa iriso Yekova.—Tam. 73:​23-28. w24.10 27 ¶11-12

Yekova ima sia rani ani du ni gako “adezire.” (Yere. 43:​10-12) Bete agarã kusayo, waraga Riigbu Bipasunge akehe ape gupai nga: “Gu bakerepa irisa rengbe boro kadu na ni nga i naayamba ni nga boro sa dagba aDezire Yekova yo. Tipagine duhe ti ni wo? Oni bingo gi kpiapai re. Ka si du nga mo naida boro du ni dezire kuba ro ngbanga yo, mo rengbe ka sia gu boro nga guni mo naima ino ni na kidu na kido kuti ni, na gu boro du rimo ni wenengai aboro narengbe ka kido kuti gupai ni apehe. Wa Yekova nasia rani tipa ani du ni gako aDezire, ko nayugo gupai nga ko ima ino rani wenengai na ko na gu kido nga ani nika pe gupai ape fu kura aboro nga ko nga gu yangara ndikidi Mbori. Si nipa irisa furani tipa ani du ni gako aDezire, na ani namangasunge na agu amamu dunduko ani agbiaha tipa ku yugo rimoko fu kura boro, na ki yuguhe nga agu aziree dunduko aboro apehe tipa ko rengo nga ha te. Ni manga ani he wo, ani naraka kuti gu rimo du kurirani nga aDezire Yekova!—Rom. 10:​13-15. w24.05 18 ¶13

Mangapai fu kura aboro aye na bakere ngbarago fu Yesu. Ti kura regbo sa ho Yesu aatungusapai ni fu bakere rimbasa aboro, ko amangi kurapai kisusi gu gbua nga ka yugopai fuyo. Ko aangera angera a fuo gayo azingo nangia ga borose. Ko akusi riahe ngba iiriwo gene na ki fuhe fu gako abawiriki i kparakaha ti aboro. (Mk. 6:41) Ko ayugu wai fu gako abawiriki si aida i naaundo kura aboro ni mangako gipai re. Ko ayugu gupai fuyo a nga, ngbatunga agi asunge re na nyanyakipa ha. Oni berẽnga pa gu ngbarago amokedi adu na ni tipa ka du na rengba ka mangasunge kina sa na Yesu ka kparaka gi riahe ko akusihe ngba iiriwo gene re fu aboro daho i ‘ari he dunduko, i ki mbiki’ ni! (Mk. 6:42) Rengo ngaha nga, anga gere nga gu yangara regbo Yesu amoi gu nyemupai nga ga gu kura aboro mbatayo fu gako te. Ko amangisunge na gako raka auru kpotosende dunduko ka undo kura aboro. (Mt. 4:23) Yesu adu na bakere ngbarago ka yugopai fu kura aboro na ka ngerafuo gayo azingo. w24.11 16 ¶10-11

Wa apai agberã kina kumbatayo “rogo kusa rago,” zanga kapa, ani nika duadu  na bakere momu berani ka fu agu ahe fu awirinarani i aidaha. Ani ima rengba a ka fu gu wasa gbiati gu nyemuse awirinarani aidaha. Gene sa dagba agu akuraha yo rengbe ani ka manga gipai re ngbaha nga ni fura ani na yo ho i aye ni tipa adunguratise na kini fu wasa fuyo. Sidu, ho awirinarani aye ni tipa adunguratise, si naida ani mangi ai gupai rengbe ani ka mangaha tipa ka sayo i bihe nga i nakpinyemu yo akpi, i ki gbia wasa, na i ki bihe nga ba yo gu ngbaangba. Abaakumba ima rengba ka undo awirinayo ti kpakarakpakara aregbo. Ho du gberãngo ni watadu gu tunguotunguo pai nga ga kaza kpotose, abaakumba namanga mbakadapai niipo tipa ka undo awirinayo. Abaakumba nafu undo a rogo toro yo. Awirina nika du wenengai tipa ka sana bakumba tipa undo ka i ini gupai nga ko nika fura wenengai fuyo, ki degetuko fuyo, na ki asadi ka rugatiko na pa gayo bipai. Ngbatunga agu asino re naundo kura aboro i bihe nga i nakpinyemu yo akpi si kini saha fuyo taata i mangipai kuti agu arugapai bakumba narengbe ka fuhe nga gu du mburuhe rii Baibiri.—1 Tesa. 2:​7, 8, 11. w24.06 29 ¶12-13

Si aidanga ani berẽ gupai nga, ka rago gberẽnga ti Mbori mbiko gupai nga ko na tandu apai dunduko ya te! Ko akusi aboro na gu tandu nga ga du na ngbarago watadu gberãrago. Na mbiko gupai nga Baibiri nape gupai nga ko akusi rani rogo kpiako yo, gure nayugo gupai nga ko nidu adu a na ngbarago watadu gberãrago. Baibiri nasakapai tipa ko nga, “nirungosi” ko na “nizingisi” ko watadu ko adu na imisiri kpotoko yo na ki du na rungo. (Tam. 78:​40, 41) Yekova aima du na gberãrago ho ko abi aboro ni i nirungosi Wiriko na ki imi ko! Motumo tumorii nayugo gupai furani nga, boro ho kpinyemu rani wa gu Yekova nakpinyemurani te—zavura agumerani watadu bawene bakurearani a te. (Rom. 8:​32, 38, 39.) Zanga kapa, Yekova kpinyemu rani susi wai ani nakpinyemu tirani. Ya mo mo naida ka raka nyeanye kindi? Yekova naida gupai nga mo raki nyeanye kindi kisusi wai mo aidaha. Ya mo mo naida i mbupai foro ti gamo aingapai? Yekova naida i mbupai foro kisusi wai mo aidaha. Gupai ko aidaha berani gbua nga, ani yugu gaani tambuahe tipa gi nyanyakipa gamahe nga motumo re, kidu na idapase kuti ko, na kini gisangbako. Motumo tumorii nga gu nyanyakipa gamahe nga gu nayugo ga Yekova dudunguro nyemuse koyo du ani ni. —Batu. 3:11. w25.01 22-23 ¶8-9

Ani dunduko ninaamanga adiaberã amanga riimburu gupai ani abihe, na gu ani agiaha ti kura aregbo. Ono ka si du nga ani namanga nyanyaki adiaberã riimburu agu apai ani abihe na kini gihe, ani ima rengba ka manga iraira diaberã. Tipagine? Bambiko agu apai ani abihe na kini gihe ti aregbo dunduko ni ruruhe te. Ka ani mangi adiaberã riimburu agu apai ani abihe na kini gihe, niyangaraha, ani nika manga gupai amanga nga gu Yekova aidanga ani mangihe ya. (Batu. 11:9; Mt. 24:​37-39) Ono ho ani amanga adiaberã ni riimburu gaani idapase, ani nika “ngba ti Gbia.” Mangapai kuti ga Mbori arugute nasarani ani du na zereda nga ga berãse yo na ani kidu na ndikidi ngbarago. (Tam. 16:​8, 9; Yes. 48:​17, 18) Na ka ani andu kindi kumbatayo kaa ta rogo idapase yo, ani nika raka nyeanye kindi. (2 Kor. 4:18) Waigu rengbe ani ka inoho singia ani nata rogo idapase yo watadu rogo bipai yo? Gini apai nasarani ani mangi agu adiaberã re? Ya mo ani namanga gaani adiaberã riimburu agu ahe gbua ani abihe abi? Watadu ani nakido kuti agu arugute naye be Yekova? w25.03 20-21 ¶3-4

Ani dunduko ni basasa ima rengba ka mangapai ka sa gu paradizo nga ga toro tipa si ngba ti kura aboro. Tipa ka manga gipai re, si naida ani wiriki Yekova. Ko asanga aboro ngba ome tipa i da ni papara gako riigbu te. Kuba gure, ko na “gbe” aboro koyo du ko ni ngba zezeredi gene. (Yo. 6:44; Yere. 31:3) Agu aboro du na wene ngbaduyo yo nga aguyo nawirikapai tipa ga Yekova nyemuse na wene asino naye koyo du ko ni. Waigu gaani wene asino na mangaapai narengbe ka gbe aboro i ye ku rogo gu paradizo nga ga toro? Gene sa nga nimanga ani pai na agu awirinarani nga airisi Yekova rogo nyemuse yo na weneringise. Ho vovo aboro aye ni tipa gaani adunguratise nga ga adungurati, ani naida i da kuti gu digisopai nga gu nangia ga agu aidipase naye tipa adunguratise rogo gu Korinda nadu mbata. I aima du na rengba ka pe gupai nga: “Mbori du dagba roni yo nirengo.” (1 Kor. 14:​24, 25; Zek. 8:23) Sidu, si naida ani naandu kindi kumbatayo kaa mangapai kuti gu zinahe nga ga gu veresi du areme. w24.04 23-24 ¶16-17