Ani naagbia arugapai dedede nga gu naye be Yekova vurube—abaakumba rogo gaani dungurati, babi adungurati, be-basunge, watadu Riigbu Bipasunge—nga gu naundo rani ani irisi Yekova. Ono ti kura aregbo, ani arengbanga ka ino ndu gupai i afu gu kura arugapai ti ni furani te. Ani ima rengba kadu na kapa singia gu rugapai re ni wenehe. Ani ima rengba ka tona maa berãrani a kuti agu aingahe nga ga agu awirina nafu gu rugapai re. Ho ani ata ni rogo idapase yo, ani na gu kido nga Yekova du nanungusa gako riigbu. Na ni sangbana gipai re, ani regerege ka giasangba na ani namangaha wo na ruru bipai. (Eb. 13:17) Ani ima ino gupai nga ho ani apekafuo rugapai ni, ani naundo dungurati si nye na kodatise. (Ef. 4:​2, 3) Ani ima du na kido kuti Yekova a, na ani ima ino gupai a nga agu awirina nangbe rogo apai yo nga kpakpa aboro, ono ho ani agiasangba ni, Yekova nika fu maku afu furani dunduko. (1 Sam. 15:22) Na ani na idapase a nga, ka si du nga si naida i mangi ariapai ti rugapai, Yekova nika mangaha amanga. w25.03 23-24 ¶13-14

Ani naraka ti bawene regbo! Rogo aˈuru dunduko, ani nabi agu apai Baibiri aima gumbaha si ni da ti rengo. Ni kpiapai, ani nabi, “gu bakindo du ku nodiyo” na “gu bakindo du ku sudiyo” i ni sovura dagbatiyo tipa kadu na ome kurii zegino. (Dan. 11:40) Ani nabi gu wene pangbanga nga ga Kindo i nitungusihe rogo zegino dunduko, na badungu amirioni aboro ima sia ka iriso Yekova. (Yes. 60:22; Mt. 24:14) Na ani nagbia agu ariahe nga ga toro kpaima “ti ragoho.” (Mt. 24:​45-47) Yekova nandu kindi kumbatayo kaa undo rani tipa ani gi rogo gu nyanyakipa apai yo nika manga barambeda kumbatayo. (Snz. 4:18) Ani ima rengba kadu na gu kido nga mbata fu bakere gberãngbi tona, ani nika ino agu apai aino dunduko si nika ida ani inihe tipa ani hipai ni rururani na ki nye ni kodikodi rani ti gu kpakarakpakara regbo re. Wa vura duhe wo, si naida ani ini gupai nga, kuraapai kinaho ani ainongo ho ya nga gu nika manga barambeda kumbatayo. w24.05 8 ¶1-2

Bake papara atambuahe fura tipa gbarasa rimo boro watadu gumbarimo. Ginihe nga kere gumbarimo? Dedede, si nga gumba aziree nga gu rengbe ka gbarasa gu wene rimo du boro na ni. Atambuahe 15:3 natingida rani a na gupai nga, ga Yekova agino nga agu aboro amanganga akurayo gbegberẽ ya, agumbanga gbigbitapai kuti rimo akurayo a ya. (Tam. 15:1) Ginipai rengbe gupai re ka kodaha? Ani ima rengba ka gbarasa rimo boro nipe ani agu apai angbanga ya tipa ni. Oni berẽnga kurii agi akpiapai re: (1) wirina ni dee zorõ tingba mangasunge Kindo ti aregbo dũ, (2) arogotise amanganga sunge berewe Betere yo te, watadu (3) wirina ni kumba amanganga sunge berewe ni bakumba watadu ni moundo abaakumba te. Si rengbe kadu ni gbegberẽpai kaa pe gupai fu kura aboro nga, si wa ka i ya pai kinaho agi awirina re namangihe ni gbegberẽhe na si du nga ndu gupai apai naˈaria ti ni fuyo. Ono tie, si rengbe kadu nga gu ariapai re mangi mbiko dungu nduapai ani ainongo pai tipaha ya. Kurigure, gu boro nga gino rogo ga Yekova bamburoko ni gu boro “amanga nga kurani gbigbita ya, agumba nga gbigbitapai kuti rimo kurani a ya.” w24.06 11 ¶11-13

Tipa ka nyakasa gaani gunde ti Yekova, si naida ani moiberãrani tipa gupai rengbe ka sa ngbarago ti ko rogo agu adiaberã dunduko ani amangaha. Ho mo nikaa geda agu apangbanga ni nga ga Baibiri, mo sananga tiro nga, ‘Ka si adu nga mi du naadu rogo gu bangiriba re, gini diaberã ka mi amangihe?’ Ni kpiapai, mo bingo tiro nga mo nadegaturo kaa gia gupai agu abamoirago naadu bawe apehe fu aYisaraere nga i arengbanga ka diabe aKanano te tingbafuo i moirago rogo gu ringara Yekova akidopa ka fuhe fu awiri aYisaraere. Ya mo ka mo aidi kuti gu pangbanga re na ki tona ka gunde be aboro, watadu ka gamo nyemuse tipa Yekova asa ro mo du na nyemu ka manga gupai nika ngba tiko? Gu riko aYisaraere naadu ti gu regbo re dunduko aidanga kuti gupai nga aYosua na Kareba aape rengo te. Ni sangbana gipai re, i azanga gu mamu nga ga rimo kurogo Ringara Mokido.—Geda 14:​10, 22, 23. w24.07 10 ¶7

Gomere nangia dia gu nebi nangia Osea ambu Osea tipa kura akumba. Ginipai Yekova amangihe? Yekova ini apai tipa boro dunduko ape gupai fu Osea nga: ‘Mo ndú berewe, mo kpí nyemu gu de gu kura kumba nakpi nyemu ri nga debari a; wa Yekova nakpi nyemu awiri aYisaraere, ka i vura sa tiyo fu kura ambori.’ (Osea 3:1; Snz. 16:2) Oni ini gupai nga dia Osea aamanga kere ingapai kindi. Ono Yekova ape gupai fu Osea nga ko mbupai furi na ki di ri ni diako berewe. Na gi kpiapai re, Yekova aaida ka yugopai fu gako aboro tipa wai ko aabi yo. Wa vura duhe nga i aamanga kere gbegberẽ apai kindi, ko akpinyemu yo kindi. Ko aakeda gako anebi kindi tipa i undo yo i saberã yo na ki mangi ariapai rogo gayo raka. Gi kpiapai re nayugo gupai furani nga Yekova ima ino agu apai dunduko du tipa boro, na ko naˈasada ka undo gu boro namanga kere aingapai kindi tipa ni saberã. w24.08 10 ¶7

Si aaida agu aYudo nada ni aKristano mangi bakere aˈariapai na gipai re adunga fuyo taata te. Ti kura regbo sa, aYudo angia ga Yekova kparakpara aboro. Tipa dungu agarã, Yerusarema angia nyanyaki pa kparakpara ba. Gu bakindo naaru kuba Yekova aazogarago yo, na agu aboro naaida ka iriso Yekova aairiso ko yekaru yo Yerusarema yo. Agu aYudo nadu niruru yo dunduko aapekafuo ga Moize aNdiko na agu aNdiko gayo abarumbatayo rogo pambori aayugoho. ANdiko adu kinaho tipa riahe, yeratise, na wai ka mangapai na agu aboro naangianga aYudo ya. Ono tifuo Yesu kpi, Yekova aaidanga na agu amotumo i aafuhe yekaru yo berewe te. Sidu, si aadunga taata fu aYudo tipa i da ni aKristano na ki aria gene gayo irisombori te. (Eb. 10:​1, 4, 10) Zavura agu aKristano naima nyaka rogo toro yo, wa gu mokedi nangia Petero asota asota ka inido tiko na bete agi aˈariapai re. (Amo. 10:​9-14; Gara. 2:​11-14) Mbiko ga agu aKristano re vovo aida, ga aYudo abarumbatayo rogo pambori arungosiyo. w24.09 9 ¶4

Ho Yekova afu sunge ni fu gako aboro, ko naida i mangihe ngba gu gene du ni mbakadimbakadihe. (1 Kor. 14:33) Ni kpiapai, gupai Mbori akpinyemuhe nga i tungusi wene pangbanga rogo zegino dunduko. (Mt. 24:14) Yekova ima maa Yesu ko ni ngerekurii gi sunge re. Na Yesu ima manga gupai si aidaha tipa gi sunge re nimangi ngba gu gene du ni mbakadimbakadihe. Rogo bambata sa kama agarã, ho i asigira vovo adungurati ni rogo kura aba, i asia abaakumba tipa i naafu arugapai na kini ngbembatayo. (Amo. 14:23) Yerusarema yo du riigbu bipasunge adu ni nga gu nadu na amokedi gbiati bete agu abaakumba naadu na bakere inohe rogoho, i anaamanga adiaberã na adungurati dunduko kini mangipai kuti gu diaberã re. (Amo. 15:2; 16:4) Bambiko wa awirina adu na giasangba, “akanisa ki nyaki rogo idapase yo, ki nge ange na uru.”—Amo. 16:5. w24.04 8 ¶1

Rogo gu wiso nangia ga Nisana 16, kura adee andu kupati gu murö i akpisidi Yesu rogoho. (Rk. 24:​1, 10) Ani gbenga berãrani kurii kpiapai nga ga dee sa dagba agu adee re nangia Maria Magadara. Ho Maria ada ni pati murö, ri abihe ni kungboho. Sidu, ri aoro ka pehe fu aPetero na Yoane. Agi akumba ue re aoro kupati murö yo na Maria ki ndu fuoyo a. Tifuo agi akumba re bi gupai nga murö ni kina kungboho, i akaraga tiyo ku kporo yo. Ono Maria aakaraga nga tiri te. Ono Maria asungu kina yo kini kpari. Ri aainongo gupai nga Yesu adu kina yo te. Ko abi gupai nga ri aakpara tipa ko na ko aaida ka fu wasa furi. Sidu, ko akuru fuo Maria na ki mangi wiri taatapai nga gu nangarasi ri ni bakerehe. Ko afura na ri na ki fu nyanyakipa sunge fu ri—nga ri gumba pangbanga zingako be kpio fu awirinako.—Yo. 20:​17, 18. w24.10 13 ¶7

Moize amangisunge ni nebi, basapungbanga, bangerekurii abanzengere, na ni bakeapai. Ko akusi gu rikaaboro nangia aYisaraere tii sunge akanga Ezipeta yo na ko ki bi dungu ga Yekova iiriwo mangaapai. Yekova amangisunge na ko ko ke gu bambata abuku bisue du rogo Baibiri yo, Atambuahe 90, na si wa ka i ya zavura Atambuahe 91. Si nawiraha a wa ko du nake gu buku nga ga Eyobo. Ngbutuko mbata fu Moize kpi na garãko nga 120, ko ayambu aYisaraere dunduko tipa ka tingida yo na pa agu apai dunduko i nabihe nga gu Yekova namangihe fuyo. Bete kura aYisaraere aima bi gu iiriwoapai Yekova amangihe na wai ko afu mbusa fu aEzipeto. (Gate 7 4) I aima bi wai Yekova akparaka Zamba Baime fuyo tipa i susi beberehe yo. Na i aima bi Yekova ko ni gbarasi Faro na gako riivura. (Gate 14:​29-31) Ngbakungbo yo, Yekova abanda yo na ki ngerefuo yo. (Pa Rug. 8:​3, 4) Si adu nga aYisaraere nika rimo barambeda ku Ringara Mokido yo. Sidu, mbata fu Moize kpi, ko aaida ka ngarasa aboro. w24.11 8-9 ¶3-4

Gupai Yesu apehe fu gako amokedi ti regbo Ga Gbia Riahe adu kia ti gupai ko apehe fu gu bakere rimbasa aboro nadu Gariraya yo, nga gu nadu na bakere rogoyo ti ni. Badungu agu aboro Yesu afura fuyo Gariraya yo aaida kina gu riahe nga ga borose gbua beko. Ono Yesu aˈasadi ka undo yo i rugutiyo na gupai nga, gu kura he adu kinaho paha anyaki gbe kisusi riahe. Si angia guhe ka fu nyenye unga fuyo. Na zavura Yesu ape gupai nga i ima rengba ka zingisa agu aboro nakpiki ti yangara regbo na i ki raki nyeanye kindi. Ko aafuranga ane tipa bete aboro wa gu ko amangihe ti regbo Ga Gbia Riahe te. Kuba gure, ko afura tipa gu maku si adu nga aboro dunduko nika gbiaha. w24.12 11 ¶10-11

Yekova nasoga ai boro zuu. (Tam. 11:5) Ho akumba amanga adiayo ni ngba gbegberẽ gene, Yekova ima sogaha ni kerehe. (Mara. 2:16) Ka kumbakudee amanganga fu diako ngba wene gene ya, gako pabakure na Mbori nadu adu ngbapai. Zavura Yekova arengbanga ka degatuko kuti gani akparakpee te. (1 Pet. 3:7) Si aidanga kumbakudee zingi fu diako watadu ka pe gbegberẽ apai furi te. Gu kura kumbakuadee nafura fu adiayo rogo kere zinga na kini peke agu apai naimisa yo ni kerehe. Ono Yekova ima soga “zinga, na erã, na paa, [na] gbegberẽ fugo.” (Ef. 4:​31, 32) Gu kumbakudee nafura ngba gbegberẽ gene fu diako agberesanga pa kina gayo rogatise sa te ono pa gako pabakure na Mbori a. (Yak. 1:26) Ga Yekova bipai nga gine tipa biko agu ahe nazingisa nyemu kodaba ti aboro? Ko ima sogaha. Sidu, gu kumbakudee nabiko agu asura du ni bibirikoho nagberesa gani pagume na Yekova na ni ayugongo irisa fu diani te. Yekova naida gupai nga kumbakudee nye ni ruruko fu diako angianga kina rogo mangapai yo sa ya ono rogo aberã yo a. Yesu ape gupai nga gu kumba nangana kura dee na nyemuri ima manga bäri na ri “kpotoni yo.” —Mt. 5:​28, 29. w25.01 9 ¶6-8

Baibiri nape gupai nga i nayamba ga Yekova amoyambu nga ruru aboro. Gipai re nayugo gupai nga, ko aidanga ani tumo tipa agu aingapai ani amangaha te. Wa vura duhe nga ko namanga gipai re, ko nabanda gako arugute abanda du tipa ruru mangapai. Ko ayambanga rani nga ruru aboro mbiko gupai nga ani ima rẽ na ni te. Berewe a, Yekova aidanga na ingapai te. Ono Yekova na nyemu ka mbupai furani ti gaani aingapai mbiko ani nayugo idapase kuti gupai ko na Yesu namangihe nga ka fu motumo tipa rani. (Rom. 3:24) Ginipai gipai re ayugoho furani ni basasa? I ima sia bete gu kura aboro i nayambu yo nga ruru aboro i ndu ka zogarago na Yesu ngbangbaturũ yo na i ki da ni awiri Mbori. (Tito 3:7; 1 Yo. 3:1) I ima mbupai fuyo ti gayo aingapai. Si wa ka i ya i aamanganga gu ingaapai re te, na si kini sa gupai nga i rẽ kadu rogo gako Kindo. (Rom. 8:​1, 2, 30) Gu kura aboro i nayambuyo nga ruru aboro nika raka nyeanye kindi auru kpotosende. Yekova ima mbupai fuyo ti gayo aingapai na i ki ima da ni abakureako.—Yak. 2:​21-23. w25.02 5 ¶17; 7 ¶18

Ani bingo regbo sa nga gu gu mokedi nangia Petero aaberã nga tipa pai wa gu Yekova aberã ya. Yesu ape gupai fu gako amokedi nga ko nika ndu ku Yerusarema yo, i ki fuko yo ku be abarumbatayo rogo pambori, ko ki hi rungosiro, na i ki imiko. (Mt. 16:21) Petero aima ino gupai nga Yesu du nangia gu Masiya i akidopa ko nga ko nika batasa ga Mbori aboro. Sidu, si aima du ni kpakarakpakaraha fu Petero ko idi kuti gupai nga Yekova nika mbu gene i imi Yesu. (Mt. 16:16) Sidu, Petero aˈaria Yesu kubani ki ya fuko: “Si turũ atura ti ro, Gbia; gi pai ayé nga sa ro wa sa te re.” (Mt. 16:22) Yesu aaidanga kuti gupai Petero apehe re te bambiko Petero aaberãnga ngba gu gene Yekova aberã ngbaha te. Yesu aima ino gupai nga tipa ka manga gupai Yekova akpinyemuhe, si aaida aida ko rungo na ki kpi. Sidu, Yesu aká ga Petero rugute, wa vura duhe nga si nawiraha wa Petero aaida aida ka undo. Na gipai re, Petero awiriki gupai nga si aaida ko niberẽ ngba gu gene Mbori aida ko ni berẽ ngbaha. Gere nga nyanyakipa wirikapai a si aida ani wirikihe. w25.03 9 ¶5-6

Ya mo kpotoro yo narungo mbiko gu boro mo akido kutini ba gberãrago tiro nikerehe watadu ni samungu kutiro? Ka boro vura manga ro kina wai, gu Bamo du ngbangbaturũ yo ima kpinyemu ro. Ka singia boro samungu kutiro, agu afugo Davide du rogo gaani veresi nga ga areme ima rengba ka fu wasa foro. Buku sa nape gupai nga, “agu aboro du kpotoyo yo na rungo” rengbe kadu nga “agu aboro adunga wenepai ho i angera tipaha kumbatayo ya.” Waigu Yekova aundo agu aboro nabi tiyo ngba gi gene re? Yekova “du mbembedi” na ani. Ko wakina gu bagude watadu nagude natinda ru kini fu wasa furu ho u akpara ni. Ho ani arungo ni mbiko boro samungu kuti rani watadu ni mbu rani, Yekova ima ino gaani imisiri na ko nika undo rani niipo. Yekova na nyemu ka fu wasa furani ka si dunga kpotorani yo na rungo na ani kini bi tirani nga sunge tirani te. Na ko nafu dungu ahe furani nga gu si aida ani ngere kumbatayo tipaha nga gu rengbe ka undo rani tipa ani hi gaani akpakarapai awere.—Yes. 65:17. w24.12 23 ¶13-14

Abaakumba ima rengba kadu areme na gu kido nga, Yekova nabi gu sunge abi i amangaha na nyanyakipaha. Kupati fu wasa fu awirina, yugopai, na tungusapai, dungu abaakumba naundo aundo na sunge mekaarago gbiati fu undo ti rago gberãngo. Aguyo namangasunge na agu aRondo Du Tipa Biko Aborokaza watadu gu Rondo Du Tipa Sakapai na Amunganga. Abaakumba ima ino gupai nga ga Yekova dungurati du angianga ga aboro ya. I namangasunge nyanyaki rogo dungurati na kidu na gu kido nga Mbori nika fu mosoro afu fuyo tipa gayo sunge. (Koro. 3:​23, 24) Anga aboro dunduko rengbe kada ni abaakumba te. Ono ani dunduko ima rengba ka fuhe fu Yekova. Gaani Mbori na ngbarago ho ani amanga ome ni kaa irisoko. Ko nabi wai abi ani afu gaani agamahe tipa gu sunge namanga rogo zegino dunduko ka si vura umba kina wai vurũ. Na ho ani ambupai ni fu agu aboro naimisa rani. Ka si vura du nga mo nabihe nga gupai mo amangaha fu Yekova ni toonihe, mo du na gu kidonga Yekova nabi gupai abi mo amangaha re na nyanyakipaha. Ko ima kpinyemuro tipa kina gupai mo amangaha re, na ko nika fu mosoro afu foro tipaha.—Rk. 21:​1-4. w24.06 23 ¶12-13

Gu pangbanga du tipa Soromo nayugo gupai rengbe ka manga ai gu boro nairiso Yekova. Ni ima rengba ka manga ingapai na kini bihe kusa nga agu apai re dunduko amangi ni ni ba sa watadu ni tunguotunguoho. Watadu ni ima rengba ka ya, “Mi ainongo wai si amangi te.” Na wa vura duhe wo, ka ni berẽ nzunzu kurii gupai namangi, ni ima rengba ka bi gupai nga ni aima manga mumungo adiaberã mbata fu ni mangi kere ingapai. Isoke, ni aima sia agu abakure akpingo nyemu Yekova ya, watadu si rengbe kadu nga bete agu aũngbarago ni asiaha, agu abangiriba nga ga Internet ni andu ku rogoho, watadu agu aba ni adu rogoho aadunga ni wenehe fu Kristano te. Isoke, ni aima mbu manga kparakpee, geda Baibiri, nduge tipa adunguratise, watadu tungusapai. Wakina gu paranga i nafura tipa ko rogo Asanza, ko amangi ingapai mbiko ko aima manga badungu gbegberẽ adiaberã mbata. Ginipai ani awirikaha ti gipai re? Anga gu yangarapai si aidaha nga ani ne ingapai nitihe te, ono si naida aida ani ne agu adiandue rengbe ka ndu na ani sa ingapai. Gere nga kina boro gupai Soromo asakipai tipaha nibasa tingbafuo ko sakipai tipa gupai namangi.—Mt. 5:​29, 30. w24.07 16 ¶10-11

Ginihe nga gi ũkumuko re? Si nga tungusa gu pangbanga nga ga Kindo nabatasa unga. (2 Kor. 4:1) Ginihe du nga agu ahe i amekehe rogo sende yo? Si narukuba ga Mbori amoyambu nga aguyo natungusa wene pangbanga fu kura aboro. Ti regbo Pauro, ababagiahe anaamangasunge na meme pere tipa kaa tinda nyanyakipa ahe wa riahe, imekakue, na marã. Wa kina gure a, Yekova ima fu nyanyakipa sunge furani nga ga tungusa wene pangbanga. Na ga Yekova undo, ani ima rengba ka gbia gu ome si aidaha tipa ani mangi gi sunge re ni rururani. Ti kura aregbo, ani ima rengba kaa gunde be aboro. Waigu rengbe ani ka diabe gu kpakarapai re? Ani bingo gu kparakpee amokedi amangihe ho i afu rugapai ni fuyo tipa i mbu tungusapai. Kuba gupai nga i gunde, i asana Yekova ko undo yo tipa gupai nga i naandu kindi kumbatayo kaa pekaha zukazuka gbe. Yekova akaragapai kuti gayo kparakpee nibasa. (Amo. 4:​18, 29, 31) Ka si du nga gunde be aboro namanga rani amanga ti kura aregbo. Mo sana Yekova ko nyakasi gamo nyemuse tipa aboro tipa wa ka mo gumba wene pangbanga fuyo zanga gunde. w24.04 16 ¶8-9

Gaani nyemuse tipa Yekova nasa rani ani ziasi rimoko. Ani naida ka fubee kuti ziasi rimo Yekova be gu gbegberẽ aziree Satana naye na ni kuti rimoko. (Bam. P. 3:​1-5; Eyo. 2:4; Yo. 8:44) Ho ani atungusapai ni, ani na bakere nyemu ka pepa gu ngbatunga boro nga Yekova fu agu aboro nadegatuyo furani. Ani naida aboro dunduko ini gupai nga bangua sino ko nga nyemuse, na gako gene zogarago niruru he, na gako Kindo nika nyasariipa arungo dunduko, na ki ye na zereda na ngbarago fu aboro dunduko. (Tam. 37:​10, 11, 29; 1 Yo. 4:8) Ho ani ape gipai re ni fu aboro tipa Yekova, gure nga ani naziasi rimoko. Ani na ngbarago a bambiko ani namanga gupai si aida ani mangihe wangia ani aDezire Yekova. w24.05 18 ¶12

Awirina, oni nayugo gupai nga oni ‘nadia aboro adia ku gume’ ho oni amanga wene apai ni fu kura aboro kodihe na agu aboro angianga mbembedi abakurearoni ya. (1 Pet. 4:9) Kura buku sa nasakapai tipa Baibiri aya, gu boro nadia aboro kugume ni na weneringise zavura fu agu aboro ni ainongo yo ya, na ni na ngbarago ka dia yo ku kpuni yo. Mo sananga tiro nga, ‘Ya mo mi nga gu boro nayugo weneringise fu agu agino naye kurogo gimi dungurati?’ (Eb. 13:​2, 16) Gu boro nadia aboro kugume, ni nayugo weneringise fu ngbatunga agino dunduko. Ni kpiapai, fu rungorungo aboro, fu agu aboro ninaandu kaa manga agumbapai rogo kura adungurati, na fu kura aboro nangarasa awirina nga akumba na adee, wa ababi adungurati.—Bam. P. 18:​2-8; Snz. 3:27; Amo. 16:15; Rom. 12:13. w24.11 21 ¶6

Rogo gu sanza yo nga ga ngasu adee, Yesu afura tipa gu ngasu adee naadu bawe nandu ka gbia badidee. (Mt. 25:​1-4) I dunduko naadu namaabangirise tipa ka gasa badidee kupati pumbo diadee yo. Yesu asakipai tipa aguyo bisue nga i angia “airatatamana” na agu akurayo bisue kingia “airamungo.” Gu ngasu adee nangia airatatamana ambakaditiyo ka sungudo badidee a wa gu si aaidaha, ka si avura du nga ko nika da yuru gi regbo yo. Sidu, i aye na nzeme na atara tipa fu imarago fuyo rogo bitimo. Sidu, i aye na kura nzeme a tipa gupai nga ka badidee aima koyo gbe i ki mangisunge na ni. I aima mbakadatiyo tipa gayo atara naki aki kindi. (Mt. 25:​6-10) Ho badidee ada ni, gu ngasu adee nangia airatatamana arimi na ko ku dimo yo ku ba pumbo diadee yo. Wakina gure a, gu mbedimbedi aKristano niima yugoho nga i nga regerege ni nye yo kaa ngera angera kindi na kidu ni ruruyo dati gu regbo Yesu nika ye ka sapangbanga aboro ti ni nika gbia gayo mosoro ni ga yo fuo badidee nga Yesu ku ngbangbaturũ yo kurogo gako Kindo.—Yugo. 7:​1-3. w24.09 21 ¶6

Ho ani aberã ni kurii wai wene pangbanga aundo dungu aboro rogo zegino, gipai re nangarasa rani ani naandu kumbatayo na tungusapai. Rogo agarã dunduko, dungu amirioni aboro naye kupati Tingidapa Kpio Yesu na kini wiriki Baibiri na ani. Dungu kama akutu yo nazio bapatiza na kini koditiyo na ani ani tungusi wene pangbanga na yo. Ani ainongo bange aboro wai nika dia wene pangbanga kugume te, ono ani ima ino gupai nga Yekova nadungura bakere rimbasa aboro kindi, nga aguyo nika bata ti regbo bakere gberãngbi. (Yugo. 7:​9, 14) Yekova nga Baira ati na ko na gu kido nga dungu aboro nika dia wene pangbanga kugume, sidu, ani nikaa ndu kindi kumbatayo kaa tungusa wene pangbanga. (Rk. 10:2) Ga Yesu ndikidi abawiriki ni naatungusapai kakaka ti aregbo dũ. Ni kpiapai, ga Yesu abawiriki atungusipai na wingbaduse na kidu na ngbarago na gipai re asa aboro i “ini ya i anidu na Yesu.” (Amo. 4:13) Si naida ani naatungusapai a na wingbaduse na ngbarago, na ni sangbanaha aboro nika bihe nga ani nawirika ga Yesu kpiapai. w25.03 18 ¶15; 19 ¶17-18

Baibiri nayugo gupai furani nga, Yekova nabi agu aboro abi aboro abiyo wa nyakingo payo te. Ni kpiapai, Yekova akedi gu nebi nangia Samuere ko ndu kua Yisai yo tipa ka mbida boro sa dagba awiriko ni gu bakindo nika zoga aYisaraere kumbatayo. Yisai ayambu awiriko saba dagba aguyo nadu muambe i ndu tipa Samuere biyo ono ka ko akodanga Davide nangia kiaro ku dagbayo ya. Ono wa si avura duwo, Yekova asia kina Davide. (1 Sam. 16:​6, 7, 10-12) Yekova aima bi gu boro nzunzu nangia Davide, na ko aima ino gupai nga gi paranga kumba re aima kpinyemuko ni bakerehe. Mo berẽnga pa wai Yekova naima yugoho nga ko ima inopai tipa ro. Ko nafu wene rugute foro tipa kina boro gupai namanga ro. (Tam. 32:8) Gere nayugo gupai nga ko ima ino kina boro guhe nzunzu mo aida na ni. (Tam. 139:1) Ho mo amangapai ni kuti ga Yekova arugute na ki bi wai ko aundo ro, mo nika du na gu kido nga Yekova naberãpa ro aberã. (1 Peka 28:9; Amo. 17:​26, 27) Yekova nabi gu ome abi mo amangaha. Ko nabi gu wene asino abi a du tiro na ko na nyemu kadu ni bakureamo.—Yere. 17:10. w24.10 25-26 ¶7-9

Rengo ngaha nga, mo ima kpinyemu Yekova na mo naida ka undo kura aboro. Ginipai rengbe ka undo ro tipa mo du na nyemu ka manga gi sunge re? Mo berẽnga pa gu ngbarago mo nika kadu na ni ka mangapai fu awirinamo. Yesu ape gupai nga: “Fu he ngba ti dia ha.” (Amo. 20:35) Na Yesu ni tiko aima manga gupai ko apehe re. Ko agbia ndikidi ngbarago ti undo kura aboro. Mo bingo gu kpiapai du rogo Marako 6:​31-34. Ti gi regbo re, Yesu na gako amokedi adu na mbugo. I aandu gayo ku rogo gu ba i arengbe ka sungo nisayo rogoho ka ongoda. Ono bakere rimbasa aboro aima da rogo gu ba re mbata fuyo, ki du na gu maabangirise nga Yesu yugupai fuyo. Ko aima rengba ka ká mbiko gako abawiriki ‘aadunga na regbo wa ka i ri riahe te.’ Watadu ko aima rengba ka yugopai fuyo gbua sa watadu ue na ki mbuyo i ga. Ono mbiko gu nyemuse nafõngbadukoyo, ko ‘atona yugo apai fu yo’ ‘da ku ho uru ati ni.’—Mk. 6:35. w24.11 16 ¶9-10

Avunguagude, oni ngarasi awironi tipa i ngere tipa amomu ka yugo gu rengo nga ga Baibiri fu kura aboro. (Rom. 10:10) Ani rengbe ka ringbisa yugopai fu kura aboro tipa Baibiri kuti wai si aida tooni gude wiriki wai ka ndu. Ni bambataha, gu gude re nawirika wai ka ru kuari, na tifuo gure, u ima rengba ka manga bete tooni adiandue. Wakina gure a, paranga boro ima rengba ka tona tungusapai ngba taata gene. Ni kpiapai, ni rengbe ka sana kurani sukuru yo nga: “Ya mo mo iningo gupai nga aboro-birĩ-inohe ni naadia kpia kina agu ahe i akusihe kaa mbakada ahe rogoho? Mi yugungo wene vidio foro.” Tifuo yugo ni vidio sa dagba agu avidio ni naakura ti mburu kuraha nga Was It Designed? ni rengbe ka ya: “Ka si dunga aboro-birĩ-inohe nagbia taarimo tipa guhe i aima kusaha, da si aida ani tambua ni tipa gu kusikusiahe ani abihe?” Isoke, gu gude sukuru re nika ida ka wirika dungu apai tipa Yekova. w24.12 19 ¶17-18

Tipa ka batasa rani be ingapai na kpio, Yekova akedi Yesu ko ye ka fu Motumo tumorii. Ono waigu kpio bangisa rengberengbe boro sa arengbe ka batasa badungu aboro be ingapai na kpio? Gu mokedi nangia Pauro asaki rogoyo nga: “Wa i amoi dungu aboro ni aboro ingapai mbiko ga [Adamu] basapai sa, kina wo i ka maa dungu aboro ni ruru aboro bangiri Mbori mbiko ga [Yesu] giasangba sa.” (Rom. 5:19; 1 Tim. 2:6) Sidu, gupai Pauro aapehe nga, aboro dunduko nga aboro ingapai na kini kpiki mbiko rengberengbe boro sa nabasasangba Mbori. Sidu, tipa ka batasa rani be ingapai na kpio, si aaida rengberengbe boro gisangba Mbori. Tipagine Yekova aambunga agu awiri Adamu naagiasangba Ko ti ni tipa i raki nyeanye kindi ya? Ani ima rengba ka berã gupai nga, gere aima rengba ka ngia wene gene tipa ka mangapai kuti gi kpakarapai re ngbaha. Ono gipai re aarengbanga kadu ni rurupai fu Yekova ko mangihe te. Mbiko ti gu regbo re, ka si adu wa ka i ya Adamu aamanganga kere ingapai te na awiriko aangianga aboro ingapai a te. Ono anga rengo nangia gipai re te. w25.01 21 ¶3-4

Ti gu kura regbo sa, Pauro aima ino gupai nga ko nika kpi barambeda, ono ho ko aberẽpa wai ni ko araki gako raka, ko adu na bakere ngbarago. Ho ko angere ni kusayo ko aya: “Mi digisi gi sunge, mi ka kuti idapase.” (2 Tim. 4:​6-8) Pauro aima manga wene adiaberã rogo gako raka yo nga ga Kristano, na ko aima bihe nga Yekova adu na ngbarago na ko. Ani ima rengba a ka manga wene adiaberã na Mbori ki idi na ani. Waigu rengbe ani ka mangaha wo? Pauro ape gupai tipa tiko na gu kura ruru aKristano nga: “Ani naata rogo idapase rogo bipai te.” Rogo Baibiri yo, gu fugo nga, “naata” ti kura aregbo ima rengba kadu nga wai boro nasia ka raka gani raka. Gu boro du na idapase kuti Yekova naberãpa gupai Yekova aidaha ho ni amanga adiaberã ni. Ni ima ino gupai nga ho ni apekafuo agu arugute ni nga ga Yekova du Baibiri yo, ni nika raka wene raka awere na Yekova nika fu dungu amaku afu funi kumbatayo.—Tam. 119:66; Eb. 11:6. w25.03 20 ¶1-2

Mbiko gu undo nga ga ga Mbori toro, dungu agu aboro nanaamangapai nizuu, kidu ni kere zingizingi aboro watadu naanamanga irairaapai ima manga bakere aˈariapai rogo gayo raka yo. (Yes. 65:25) I ima manga bakere ome ka mbu gu gbegberẽ asino re. (Ef. 4:​22-24) Ono gu rengo tie duho nga, ga Mbori aboro kindi nga kpakpa aboro, ani nikaa ndu kindi kumbatayo kaa manga aingahe. Ono tie, Yekova ima ye na “aboro dunduko” nga aguyo nakpinyemuko na kini kpinyemu akurayo, na ni sangbanaha, i na ndikidi zereda na kodatise. (Tito 2:11) Gere nga gu iiriwopai kina gu Mbori duna tanduapai dũ narengbe ka mangaha! Gako akidohe ti aregbo dunduko ni naada ada ti rengo. (Yes. 55:​10, 11) Gu paradizo nga ga toro kinaho awere. Yekova ima kusa agu aborokporo nga aguyo nairisoko na gipai re nzunzu nga gupai du kia. Ani na bakere zereda awere na kini bi tirani nga ba rani gu ngba angba bambiko ani nga papara agi aborokporo re. (Tam. 72:7) Tipa agi andu apai re, ani naida ka undo badungu aboro wa rengbe ome rani na ni tipa i ye kadu ni awirinarani aKristano. Ani rengbe ka manga gipai re ka si dunga ani namaaberã rani tipa ka sa aboro ni abawiriki.—Mt. 28:​19, 20. w24.04 23 ¶13, 15

Yesu akpinyemu Yekova na berãko yo dunduko. Ko aima ino gupai Mbori aaidaha beko, na ko aima diaberã tipa ka mangapai ringbisihe kutini si ki vura du vurũ nga mangaha wo arengbe ka yugo gupai nga ka rungo tipa gupai nadu ni ruruhe. Mbiko gupai nga Yesu agbeberã ko sa manga gupai Bako akpinyemuhe, ko aambunga ai pai si da na nyanyakipaha rogo gako raka yo te. Petero na kura amokedi adu na bawene momu beyo tipa ka dia regbo sa na Yesu na ka wirika gu gene ko aaberã ngbaha. Ho Petero ake gako bambata waraga ni, ko angarasi aKristano tipa i ukadi ũvura niberẽ pai wa Kristo. (1 Pet. 4:1.) Petero amangisunge na fugo abanzengere ho ko ake gupai ni nga: “Oni ukadi ũvura.” Sidu, ka aKristano wiriki kaa berã ngba gu gene Yesu aberã ngbaha, i nika du na guhe beyo si aidaha tipa ka sovura kuti ai gu nyemupai du ni gbegberẽ he na kuti gi zegino Satana azogaha re.—2 Kor. 10:​3-5; Ef. 6:12. w25.03 8-9 ¶1-3

Ginipai si aida mo inipai tipaha tipa gu boro mo ambakada pa rogatise na ni ti regbo mbakadapa rogatise? Mbata fu mo sonosi gu nyanyaki nyemuse du dagba kumba na dee koyo du gu boro re ni, si ima rengba ka ida oni saki kura nyanyakipa apai, ga gu boro re asasa tipa kumbatayo. Waigu rengbe mo ka ino boro wenengai nzunzu? Gene sa dagba agu akuraha yo ngba kisusi nga ka pe kina boro rengo na kini fura gbaiga, ka fu asanahe na kini degetue wenengai. (Yak. 1:19) Isoke mo ima rengba ka sia gupai nga oni mangi kuraapai kina sa nga gu rengbe ka saha furoni taata oni fura dagbaroni, ngbatunga apai wa rihe kina sa, kaa ta kina sa rogo agu aba du aboro adu rogoho, na ka tungusapai kina sa. Oni ima rengba a ka inopai tipa tironi ho oni adia regbo ni kina sa na abakurearoni gbiati agumeroni. Kurigure, oni mangi mbakadapai tipa ka manga agu apai nga gu nika yugo wai foro gu kura boro re amangapai rogo abangiriaba ni bakiakia na aboro ni bakiakia. w24.05 27-28 ¶6-7

Barambeda kumbatayo, ani nika gbiatirani na kere kpakarakpakara aregbo, na si nika ida ani kido kuti Yekova gbe susi gu nidu mbata. Agu apangbanga nga ga Baibiri gbiati agu akpiapai nga ga ga Yekova amoyambu du ti gi gaani regbo re nika undo rani ani bi wai Yekova nasongodi gako amoyambu. Ani berẽ dudunguro kurii agu apangbanga re. Pa manga oni he wo nika undo roni oni moi Yekova ni gaoni Mbia. Na berewe a, ka mo mangi asadatise wa rengbe omero na ni ka wirika asino Yekova, mo ima rengba ka nyakasa awirinamo. Ni kpiapai, Yesu afu gu rimo fu Simona nga Kefa (si wa ka i ya “Petero”), du rogoyo nga “Mbia.” (Yo. 1:42) Gupai Yesu aapehe nga Petero nika fu wasa fu aboro rogo dungurati na ki nyakasi gayo idapase. I nafura tipa abaakumba rogo dungurati nga i wa “nzereme bambia.” Gipai re nayugo gupai nga i nabanda agu aboro du rogo dungurati. (Yes. 32:2) Ono tie, dungurati nagbia undo ho awirina dunduko awirika asino Yekova ni. w24.06 28 ¶10-11

Agu abakindo nangia ga aYisaraere yo Yekova anaabiyo ni ruruyo anaairisoko ngba gu gene ko aaida na ni. Yekova asaringbanga kura abakindo nambu pekafuo Gako aNdiko na ki tona kaa iriso kungbo ambori. (1 Aba. 21:​25, 26; 2 Peka 12:1) Tipagine gupai nga ga iriso adu ti ni na nyanyakipaha gbe fu Yekova? Ndupai sa nga, si anaaida bakindo ni undo aboro i irisi Yekova ngba ruru gene. Berewe a, ho aboro anaairiso kungbo ambori ni, si anaasa yo i nimangi kura kere aingapai na kini mangi fu akurayo gbegberẽ. (Osea 4:​1, 2) Kurigure, abakindo nga ga aYisaraere yo na aYisaraere aima kparatiyo fu Yekova. Sidu, ho i anaadunga ni ni ruruyo fu Yekova ya na kini irisi kura ambori, Baibiri nape gupai nga si adu wa ka i ya i aamanga pa bäri. (Yere. 3:​8, 9) Ho boro amanga bäri ni, ni na zanga du niruru ni fu gani badiarogatise na ni naimisa gani badiarogatise nikerehe. Wakina gure a, ho gu ga Yekova moyambu niima kpara gani raka fuko arimiso ti ni ni kurogo irisokpiahe, ni namanga ingapai kutiko na si naimisa ko nikerehe.—Pa Rug. 4:23. w24.07 22-23 ¶12-15