Si naida ani mangi nyanyaki asadatise tipa ka nyaka rogo toroyo na ki bandaha. Sidu, si naida ani du na rubangirise ka zanga berã gupai nga ani ima nyaka rogo toroyo na ndupai ho si aida ani nye kindi ti ni kaa nyakasa gaani pagume na Yekova ya te. (1 Kor. 10:12) Si naida ani ‘naawísigo tirani’ ka inoho singia ani namanga sonakumbatayo. Rogo gu waraga yo gu mokedi nangia Pauro akehe fu aKorosaio, ko angarasi yo berewe tipa i nye nyanyaki rogo toroyo. Wa si avura dunga agu aKristano nadu Korosai yo re aima nyaka rogo toroyo, Pauro ape gupai fuyo nga si naida i du na rubangirise ka zanga mbu berãpai nga ga aboro zegino si nangi yo. (Koro. 2:​6-10) Na Epafura, nga guko naima ino agu aboro naadu rogo gu dungurati re wenengai aakpara dedede nga i rengbe na “ru ziazia teketeke,” watadu nyanyaki rogo toroyo. (Koro. 4:12) Ginipai rengbe ani ka wirikaha ti gipai re? APauro na Epafura aima rugatiyo na gupai nga, ani naida aida na ga Mbori undo tipa ka nye nyanyaki rogo toroyo, ono si naida aida a ani bi gupai nga gaani pagume na ko nasona kina kumbatayo. I aaida agu awirina nadu Korosai yo nye nyanyaki rogo toroyo i ki vura kaa gbiatiyo na aˈasada vurũ. w24.04 6-7 ¶16-17

Rogo gupai yo nga ka gunde ti Yekova nga ka kpinyemu ko ni bakerehe gbe, si ki sa gupai nga ka ani mangingo gupai nika ba gberãrago tiko ya. Ani nga regerege ka wirika gu kparakpara pai du dagba rurupai na irairaha, rengo na ziree tipa gupai nga Yekova rengbe ka ida na ani. (Snz. 2:​3-6; Eb. 5:14) Ka si du nga ani tona kaa gunde be aboro kisusi Mbori, si ima rengbe ka sarani ani idi kuti gupai nga gu ayengo be Yekova ya. Oni bingo gu kpiapai nangia ga agu bamoirago naadu 12 naandu ka bi gu ringara Yekova akidopaha fu awiri aYisaraere. Tipa agu abamoirago naadu bawe, gayo gunde be aKanano adu ni nyanyakihe susi gayo nyemuse koyo du Yekova ni. I aya fu awirinayo aYisaraere we: “Ani arengba nga ka ndu sa agu aboro te re; bambiko i nyaki ki susi rani.” (Geda 13:​27-31) Ringbisihe kuti gu bipai nga ga wiri aboro, aKanano aima nyaka. Na gipai re angia kina rengo. Ono ai gu boro nape gupai nga ka aYisaraere dinga be avurayo te, aaberãnga pa Yekova te. w24.07 9 ¶5-6

Ya mo wene nduapai ho berani tipa kadu na gu kido nga ho Yekova nika sapangbanga aboro ni, ko nika manga gu diaberã du ni ruruhe? Ii! Abarayama aima ino gipai re wenengai, nga Yekova ni rengberengbe ko, kidu ni iratatamana, na inapai ni “basapungbanga zegino dunduko.” Ko ima raba Wiriko na ki fu gu sunge fuko nga ga sapangbanga aboro dunduko. (Yo. 5:22) AYekova na Yesu ima ino gupai du ngbadu aboro yo dunduko. (Mt. 9:4) Sidu, ho i nika sapangbanga aboro ni, i nika ‘manga gu pai ru aru’! Ani dinga berã adia ka kido kuti Yekova nga gu boro ini gupai du ni wenehe. Ani ima ino gupai nga ani arénga tipa ka sarangbanga te—ono kinako sa re! (Yere. 55:​8, 9) Si nga ndu gupai ani akido ti ni kuti Yekova na Wiriko tipa i saringbanga dunduko. Na berewe a, ani na gu kidonga gaani Bakindo nga Yesu, nika wirika ga Bako ruru sarangbanga na inapai.—Yes. 11:​3, 4. w24.05 7 ¶18-19

Si ni nyanyakipa pai tipa boro naape rengo kpotoniyo. Ani rengbe ka bi gipai re ti gupai namangi ho Firipo ayambu bakureako ni nangia Natanaere ko gbia Yesu. Wa vura duhe nga Yesu aagbianga Natanaere mbata te, ko aya: “Oni ngére ndikidi Yisaraere, biriki ti ko te!” (Yo. 1:47) Yesu aima bi wai Natanaere adu ni ruruko ngba kparakpara gene. Wakina rani, Natanaere angia kpakpa boro. Ono ko aangianga irabiriki te, kuba gure, ko adu ni ruruko rogo apai yo dunduko. Gupai re aima ngba ti Yesu na ko ki tambua Natanaere tipaha. Badungu agu apai si aidaha berani tipa ka sa ngbarago ti Yekova i natangaraha rogo Atambuahe 15 nabipa wai rengbe ani ka mangapai na kura aboro. Atambuahe 15:3 nape gupai tipa gu boro du nga gino rogo ga Yekova bamburoko yo nga ni nga gu boro “agbarasa nga rimo boro ya, amanga nga kurani gbigbita ya, agumba nga gbigbitapai kuti rimo kurani a ya.” Ka ani aape ziree kuti akuarani, si ima rengba ka imisa yo nikerehe.—Yak. 1:26. w24.06 10 ¶7, 9; 11 ¶10

Ka mo mbakadi tiro wenengai tipa tungusapai, mo abakanga bangiro tipa ka fura fu kura aboro te. Yesu aundo gako abawiriki tipa i mbakadi tiyo mbata fu ko kedi yo ku gene tungusapai yo. (Rk. 10:​1-11) Abawiriki adu na rengba ka manga badungu apai na kidu na bakere ngbarago mbiko i amangipai kuti gupai Yesu ayuguhe fuyo. Waigu rengbe ani ka mbakada tirani tipa sunge tungusapai? Si naida ani berẽ tipa gupai ani nika pehe, na ani ki pehe ngba gu gene nika du taata furani na ani kini fura kina wai ani naafura. Si a ni nyanyakipa pai tipa ani ini agu agene rengbe aboro ka mangapai ngbaha na ani ki ini wai rengbe ani ka karagapai fuyo kutini. Sidu, ho ani nika gbia aboro ni, ani ima rengba kaa fura zezeredi, kini momu ti ngbarani, na kidu wa abakure. w24.04 16 ¶6-7

Gu nyanyakipa ndupai ani atungusapai ti ni nga, ani ima kpinyemu Yekova Mbori na ziazia rimoko. Ani nabi gaani sunge tungusapai nga gu gene si aida ani taasi gu Mbori ngbaha ani nakpinyemu ko. Ani dunduko idi kuti gupai nga: “Mo gaani Gbia nga gaani Mbori, re mo are na dia taarimo na irisa na tandu.” Ani nafu taarimo na iriso fuko ho ani ayugo gupai ni fu aboro nga gu ani naidi kuti ni nga ko “nafu ahe dunduko” na ani ni unga rani bambiko ko nafu unga furani. Ani nafu gaani ome fuko—ho ani amangasunge ni na gaani regbo, ome, na agu ahe du berani ka tungusapai a wa rengbe omerani na ni. (Mt. 6:33; Rk.13:24; Koro. 3:23) Ka pehe ngba taata gene, ani ima kpinyemu kaa fura tipa gu Mbori ani nakpinyemu ko. Ani nabihe nga si naida ani pe pa rimoko fu kura aboro na gu ngbatunga Mbori nga ko. w24.05 17 ¶11

Yekova nafu zereda na rengbabepai awere furani na ko nika fu nyenye unga furani kumbatayo. Ani ima du na gu kido nga, Yekova naida ka fu mosoro furani na ome kina beko tipa ka mangaha wo. Mbiko gi ndupai re, ani nandu kindi kumbatayo kaa manga gupai rengbe ome rani na ni ti ngba irisoko kina wai gu gako amoyambu naadu mbata kusayo amangihe. Gure du nga gupai Timoteo amangihe. (Eb. 6:​10-12) Timoteo adu na nyanyaki idapase kuti unga Mbori nga ko nika fu mosoro afu fuko. (1 Tim. 4:10) Gure du nga ndu gupai ko amangisunge ti ni nyanyaki fu Yekova na fu kura aboro. Ginipai ko amangihe? Gu mokedi nangia Pauro angarasiko tipa ko da ni wene bayugupai gene tungusapai yo na rogo dungurati. Pauro ape gupai fuko nga, si naida ko du ni wene kpiapai fu akurako aidipase, gu paranga yo na gu sosono yo. Pauro afu nyanyaki sunge a fuko nga gu naakoda fu nyanyaki rugute ono rogo nyemuse yo fu agu aboro si aaida i fuhe fuyo. (1 Tim. 4:​11-16; 2 Tim. 4:​1-5) Timoteo aima du na gu kido nga Yekova nika fu mosoro afu fuko.—Rom. 2:​6, 7. w24.06 22-23 ¶10-11

Ho ga Yekova aboro anaabasa sangbako ni, ko anaakeda gako anebi dedede i ndu ka zayo tipa gupai na ni rengbe ka manga ka i aamanganga ariapai ya na kini ruguyo. Ni kpiapai, Mbori ape gupai rogo Yeremaya yo nga: “Mo káraga tiro, Yisaraere nga boro tikusayo . . . Mi angéra nga kuti ro na zinga te, bambiko mi du na inapai . . . mi azínga nga nye anye kindi te. Mo ídi pa ga irairapai, ya mo asa mungu kuti Yekova.” (Yere. 3:​12, 13) Yekova aya fu Yoere ko pe gupai fu aboro nga: “Oni karaga tironi kono du mi ni na kpotoroni yo dunduko.” (Yoe. 2:​12, 13) Ko asa Yesaya ko pe gupai nga: “Ki girisi tironi; oni mói gu gbigbitapai nga ga gaoni mangapai ku sa yo ti bangire; oni mbú manga gbigbitapai.” (Yes. 1:​16-19) Na vurube Yezekere, Yekova asanahe nga: “Rago nangba tire mbiko kpio gbegberẽ boro? . . . Gu ngba nga ni sa tini ti gani gbegberẽpai ki nye ni ungani, te? Bambiko rago angba nga ti re mbiko kpio boro te, . . . si du oni sá tironi, ki nye ni ungaroni.” (Yeze. 18:​23, 32) Yekova na bakere ngbarago ka bi gupai nga aboro nasaberã yo ti gayo aingapai, mbiko ko naida i raki—nyeanye kindi! w24.08 9 ¶5-6

Ga Mbori aboro dunduko nagbia agu ariahe nga ga toro, arugapai, gbiati gu bandahe i aida na ni. Gu kpiapai nayugo gupai nga Yekova akparanga aboro areme te nga, ko sa gupai nga aboro gbia Baibiri rogo zegino dunduko. I ake Ziazia Kekeapai ni bambataha rogo afugo biata: pa-Ebere, pa-Arama na pa-Giriki. Ya mo agu aboro nageda Baibiri rogo agi afugo yo i ake Baibiri rogoyo ni bambataha re na mbembedi pagume dagbayo na Yekova kisusi gu kura aboro agedanga ha rogo agu afugo re ya? Oó, anga wo duhe te. (Mt. 11:25) Yekova ayambanga rani ani du ni abakureako kina gu sa ka si du nga ani wirikipai ni bakerehe watadu ani ini agu afugo i ake Baibiri rogoho ni bambataha te. Yekova nasa gupai nga gako tatamana du fu aboro rogo zegino dunduko angianga kina aguyo wirikipai ni bakerehe ya. I ima sa Fugoko nga Baibiri kurogo dungu afugo rogo zegino, na aboro rogo zegino dunduko rengbe ka gbia undo tigaha yugopai na ki wiriki wai rengbe yo ka da ni abakureako.—2 Tim. 3:​16, 17. w24.06 6-7 ¶13-15

Rago gbarasa Yerusarema na yekaru nga gu Yesu apehe aambeda. (Rk. 21:20) Rengo ngaha nga, singia Pauro watadu agu aKristano nadu Yuda yo aainongo gu regbo nzunzu gbarasaha nika manga ti ni te. Wa vura duhe wo, agu aKristano re aima rengba ka mangasunge na gu yangara regbo nanye re tipa ka mbakada tiyo ka sonosa agu asino duwa idapase na hipai. (Eb. 10:25; 12:​1, 2) Ani ima mbeda ka gbiatirani na bakere gberãngbi susi gu agu aKristano nangia aEbere agbiatiyo na ni. (Mt. 24:21; Yugo. 16:​14, 16) Ani wisigingo pai tipa bete agu arugute Yekova afuhe fu agu aKristano re na nga gu nika undo rani a. Gu mokedi nangia Pauro angarasi akurako aidipase tipa i wisigi gu dudunguro apai du rogo Fugo Mbori. (Eb. 5:14–6:1) Ni mangako sunge na Kuru Ndika nga ga Ziazia Kekeapai, Pauro asakipa wai du gu Irisimbori nga ga aKristano na nyanyakipaha kisusi gu pambori nga ga aYudo. Pauro aima ino gupai nga dudunguro inohe nga ga rengo aima rengba ka undo aKristano tipa i ka ziree ayugopai tipa ka boro nangingo yo ya. w24.09 8-9 ¶2-3; 10 ¶6

Ga Yesu abawiriki aaida na ngarasaro. Tipagine? Beteyo ambu akpuyo, gayo aborokporo, na gayo sunge bagaahe tipa ka pekafuo Yesu ti aregbo dũ. (Mt. 19:27) I anaamanga agu akurayo gbegberẽ mbiko i ada ni gako abawiriki. (Yo. 9:22) I adu na nyemu ka manga agi aˈariapai re rogo gayo raka yo na ka rungo mbiko i aima ida kuti gupai nga Yesu nangia gu Masiya i akidopa ko. (Mt. 16:16) Ono ho i aimi Yesu ni, i adu na bakere gberãrago bambiko i aainongo gupai berewe nika manga te.Yesu aima rugatiko na gupai nga si arẽarẽ fu gako abawiriki i du na gberãrago ho ko akpi ni. Na ko aima ino gupai nga anga i adu na gberãrago mbiko i aadunga na idapase te te. Sidu, ko atona ka ngarasa abakureako nibasa kina rogo gu uru i azingisiko be kpio. (Yo. 20:​11, 16) Ko ayugu tiko a fu abawiriki ue nga aguyo nakaragatiyo ku rogo gu gbaria nga ga Emau. Na ko ayugu tiko fu gu mokedi nangia Petero. w24.10 13 ¶5-6

Avunguagude, oni undo awironi tipa i du na rengba ka saka ndu gupai fu kura aboro i naidi ti ni kuti Bakusiahe. Mo ima rengba ka gbia wene aberãpai ka fugoho wa sa na ni rogo gu kekeapai du rogo jw.org nga gu nasakapai tipa kusa ahe gbiati gu yugopai nga ahe akuru nisaha. Fuoho, wiro ima rengba ka sia gu saka rogopai yo nga gu ni abihe nga si rengbe ka undo kura aboro i rugutiyo na gupai nga Bakusiyo kina ti ni. Oni fura tipa gu sakapai re kina sa na ni. Mo ngarasi ni tipa gani saka rogopai yo du taata na rogo birĩ yo ka si du nga boro na nyemu ka fura na ni tipaha. Ni kpiapai, gude sukuru ima rengba ka ya: “Mi idi kina kuti guhe mi abihe, na mi abingo Mbori te.” Gu paranga wirina nga Kristano ima rengba ka karagapai nga: “Mo berẽnga gupai nga mo nandu ngbakungbo yo tuturũ ti gbata na mo ki bi bawene guga i amehe na ambia. Gini digisopai ka mo da kutini? Boro kinaho name gu guga re. Kina gu bangisapai re du tipa gaani zegino na rakirakiahe dunduko. Boro kinaho nakusihe!” w24.12 18 ¶16

Ani dunduko naida na undo tipa ka manga wene adiaberã. Ani rengbe ka gbia bakere gu undo re be abaakumba rogo dungurati watadu agu awirina nga akumba na adee du na bakere inohe nga aguyo ani naini yo. Ka si du nga garãyo ima nge kisusi gaani, si aidanga ani bihe nga gayo arugute na undo ti ni furani areme ya te. Yekova naida gupai nga ani wirikipai be sosono aboro. I ima raka ni gbangaha na ki wiriki dungu apai tipa raka na ki da ni airatatamana kisusi rani. Ti agu aregbo i aake Baibiri ti ni, Yekova amangisunge na gu sosono aboro nadu ni ruruyo tipa i ngarasi gako aboro na kini ngbe fuyo kumbatayo. Oni bingo gu kpiapai nangia ga, Moize, Davide, gbiati gu mokedi nangia Yoane. I araki ti aregbo ni bakiakia, na agu apai naadu tipa yo adu kia gbe. Ho i aambeda ni kuti digido gayo raka, i afu agu arugute nga ga tatamana fu paranga aboro. Gi ruru akumba re dunduko ni basasa afura tipa nyakapa giasangba Mbori. Singia ani nga paranga aboro watadu sosono aboro, ani ima rengba ka gbia undo ti fugö ani gayo rugute. Rom. 15:4; 2 Tim. 3:16. w24.11 8 ¶1-2

Ti regbo Noa, Mbori aima za aboro ti ri kure. (Bam. P. 9:​3, 4) Kusa, Yekova aima fu rugute a fu aYisaraere nga ka i ringa kure ya. Si adu nga i “kpara” watadu ka imo gu boro naniri kure. (Pa Mot. 7:27) Yesu ayugupai fu aYudo i mangipai kuti agu aNdiko dunduko Mbori afuhe fuyo. (Mt. 5:​17-19) Sidu, ko aarengbanga ka sana agu aYudo re i ri ndikidi pasioko watadu ka mbira ndikidi kure ko te. Yesu amangisunge na kpiapai ho ko ape gupai ni fu gu dee nangia boro Somorona nga: “Gu ime ka mi fu fu ni sa nyenye unga.” (Yo. 4:​7, 14) Anga gupai Yesu aapehe nga gu dee Somorona re nika raka nyeanye kindi ka ri mbiri kura ime rogo gu kura guga te. Wakina gure a, anga gupai ko aapehe nga gu rimbasa aboro ko aafura fuyo Kaparanauma yo nika raka nyeanye kindi ka i ri ndikidi pasioko na ki mbiri ndikidi kure ko te. w24.12 9 ¶4-6

Si naida agu akumbakuadee nairiso Yekova du na rubangirise ka zanga mbu gu iraira bipai tipa adee du zegino na ni si sayo i du na iraira bipai tipa adee. Tipagine? Ndupai sa nga gu gene boro aberã ngbaha du nasa ni ni mangipai ngba gu kura gene kia. Gu mokedi nangia Pauro aza gu mbedimbedi aKristano nadu Roma yo nga, “ka oni ríngbisi nga tironi na gi zegino re ya.” (Rom. 12:​1, 2) Ho Pauro ake waraga ni fuyo, agu aboro nadu rogo gu dungurati re aima du ni aKristano tipa dungu agarã. Wa si avura duwo, afugo Pauro nayugo gupai nga, kura aboro adu kindi rogo dungurati gu maapai nga ga sino atitase na gu berãpai du rogo zegino adu na maapai kurii yo. Si nga ndu gupai ko angarasi yo ti ni i mangi ariapai rogo gayo aberã na asino. Gu rugute re nabi gu kumbakuadee abi du areme nga aKristano. Si nipa gberãrago tie nga, gu kura yo dagbayo gu berã nga ga zegino niima du na maapai kurii yo na zavura naima manga adiayo ngba gbegberẽ gene. w25.01 9 ¶4

Abaakumba namanga badungu asunge areme. I nga abatungusipai. (2 Tim. 4:5) I namanga wene kpiapai ni tungusa yo pai zaaza, kini mangi mbakadapai nga ga tungusapai rogo gaani dagbarago, na kini raba rani tipa ani tungusipai na kini yugupai wenengai. I namangasunge a ni agu abasapungbanga du na inapai adunga na kparakaro ya. Ho boro amanga kere ingapai ni rogo dungurati, abaakumba namanga ome nyanyaki ka undo ni ni mbakadi gani pagume berewe na Yekova. Ti kina gu bangisa regbo re, i na rubangirise ka banda dungurati ni gigirihe. (1 Kor. 5:​12, 13; Gara. 6:1) Bambatapai nga, abaakumba nga ababanda akandoro. (1 Pet. 5:​1-3) I namanga wene agumbapai rogo Baibiri yo, kini asadi nyanyaki ka ino aboro dunduko rogo dungurati, na kini ndu kaa ngarasa aboro. Kura abaakumba naundo na Sunge Dudua ABambu Kindo na kini ngerefuoho, manga mbakadapai tipa bakere adunguratise, na rogo gu Rondo Du Tipa Sakapai na Amunganga na agu aRondo Du Tipa Biko Aborokaza, gbiati gu kura asunge. Abaakumba namangasunge nyanyaki tipa rani! w24.10 20 ¶9

Baibiri nape gupai nga mbiko i aima fu motumo tipa rani, i ima kusa rani kusayo tii ingapai. Gu mokedi nangia Petero apehe ngba gi gene re: “Oni ini he ya i atumo nga roni ni agu ahe nikagberã, wa feda na dahabu, be gu kungba apai oni agi ngba abaroni te. Ono i atumo roni ni gu kikipa kure nga ga Kristo, wa gu wiri kandoro zerenge kpotoru azerenga, adu nga wiri he ti ru ya.” (1 Pet. 1:​18, 19.) Mbiko motumo tumori, i akusi rani be ingapai na kpio nga gu naye na bakere rungo. (Rom. 5:21) Ani na bakere tambuahe fu Yekova na Yesu bambiko i ima diapai rirani kusayo mbiko nyanyakipa kure Yesu. w25.02 5 ¶15-16

Waigu rengbe ani ka bandatirani? Oni bingo gupai rengba ani ka wirikaha ti gu paranga kumba i nafura tipa ko rogo Asanza kapita 7. Ko amangi wasiwasi kodaba na debäri. Veresi 22 nape gupai furani nga, gu paranga re andu fuo ri “ni ba sa.” Ono agu averesi ye mbata fuhe nayugo gupai nga, ko aima manga dungu adiandue yeeye nga gu nasako ko mangi ingapai. Ginipai gu paranga re amangihe mbata fu ko ti kurogo ingapai? Bambatapai nga, tingba nyemu, ko asusi “ti gene mbembedi pati tukpu [ga debäri] bambu.” Tingbafuo gure, ko ki ndu ngba gu gene nandu ku kpuri yo. (Snz. 7:​8, 9) Fuo gure, ho ko abi gu dee re ni, ko aakaraganga tiko kusayo te. Kuba gure, ko aima mbu tiko tipa ri nyoro ngbako na ko ki degetuko kuti pa agu amotumo zereda ri afuhe, isoke, mbiko gupai nga ri aaida ko berẽhe nga ri aangianga gbegberẽ boro te. (Snz. 7:​13, 14, 21) Ka si adu nga ko aamanganga agi amumungo adiandue re te, ka ko aima ne gu asada nasako ko mangi gupai du ni irairaha na ki mangi ingapai. w24.07 16 ¶8-9; 19 ¶19

Ani nawirika gupai ti gu pangbanga re nga, Yekova aidanga agu aboro mangi kere ingapai ka i asanga berã ya i nye rogo dungurati te. Gu kura aboro ima rengba ka berã gupai nga mbiko wa du Yekova nga Mbori inapai, ko ima rengba ka mbu gu boro asanga berã ya ni nye rogo dungurati, ono anga wo du Yekova ayugo inapai te. Wa vura duhe nga Yekova nga Mbori inapai, ko aidanga na ngbatunga mangaapai dunduko te. Gako arugute tipa gupai du ni ruruhe na gu du ni irairaha aˈarianga tihe te. (Yuda 4) Ka Yekova mbu agu aboro ingapai asanga berã ya i nye rogo dungurati, gure arengbanga kadu nga inapai te bambiko gipai re ima rengba ka gbarasapa dungurati. (Snz. 13:20; 1 Kor. 15:33) Wa vura duhe wo, ani nawirika gupai nga Yekova aidanga ai boro kpi te. Ko naida ka batasa aboro a wa rengbehe. Ko nayugo inapai fu agu aboro namanga aˈariapai ngbaduyo yo na nga agu aboro naida ka mbakada gayo pabakure na ko. (Yeze. 33:11; 2 Pet. 3:9) Sidu, ho gu kumba nadu Korinda yo asaberã ni na ki mangi aˈariapai rogo gako mangaapai yo, Yekova arugu dungurati tipa i mbupai fuko na ki diko kugume rogo dungurati. w24.08 17 ¶7; 18-19 ¶14-15

Rogo gu sanza yo nga ga akandoro na ameme, Yesu ape gupai nga ko nika sapangbanga aboro nibipa wai i undo mbedimbedi awirinako. (Mt. 25:​31-46) Ti regbo “bakere gberãngbi,” ko nika diaberã singia i nga akandoro watadu ameme mbata fu Aramegido. (Mt. 24:21) Kina wai babanda akandoro nakparaka akandoro ti ameme, kina wo a Yesu nika kparaka agu aboro ninaaundo mbedimbedi awirinako na aguyo naundongo yo ya. Baibiri nape gupai nga wa Yesu nika sarangbanga kuba Yekova ko nika sarangbanga aboro ni ruruhe. (Yere. 11:​3, 4) Ko nagbeberã ko kuti gupai i amangaha, gupai i aberãha, na gupai i apehe—kodihe na wai i amangapai na awirinako mbedimbedi aKristano. (Mt. 12:​36, 37; 25:40) Yesu nika ino agu aboro naundo mbembedi awirinako na gayo sunge. Gu nyanyakipa gene boro narengbe ka undo awirina Kristo ngbaha nga tungusapai. w24.09 20-21 ¶3-4

Ho du ani ni na kapa tipa pai, si naida ani bi gupai Baibiri apehe tipaha. Ni kpiapai, mo berẽnga pa gu paranga boro nabaka bangirini singia Yekova naberãpa ni aberã nzunzu. Ya mo si naida ni idi kuti gupai gbua nga gu berãpai re ni ruruhe? Oó, si naida ni “ásadi apai dunduko” ni wisigo ni Baibiri ka bi ga Yekova aberãpai tipa ni. Ho ani ageda Baibiri ni, si nadu wa ka i ya Yekova nafura furani. Ono si naida ani mangi ome amanga tipa ka gbia gako aberãpai kuti gaani asanahe. Si naida ani gbataha na ki wisigipai tipa agu averesi rengbe ka undo rani ka karagapai kuti gaani sanahe. Tipa ka manga gupai re, si naida ani mangi wetekapai rogo gaani awaraga. (Snz. 2:​3-6) Si naida ani kpari fu Yekova na ki sanako tipa ko undo rani ani gbia karagapai kuti gaani sanahe. Fuoho, ani rengbe ka ngera tipa gu bangua arugute na agu aberãpai rengbe ka undo rani rogo gupai du ani rogoho re. w24.10 25 ¶4-5

Yekova afunga maku kurii gu ome nga ga ai gu boro namangapai mbiko rukö te. (1 Kor. 10:​24, 33; 13:4) Ti kura aregbo, zavura mbembedi abakurea Yesu aaida ka gbia kura amomu mbiko iraira ndupai. Oni berẽnga kurii gupai agu amokedi nangia Yakoba na Yoane amangihe. I asana Yesu tipa ko fu nyanyakipa bangiriba fuyo rogo gako Kindo. Yesu aatambua nga yo tipa gi gayo nyemupai re te. Kuba gure, ko asakipai fu gu gako amokedi dunduko nadu 12 nga: “Gu ni nakpi nyemu ka du ni bahe dagba roni yo, ni adu ni gaoni moyambu; na gu ni nakpi nyemu ka du ku mbata yo fu roni, ni adu ni gaoni kanga dunduko.” (Mk. 10:​35-37, 43, 44) Agu awirina du na ruru nyemupai—nga nyemu ka mangasunge fu awirinayo, nga pa maku fu dungurati.—1 Tesa. 2:8. w24.11 15-16 ¶7-8

Ho ani amanga adiaberã ni, nyemuse nika fõngbaduraniyo tipa ani mangi agu apai ngba ‘ti kura aboro’ na agu apai du ni iriirihe. (1 Kor. 10:​23, 24, 32; 1 Tim. 2:​9, 10) Sidu tie, ani nika manga gu diaberã nika yugo gaani nyemuse na irisa ko yo du kura aboro ni. Ka singia mo namanga nyanyakipa diaberã, si naida mo berẽkurii gupai si aida mo mangihe tipa ka mangapai kuti gi diaberã re. Yesu ayugupai furani tipa “ka geda paha” watadu ka berãkuriipa agu apai si adiaha. (Rk. 14:28) Sidu, si naida mo wisigi bakio gu regbo si nika diaha, ahe, gbiati gu ome si nika ida mo mangihe tipa ka sa gu diaberã re si mangisunge. Rogo kura apai yo, mo ima rengba ka fura na gamo aborokporo tipa gupai si aida ai borokporo mangihe tipa ka sa gu diaberã re si du na diabese. Tipagine du ngbatunga gi mbakadatise re ti ni na nyanyakipaha? Si ima rengba ka undo ro mo ini gupai nga si naida mo mangi aˈariapai amanga ti gamo diaberã watadu gu kurapai kinaho berewe du ni wenehe si aida mo mangihe. Na ho mo akoda gamo aborokporo ni ku rogoho yo na ki degeturo kuti gayo abipai, i nika duadu na nyemu ka mangapai na mo tipa ka sa gu diaberã re si du na diabese. w25.01 18-19 ¶14-15

Yesaya ape gupai si aida ani du ti ni “na ngbarago ki ningi” rogo gu paradizo nga ga toro. Yekova du nambakadi gi paradizo narukuba kurapai re. (Yes. 65:​18, 19) Si airiwongo tie tirani ka bi gupai nga Yekova namangasunge na ani ka undo aboro i mbu agu ariigbu nga ga gi zegino re nga gu ayugongo rengo tipa Mbori ya na ki undo yo i du ni papara gi gaani bawene paradizo nga gu narukuba kurapai re! Ani na bakere ngbarago tipa agi amaku re na ani nagbia ngbarago tipa kadu rogo rengo yo, na ani na bakere nyemu ka pepaha fu kura aboro. (Yere. 31:12) Ani a na bakere tambuahe na ngbarago tipa gu maabangirise du ani na ni bambiko gu wene pagume du dagbarani na Yekova. Baibiri nakidohe nga ani “adúdua abambu ki niraki rogo [na ani] arũka bakakue aati yo ki niri zuzuhe.” Ani “amánga nga sunge gbua te” bambiko ani nika du ni “aboro maku nga ga Yekova yo.” Ko nakido rani na pa wene raka nga gu ani nika du ni bandabanda rani rogoho na kidu na ndikidi maabangirise rogo raka yo. Ko akaragapai kuti gayo nyemupai na “ki nimbisi gu nyemuhe nga ga unga ahe dunduko.”—Yes. 65:​20-24; Tam. 145:16. w24.04 22-23 ¶11-12

Ani namaa Yekova ni gaani Mbia ho ani amaa gaani kido ni dunduko kina kuti ko. Ani na gu kido nga nidega ani turani fuko zavura ti kpakarakpakara aregbo, ani nika gbia undo agbia. (Yes. 48:​17, 18) Ai gu regbo ani abi gupai nga Yekova ima undo rani, si nasa gupai nga ani du na bakere kido kuti ko. Ani nadu na gu kido nga kina Yekova sa nika du na rengba ka undo rani ani hi ai asada ka si vura kpakara akpakara wai vurũ. Yekova wakina bakiki mbia, watadu bagangara, nga gu nanye kina rogo bangisa ba. Asino ko gbiati gako ringbisapai aˈariangatihe te. (Mara. 3:6) Ho aAdamu na Eva asamungu ni kuti Yekova, ko aˈarianga gako ringbisapai tipa aboro te. Wakina gupai gu mokedi nangia Pauro akehe, ka Yekova “oro nga rimoko tigako te.” (2 Tim. 2:13) Gipai re nayugo gupai nga, ka kina ginipai vura manga vurũ, watadu ka aboro vura manga kina ginipai vurũ, Yekova aˈarianga wai du ko te, gako ringbisapai, watadu gako arugute te. Mbiko gupai nga Yekova aˈarianga tiko te, ani ima ino gupai nga ko nika undo rani aundo ti kpakarakpakara aregbo na ki banda gako akidohe tipa kumbatayo.—Tam. 62:​6, 7. w24.06 27-28 ¶7-8

Ka si du nga mo nambakada pa rogatise, ginipai nika undo ro mo mangi diaberã singia ka manga rogatise watadu ka zanga mangaha? Oni asadi ka ino tironi wenengai. Si nawiraha wa mo aima ino wiri bete apai tipa gu boro re mbata fu mo tona fugo na ni. Ono awere wa oni natona mbakadapa rogatise, mo na momu ka ino “gu okooko boro du kpoto yo.” Ho oni ambakada pa rogatise ni na boro, mo ima rengba ka ino dungu apai tipa ga gu boro re pagume na Yekova, asino ni, na gu gene ni aberã ngbaha. Wa regbo nikaa susa, mo ima rengba kadu na rengba ka karagapai kuti ngbatunga asanaha wa: ‘Ya mo gi boro re adu ni wene badiarogatise fere?’ (Snz. 31:​26, 27, 30; Ef. 5:33; 1 Tim. 5:8) ‘Ya mo mi rengbe ka yugo gu nyemuse fu ni ni aidaha na kini moiberã re tipa ni, na ya mo ni rengbe ka yugo gu nyemuse fere mi aidaha na kini moiberã ni kuti agu apai du mi na zingoho? Ya mo ani rengbe ka mbupai dagbarani ti gaani azangarengba?’ (Rom. 3:23) Wa oni nikaa inido tironi, oni tingidi gupai nga: Anga gupai nyakipaha kisusi nga wai du apai tipa roni kina sa te, ono gupai nyakipaha nga singia oni ue rengbe ka inido tironi na agu apai du ni bakiakia tipa roni. w24.05 27 ¶5

Bakindo Davide amangi kere ingahe. Ono ho gu nebi nangia Natana ape pa wai ni fu Davide Yekova adu na gberãrago mbiko gako ingapai, Davide adu na umbasitise ki saberã ko. (Tam. 51:​3, 4, 17) Bakindo Izikiya aima ingapai kuti Yekova a. (2 Peka 32:25) Ono wakina Davide, Izikiya adu na umbasitise ki saberã ko. (2 Peka 32:26) Ni sangbanaha, Yekova abi ko niruru bakindo ‘namangi gu pai naru aru.’ (2 Aba. 18:3) Ginipai ani awirikaha? Si naida ani saberã rani ti gaani aingapai na ki mangi ai gupai rengbe omerani na ni tipa ka zanga mangaha berewe. Na ginipai rengbe ka manga ka si du nga ani gbia rugute be agu abaakumba nga ga dungurati yo tipa gupai ani abihe nga si angia kungbo wiri tooni pai? Ka ani bingoho nga Yekova akpingo nyemu rani ya te watadu abaakumba nasoga rani asoga ya. Zavura gu wene abakindo naadu Yisaraere yo, si anaaida aida i naafu zahe na rugute fuyo. (Eb. 12:6) Ho i afu rugute ni furani, si naida (1) ani dihe niumbasitise, (2) ki mangi agu aˈariapai si aida ani mangihe na (3) ki ndu kumbatayo kaa iriso Yekova na kpotorani yo dũ. Ka  ani saberã rani ti gaani aingapai, Yekova nika mbupai ambu furani.—2 Akor. 7:​9, 11. w24.07 21 ¶8; 22 ¶9, 11

I nakusa gu boro ingapai rogo dungurati ká ka manga ariapai zavura tifuo abaakumba asadi ka undo ni bara dunguhe. (2 Aba. 17:​12-15) Ni ima yugo gupai rogo gani mangaapai yo nga ni aidanga ka giasangba ga Yekova arugute te. (Pa Rug. 30:​19, 20) I namanga tingidapai tipa ka pe gupai fu dungurati nga gu boro re berewe nga Dezire Yekova te. Anga ndu gupai i amanga gu tingidapai re ti ni nga ka ba zee ti gu boro ingapai re te. Ono i namangaha tipa awirina mangipai kuti gu rugute nga gu du tipa zanga “kodatise” na gu boro re, “tipa ri riahe a te.” (1 Kor. 5:​9-11) Wene nduapai kinaho Yekova afu gu rugute re ti ni. Gu mokedi nangia Pauro ake gupai nga: “Toni agbooro nandu rogo boro kakputu he dunduko.” (1 Kor. 5:6) Ka i aakusanga gu boro kusayo rogo dungurati asanga berã ni ti gani aingapai ya, gu kura aboro ima rengba ka berã gupai nga si aidanga i mangipai kuti ga Yekova arugute te.—Snz. 13:20; 1 Kor. 15:33. w24.08 27 ¶3-4

Ono ani ima rengba ka wirika ko ni manga ani sunge na gaani ome ka undo kura aboro. Ni kpiapai, ani ima rengba ka undo sosono awirina watadu aguyo du na kaza ni ngera ani fuo kpuyo watadu ka ndu ka ngbehe fu yo. Watadu ani ima rengba ka fu tirani ka undo na giriso Bambu Kindo na kini bandaha. Ka bangironi go nga ti gupai nga oni ima rengba a ka nyakasa kura aboro na afugo roni ya. Ya mo mo rengbe ka berãpa agu aboro nga aguyo rengbe ka gbia ngarasaro ka mo pe gupai fuyo nga mo na tambuahe tipa agu apai i amangaha? Ya mo mo iningo gu boro naida na wasa? Ka si du nga mo ima inopa boro, mo pehe fu gu boro re nga mo naberãpa ni aberã. Mo ima rengba ka ndu ka bi ni, ka yamba ni rogo terefuni, watadu isoke ka keda waraga, email, watadu kekeapai fu ni. Ka mo dunga na bakere bakabangirise tipa gupai mo nika pehe ya. Wiri bete afugo nga gu naye kina boro ngbaduro yo ima rengba ka du nzunzu nga gupai wirinamo aidaha tipa ka nye ni ruru ni tipa kura uru watadu kadu na wene bipai.—Snz. 12:25; Ef. 4:29. w24.09 28 ¶8-10

Ka singia mo namangasunge ni moundo abaakumba, si nawiraha wa mo ima manga ome nyanyaki ka sonosa badungu agu asino si aidaha tipa boro da ni bakumba. Ya mo mo naida ka manga gu “wene sunge” abaakumba amangaha”? Gini sunge bakumba amangaha? Ni nangbembatayo rogo sunge tungusapai, ni namangasunge nyanyaki ka ngerafuo akandoro na sunge yugopai, na ni nanyakasa dungurati rogo gani afugo na gani mangaapai. Si nga gu wene ndupai Baibiri ayamba gu gaani abaakumba ti ni namangasunge kakaka nga i nga ‘agamahe rogo aboro yo.’ (Ef. 4:8) Waigu rengbe mo ka rẽ tipa ka mangasunge ni bakumba? Anga pa boro rẽ ka da ni bakumba kina sa na pa wai boro arẽ tipa mangasunge marã te. Dedede, tipa sunge marã tigaha rogo zegino, ka singia mo na bete agu abirĩ si aidaha nga gu baira sunge angera tipaha, mo ima rengba ka gbia sunge. Tipa ka da tigaha ni bakumba si kia. Tipa boro da ni bakumba, anga kina gupai sa gbua si aidaha nga mo du ni wene batungusipai watadu bayugupai te. Si naida a mo du na agu asino nga gu du rogo 1 Timoteo 3:​1-7 na Tito 1:​5-9 . w24.11 20 ¶1-3