Ani nagbia undo agbia awere ti ga Kristo motumo tumorii. Ni kpiapai, riimburu motumo, Yekova nambupai furani ti gaani aingapai. I aziongo ko azio tipa ko mbupai furani te. Ono ko du naidaha wo. (Tam. 103:​3, 10-13) Agu rani kinaho rengbe kaa bihe nga ani arẽnga na ga Yekova mbupai te. Rengo ngaha nga, boro ho dagbarani rẽ tipa ga Yekova mbupai te. Gu mokedi nangia Pauro aima rugatiko na gupai nga ko “arengba nga na gu rimo nga mokedi” te bambiko ko “aima rungosi ga Mbori kanisa.” Ono wa si avura duwo, ko agbia kurapai kutini nga: “Be gu undahe nga ga Mbori mi du wa du mi.” (1 Kor. 15:​9, 10) Yekova nambupai furani ho ani asa berãrani ni ti gaani aingapai. Tipagine? Angianga mbiko gupai nga ani rẽ na ni ya, ono mbiko gako nyemuse. Sidu, ka mo du na gberãrago bambiko mo naberã gupai nga mo arẽnga na ga Yekova mbupai te, mo tingidi gupai nga ko aafunga motumo tipa rengberengbe aboro te, ko afu motumo tipa kpakpa aboro nga aguyo du na gberãrago tipa gayo aingapai na kini aˈasadi ka manga ariapai.—Rk. 5:32; 1 Tim. 1:15. w25.01 26-27 ¶3-4

Ani arengbanga kadu na maapai kurii agu apai aboro apehe tipa rani watadu i amanga rani na ni te, ono ani ima rengba ka asada kadu na maapai kurii wai ani amangapai kuti ni. Na dedede, gu wene gene duho ka mangapai kuti ni nga ka mbu gupai re. Tipagine? Bambiko ani ima kpinyemu Yekova na ko naida ani naambupai. Ka ani nye na zinga zanga ka mbupai, si nawiraha wa ani ima rengba ka mangapai ngba mumungo gene na isoke, ki imisi kina tirani nikerehe. (Snz. 14:​17, 29, 30) Ho ani akpingo pai ni ya, ani ambunga zinga si du na maapai kurii wai ani amangapai na kura aboro te. Ani namanga wenepai a fu tirani—nga ani nambu berãkurii gupai re na ki tona ka gbia ngbarago rogo raka yo berewe kina wai ani aagbia ha mbata. (Snz. 11:17) Waigu rengbe mo ka mbu du na zinga watadu imisiri ngbaduse? Gene sa rengbe mo ka mangaha ngbaha nga nimbu mo regbo si susi. Si naadia regbo adia tipa gu boro hõ nikerehe hu tingbafuo fuyo adawa fu ni. Wakina gure a, si ima rengba ka dia regbo tipa ani du wenengai mbata fu ani mbupai funi kpotorani yo. (Batu. 3:3; 1 Pet. 1:22) Mo mangi kparakpee tipa ka sana Yekova ko undoro mo naambupai. w25.02 16-17 ¶8-11

Akpiapai nga ga gu bangua ayugopai re nakoda saberã, idapase, bapatiza, na zingabekpio. (Eb. 6:​1, 2) Gere nga bete gu bangua ayugopai aKristano dunduko naidi kutini. Sidu, ho Petero atungusipai ni fu aboro ti regbo Pendekote, ko afura fuyo tipa agi apai re. (Amo. 2:​32-35, 38) Ani du wa ka ani idi kuti gi tonatona yugopai re tipa kada ni ga Kristo abawiriki. Ni kpiapai, Pauro ayuguhe nga ka ani aidanga kuti zingabekpio ya, ani arengbanga ka ya ani nga ndikidi aKristano te. (1 Kor. 15:​12-14) Ono tie, ani du wa ka ani du na nyemu ka wirika dungu apai susi gi tonatona ayugopai re tipa ka da ni agu aKristano niima nyaka rogo toroyo. Ni gupai du kia ti tonatona yugopai, nyanyaki riahe nga ga toro akodanga kina ga Yekova arugute sa te, ono si nakoda gako abangua arengo nga gu naundo rani ani rugutirani na gako aberã. Tipa ka gbia undo ti gu riahe re, ani du wa ka ani wisigipai, kini berẽkuriihe, na kini mangi ome ka mangapai kuti gupai ani nawirikihe. Wa ani nikaa mangaha wo, ani nika raba tirani ka manga agu adiaberã nasa ngbarago ti Yekova. w24.04 5 ¶12-13

Mbori atingidi Yona na gupai nga aboro Nineve “aina nga pa kparaka kumbabeyo ti garebeyo ya” te. (Yona 1:​1, 2; 3:10; 4:​9-11) Kusa, Yesu amangisunge na gu kpiapai re ka yugopai tipa inapai. Rogo gini ngbatunga “sapangbanga” aboro Nineve nika ‘ru’ ti ni kuari? Yesu ape gupai nga rogo gu “zingabekpio nga ga sapangbanga” nika du kumbatayo. (Yo. 5:29) Ko aafura tipa Zogarago Tipa Agarã Kutu, ti gu regbo re du ‘ruru aboro nika zinga be kpio na iraira yo a’ nika zingabekpio. (Amo. 24:15) Tipa gu iraira yo, si nika ngia gu “zingabekpio nga ga sapangbanga.” Gere nayugo gupai nga aYekova na Yesu nika wisigo agi aboro i nika zingisayo be kpio re ka bihe singia i agiasangba na kini mangi gupai i awirikaha. Ka si du nga agu aboro Nineve i nika zingisa yo re nika ká ka iriso Yekova, Yekova ambunga yo tipa i naaraka kindi te. (Yes. 65:20) Ono tipa agu aboro dunduko nika sia ka iriso Yekova ni ruruyo, gayo sapangbanga nika du ni wenehe. I nika du na gu maabangirise nga ga raka nyeanye kindi!—Dan. 12:2. w24.05 5 ¶13-14

Yesu adu na inopai wakina Bako. (Yo. 14:9) Ani nawirika gupai nga Yekova na inopai na ko nakpinyemu aboro ingapai na kini idi ka undoyo ti wai Yesu aafura na aboro na kini mangipai na yo. Yesu aundo aboro ingapai tipa i du na nyemu ka aria gayo gene mangapai na ki pekefuo ko (Rk. 5:​27, 28) Yesu aima ino gupai nadu fuko kumbatayo. Ko ape gupai bara dunguhe fu apefuoko nga, i nika fuko ku be aGendiria na i ki imiko ti ngbunduru-ngua. (Mt. 17:22; 20:​18, 19) Ko aima ino gupai nga gako motumo nika dia ingapai kusayo rogo zegino. Yesu ape gupai a nga tifuo ko kpi, ko nika “gbe aboro dunduko” ko yo du ko ni. (Yo. 12:32) Agu aboro du na idapase kuti Yesu nga aguyo naˈasadatiyo ka wirika ko nasa ngbarago ti Yekova. Ka i amangihe wo ‘ka i aima kusayo be ingapai.’ (Rom. 6:​14, 18, 22; Yo. 8:32) Sidu, Yesu adu na wingbaduse na ki du na nyemu ka kpi iigirã kpio tipa ka batasa rani.—Yo. 10:​17, 18. w24.08 5 ¶11-12

Mo berẽnga kusayo ka bingo wai mo adu ho mo awiriki gu rengo ni du rogo Fugo Mbori yo. Mo awiriki gupai nga gu Bamo du ngbangbaturũ yo ima kpinyemu ro, na ko naida mo du ni papara gu gako aborokporo nairisoko, na ko kidohe nga ko nika nyasariipa aigirã na arungo, na mo ima rengba kadu na maabangirise ka bi gu gamo aboro nakpiki i nazingisiyo kurogo vovo zegino—na gu kura dungu apai. (Mk. 10:​29, 30; Yo. 5:​28, 29; Rom. 8:​38, 39; Yugo. 21:​3, 4) Agi arengo mo awirikihe re aima sa ro mo du na ngbarago. (Rk. 24:32) Mo aima kpinyemu gupai mo aawirikaha, na mo adu na nyemu ka pehe fu aboro dũ! (Oni ringbisinga ha na Yeremaya 20:9.) Ho ani akpinyemu gupai ni ani nawirikihe rogo Baibiri yo, ani nabihe nga si naida ani pehe fu aboro dũ. (Rk. 6:45) Ani nadu wakina gu ga Yesu abawiriki naadu rogo bambata sa kama agarã naya: “Gaani nga kina gumba agu apai ani abi nigi he.” (Amo. 4:20) Ani ima kpinyemu rengo ni bakerehe gbe na si nasarani ani du na nyemu ka pehe fu dungu aboro wa rengbe omerani na ni. w24.05 15 ¶5; 16 ¶7

Wangia ani ga Yekova aboro, ani natungusapai fu kura aboro bambiko ani ima kpinyemu gu Barani du ngbangbaturũ yo na ani naida ka undo gaani amurakporo tipa i ye ka inoko. Ono tipa kura aboro, si ima kpakara fuyo tipa i gbia ngbarago ti sunge tungusapai. Tipagine? Bete aguyo ima rengba kadu na bakere zee na kini bihe nga wene abayugupai nga yo te. Aguyo ni naadunga wenengai ka ndu ku rogo akporo zanga i yambu yo ayamba te. Aguyo nagunde nga aboro nika zinga kuti yo. Si wa i ya i aima yugopai fu agu akurayo nga ka i banga gberãrago ti kura aboro ya. Agi awirina re nabihe ni mbumbuhe tipa ka ndu fuo agu aboro i ainongo yo ya na wene pangbanga. Ya mo mo naasota ti kura aregbo ka gbia ngbarago gene tungusapai yo mbiko agi abipai re? Ka ngia wo duhe, ka rago gberẽnga tiro ya. Gamo zanga du na kido ima rengba ka yugo gupai nga mo na umbasitise na mo aidanga ka gbeberã aboro kuti ro ni bakerehe te, na si nayugo gupai a nga mo aidanga ka ti kango na boro te. Na boro ho naida ka ba gberãrago ti kura aboro te, gu susi gbe nga ho ni aˈasada ka manga wenepai ni fu kura aboro. Gu Bamo du ngbangbaturũ yo ima ino wai du mo nzunzu na ko naida ka fu gu undo foro mo aida na ni.—Yes. 41:13. w24.04 14 ¶1-2

Wa mo nikaa geda Baibiri, kuba gupai nga ka asada ka manga agu apai mo nawirikihe dunduko ti bangisa regbo sa, mo ima rengba ka asada ka manga gu sa watadu ue. Mo asadingo gipai re: Mo keke agu apai mo aida ka mangaha, na mo ki sia gu sa watadu ue nga gu si aida mo mangipai ti ni mbata na ki mbu gu kuraha re ka manga pai kuti ni kusa. Wari gu si aida mo tonaha ni? Mo ima rengba ka tonaha na gu sásá du taata foro tipa ka mangaha. Watadu mo ima rengba ka sia gu bangiriba nga gu si aida mo mangi ariapai ti ni niipo. Tingbafuo mo diberã tipa gupai si aida mo mangihe, mo mangi wetekapai rogo gaani awaraga yo. Mo mangi kparakpee fu Yekova tipa gamo sásá na ki sanako tipa “ida pai na manga ha mbiko wene sangbako.” (Frp. 2:13) Na mo mangi gupai mo nawirikihe rogo mangimangipai yo. Ka mo mangi sonakumbatayo ti gamo bambata sásá, si nika sa ro mo du na nyemu ka mangapai tipa agu akuraha. Ho mo abihe ni nga mo adu na rengba ka manga ariapai watadu ka mbakada gamo asino nga ga aKristano, si nika ngarasaro mo namanga kura aˈariapai na si nawiraha wa si nika du foro taata tipa mo mangi kura aˈariapai. w24.09 6 ¶13-14

Mo ima rengba kadu na gberãrago nga bete agu apai mo amangihe mbata kusayo aima imisa kura aboro. Ginipai rengbe ka undo ro? Mo mangi gupai rengbe mo ka mangaha tipa ka sa apai wenengai fuyo. Na berewe a, mo pe gupai fuyo nga mo na gberãrago tipa gupai mo angihe na mo ki yuguhe nga mo na gberãrago. Mo sana Yekova ko undo agu aboro mo aimisi yo. Ko ima rengba ka undo ro gbiati agu aboro mo naimisi yo re tipa oni naandu kumbatayo kindi kaa irisoko na ki gbia zereda. Oni wirikipai ti agu aingahe oni amangihe kusayo, na oni kidu na nyemu ka mbu Yekova ko mangisunge na oni ngba ai gu gene ko nasia ka mangasunge na oni ngbaha. Oni bingo gu kpiapai nangia ga gu nebi nangia Yona. Kuba gupai nga Yona ndu ku Nineve yo wa gu Yekova aruguko, ko azubo ku rogo kura ba kia. Yekova arugu Yona, na Yona ki wirikipai ti gako ingahe. (Yona 1:​1-4, 15-17; 2:​7-10) Yekova aambunga mangasunge na Yona ni nebi te. Mbori afu gu kura momu berewe fuko nga ko ndu ku Nineve yo, na ti gi regbo re, Yona aima giasangba nibasa. Wa vura duhe nga Yona aima bira tiko tipa gu ingahe ko amangihe, ko aima manga gupai Yekova asanako ko mangihe.—Yona 3:​1-3. w24.10 8-9 ¶10-11

Anga gupai Yekova amangaha gbua nga ka mbupa gu bape du kurirani watadu gaani aingapai te; ko nagbandakaha kusayo. Tipa ka yugoho na kpiapai, mo berẽnga gupai nga boro gbahe bangiri gu marã yo mo adi ru be ni ni bape. Ono tie, aboro dunduko ima rengba ka bi agu anamba du tii gu gbagbahe yo re. Ono ka gbandaka he kusayo kia tigaha. Tipa ka yugoho na kpiapai, gu ngbatunga ime kepai aboro anaamangasunge na ni bakuru kusayo, i aima rengba ka gbandaka ha taata na ime. Boro aima rengba ka dia fiõfiõ roko na ki gbandaka kekepai kusayo. Sidu, ho i ‘anagbataka’ bape ni, si anago kusayo dunduko. Aboro aarengbanga ka bi gupai i akehe mbata te. Si anidu wa ka i ya gu bape re aadunga ho berewe te. Si ni bakere pa ngbarago furani ka ino gupai nga, anga gupai Yekova amangaha sa nga ka mbupai ti gaani aingapai te, ono ko nagbandaka ha kusayo dunduko!—Tam. 51:9. w25.02 10 ¶11

Ho kura aboro asapangbanga rani ni ngba iraira gene watadu ka manga furani gbegberẽ, ani nadu na gu kido nga Yekova ima ino gupai mangi. Pa ino gupai nga Yekova niyangaraha nika ruga apai dunduko nika undo rani ani hipai ho i amanga rani ni ngba gbegberẽ gene. Ka si du nga ani nika kido kuti Yekova na kini sungudi ko tipa ko mbakadi akpakarapai dunduko, ani anyenga na zinga watadu ka soga kura aboro te. Du na zinga ima rengba ka sarani ani mangi gbegberẽpai, ani zanga gaani ngbarago, na si ki gbarasi pa gaani pagume na Yekova. Rengo ngaha nga, ka ani rengbe nga ka pekafuo ga Yesu kpiapai ngba rengberengbe gene te. Ti kura aregbo, ani ima rengba ka manga gupai watadu ka gumba gupai ani nika bira tirani tipaha kusa. (Yak. 3:2) Na ti kura aregbo, gu gene aboro amanga rani gbegberẽ ngbaha ima rengba ka imisa rani na si kini fudi rani rogo gaani raka yo naabaha rogo gi sino raka nga ga gi zegino re. Ka singia pai wa gure aima manga ro, mo du na gu kido nga Yekova ima ino gupai mo andu rogoho. Na Yesu ima ino wai du mo bambiko ko aima gbiatiko na iraira sarangbanga. (Eb. 4:​15, 16) Nairiwo gu ngbarago du ani na ni  nga Yekova ima fu arugute a rogo Fugoko yo nga gu naundo rani ho i amanga rani ni ngba gbegberẽ gene. w24.11 6 ¶12-13

Du na idapase kuti gu boro Mbori akedi ni na nyanyakipaha tipa ka gbia “nyenye unga.” (Yo. 3:​16-18, 36; 17:3) Si aaida i du na idapase kuti gu boro Mbori akedi ni tipa wa ka i gbia “nyenye unga.” Agu aYisaraere re aaidanga kuti gupai nga si aaida i du na idapase kuti “ga Mbori sunge” te. I asanako nga: “Gini gu pai i aina pai ti ni mo amanga tie, ani bi he, ki idi pa ro? gini pai mo amanga?” (Yo. 6:30) Fuo gure, i ki pe pa agu aboro nadu ti rago Moize nga aguyo naagbia Manu ngba iiriwo gene ka rihe nga gu riahe i anaarihe na aˈuru dunduko. (Nem. 9:15; Atambuahe 78:​24, 25) Si tie ziazia nga, i aaberã tipa kina ndikidi riahe. Na ho Yesu afura ni berewe tipa ‘ndikidi kpokuta fuyo ngbangbaturũ’ yo, nga gu si awiraha wa manu du naadu narengbe ka fu nyenye unga fuyo, i aasananga ko tipa gupai si aayugoho te. (Yo. 6:32) I aagbeberã yo gbe kurii gu gayo azingo nga ga borose si ki sayo ka i degenga tuyo sa gupai Yesu aˈasada ka yugoho fuyo tipa gbia nyenye unga ya. w24.12 5-6 ¶10-11

Wa wiro nika tona wirikapai gbe sukuru yo tipa gu ngbatunga kusikusi ahe re, ni nika bi gupai abi nga andiko kinaho ti ni nga ga kusikusi ahe nasa gupai nga ahe du wa gu duhe re, si ngia si nigbangaha, niguruhe, nikirikirihe, nibakerehe, watadu niumbaha. Ni kpiapai, ndupai kinaho du gu he ti ni nga morogumba a wa gu duhe. Ono gu sanahe nakura nga da du nasa gupai nga agi ahe re kuru ngba arikoho na angbatungaha wa gu ani abihe re? Gu bawene kusikusi ahe ani abihe re, da du narekehe ki kusihe ti agenehe wa gu ani abihe re? Ka wiro tona kindi kaa berãkurii ngbatunga asanahe wa gure, si nika undo ni ni sonosi nyanyaki ida kuti Mbori nga ko du nakusi ahe dunduko. Ti kura aregbo, mo rengbe ka sana wiro nga, ka si du nga Mbori du nakusi rani, ya mo si arẽnga ani da kuti gupai a nga kina ko sa rengbe ka fu agu arugute furani rengbe ka sarani ani gbia ngbarago rogo raka yo te? Fuo gure, mo rengbe ka gumba gupai funi nga ani rengbe ka gbia ngbatunga agu arugute re rogo Baibiri yo. w24.12 16 ¶8

Yekova afõngbadu Pauro yo ko ke waraga fu gu dungurati re na ki saki rogo gupai yo nga si naida i kusi gu boro ingapai asanga berã ni re ya kusayo rogo dungurati. (1 Kor. 5:13) Waigu si aaida agu aboro nadu rogo dungurati mangipai na ko? Pauro ape gupai fuyo nga ka i ‘kódi nga tiyo’ na ko ya. Ginipai gipai re aayugoho? Pauro asaki rogo yo nga si aakoda gupai nga ka i ‘ringa riahe a’ na ko ya. (1 Kor. 5:11) Ka mo ari riahe na boro, mo nadia regbo na ni na kini fura na ni. Ni sangbanaha, mo natona kaa dia bakere regbo wa sa na ni. Si tie ziazia nga, gupai Pauro aaida ka pehe nga si aaidanga dungurati naakoda tiyo na gu kumba re te. Gipai re arengbe ka banda dungurati be gako gbegberẽ maapai kurii. (1 Kor. 5:​5-7) Berewe a, gipai re aima rengba ka undo gi kumba re ko rugu tiko na gupai nga ko ima manga kere gbegberẽpai, na ko aima rengba kadu na gberãrago tipaha na si ki sa ko ko saberã. w24.08 15 ¶4-5

Si aaida aYisaraere naamanga kparakpara pumbo tipa uru sa rogo agarã dunduko. I aayamba gu uru re nga Uru Dada Ingapai. Rogo gu uru re, gbiamotumo anaafu amotumo nga ga anya kuba aboro. Rengo ngaha nga, agu amotumo i aafuhe nga ga anya aarengbanga ka dia agu aingapai kusayo nangia ga aYisaraere te bambiko aboro nyakipa yo ti anya. Ono ho agu aYisaraere naanasa berãyo anaafu gu motumo ni Yekova aaidaha, ko aanidu na nyemu ka mbupai fuyo ti gayo aingapai. (Eb. 10:​1-4) Agu amotumo i anaafuhe rogo Uru Dada Ingapai na ti kura aregbo, anaaundo aYisaraere i ini gupai nga i angia aboro ingapai. Ginipai Yekova amangihe ka saha taata tipa i mbupai fu aboro ti gayo aingapai? Ko amangi mbakadapai tipa gu wiriko ko aima kpinyemu ko gbe “tumo ni tiko bara sa, ka dia gu ingaapai nga ga dungu aboro ku sa yo.” (Eb. 9:28) Yesu naye, “ka tumo dungu [aboro] ni ungako.”—Mt. 20:28. w25.02 4 ¶9-10

“Mbisimoroni nakpi nyemu he ni rengo, bororoni anyaka nga ya.” (Mt. 26:41b) Yesu ayugu gupai na agu afugo re nga, ko aima rugatiko na gupai nga ani nga kpakpa aboro na ani nikaa manga aingahe amanga. Ono ko afu agu zahe a nga: Ani du na rubangirise nibipa bakere kido kuti tirani. Bete asaa kusayo mbata fu Yesu pe agi afugo re, gako abawiriki akido ko nga i ambunga ko te. (Mt. 26:35) I aaida ka manga gupai naadu ni ruruhe. Ono i aaberãnga gupai nga ti kpakarakpakara regbo, si taata tipa i rungbura ki mangi gupai du ni irairaha kuba gupai du ni ruruhe te. Si du nga ndu gupai Yesu afu gu zahe ti ni fuyo rogo agu afugo yo du rogo gu veresi nga ga areme. Si tie ni pa gberãrago nga, abawiriki aanyenga kaa ngera angera kindi te. Ho i azi Yesu ni, ya mo i anye na ko watadu i adu na gunde na ki oro kusayo patiko? Mbiko pa zanga yo kaa ngera angera kindi, i amangi kina boro gupai i aya ka i mangingo ho te nga—ka mbu Yesu.—Mt. 26:56. w24.07 14 ¶1-2

Ho aAdamu na Eva aingipai ni, i aadunga na rengba berewe ka raka nyeanye kindi te. Ono i aima da a ni avura Bayo nga Yekova. Mbata fu aAdamu na Eva mangi ingapai, i angia papara ga Yekova aborokporo. (Rk. 3:38) Ono ho i abasasangba Yekova ni, ko aambunga yo i du ni papara gako aborokporo berewe te, gipai re amangi mbata fu i vungu awiriyo. (Bam. P. 3:​23, 24; 4:1) Boro ho dagba awiriyo yo kodihe na ani kadu ni papara ga Yekova aborokporo te. Sidu, ani aaida na undo tipa kadu na wene pagume dagbarani na ko. (Rom. 5:​10, 11) Si aaida ani mbu du ni avura Mbori na ki da ni abakureako. Si nipa ngbarago nga, kina boro Yekova nitiko namangi diandue tipa ka sa gipai re si du taata. Ngba gini gene? Vurube gu mbakadapai nga ga dada ingapai, Yekova amoihe tipa ka karaga wene pa bakure dagbako na aboro ingapai. Ko amangi mbakadapai tipa ka gasa guhe aAdamu azangaha ni fuko guhe paha anyaki wakina gu i azangaha. w25.02 3-4 ¶7-8

Gu mokedi nangia Pauro aya gi “mbusa re rengbe fu gu boro re, nga gu dungu aboro ambusi ni na ni.” (2 Kor. 2:​5-8) Ka pepai ngba kura gene, gi rugute re ima manga gupai si aidaha tipa gu kumba naakodaba na dia bako re. (1 Kor. 5:1) Ginipai? Si aima sa gupai nga ko mangi saberã. (Eb. 12:11) Mbiko gupai nga gu kumba re aima saberã, Pauro aya fu abaakumba i karaga ko berewe ku rogo dungurati. Na ko agumba gupai berewe fuyo nga, i ‘ka vu ko na ki fu wasa’ fu ko na ki ‘nyákasi gayo nyemuse koyo du ko ni.’ Pauro aaida gupai nga awirina yuguhe rogo gayo afugo na mangaapai nga i ima mbupai fuko nzunzu na i nakpinyemuko akpi. Ngba gi gene re, i arengbe ka yugoho ziazia nga i aima diako kugume rogo dungurati. w24.08 15 ¶4; 16-17 ¶6-8

Gu mokedi nangia Pauro aima ino gupai nzunzu si aidaha tipa ka hipai. Ko atingidi aKristano nga ho i nikaa hi aˈasada ni, si aidanga i kido kuti tiyo te ono kuti Yekova. Pauro aima rengba ka pe gupai na wingbaduse nga: “Gbia nga gimi mounda; mi agúnde nga wa sa te.” (Eb. 13:6) Bete kura awirinarani kinaho awere nahi asada. Gene sa rengbe ani ka yugo gaani nyemuse fuyo ngbaha nga ni manga ani kparakpee tipa yo na ti kura regbo, ani ima rengba ka undoyo nifu ani guhe fuyo du yo na zingoho. Ono tie, Baibiri nape gupai ziazia nga, “i arúngosi agu yo dunduko ka kpi nyemu ka ka kuti sino Mbori wa du yo ni ungayo rogo Kristo Yesu yo a.” (2 Tim. 3:12) Tipa gu ndupai re, ani dunduko si aida ani mbakadi tirani tipa gupai naye ka manga kumbatayo. Ani nindu kumbatayo kindi kaa kido kuti Yekova na kidu na gu kido nga ko nika undo rani aundo ani hi ai gu asada ani nika gbiatirani na ni. Barambeda, ko nika fu ongoda fu agu aboro dunduko nairisoko ni ruruyo.—2 Tesa. 1:​7, 8. w24.09 13 ¶17-18

Ginipai naundo agu aboro nadu Korinda yo i zi bapatiza? (2 Kor. 10:​4, 5.) Fugo Mbori gbiati gako ziazia toro du na bakere ome ti ni naundo yo i mangi bakere aˈariapai rogo gayo raka yo. (Eb. 4:12) Agu aboro nadu Korinda yo nga aguyo nagi wene pangbanga tipa Yesu adu na rengba ka mbu manga agu apai duwa kpibuda, dĩ, na azapaditise na akumba. (1 Kor. 6:​9-11) Mo tingidi gupai nga, wa vura duhe nga si aaida kura aboro Korinda yo mangi bakere aˈariapai amanga, i aabingo ho nga gipai re ni kpakarakpakaraha tipa kada ni aKristano te. I amangi ome nyanyaki tipa ka ndu ngba fitikiri gene, ono nga gu nandu sa nyenye unga. (Mt. 7:​13, 14) Ya mo mo nasota asota tipa ka diabe gbegberẽ sino watadu mangapai tipa wa ka mo rẽ ka zio bapatiza? Ka omero batingo ya! Mo zungodi Yekova tipa gako ziazia toro si undoro mo ká nyemu manga gupai du ni gbegberẽhe. w25.03 6 ¶15-17

Yekova nakido rani nga ko nika fu tatamana furani ani rugutirani singia gu diaberã ani nika mangaha nika sa ngbarago ti ko. Ko nafu ngbatunga gu tatamana re ‘fu aboro dunduko, ko azinga nga fu boro te. Bara sa kindi mo nakpari tipa ga Yekova rugapai, mo moiberãro wenengai tipa gako karagapai. Tipa ka yugoho na kpiapai: Ka mo ingi ho mo andu nunguro ni, mo ima rengba ka sana gu boro naraka rogo gu dagbarago re tipa undo. Ono ya mo mo rengbe ka guari barabangirini mbata fu ni karagapai? Wagusa te. Mo ima rengba ka degaturo wenengai sa gani arugapai. Wakina gure a, tifuo mo sana Yekova tipa tatamana, mo asadi ka ino gako karagapai ni ino mo pa gini andiko nga ga Baibiri na bangua arengo rengbe mo ka mangapai kuti ni rogo gupai du mo rogoho re. Ni kpiapai, ho mo adiaberã ni singia si naida mo ndu kupati sungo, mo ima rengba ka makia gupai Baibiri apehe tipa gbegberẽ apumbo, gbegberẽ kpamiatise, na gupai si aida ani peresipa agu apai nga ga Kindo ti ni mbatayo fu gaani nyemuapai.—Mt. 6:33; Rom. 13:13; 1 Kor. 15:33. w25.01 16 ¶6-7

Gu sangbaanebi nga ga Yesaya ayugu gu kparakparapai du dagba agu aboro du rogo gu paradizo nga ga toro na agu aboro adunga rogoho ya. Yekova nafu ai guhe fu airisiko nga gu i aida na ni tipa i nye mbembedi na ko. Ko ima fu gako ziazia toro, Fugoko, na agu awaraga du mburuhe rii Ziazia Kekeapai tipa gupai nga ani rengbe ka “rihe, . . . Ki mbirihe, . . . [na] kini ngi.” (Oni ringbisinga ha na Yugoti 22:17.) Ni gupai du kia ti gure, agu aboro adunga rogo gu paradizo nga ga toro ya na “gomoro . . . , gomoro ime . . . , [na] kidu na zee.” I na pagume dagbayo na Mbori te. (Amosa 8:11) Yekova nafu ahe kpaima fu Gako aboro, kodihe na agu ariahe nga ga toro. (Yoe. 2:​21-24) Ko namanga gipai re vurube Baibiri, gu gaani awaraga du mburuhe rii Baibiri, gaani bangiriba nga ga internet, vurube gaani adunguratise, na bakere adunguratise. Ani ima rengba ka gbia undo ti agi ambakadapai re na aˈuru dunduko na ni sangbanaha, ani nika mbika na kpotorani kidu wenengai. w24.04 21 ¶5-6

Ka si du nga mo nakpinyemu ka tona mbakadapa rogatise na boro, mo ima rengba ka manga mbakadapai tipa ka fura na gu boro re, singia rogo gu ba du aboro adu rogoho watadu rogo terefuni. Mo pe gupai fu ni gbaiga nga mo ima kpinyemu ni na mo naida oni inidi tironi wenengai. (1 Kor. 14:9) Mo fu regbo fu gu boro re ni berẽkurii wai ni nika karagapai ka si aaidaha wo. (Snz. 15:28) Na ka gu boro re aakpingo nyemu oni mbakadi pa rogatise na ni ya, mo du na irisa tipa gani bipai. Na ka si du nga boro yugu nyemupai nga ga rogatise koyo du mo ni? Si nawiraha wa gu boro re ima du na wingbaduse tipa ka pehe foro, sidu, si naida mo yugu wenesino na kidu na irisa. Ka si du nga mo naida regbo tipa ka berãkuriihe singia mo naida ka tona mbakadapa rogatise, mo pehe fu gu boro re. Ono tie, si naida mo asadi ka karagapai fu ni ni ipiipihe. (Snz. 13:12) Ka si du nga nyemu mbakadapa rogatise tiro na gu boro re te, mo pehe fu ni ngba wene gene na gbaiga. Ka mo aida ka ino boro wenengai, mo pehe funi na oni ki saki gupai kina sa oni aida si mangi ti regbo gaoni mbakadapa rogatise. Agu apai mo aberãha ima rengba kadu kia ti gu gu kura boro aberãha. w24.05 23-24 ¶12-13

Si nawiriha wa ho Davide adu ni kindi ni paranga gude mbata fu garãko da nga 20, ko andu ku rogo gu bataya agu abanzengere nga ga aYisaraere yo adu rogoho. Ko andu ki bi gupai nga abanzengere aagunde agunde bambiko gu ngburunga Fereseto rimoko angia Goriata ‘apayasi pa ga aYisaraere arikavura.’ (1 Sam. 17:​10, 11) Agu abanzengere re aagunde agunde bambiko i aagbe berãyo kuti wai bakio Goriata adu na agu apai ko aagumbaha fuyo. (1 Sam. 17:​24, 25) Ono tie, Davide aagbe berãko kuti kurapai kia. Davide aima ino gupai nga, ho Goriata apayasi agu abanzengere ni nangia ga aYisaraere yo, gure nga ko aasenga gu “arikavura nga ga unga Mbori.” (1 Sam. 17:26) Davide aaberã tipa Yekova. Davide aima du na gu kido nga gu Mbori naundo ko ho ko adu ni ni babanda akandoro nika undoko aundo berewe ti gi regbo re. Ni rengo, mbiko ga Mbori undo, Davide asovura na Goriata na ki di beko!—1 Sam. 17:​45-51. w24.06 21 ¶7

Mo bingo wai ka raka rani nidu kia ka si nidu nga ani airisongo Yekova te. Ka ani tingidi ndu gupai duhe ti ni ni wenepai ka iriso Yekova, si nika undo rani tipa ani nye ni rururani fuko na ani nika du wakina gu bake papara Atambuahe nga guko naya: “Si ni wene he fere ka mbeda na Mbori.” (Tam. 73:28) Ani ima rengba ka hi ai agu akpakarapai rengbe ani ka gbiatirani na ni rogo gi yangara arame re bambiko ani namangapa “unga Mbori nga irarengo.” (1 Tesa. 1:9) Gaani Mbori naberãpa rani aberã na ko nikaa undo rani ti aregbo dunduko. Ko aima undo gu gako amoyambu naadu mbata kusayo na ko naundo rani aundo areme a. Ani nika gbiatirani barambeda na bakere gberãngbi nga gu nika manga auru kpotosende. Ono ani adunga nisarani te, Yekova nika du na kina rani. Sidu, ani dunga adu dunduko na ngarã “wenengaĩ ki ya, ‘Gbia nga gimi mounda; mi agúnde nga wa sa te.’”—Eb. 13:​5, 6. w24.06 25 ¶17-18

Baibiri fura tipa akumba naima susa 40 nga aguyo nazogorago ni abakindo kurii aYisaraere. Agu abakindo naadu ni weneyo aima amanga kura agu apai naadu ni gbegberẽhe. Oni bingo gupai naadu tipa gu wene Bakindo nangia Davide. Yekova aya: “Gi moyambu nangia Dawidi . . . nipeke re na kpotoko yo dunduko, ki nimangi kina gu pai ngba bangire.” (1 Aba. 14:8) Ono wa si avura duwo, gu kumba re amangi wasiwasi kodaba na diakumba na ki mangi mbakadapai tipa i imi kumbari ba vura yo. (2 Sam. 11:​4, 14, 15) Baibiri nafura afura furani a tipa gu weneapai agu abakindo re amangihe nga aguyo naanyenga ni ruruyo fu Yekova ya. Oni bingo gu kpiapai nga ga Rabama. Bangiri Yekova, ko ‘amangi gu pai nadu ni gbigbita ha.’ (2 Peka 12:14) Ono tie, Rabama aima manga bete weneapai. Ni kpiapai, ko agisangba Yekova ho Ko aya ni fuko ka ko songa vura kuti gu ngbatunga aYisaraere naadu bawe ya na ko mbu yo i sia kura bakindo. Ko asa kura agbata a rogo gako kindo tipa si du ni nyanyakihe gbe tipa ka banda ga Mbori aboro be avura yo. (1 Aba. 12:​21-24; 2 Peka 11:​5-12) Wai du Yekova aniini gupai nga bakindo anidu niruru ni? Karagapai kuti gu sanahe re nika undo rani ani ini gupai si aida ani mangihe ka sa ngbarago ti Yekova. w24.07 20 ¶1-3

Na ka si du nga agu agude naima zio bapatiza—du garãyo kusende ti 18—ti ku rogo kere ingapai? Gu gbuu nga ga abaakumba nika manga mbakadapai tipa abaakumba ue sungu na gu gude re gbiati vungu ru. Agu abaakumba re nika sana agu avungu gude re tipa gupai i namangihe tipa ka undo gu wiriyo re u mangi agu aˈariapai si aidaha na ki saberã ru. Ka si dunga gu gude re na kina ruru bipai na si kidu nga avungu ru ima manga diandue tipa gupai re, agu abaakumba ue re ima rengba ka diaberã nga ndupai ho berewe tipa ka ndu na gupai re kumbatayo te. Abaakumba ima ino gupai nga Yekova ima fu gu pagbia fu avunguagude nga i fu rugute fu awiriyo rogo nyemuse yo. (Pa Rug. 6:​6, 7; Snz. 6:20; 22:6; Ef. 6:​2-4) Abaakumba nika sana avungu gu gude re asana ti kura regbo tipa ka bi gupai nga gu gude re nagbia gu undo agbia si aida u gbiaha. Ono ginipai abaakumba amangaha ka si du nga gu gude re nandu kindi kumbatayo kaa manga gupai du ni gbegberẽhe? Ka si du wo, abaakumba biata nika sungo na ni wa sa na agu avunguni nga aKristano. w24.08 24 ¶18

Ani dunduko nidu adu na ngbarago ho ani ninaagbia gamahe ni. Wa vura duhe wo, ani nadu na bakere ngbarago ho ani agamahe ni fu kura aboro. Mbiko gupai nga Yekova akusi rani ngba gi gene re, ani ima rengba ka kiiso gaani ngbarago. Ani ima rengba ka kiiso gaani ngbarago ni ngera ani tipa kura amomu ka undo ngbaha. Si ni bawenepai tie nga Yekova akusi rani ngba gi gene re. (Tam. 139:14) Mbiko gupai nga Baibiri nape gupai furani nga agu aboro nafuhe fu kura aboro nga aboro ngbarago, si taata ani rugutirani na ndu gupai du Yekova ti ni nga ‘Mbori ngbarago.’ (1 Tim. 1:11) Ko nga gu bambata boro nafuhe fu aboro na boro ho nafuhe ni bakerehe kisusi Yekova te. Wakina gupai gu mokedi nangia Pauro apehe, ‘ani ni ungarani, ki nita ata, ki du kina ho rogo ko yo’ mbiko ko. (Amo. 17:28) Ni rengo, “wene gamahe dunduko, na ziazia ũgamahe dunduko” naye be Yekova. (Yak. 1:17) Si nawiraha wa ani dunduko ima kpinyemu ka gbia gu bakere ngbarago naye ti fuhe. Ani rengbe ka mangaha wo ni wirika ani gu sino nga ga gamahe duti Yekova.—Ef. 5:1. w24.09 26 ¶1-4

Bete amoundo abaakumba ima rengba ka bihe nga ka i rengbe nga kada ni abaakumba te bambiko badungu asino si aida i sonosihe. Ono mo tingidi gupai nga singia Yekova watadu gako riigbu, boro ho naida mo yugu agu asino re ngba rengberengbe gene te. (1 Pet. 2:21) Na ga Yekova toro du na bakere ome ti ni nika undo ro tipa mo sonosi agu asino re. (Frp. 2:13) Ya mo sino ho nga gu mo aida ka manga ome tipa ka sonosaha? Mo mangi kparakpee fu Yekova tipaha. Mo mangi wetekapai tipa gu sino re, na ki sana bakumba sa tipa aberãpai tipa wai ka manga ariapai. Agu awirina nga akumba dunduko kodihe na agu aboro namangasunge awere ni abaakumba naandunga andu kindi kumbatayo kaa sonosa agu asino i nafura tipaha rogo gi kekeapai re. Mo naamanga sonakumbatayo kindi! Mo sana Yekova tipa ko raba ro na ki me ro tipa mo duni wene ũsunge ti ngba gako sunge na fu dungurati. (Yes. 64:8) Yekova funga maku afu kpaima kurii gu ome mo amangaha tipa ka rẽ kadu ni bakumba. w24.11 25 ¶17-18

Boro ho dagbarani si aida ni naaberã gupai nga si naida Yekova mbupai funi mbiko gupai gbua nga ni ima irisoko tipa dungu agarã te. Rengo du ngaha nga, Yekova natingidapa agu apai atingida dunduko ani namangihe fuko. Ko afu motumo furani gbua, angianga ka tumo tipa gu weneapai ani namangihe fuko ya. Sidu, si ima rengba kadu ni irairaha ka berã gupai nga, ani ima rẽ tipa ga Yekova mbupai mbiko gupai nga ani ima manga dungu weneapai fuko. Sidu, ka ani idi kuti gupai re, gure nayugoho nga ani naberã gupai nga ani aidanga na motumo te.—Oni ringbisinga ha na AGaratio 2:21. Gu mokedi nangia Pauro aini gupai nga, pai ho ka ko arengbe ka mangaha fu Yekova nga gu ka Yekova ambupai fuko ti ni te. Ono tie, tipagine ko amangisunge nyanyaki ti ni fu Yekova? Ko amangihe wo ka yugo gupai nga ko adu na tambuahe fu Yekova tipa gu weneringise na inapai ko ayuguhe fuko. (Ef. 3:7) Wakina Pauro, ani nandu kumbatayo kaa iriso Yekova zaaza, angianga mbiko ani ima rẽ tipa ga Yekova inopai furani ya, ono mbiko gaani tambuahe tipaha. w25.01 27 ¶5-6