Ester 9:1-32
9 Gunda dxi 13 stiʼ beeu 12, beeu adar,* dxi gudíxhecabe gaca cumplir ni biʼniʼ mandar rey que ne ley stiʼ. Cabeza ca enemigu stiʼ ca judíu que gunduuxecaʼ laacabe dxi que, peru gadxé si ni bizaaca: laga ca judíu que nga binitilucaʼ guiráʼ ca ni nanalaʼdxiʼ laacaʼ.
2 Bidxiña ca judíu ndaaniʼ ca guidxi ra nabézacaʼ, ndaaniʼ guiráʼ ca guidxi ni nuu biaʼ ra runi mandar rey Asuero, para gucaalucaʼ guiráʼ ca ni racalaʼdxiʼ guniná laacaʼ. Cumu guizáʼ bidxibi ca binni ni nabeza ndaaniʼ guiráʼ ca guidxi que laacabe la? qué ñanda nudxiilucaʼ laacabe.
3 Ne guiráʼ ca príncipe ni nuu ndaaniʼ ca guidxi* ca, ca xaíque stiʼ ca gobernador, ca gobernador ne guiráʼ ca ni ruuyaʼ gaca xhiiñaʼ rey gucanecaʼ ca judíu purtiʼ guizáʼ cadxíbicaʼ Mardoqueo.
4 Gúpabe stale autoridad ra palaciu stiʼ rey que. Ne ra zidiʼdiʼ dxi, jma binibiáʼ binni Mardoqueo ndaaniʼ ca guidxi biaʼ ra runi mandar rey que, purtiʼ zeʼ dxi jma stale autoridad gúpabe.
5 Bicaalú ca judíu que ca enemigu sticaʼ né espada ne biiticabe laacaʼ dede ra binduuxecabe laacaʼ. Bíʼnicabe ni gúpacabe gana ca ni nanalaʼdxiʼ laacabe.
6 Ne ra palaciu stiʼ Susa, biiti ca judíu que gaayuʼ gayuaa hombre.
7 Laaca biiticabe Parsandatá, Dalfón, Aspatá,
8 Poratá, Adalía, Aridatá,
9 Parmastá, Arisái, Aridái ne Vaizata.
10 Laacabe nga ca chii xiiñiʼ Hamán xiiñiʼ Hamedata, enemigu stiʼ ca judíu. Peru qué ñaanané diʼ ca judíu ca cosa stícabe despué de biiticaʼ laacabe.
11 Dxi que gúdxicabe rey que panda binni gutiʼ ra palaciu stiʼ Susa.
12 Ndiʼ nga ni gudxi rey que reina Ester: «Pa ndaaniʼ si palaciu stiʼ Susa maʼ biiti ca judíu ne maʼ binduuxecaʼ gaayuʼ gayuaa hombre ne ca chii xiiñiʼ Hamán, ¿nanna xpándaruʼ maʼ biiticabe ndaaniʼ ca guidxi biaʼ ra runi mandar rey yaʼ? Yanna, ¿xiruʼ racaláʼdxiluʼ? Gudxi naa ne zudieeʼ ni lii. ¿Xiruʼ nuuluʼ guinábaluʼ naa? Zudieeʼ ni lii».
13 Para ná Ester rabi laabe: «Pa rábiluʼ jneza ni chinabaʼ lii riʼ la? rey, racalaʼdxeʼ gudiiluʼ lugar guixíʼ guni ca judíu ni nabeza Susa ni bíʼnicaʼ yannadxí casi ná ley biree ca. Laaca rinabaʼ lii ugaandacabe ca cuerpu stiʼ ca chii xiiñiʼ Hamán lu yaga».
14 Ngue runi biʼniʼ mandar rey que gúnicabe ni canabaʼ Ester. Biree ti ley ndaaniʼ guidxi Susa ne bigaandacabe ca cuerpu stiʼ chii xiiñiʼ Hamán lu yaga.
15 Ngue runi 14 stiʼ beeu adar biguetaʼ bidxiña ca judíu de Susa ne biiticabe chonna gayuaa hombre ndaaniʼ guidxi Susa. Peru qué ñaananedícabe ca cosa sticaʼ.
16 Xcaadxi judíu ni nabeza ndaaniʼ ca guidxi biaʼ ra runi mandar rey que laaca bidxíñacaʼ para tíndecaʼ. Biiticabe setenta y cinco mil enemigu stícabe ne zaqué bilácabe de lu náʼ ca ni nanalaʼdxiʼ laacabe, peru qué ñaananedícabe ca cosa sticaʼ.
17 Bizaaca ndiʼ 13 stiʼ beeu adar. Peru 14 que biziiláʼdxicabe ne gudíxhecabe gácani ti dxi para gúnicabe stale guendaró ne chúʼcabe nayecheʼ.
18 Ca judíu ni nabeza Susa bidxíñacaʼ 13 ne 14 stiʼ beeu que para tíndecaʼ. Peru 15 que biziiláʼdxicabe ne gudíxhecabe gácani ti dxi para gúnicabe stale guendaró ne chúʼcabe nayecheʼ.
19 Peru ca judíu ni nabeza lu ca layú stiʼ xcaadxi guidxi, gudíxhecaʼ gúnicaʼ 14 stiʼ beeu adar ti dxi para gúnicaʼ guendaró ne chuʼcaʼ nayecheʼ. Gúcani ti dxi de saa ne ti dxi para gudiisaacabe guendaró.
20 Bicaa Mardoqueo guiráʼ ni bizaaca riʼ ne biseendabe carta ra nuu guiráʼ ca judíu ni nabeza ndaaniʼ ca guidxi ra runi mandar rey Asuero, ca ni nuu gaxha ne ca ni nuu zitu.
21 Biʼniʼ mandarbe laacaʼ gúnicaʼ saa guiráʼ iza, 14 ne 15 stiʼ beeu adar,
22 ca dxi que nga biziilaʼdxiʼ ca judíu purtiʼ maʼ qué nucaalú ca enemigu sticaʼ laacaʼ. Beeu que beeda gaca yuubaʼ stícabe guendanayecheʼ ne lugar de ñuunacabe beeda gácani ti dxi de saa para laacabe. Naquiiñeʼ gúnicabe saa ca dxi que, gúnicabe guendaró ne chúʼcabe nayecheʼ, ne naquiiñeʼ gusendasaacabe guendaró ne gudiicabe regalu ca pobre.
23 Ne guyuu ca judíu de acuerdu gúnirucaʼ saa ni maca bizulú cayúnicaʼ ne gúnicaʼ guiráʼ ni bicaa Mardoqueo ra nuucaʼ.
24 Purtiʼ gudixhe ique Hamán —xiiñiʼ Hamedata agaguita que—, enemigu stiʼ guiráʼ ca judíu, gunitilú guiráʼ ca judíu ne bilaa pur, o suerte, para guchibi ne gunduuxeʼ laacabe.
25 Peru ora guyé Ester nezalú rey que, biʼniʼ mandar rey que guicá ndiʼ: «Guiráʼ ni naguixhe íquebe gúnibe para gunduuxebe ca judíu, guiábani luguiabe». Ne bigaandacabe Hamán ne ca xiiñiʼ lu yaga.
26 Ngue runi pur diidxaʼ pur* gulee lácabe ca dxi que Purim. Ne pur ni bicaa Mardoqueo lu carta que, pur ni biʼyaʼ ca judíu ne ni bizaacacaʼ,
27 bidii stiidxacabe, laacabe, ne ca xiiñicabe ne guiráʼ ni chuʼ ládecabe zúnicabe saa guiropaʼ gubidxa ca ne zúnicabe ni guiráʼ iza ne zinándacabe guiráʼ ni cá gaca ca dxi ca, dxi nexheʼ gácacani.
28 Guiráʼ ca familia ni guibani despué de laacabe naquiiñeʼ guietenaláʼdxicaʼ ne gúnicaʼ saa ca dxi riʼ ndaaniʼ guiráʼ guidxi ne guiráʼ lugar. Cadi naquiiñeʼ gusaana ca judíu de gúnicaʼ saa ca dxi ni runibiáʼcabe casi Purim, ne ca familia stícabe ni guibani despué laaca naquiiñeʼ guietenaláʼdxicaʼ ni ne naquiiñeʼ gúnicaʼ saa ca dxi ca.
29 Despué gucuá sti carta ni caníʼ de Purim, ne biquiiñeʼ reina Ester, xiiñiʼ Abihail, ne Mardoqueo, judíu que, autoridad ni nápacaʼ para bicaacaʼ ni.
30 Biseendaʼ Mardoqueo carta ra nuu guiráʼ ca judíu ni nabeza ndaaniʼ ti gayuaa veintisiete grupu de guidxi ra runi mandar rey Asuero. Lúcani cá diidxaʼ ni dxandíʼ ne ni riguixhedxí ladxidóʼ binni
31 para gábicabe ca judíu que caquiiñeʼ gúnicaʼ saa ca dxi ni runibiáʼcabe casi Purim, ca dxi gudíxhecabe gácacani, casi maca biʼniʼ mandar Mardoqueo, judíu que, ne reina Ester gácani, ne casi bidii stiidxacabe gúnicabe ni, laacabe ne ca xiiñicabe. Ndiʼ riníʼ cadi naquiiñeʼ gócabe gastiʼ ne naquiiñeʼ guinábacabe gacané Dios laacabe.
32 Biʼniʼ mandar Ester laacabe gúnicabe saa stiʼ Purim que ne gucuani lu ti libru.
