Ester 5:1-14
5 Lu guionna gubidxa que, gucu Ester lari ni racu reina, ne biree zeʼ ra patiu ni nuu dede dentru ra lidxi* rey que ne bianadxibe frente de ra nuu sala stiʼ rey que. Nuu rey que ra sala stiʼ, zuba lu trono stiʼ ne nudxiilú neza ra entrada que.
2 Casi peʼ biiyaʼ rey que zuhuaa reina Ester lu patiu que, guizáʼ biecheʼ, para gundísabe bastón de oro naazebe que ne bidxiibe ni neza ra nuu Ester.* Óraque bidxiña Ester ra nuube ne gudaʼnaʼ punta bastón stibe.
3 Para ná rey que rabi laabe: «¿Xi cayácaluʼ, reina Ester? ¿Xi nuuluʼ guinábaluʼ naa? Gudxi naa ne zudieeʼ ni lii. ¡Neca guinábaluʼ naa galaa reinu stinneʼ, zudieeʼ ni lii!».
4 Para ná Ester rabi laabe: «Pa naluʼ la? rey, ñuuladxeʼ ñedaneluʼ Hamán yannadxí purtiʼ maʼ bineʼ ti guendaró para lii».
5 Para ná rey que rabi ca hombre runi xhiiñaʼ: «Lachitidxi Hamán gueeda nagueenda, casi canabaʼ reina Ester ni». Para biree rey que ne Hamán zecaʼ ra biʼniʼ preparar Ester guendaró que.
6 Ne laga cayaaziʼ vinu* que, ná rey que rabi Ester: «¿Xi racaláʼdxiluʼ? Gudxi naa ne zudieeʼ ni lii. ¿Xi nuuluʼ guinábaluʼ naa? ¡Neca guinábaluʼ naa galaa reinu stinneʼ, zudieeʼ ni lii!».
7 Para ná Ester rabi laabe: «Ndiʼ nga ni racalaʼdxeʼ:
8 pa cayuuláʼdxiluʼ ni cayuneʼ la? rey, ne pa rábiluʼ zanda gudiiluʼ naa ni guinabaʼ lii la? ñuuladxeʼ ñedaneluʼ Hamán guixíʼ ra chiguneʼ sti guendaró para lii. Ne guixíʼ guicabeʼ lii, rey».
9 Dxi que guizáʼ nayecheʼ biree Hamán de raqué dede dxaʼ tipa ladxidóʼ de guendanayecheʼ. Peru ora bíʼyabe Mardoqueo ra puertaʼ palaciu stiʼ rey que, bidiibe cuenta qué riasa Mardoqueo ne qué racaditi ora guʼyaʼ laabe, ngue runi guizáʼ bidxiichinebe laa.
10 Peru bicueezabe laabe ne bireebe zebe ra lídxibe, despué bisendacaabe ca xhamígube ne xheelabe Zeres.
11 Ne bizulú Hamán cayuni presumir guiráʼ cosa risaca ni napa, cayuni presumir panda xiiñiʼ napa ne modo bisisaca rey que laabe ra bidii laabe ti puestu para gápabe jma autoridad que xcaadxi príncipe ne ca mozo stiʼ rey que.
12 Laaca guníʼ Hamán: «Ne cadi ngasi, laaca biʼniʼ reina Ester ti guendaró para rey ca ne naa si biʼniʼ invitarbe para chiniáʼ rey ca. Ne guixíʼ laaca biʼniʼ invitar reina ca naa ne rey ca ti guendaró.
13 Peru qué zanda diʼ chuaaʼ nayecheʼ pa cayuuyaruaʼ Mardoqueo judíu que zúbaruʼ ra puertaʼ palaciu stiʼ rey».
14 Para ná xheelabe Zeres ne ca xhamígube rábicaʼ laabe: «Biʼniʼ mandar guzuhuaacabe ti yaga de 50 codo* de nasoo. Ne guixíʼ siadóʼ gunabaʼ rey ca ugaandacabe* Mardoqueo luni. De racá guyé ne biechené rey ca ra chigaca guendaró ca». Guyuulaʼdxiʼ Hamán ni gúdxicabe laa ne biʼniʼ mandar guzuhuaacabe yaga que.
