Ester 7:1-10
7 Para yendá rey que ne Hamán ra biʼniʼ invitar reina Ester laacabe chitócabe.
2 Maʼ ndiʼ nga guiropa gubidxa que, ne laga cayaaziʼ vinu, gunabadiidxaʼ rey que Ester sti biaje: «¿Xi racaláʼdxiluʼ, reina Ester? Gudxi naa ne zudieeʼ ni lii. ¿Xi nuuluʼ guinábaluʼ naa? ¡Neca guinábaluʼ naa galaa reinu stinneʼ, zudieeʼ ni lii!».
3 Para bicabi reina Ester laabe: «Rey stinneʼ, pa cayuuláʼdxiluʼ ni cayuneʼ ne pa rábiluʼ zanda gudiiluʼ naa ni guinabaʼ lii la? canabaʼ lii gulaluʼ naa ne ca binni xquidxeʼ.
4 Purtiʼ maʼ bitoocabe naa ne ca binni xquidxeʼ para guuticabe laadu ne gunduuxecabe ne gunitilúcabe laadu. Pa ñaca nutoosícabe laadu casi esclavu ne esclava la? qué ninieediáʼ gastiʼ. Peru canieeʼ ni, purtiʼ laaca zuniná ni chiguizaaca riʼ lii, rey».
5 Para ná rey Asuero rabi reina Ester: «¡¿Paraa biree ni cá ique guni ndiʼ yaʼ?! ¡¿Tu laabe?! ¡¿Paraa nuube?!».
6 Para bicábibe laa: «Hombre ni nanalaʼdxiʼ laadu nga Hamán, hombre qué iquiiñeʼ riʼ».
Guizáʼ bidxibi Hamán rey ne reina que.
7 Nabé bidxiichi rey que dede biasa ne biree de ra cayaaziʼ vinu que ne zeʼ ra jardín stiʼ palaciu que. Cumu bidii Hamán cuenta zuni castigar rey que laa la? biásabe zinábabe reina Ester gulá laabe.
8 Ora zeeda rey que de ndaaniʼ jardín stiʼ palaciu que ne guyuu ra cayaaziʼ vinu que, biiyaʼ mápeca nuu Hamán lu sillón ziuulaʼ ra nuu Ester. Ngue runi bicaa ti ridxi: «¡¿Ñee laaca zalaxoo hombre riʼ reina ca ndaaniʼ lidxeʼ la?!». Casi peʼ biluxe guníʼ rey que ndiʼ, bichiicabe lú Hamán.
9 Óraque guníʼ Harboná, tobi de ca ni runi dxiiñaʼ ra palaciu que: «Laaca maʼ bizuhuaa Hamán ti yaga para ugaandacabe Mardoqueo, hombre ni bilá lii ra guníʼ xi chigúnicabe lii, rey. Ra lidxi Hamán zuhuaa yaga ca ne nasooni 50 codo».* Óraque ná rey que: «Laugaanda laabe luni».
10 Ngue runi bigaandacabe Hamán lu yaga ni bizuhuaabe para Mardoqueo. Ne zaqué biete xiana stiʼ rey que.
Nota
^ Biaʼ 22.3 m. Biiyaʼ apén. B14.
