Ester 8:1-17
8 Dxi que bidii rey Asuero reina Ester guiráʼ ca cosa risaca stiʼ Hamán, enemigu stiʼ ca judíu. Ne guyé Mardoqueo nezalú rey, purtiʼ guníʼ Ester tu raca laabe.
2 Para gulee rey que aníu ni rucaané sellu ni gúxhabe Hamán ne bidiibe ni Mardoqueo, ne bisaana Ester guiráʼ ca cosa risaca stiʼ Hamán lu náʼ Mardoqueo.
3 Laaca biguetaʼ guniʼné Ester rey que. Biábabe xañee ne cayuunabe canábabe laa guni chaahuiʼ dañu biʼniʼ Hamán, agaguita que, ne guxhiá ni naguixhe íquecabe gúnicabe ca judíu.
4 Para gundisaʼ rey que bastón de oro naazeʼ ne bidxii ni neza ra nuu Ester, óraque biasa Ester ne bizuhuaa nezalú rey que.
5 Óraque gúdxibe rey que: «Rey stinneʼ, pa rábiluʼ jneza ni cayuneʼ ne rusiecheʼ lii, ne pa biaʼsi ne chuuláʼdxiluʼ ni chinabaʼ lii riʼ la? guicá ti ley ni guxhiá ca documentu bicaa hombre riguite binni ca, Hamán xiiñiʼ Hamedata agaguita que, para guinitilú guiráʼ ca judíu nabeza ndaaniʼ ca guidxi biaʼ ra runi mandar rey.
6 Purtiʼ qué zanda diʼ guneʼ huantar guuyaʼ gunitilúcabe ca binni xquidxeʼ. Qué zanda diʼ guneʼ huantar guuyaʼ guuticabe ca familia stinneʼ».
7 Ngue runi ná rey Asuero rabi reina Ester ne Mardoqueo judíu que: «Biaa, maʼ bidieeʼ Ester guiráʼ ca cosa risaca stiʼ Hamán ne maʼ bineʼ mandar ugaandacabe Hamán lu yaga purtiʼ gucalaʼdxiʼ nunduuxeʼ ca judíu.
8 Yanna, lagucaa lu lá rey ni rábitu jma galán gaca para ca judíu ne laiquiiñeʼ aníu stiʼ rey para gucaatu ni sellu, purtiʼ qué zanda diʼ guixiá ti ley ni guicá lu lá rey ne ni maʼ guca sellar né aníu stiʼ».
9 Ngue runi 23 stiʼ guionna beeu que, beeu siván,* bichíñacabe ca secretariu stiʼ rey que. Ne bicaacabe guiráʼ ni biʼniʼ mandar Mardoqueo guni ca judíu ne ca xaíque stiʼ ca gobernador ne ca gobernador ne ca príncipe stiʼ ca guidxi ni nuu dede India hasta Etiopía, biaʼsi ti gayuaa veintisiete grupu de guidxi.* Bicaacabe ni modo ricá stiidxaʼ cada grupu de guidxi ne lu diidxaʼ riníʼcabe ndaaniʼ cada guidxihuiiniʼ. Laaca bicaacabe ni modo ricá stiidxaʼ ca judíu ne lu diidxaʼ ni riniʼcaʼ.
10 Bicaa Mardoqueo caadxi documentu lu lá rey Asuero ne bicaabe cani sellu né aníu stiʼ rey que. Ne bisendanebe ni ca hombre ni riguiʼbaʼ caballu ni ruxooñeʼ nagueendaʼ* ni bisiroobacabe para guni xhiiñaʼ rey.
11 Lu ca documentu que bidii rey que permisu ca judíu ni nabeza ndaaniʼ guiráʼ ca guidxi que para guieegucaʼ ne tíndecaʼ ora gucaalúcabe laacaʼ ne para guuticaʼ, gunitilucaʼ ne gunduuxecaʼ ca grupu de binni naazeʼ guiibaʼ ni zeeda de intiica guidxihuiiniʼ o guidxi* ni gucaalú laacabe —pareju, né gunaa ne xcuidi— ne guiaananécabe ca cosa risaca sticaʼ.
12 Dxi queca zúnicabe guiráʼ ndiʼ ndaaniʼ guiráʼ guidxi runi mandar rey Asuero, 13 stiʼ beeu 12, lu beeu Adar.*
13 Naquiiñeʼ guiree ni cá lu* documentu que casi ti ley ne chindani ndaaniʼ guiráʼ ca guidxi* ca. Laaca naquiiñeʼ gábicabe ni guiráʼ ca binni ni nuu ndaaniʼ ca guidxihuiiniʼ para chuʼ ca judíu listu dxi que, ne ganda gucaalúcabe ca enemigu stícabe.
14 Ngue runi, casi biʼniʼ mandar rey que, oraqueca ne nagueendaca biree ca mensajeru que zinecaʼ ca caballu* ni riquiiñecabe para gúnicabe xhiiñaʼ rey. Laaca gúnnacabe de ley riʼ ndaaniʼ palaciu stiʼ Susa.
15 Ora biree Mardoqueo de nezalú rey que, nácube lari de color azul ne blancu casi ni racu rey, nuu ti corona de oro íquebe ne nándabe ti capa color moradu de guichaladi dendxuʼ de ni jma galán. Ne interu guidxi Susa bicaacaʼ ridxi de tantu cayéchecaʼ.
16 Gutadxí ladxidóʼ ca judíu ne guizáʼ nayecheʼ guyuucaʼ, ne guiráʼ binni biʼniʼ respetar laacaʼ.
17 Ne guizáʼ nayecheʼ guyuu ca judíu ndaaniʼ guiráʼ guidxi* ne ca lugar ra yendá ni biʼniʼ mandar rey que ne ley stiʼ, bíʼnicabe stale guendaró ne saa. Ne stale binni de sti guidxi* gúcacaʼ judíu purtiʼ guizáʼ bidxíbicaʼ ca judíu.
