Ester 4:1-17
4 Ora gunna Mardoqueo guiráʼ ni bizaaca que, gucheza xhaba, gucu lari nachonga* ne bichá dé ludé ladi. De raqué guyebe ndaaniʼ guidxi que ne cucaabe ridxi de tantu naná nuube.
2 Ra puertaʼ si palaciu stiʼ rey que yendabe, purtiʼ guirutiʼ zanda tidiʼ ra puertaʼ que pa nacu lari nachonga.
3 Ne biaʼ ra ziyánnacabe xi ná ley ni gulee rey que ndaaniʼ ca grupu de guidxi biaʼ ra runi mandar, guiráʼ ca judíu ni nabeza raqué riuucaʼ triste ne qué rocaʼ gastiʼ, ruunacaʼ ne rucaacaʼ ridxi de tantu naná nuucaʼ. Ne stale tu laa guʼtaʼ lu lari nachonga ne lu dé ludé.
4 Ora guyé ca criada ne ca eunuco stiʼ Ester ra nuu ne gúdxicabe reina que xi cazaaca, guizáʼ guyuube xizaa ne biseendabe lari ra nuu Mardoqueo para cuee lari nachonga que ladi, peru qué niná Mardoqueo nicaa ni.
5 Para bisendacaa Ester Hatac, ti eunuco ni bidii rey que laabe para guni xhiiñabe, ne biseendabe laa chinabadiidxaʼ Mardoqueo para gánnabe xii ngue cazaaca.
6 Ngue runi guyé Hatac yeyubi Mardoqueo ra plaza stiʼ guidxi que ni nuu frente de ra puertaʼ palaciu stiʼ rey que.
7 Para bisiene Mardoqueo laabe guiráʼ ni cazaaca que. Laaca gudxi laabe pabiáʼ peʼ bueltu guníʼ Hamán chigudii para chuʼ ndaaniʼ tesoro stiʼ rey que ti guuticabe ca judíu que.
8 Laaca bidiibe Hatac ti copia stiʼ ley ni bireeche ndaaniʼ guidxi Susa ra cayuni mandárcabe gunitilúcabe ca judíu. Naquiiñeʼ guluíʼ Hatac copia stiʼ ley que Ester ne gusiénebe ni laa. Laaca gúdxibe Hatac gabi Ester caquiiñeʼ cheʼ nezalú rey que ne laa peʼ guinabaʼ rey que guiá xquídxibe.
9 Para biguetaʼ Hatac ra nuu Ester ne gúdxibe laa xi guiráʼ gudxi Mardoqueo laabe.
10 De raqué gudxi Ester Hatac gabi ca diidxaʼ riʼ Mardoqueo:
11 «Guiráʼ ca ni runi xhiiñaʼ rey ne guiráʼ ca binni ni nuu ndaaniʼ ca guidxihuiiniʼ runi mandar rey ca, nánnacaʼ nuu ti ley ni ná naquiiñeʼ gatiʼ tutiica hombre o gunaa ni chuʼ lu patiu ni nuu dede dentru ra nuu rey ca pa cadi laabe gusendacaabe laa. Ni zanda si gulá binni ca nga pa guindisaʼ rey ca bastón de oro stiʼ. Ne maʼ napa 30 dxi de qué huasendacaa rey ca naa».
12 Ora gunna Mardoqueo ni guníʼ Ester que,
13 bisendatídxibe laa: «Cadi guiníʼ íqueluʼ tisi nuuluʼ ndaaniʼ palaciu stiʼ rey ca jma nagueenda zadxélaluʼ modo guilaluʼ que xcaadxi judíu ca.
14 Purtiʼ, pa qué guiniʼluʼ gastiʼ yanna la? laaca si ziuu tu gacané ca judíu para guilacaʼ; peru lii ne familia stiʼ bixhózeluʼ zátitu. Ne qué gánnanu pa cadi beeda gácaluʼ reina para gacaneluʼ ora chuʼ ti guendanagana casi ndiʼ».
15 Para bicabi Ester Mardoqueo:
16 «Guyé, ne bichiña guiráʼ ca judíu ni nuu Susa, ne laguni ayunar* pur naa. Cadi goto nin guetu gastiʼ chonna dxi ne chonna gueelaʼ. Naa ne ca criada stinneʼ laaca zuni ayunardu. Ne despué, neca ná ley qué zanda cheʼ tuuxa nezalú rey, ziaaʼ nezalú rey ca. Ne pa pur nga guuticabe naa la? zaa gateʼ».
17 De raqué biree Mardoqueo zeʼ ne biʼniʼ guiráʼ ni gunabaʼ Ester laa guni.
