Ester 6:1-14
-
Biʼniʼ mandar rey que gusisácacabe Mardoqueo (1-14)
6 Gueelaʼ que, qué ganda gasiʼ rey que.* Para biʼniʼ mandarbe guedanécabe libru ra ricá guiráʼ ni bizaaca ne gúʼndacabe ni nezalube.
2 Luni cá Mardoqueo nga guníʼ gucalaʼdxiʼ Bigtana ne Teres ñuuticaʼ rey Asuero. Laacabe nga chupa hombre ni biʼniʼ dxiiñaʼ ndaaniʼ palaciu ni gúpacaʼ ra puertaʼ que.
3 Para ná rey que: «¿Ximodo bisisácacabe Mardoqueo pur ni biʼniʼ riʼ ne xi bidiicabe laabe pue?». Para bicabi ca hombre ni runi xhiiñaʼ rey que laa: «Qué ñunidícabe gastiʼ pur laabe».
4 Despué gunabadiidxaʼ rey que: «¿Tu nuu lu patiu ca?». Hamán ngue nuu lu patiu ni nuu fuera de ra lidxi* rey que. Nuube guinábabe ugaandacabe Mardoqueo lu yaga ni biʼniʼ mandarbe guzuhuaacabe para laa.
5 Ngue runi bicabi ca ni runi xhiiñaʼ rey que laa: «Hamán nga nuu lu patiu ca». Para rábibe laacaʼ: «Lagabi laabe chuʼbe».
6 Ora guyuu Hamán, gudxi rey que laabe: «¿Xi rábiluʼ caquiiñeʼ gúnicabe hombre ni racalaʼdxiʼ rey gusisaca?». Óraque guníʼ ique Hamán:* «¿Turuʼ ndiʼ nuu rey riʼ gusisaca pa cadi naa yaʼ?».
7 Ngue runi ná Hamán rabi laabe: «Pa racaláʼdxiluʼ gusisácaluʼ tuuxa la? rey,
8 guedanécabe lari ni racu ti rey, de ca ni ráculuʼ ne guedanécabe ti caballu stiluʼ ni nuu adorno ique, tobi de ca ni riguiʼbaluʼ, rey.
9 Ne tobi de ca príncipe jma risaca stiʼ rey gaca xcuenta lari ne caballu ca. Ne hombre ni racaláʼdxiluʼ gusisácaluʼ, rey, naquiiñeʼ ugácucabe laabe lari ca ne gudxiibacabe laabe lu caballu ca ne sanécabe laabe ra plaza* stiʼ guidxi ca. Ne sanírucabe nezalube ne guiníʼcabe nadipaʼ: “¡Sicaríʼ nga runi tratárcabe hombre ni racalaʼdxiʼ rey gusisaca!”».
10 Oraqueca biʼniʼ mandar rey que Hamán: «¡Guca purá! Yeyubi lari ne caballu ca. Guiráʼ ni guniʼluʼ ca biʼniʼ ni Mardoqueo, judíu ni zuba ra puertaʼ palaciu stiʼ rey. Biʼniʼ guiráʼ xixé ni guniʼluʼ ca».
11 Para biree Hamán ziyubi lari ne caballu que, bigácube* lari que Mardoqueo, bidxiibabe* laa lu caballu que ne yenebe laa ra plaza stiʼ guidxi que, ne nadipaʼ guniʼbe nezalú Mardoqueo: «¡Sicaríʼ nga runi tratárcabe hombre ni racalaʼdxiʼ rey gusisaca!».
12 Despué de ngue, biguetaʼ Mardoqueo ra puertaʼ palaciu stiʼ rey. Peru Hamán la? nagueendaca biguetaʼ ra lidxi, zituí lube ne ziguchiibe íquebe.
13 Gudxi Hamán guiráʼ ca xhamigu ni bizaaca que ne laaca gúdxibe ni Zeres xheelabe. Para ná ca hombre rudii conseju laabe* ne Zeres rábicaʼ laabe: «Pa judíu Mardoqueo, jma nápabe autoridad que lii, ne qué zuni ganarluʼ laabe; de seguru ziábaluʼ nezalube».
14 Laga caniʼnérucabe Hamán, bedandá ca hombre ni napa autoridad ndaaniʼ palaciu que, ne oraqueca zinecaʼ laabe ra biʼniʼ invitar Ester laabe chitobe que.
