Ester 2:1-23
2 Despué de ngue, biete si xiana stiʼ rey Asuero, biguetaʼ guníʼ íquebe ni biʼniʼ Vasti ne xi gudixhe íquebe gúnibe para guni castigarbe laa.
2 Para ná ca ni racané rey que rábicaʼ laabe: «Caquiiñeʼ guyúbinu caadxi binnidxaapaʼ nahuiiniʼ ne sicarú para lii, rey.
3 Guyubi rey caadxi hombre ndaaniʼ ca guidxi biaʼ ra runi mandar para guchíñacaʼ guiráʼ ca binnidxaapaʼ sicarú ne guedanecaʼ laacabe ra palaciu stiʼ Susa, ndaaniʼ yoo ra riuu ca gunaa. Ne gapaʼ Hegái laacabe —eunuco stiʼ rey ne ni rapa ca gunaa— ne guixuubicabe aceite ti guihuínnicabe jma sicarú.*
4 Ne baʼdudxaapaʼ ni jma chuulaʼdxiʼ rey ca gacaʼ reina lugar stiʼ Vasti». Nabé guyuulaʼdxiʼ rey que ni guníʼcabe ne biʼniʼ ni gúdxicabe laa.
5 Ra palaciu stiʼ Susa que nuu ti judíu láʼ Mardoqueo, xiiñiʼ Jaír, xiiñiʼ Simeí, xiiñiʼ Quis, ti benjaminita,
6 ni guyuu lade ca binni ni guleecabe de Jerusalén, dxi zinécabe Jeconías,* rey stiʼ Judá, rey ni gulee Nabucodonosor rey stiʼ Babilonia de xquidxi.
7 Bisiniisi Mardoqueo* ti baʼdudxaapaʼ láʼ Hadassá,* xprímabe,* laca laabe nga Ester, purtiʼ guti bixhoze ne jñaa. Nabé sicarú baʼdudxaapaʼ riʼ ne nápabe ti cuerpu galán. Gucuaa Mardoqueo laabe casi xiiñiʼ despué de guti bixhózebe ne jñaabe.
8 Ora gunna ca binni que xi ley gulee rey que, yenécabe stale baʼdudxaapaʼ ra palaciu stiʼ Susa ne biaanacabe lu náʼ Hegái, ni rapa ca gunaa que. Ládecabe zeʼ Ester ne laaca yenécabe laabe ra palaciu stiʼ rey que, ne Hegái gupaʼ laabe.
9 Nabé guyuulaʼdxiʼ Hegái modo naca Ester ne biaba baʼdudxaapaʼ riʼ laabe.* Ne nagueendaca biʼniʼ mandar Hegái guidaabiʼ baʼdudxaapaʼ riʼ né aceite* ti guihuinni jma galán ne quíxhecabe xi caquiiñeʼ go. Laaca bidiibe laa gadxe criada ni maca gulícabe ni nuu ra lidxi rey que. Despué yenebe laa ne ca criada stiʼ lugar jma galán ni nuu ra yoo stiʼ ca gunaa.
10 Qué niníʼ Ester gastiʼ de xquidxi nin de ca familia stiʼ purtiʼ maca gudxi Mardoqueo laabe cadi gábibe ni guirutiʼ.
11 Guiráʼ dxi ridiʼdiʼ Mardoqueo frente de patiu stiʼ yoo stiʼ ca gunaa que para gánnabe ximodo nuu Ester ne xi cazaaca.
12 Ne rié ca baʼdudxaapaʼ que nezalú rey Asuero pur turnu. Cada tobi de laacabe ridaabicabe* 12 beeu para guihuínnicabe jma galán. Xhoopaʼ beeu ridaabinécabe aceite de mirra ne sti xhoopaʼ beeu ridaabinécabe aceite rindáʼ naxhi ne stale tipu crema.
13 Despué de ngue maʼ riuucabe listu para chécabe nezalú rey que. Ne intiica cosa guinábacabe, ricaacabe ni ra yoo stiʼ ca gunaa que ora chécabe ra palaciu stiʼ rey.
14 Riuucabe huadxí ne rireecabe siadóʼ peru maʼ ra nuu sti yoo stiʼ ca gunaa que ribiguétacabe, ne ni rapa ra yoo que nga Saasgaz, eunuco stiʼ rey que ne ni rapa ca xheelaʼ rey que. Ne maʼ qué ribiguétacabe ra nuu rey que pa qué gusendacaa laacabe, peru pa guizáʼ chuulaʼdxiʼ rey que tobi de laacabe, laa peʼ rusendacaa laabe ne riníʼ tu labe.
15 Ora guca caber Ester —baʼdudxaapaʼ ni gucuaa Mardoqueo casi xiiñiʼ, sobrinu Abihail, bixhoze báʼdudxaapaʼ que— cheʼ nezalú rey que, ni gunábasibe nga ni gudxi Hegái laabe, eunuco stiʼ rey que ne ni rapa ca gunaa que. (Biaʼ tiempu guyuu Ester raqué, biábabe guiráʼ binni ni biʼyaʼ laabe).
16 Yenécabe Ester nezalú rey Asuero ndaaniʼ palaciu stiʼ rey lu beeu chii —laani nga beeu tebet—, lu gadxe iza de cayuni mandarbe.
17 Ne jma gunnaxhii rey que Ester que xcaadxi gunaa que. Nabé guyuulaʼdxiʼ rey que modo nácabe ne biʼniʼ ganarbe cariñu stiʼ jma que xcaadxi binnidxaapaʼ que. Ngue runi guluube adorno* ni riuu ique reina que ique Ester ne bíʼnibe laa reina lugar stiʼ Vasti.
18 Ne biʼniʼ rey que ti saa para guiráʼ ca príncipe ne ca mozo stiʼ, laani nga saa stiʼ Ester. Biʼniʼ mandar rey que gundaacabe ca ni deguyoo ndaaniʼ ca guidxi que* ne bisigáʼdebe stale cosa, ti rey si casi laabe zanda gusigaʼdeʼ ca cosa riʼ.
19 Ne guiropa biaje bichíñacabe ca binnidxaapaʼ* que, zuba Mardoqueo ra puertaʼ palaciu stiʼ rey que.
20 Peru qué niníʼ diʼ Ester gastiʼ de familia stiʼ nin de xquidxi, casi gudxi Mardoqueo laabe gúnibe. Bizuubarube stiidxaʼ Mardoqueo cásica dxi nabézabe ra nuu.
21 Ca dxi que, laga zuba Mardoqueo ra puertaʼ palaciu stiʼ rey que, Bigtán ne Teres —chupa hombre* ni rapa ra puertaʼ, ni runi dxiiñaʼ ndaaniʼ palaciu que— guizáʼ bidxiichicaʼ ne gudixhe íquecaʼ gúnicaʼ xiixa para guuticaʼ rey Asuero.
22 Peru gunna Mardoqueo ni cá íquecabe gúnicabe ne nagueendaca gúdxibe ni reina Ester, para gudxi Ester rey Asuero xi gudxi Mardoqueo laa.
23 De raqué biʼniʼ investigárcabe ni bizaaca que ne ra gudiʼdiʼ tiempu bihuinni dxandíʼ ni, ngue runi bigaandacabe guiropaʼ hombre que lu yaga. Ne gucuani nezalú rey que, lu libru ra ricá guiráʼ ni bizaaca.
Nota
^ O «guicaacabe ti tratamientu de belleza».
^ O «Beeda gaca Mardoqueo bixhoze».
^ Ndiʼ nga lá Ester lu diidxaʼ hebreu ne riniʼni “mirto”.
^ O «xiiñiʼ biʼchiʼ bixhózebe».
^ O «gúcabe nachaʼhuiʼ né laa».
^ O «guicaa baʼdudxaapaʼ riʼ ti tratamientu de belleza».
^ O «ricaacabe ti tratamientu de belleza».
^ O «turbante».
^ O «Biʼniʼ mandar rey que cadi quixe ca binni de ca guidxi que impuestu».
^ O «baʼdudxaapaʼ».
^ O «chupa oficial».
