Ester 1:1-22
1 Bizaaca historia riʼ ca dxi cayuni mandar rey Asuero,* rey riʼ nga biʼniʼ mandar ti gayuaa veintisiete grupu de guidxihuiiniʼ* dede India hasta Etiopía.*
2 Ca dxi que cayuni mandar rey Asuero ndaaniʼ palaciu stiʼ Susa.*
3 Lu guionna iza de cayuni mandarbe bíʼnibe ti saa para guiráʼ ca príncipe ne ca mozo stibe. Ne raqué nuu ca xaíque stiʼ ejércitu stiʼ Persia ne Media, ca hombre risaca ne ca príncipe stiʼ ca grupu de guidxihuiiniʼ que.
4 Ne biluiʼbe laacaʼ ca cosa risaca ni nuu lu reinu stibe ne pabiáʼ poder nápabe casi rey, biaʼsi ti gayuaa ochenta dxi bindaabe para biluiʼbe laacaʼ guirani.
5 Gudiʼdiʼ si guiráʼ ngue, biʼniʼ rey que ti saa ni bindaa gadxe gubidxa, bíʼnibe ni lu patiu stiʼ jardín ni nuu ra palaciu stibe para guiráʼ ca binni ni nuu ra palaciu stiʼ Susa, para ca ni napa ti puestu risaca ne zaqueca para ca ni qué gapa.
6 Lu patiu que nanda cortina de lino ne de algodón de ni jma galán, ne de lari azul ni liibiné doo de ni jma galán ne doo moradu ni bizáʼcabe de guicha ladi dendxuʼ ni liibi lu caadxi argolla de plata, ne laaca nuu columna de mármol raqué, laaca zuhuaa sillón ziuulaʼ de oro ne de plata, zuhuaacani lu ti pisu de guié pórfido, mármol blancu, nácar ne mármol nayaaseʼ.
7 Gudiizicabe vinu ndaaniʼ caadxi copa* de oro ne gadxé gadxé modelu cada copa que. Guizáʼ guyuu vinu ra palaciu stiʼ rey que, ne ti rey si casi laabe zanda gudii biaʼ vinu bidiibe que.
8 Ca dxi que guirutiʼ niguixhe pabiáʼ zanda gueʼ cada binni; zaqué bíʼnicabe ni purtiʼ maca guníʼ rey que ne ca hombre ni napa autoridad ndaaniʼ palaciu que zanda gueʼ binni biaʼ naʼ ladxidóʼ.
9 Ca dxi que, laaca biʼniʼ Vasti, reina que, ti saa para ca gunaa ndaaniʼ palaciu* stiʼ rey Asuero.
10 Ra bizaa gadxe gubidxa, ora cayecheʼ ladxidóʼ rey que pur vinu ni cayéʼ, guníʼnebe ca hombre ni racané laabe —gadxe hombre ni napa autoridad ndaaniʼ palaciu que, laacabe nga Mehumán, Biztá, Harboná, Bigtá, Abagtá, Zetar ne Carcás—
11 ne gúdxibe laacaʼ guedanecaʼ reina Vasti ra nuube ne uguu ique adorno* ni riguu ique ca reina para guluiʼbe ca binni guidxi que ne ca príncipe stibe pabiáʼ sicarú reina que purtiʼ dxandíʼ peʼ guizáʼ galán laa.
12 Peru neca stale biaje bisendacaa rey que reina Vasti, qué niná nuzuubaʼ stiidxaʼ ca hombre ni napa stale autoridad ndaaniʼ palaciu que, ca ni biseendaʼ rey que. Ngue runi guizáʼ bidxiichi rey que ne bidaa xiana.
13 Para guniʼné rey que caadxi hombre nuu xpiaaniʼ ni nanna stale de ley ne de ca guendanagana ni huayaca chaahuiʼ nezalú justicia. (Ca hombre ni guizáʼ nanna de ley ne de xcaadxi guendanagana ni huayaca chaahuiʼ nga ruuyaʼ guiráʼ ca cosa ni rizaaca rey que.
14 Ca ni jma riuu gaxha de laabe nga Carsená, Setar, Admatá, Tarsis, Meres, Marsená ne Memucán, gadxe príncipe stiʼ Persia ne Media ni randa riuu nezalú rey que ne laacabe nga nápacabe ca puestu jma risaca lu reinu que).
15 Para gunabadiidxaʼ rey que laacabe: «Según ni ná ley, ¿xi rábitu naquiiñeʼ gaca reina Vasti pur qué niná nuzuubaʼ stiidxaʼ rey Asuero, ne qué niná ñuni ni yetidxi ca hombre ni napa autoridad ndaaniʼ palaciu que laa?».
16 Óraque ná Memucán rabi rey que ne ca príncipe que: «Cadi rey si zapa guendanagana pur ni biʼniʼ reina Vasti riʼ, sínuque laaca zugaanda ni guiráʼ ca príncipe ne ca binni ni nabeza ndaaniʼ ca guidxi* biaʼ ra runi mandar rey Asuero.
17 Purtiʼ ora ganna guiráʼ ca gunaa ni maʼ bichaganáʼ ni biʼniʼ reina riʼ, maʼ qué zuni respetarcaʼ xheelacaʼ ne zaniʼcaʼ: “Bisendacaa rey Asuero reina Vasti, peru qué ninabe nuzuubabe stiidxaʼ”.
18 Yannadxica, ca princesa stiʼ Persia ne Media ni ganna de ni biʼniʼ reina riʼ, zábicaʼ ni xheelacaʼ, ca príncipe stiʼ rey, ne maʼ qué zuni respetar ca gunaa riʼ xheelacaʼ ne zuchiichini ca príncipe ca.
19 Nga runi pa naluʼ la? rey, gulee ti ley para maʼ cadi chuʼruʼ dxi gueeda guzuhuaa Vasti nezaluluʼ, ne guicá ley riʼ ra cá ca ley stiʼ Persia ne Media, ca ley ni guirutiʼ zanda guxhá. Ne cuiluʼ sti gunaa para gaca reina, ti gunaa ni guni ni jneza.
20 Ti ora gunadiaga guiráʼ ca binni ni nabeza lu reinu stiluʼ de ley riʼ la? guiráʼ ca gunaa ni maʼ bichaganáʼ zuni respetarcaʼ xheelacaʼ, dede lade ca binni ni napa ti puestu jma risaca ne ca ni qué gapa».
21 Cumu guyuulaʼdxiʼ rey que ne ca príncipe que ni ná Memucán la? biʼniʼ rey que ni nabe.
22 Ngue runi biseendabe carta ra nuu guiráʼ ca guidxi* ni nuu lu reinu stibe, ne gucuácani modo ricá stiidxaʼ ca guidxi que ne lu idioma stiʼ cada guidxihuiiniʼ. Luni cayuni mandar rey que cada hombre ni maʼ bichaganáʼ gusihuinni naca xaíque* ra lidxi ne guiníʼ familia stiʼ idioma ni riníʼ.
