Ester 3:1-15
3 Bizaaca si guiráʼ ndiʼ, bidii rey Asuero ti puestu risaca Hamán xiiñiʼ Hamedata agaguita que ne bidiibe laa autoridad, jma que biaʼ napa xcaadxi príncipe que.
2 Guiráʼ ca hombre runi dxiiñaʼ ndaaniʼ palaciu, ca ni ruzuhuaa ra puertaʼ palaciu stiʼ rey que, ruzuxíbicaʼ dede riguixhe íquecaʼ layú nezalú Hamán, purtiʼ ngue nga biʼniʼ mandar rey que laacabe gúnicabe. Peru Mardoqueo qué riná guzuxibi ne qué riguixhe ique layú nezalube.
3 Ngue runi ca mozo ni runi dxiiñaʼ ndaaniʼ palaciu ni zuhuaa ra puertaʼ palaciu stiʼ rey que, gúdxicaʼ Mardoqueo: «¿Xiñee qué naluʼ gúniluʼ ni biʼniʼ mandar rey ca pue?».
4 Guiráʼ dxi rábicabe ni laabe peru qué rulábibe laacaʼ. Para gúdxicabe ni Hamán, ti laa guʼyaʼ pa zudii lugar gúniruʼ Mardoqueo zaqué. Purtiʼ maca gudxi Mardoqueo laacabe judíu laa.
5 Ora biʼyaʼ Hamán qué riná Mardoqueo guzuxibi ne qué riná quixhe ique layú nezalube, guizáʼ bidxiichi.
6 Peru cumu maca gúdxicabe laabe padé Mardoqueo la? maʼ cadi laasi cá íquebe guutibe. Para bizulú Hamán biyubi modo gunitilú guiráʼ ca judíu ni nabeza biaʼ ra runi mandar Asuero, guidubi naca xquidxi Mardoqueo.
7 Ngue runi, para cuícabe dxi ne beeu guizaaca ndiʼ, bilaacabe pur (laca laani nga suerte)* nezalú Hamán primé beeu que —beeu nisán—,* lu iza 12 de cayuni mandar rey Asuero. Ne biaʼsi lu beeu 12 que guca caber gácani, laani nga beeu adar.*
8 De raqué ná Hamán rabi rey Asuero: «Nuu ti grupu de binni de ti guidxi ne reechecabe ndaaniʼ guiráʼ ca guidxi ni nuu lu reinu stiluʼ ne maʼ gadxé ca ley stícabe que ca ley stiʼ xcaadxi guidxi ca. Qué rinácabe chinándacabe ca ley stiʼ rey, ne pa gudii rey lugar gúnicabe zacá la? zapa guendanagana.
9 Nga runi pa rábiluʼ biaʼsi la? rey, guiree ti ley ni guiníʼ caquiiñeʼ guinitilú guidxi riʼ. Ne naa zudieeʼ chii mil talentu* de plata ca hombre ni runi xhiiñaʼ rey para cuʼcaʼ ni lade ca tesoro stiʼ rey».*
10 Para guxha rey que aníu ni rucaané sellu ni nuu náʼ ne bidii ni Hamán, hombre ni nanalaʼdxiʼ ca judíu que, xiiñiʼ Hamedata agaguita que.
11 Óraque ná rey que rabi Hamán: «Cusaanaʼ plata ca ne guidxi ca lu naluʼ para gúniluʼ ni gacaláʼdxiluʼ».
12 Ngue runi 13 stiʼ primé beeu que bisendacaacabe ca secretariu stiʼ rey que. Laacabe nga bicaacabe guiráʼ ni biʼniʼ mandar Hamán para ca xaíque stiʼ ca gobernador ni napa rey que, para ca gobernador stiʼ ca guidxi* que ne para ca príncipe stiʼ cada guidxihuiiniʼ. Bicaacabe ra nuu cada guidxi modo ricá stiidxacaʼ ne ra nuu cada guidxihuiiniʼ lu diidxaʼ ni riniʼcaʼ. Guirani gucuani lu lá rey Asuero ne guca sellar ni né aníu ni rucaané rey que sellu.
13 Despué biseendacabe tu chiné ca carta que ra nuu guiráʼ ca guidxi* ni runi mandar rey que. Luni cá naquiiñeʼ guuticabe, gunduuxecabe ne gunitilúcabe guiráʼ ca judíu que —nahuiiniʼ, huaniisi, gunaa ne xcuidihuiiniʼ— ti dxi si, 13 stiʼ beeu 12 que, laca laani nga beeu adar, ne guiaananécabe guiráʼ ca cosa sticaʼ.
14 Ne ndaaniʼ ca guidxi* ra chindá ca carta riʼ naquiiñeʼ gúʼyacabe ni casi ley, ne naquiiñeʼ gánnacabe ni ndaaniʼ guiráʼ ca guidxihuiiniʼ ca ti chuʼcaʼ listu dxi ca.
15 Ne nagueendaca biree ca hombre que zinecaʼ ca carta que, casi biʼniʼ mandar rey que ni. De ndaaniʼ palaciu stiʼ Susa nga biree ley que. Despué guriné rey que Hamán ne bizulú cayeʼcaʼ, peru ndaaniʼ guidxi stiʼ Susa cadi cayene binni xi cazaaca.
Nota
^ Dxiqué ante guicaacabe xiixa decisión rulaacabe suerte. Cadi laadini nga suerte ni runi cré binni yanna. Biiyaʼ glosario, bilaacabe suerte.
^ Biiyaʼ apén. B15.
^ Biiyaʼ apén. B15.
^ Ti talentu nga 34.2 kg. Biiyaʼ apén. B14.
^ O zándaca «Zaguaaʼ chii mil talentu lade ca tesoro stiʼ rey para ca ni guni dxiiñaʼ ca».
^ O «ca provincia».
^ O «ca provincia».
^ O «ca provincia».
