“Diri kami nagkakauruyon kon may-ada gud ba ngaran an Dios, o kon may-ada man, kon ano ito nga ngaran.”—Propesor David Cunningham, Theological Studies.

An Dios nagsiring: “Ako hi Jehova, amo ito an akon ngaran.” (Isaias 42:8) An ngaran nga Jehova tikang ha Hebreo nga nangangahulogan “Hiya Nagpapahinabo nga Magin.”—Kitaa an New World Translation, Appendix 1, parapo 1.

Karuyag ni Jehova nga gamiton naton an iya ngaran. An Biblia nasiring: “Tawag han iya ngaran, pagsaysay han iya mga binuhatan dida ha mga katawohan, sumati nga an iya ngaran pagpahitas-on.”—Isaias 12:4.

Gin-gamit ni Jesus an ngaran han Dios. Ha iya pag-ampo, hi Jesus nagsiring kan Jehova: “Iginpakilala ko ha ira [mga disipulo ni Jesus] an imo ngaran ngan padayon nga igpapakilala ko ito.” Kay ano nga iginpakilala ni Jesus ha iya mga disipulo an ngaran han Dios? Hiya nagsiring: “Basi magpakita hira hin gugma sugad han paghigugma mo [Dios] ha akon ngan basi magin kahiusa ako nira.”—Juan 17:26.

“An tawo nga diri maaram han ngaran han Dios diri nakilala ha Iya sugad nga persona,” siring han teologo nga hi Walter Lowrie, “ngan diri hiya mahibabaro paghigugma ha Iya, kon para ha iya an Dios usa la nga pwersa ngan diri usa nga persona.”

Pananglitan, hi Victor nga nasingba kada semana. Pero para ha iya, diri niya kilala an Dios. “Katapos, hinbaroan ko nga Jehova an ngaran han Dios, dida hito baga hin pormal nga iginpakilala hiya ha akon,” siring niya. “Yana kilala ko na an Usa nga hinbabatian ko la hadto. Nakilala ko hiya sugad nga tinuod nga Persona ngan nagin duok ako ha iya.”

Hi Jehova napahirani ha mga tawo nga nagamit han iya ngaran. May kalabotan hadton “naghunahuna ngada ha iya ngaran,” hiya nagsasaad: “Akon hira huhungayon, sugad han paghungay han usa ka tawo han iya kalugaringon nga anak nga lalaki nga nag-aalagad ha iya.” (Malakias 3:16, 17) Ginbibendisyonan liwat han Dios an natawag han iya ngaran. An Biblia nasiring: “An kada tagsa nga natawag ha ngaran ni Jehova matatalwas.”—Roma 10:13.