Usa nga Domingo nga kulop, hira Kenneth ngan Filomena nga taga-Curaçao, binisita ha mag-asawa nga ira gindudumarahan hin pag-aram ha Biblia.

“Pag-abot namon,” siring ni Kenneth, “sarado an balay ngan waray an ira awto. Pero baga hin may nag-aghat ha akon nga tawagan an celfon han asawa.”

Ginbaton han asawa an tawag ngan nagsiring nga adto ha trabaho an iya bana. Pero han hinbaroan niya nga aada ha gawas han ira balay hira Kenneth ngan Filomena, gin-abrihan niya an purtahan ngan ginpasulod hira.

Inabat dayon nira nga nagtinangis pa la an babaye. Han nag-ampo hi Kenneth basi tikangan an ira pag-aram, nagtangis an babaye. Salit makonsiderasyon nga ginpakianhan nira hiya kon ano an problema.

Nagsumat an babaye nga nagplano hiya pag-unay hito nga kulop, ngan naghihimo hiya hin suicide note ha iya bana han mapugngan hiya han ring han celfon. Nagsiring hiya nga may-ada hiya depresyon, salit ginliaw nira hiya pinaagi hin pipira nga teksto ha Biblia. Ito nga pagliaw nakatalwas gud hin kinabuhi.

“Nagpapasalamat kami kan Jehova ha pagtugot ha amon nga buligan inin depres nga babaye,” siring ni Kenneth, “labi na ha pag-aghat ha amon—bangin pinaagi hin anghel o han Iya baraan nga espiritu—ha pagtawag ha iya!” *

Husto ba nga hunahunaon nira Kenneth nga nanginlabot an Dios, pinaagi man hin anghel o han Iya baraan nga espiritu, o aktibo nga pwersa? O an napapanahon ba nga tawag ni Kenneth matatawag nga makalilipay la nga tsamba?

Diri kita makakasiguro. Pero an aton la hinbabaroan, ginagamit han Dios an iya mga anghel ha pagbulig ha mga tawo ha espirituwal nga paagi. Pananglitan, an Biblia nasiring nga gin-gamit han Dios an usa nga anghel basi giyahan an Kristiano nga ebanghelisador nga hi Felipe nga buligan an Etiopiahanon nga opisyal nga namimiling hin espirituwal nga giya.—Buhat 8:26-31.

An iba-iba nga relihiyon nag-aaghat hin pagtoo ha mga espiritu, diin an pipira ginhuhulagway sugad nga buotan ngan nagbubuhat han kaburut-on han Dios o nagbabantay ha usa nga tawo. Damu an natoo nga diri la naeksister an mga anghel kondi may mahihimo liwat hira ha mga tawo. Kondi an iba diri gud natoo ha mga anghel.

Tinuod ba an mga anghel? Kon oo, diin hira nagtikang? Ano an kamatuoran mahitungod ha ira? May mahihimo ba hira ha imo? Aton usisahon an ginsisiring han Biblia.