Iginpapakita han Biblia nga basi matuman an katuyoan han Dios, an mga anghel usahay nagtatagana hin proteksyon ha tinuod nga mga magsiringba. (Salmos 34:7) Pananglitan:

• Han ginbungkag ni Jehova an magraot nga syudad han Sodoma ngan Gomorra, ginbuligan han mga anghel an matadong nga hi Lot ngan an iya pamilya nga makapalagiw.—Genesis 19:1, 15-26.

• Ha kadaan nga Babilonya, han ginsirotan hin kamatayon ha naglalaga nga hudno an tulo nga batan-on nga Hebreo, an Dios “nagpadara han iya angel, ngan nagluwas han iya mga sorogoon.”—Daniel 3:19-28.

• Katapos hin usa ka gab-i ha lungib han mabangis nga mga leon, an matadong nga hi Daniel nagsiring nga nakatalwas hiya tungod kay an Dios “nagpadara han iya angel, ngan nagguum han mga baba han mga leon.”—Daniel 6:16, 22.

Usahay, nabulig an mga anghel ha mga buruhaton han Kristiano nga kongregasyon han siyahan nga siglo kon kinahanglan basi matuman an katuyoan ni Jehova. Pananglitan:

• Gin-abrihan han usa nga anghel an prisohan ngan ginsugo an priso nga mga apostol nga magpadayon ha pagsangyaw ha templo.—Buhat 5:17-21.

• Ginsugo han usa nga anghel an ebanghelisador nga hi Felipe nga kumadto ha dalan ha disyerto nga tikang ha Jerusalem ngadto ha Gasa ngan sangyawan an usa nga Etiopiahanon nga tikadto ha Jerusalem basi magsingba.—Buhat 8:26-33.

• Han gintugotan na han Dios nga magin Kristiano an mga diri Judio, may anghel nga nagpakita ha Romano nga opisyal han kasundalohan nga hi Cornelio ha usa nga bisyon, ngan ginsidngan hiya nga ipatawag hi apostol Pedro ha iya balay.—Buhat 10:3-5.

• Han napriso hi apostol Pedro, may anghel nga nagpakita ha iya ngan nagpagawas ha iya ha prisohan.—Buhat 12:1-11.

Waray ebidensya nga ginagamit yana han Dios an mga anghel basi milagroso nga buligan an mga tawo pariho ha mga gin-unabi ha Biblia. Kondi, hi Jesus nagsiring may kalabotan ha aton panahon: “Inin maopay nga sumat han Ginhadian isasangyaw ha bug-os nga inuukyan nga tuna sugad nga pamatuod ha ngatanan nga nasud, ngan sunod hito an kataposan maabot.” (Mateo 24:14) Maaram ka ba nga ginbubuhat ito han mga disipulo han Kristo ilarom ha paggiya han mga anghel?

Iginpapakita han libro han Pahayag nga an mga anghel magigin maduruto ha pagbulig ha mga tawo ha bug-os nga tuna nga mahibaro mahitungod kan Jehova ngan han iya katuyoan para ha tawo. Hi apostol Juan nagsurat: “Nakakita ako hin usa pa nga anghel nga nalupad ha kabutngaan han langit ngan tuna, ngan may maopay nga sumat hiya nga ipapasamwak ha mga naukoy ha tuna, ha tagsa nga nasud, tribo, pinulongan, ngan katawohan, nga nasiring ha daku nga tingog: ‘Kahadluki niyo an Dios ngan himayaa hiya, kay inabot na an oras han iya paghukom, salit singbaha an Dios nga naghimo han langit ngan han tuna, han dagat ngan han mga burabod han tubig.’” (Pahayag 14:6, 7) Damu nga eksperyensya yana an nagpapamatuod han bulig han mga anghel ha pagsangyaw han Ginhadian nga buruhaton ha bug-os nga kalibotan. Ngani, “nagkakalipay an mga anghel han Dios” kon may bisan usa nga makasasala nga nagbabasol ngan nabalik kan Jehova.—Lucas 15:10.

Ano an mahitatabo kon matapos na an pagsangyaw nga buruhaton? Hito nga panahon, an mga anghel nga “kasundalohan ha langit” masuporta kan Jesu-Kristo, an Hadi han mga hadi, ha “pakiggirra ha daku nga adlaw han Dios nga Makagarahum-ha-ngatanan” ha Armagedon. (Pahayag 16:14-16; 19:14-16) Ipapadapat han gamhanan nga mga anghel an paghukom han Dios samtang an Ginoo nga hi Jesus “nabulos . . . ha mga diri nasugot ha maopay nga sumat mahitungod han aton Ginoo nga hi Jesus.”—2 Tesalonica 1:7, 8.

Salit, makakasarig ka nga an mga anghel interesado gud ha imo. Nagtatagad gud hira han kaopayan hadton naruruyag mag-alagad ha Dios, ngan pauroutro nga ginagamit hira ni Jehova basi parig-unon ngan protektaran an iya matinumanon nga mga surugoon ha tuna.—Hebreo 1:14.

An tagsa ha aton, kon sugad, sadang maghimo hin importante nga desisyon. Mamamati ba kita ngan masunod ha maopay nga sumat nga iginsasangyaw ha bug-os nga tuna? An mga Saksi ni Jehova malilipay ha pagbulig ha imo basi magpahimulos ka ha mahigugmaon nga bulig han gamhanan nga mga anghel han Dios.