Oo, may-ada. Tikang hira diin? Hinumdumi nga ginlarang han Dios an mga anghel nga may-ada kagawasan ha pagbuot. Waray pag-iha katapos larangon an siyahan nga lalaki ngan babaye, hira Adan ngan Eva, gin-abuso han usa nga perpekto nga espiritu an iya kagawasan ha pagdesisyon ngan nag-aghat hin pagrebelde ha tuna. Naglampos hiya, ngan nagrebelde ha Dios hira Adan ngan Eva. (Genesis 3:1-7; Pahayag 12:9) An Biblia waray magsiring kon ano an ngaran hini nga espiritu ngan kon ano an iya katungdanan ha langit antes hiya magrebelde. Kondi katapos niya magrebelde, gintawag hiya han Biblia nga Satanas nga nangangahulogan hin “Parakontra,” ngan Yawa nga nangangahulogan hin “Parapakaraot,” ngan angayan gud ito ha iya.—Mateo 4:8-11.

Makasurubo, diri la hiya an nagrebelde. Ha panahon ni Noe, an waray unabiha nga kadamu hin mga anghel “binaya ha urukyan nga angay ha ira” ha langitnon nga pamilya han Dios. Linusad hira nganhi ha tuna ngan nagpakatawo basi magkaada maraot ngan imoral nga pagkinabuhi, nga diri amo an katuyoan han paglaranga ha ira.—Judas 6; Genesis 6:1-4; 1 Pedro 3:19, 20.

Ano an nahitabo hiton magraot nga anghel? Han nagpahinabo an Dios hin baha ha bug-os nga tuna basi limpyohan ito, ginbayaan nira an ira tawhanon nga lawas ngan binalik ha lugar han espiritu. Kondi waray tumugot an Dios nga inin magraot nga anghel makabalik ha “ira orihinal nga kahimtang.” Lugod, iginlabog hira ha ubos nga kahimtang han “duro nga [espirituwal nga] kasisidman,” nga gintatawag nga Tartaro. (Judas 6; 2 Pedro 2:4) Ini nga mga demonyo nagin sakop ni Satanas nga Yawa, an “magmarando han mga demonyo,” nga “padayon nga nagpapakaanghel han kalamrag.”—Mateo 12:24; 2 Corinto 11:14.

Igintututdo han Biblia nga an Mesianiko nga Ginhadian han Dios, usa nga langitnon nga gobyerno, naestablisar han 1914. * Katapos hiton makasaysayan nga panhitabo, ginpaiwas ha langit hi Satanas ngan an iya mga demonyo ngan ginlabog hira dinhi ha tuna ngan diri na hira puydi bumalik ha langit. An kalyap nga karaotan ngan duro nga imoralidad yana ebidensya han ira kasina ngan nakakadaot nga impluwensya.—Pahayag 12:9-12.

Kondi, an pagtikaduro han karaotan ngan kamadarahog nagpapamatuod nga hirani na matapos an ira maraot hinduro nga impluwensya. Ha diri na maiha, inin magraot nga espiritu diri na tutugotan ha pagbuhat hin bisan ano. Katapos magmando an Ginhadian han Dios ha paraiso nga tuna ha sulod hin 1,000 ka tuig, inin magraot nga espiritu magkakaada ultimo ngan halipot nga higayon ha pagsulay ha katawohan. Katapos, bubungkagon hira ha kadayonan.—Mateo 25:41; Pahayag 20:1-3, 7-10.