“Samtang ginpapatambal ko an akon kanser, nahahadlok gud ako,” siring ni Pamela. “Pero kon nag-aampo ako kan Jehova nga Dios, nagigin kalmado ako ngan nakakapanhunahuna hin maopay. May inaabat la gihap ako nga kaul-ol, pero an pag-ampo nakabulig ha akon nga pirme magin positibo. Kon ginkukumusta ako han mga tawo, nasiring ako, ‘Diri maopay an akon pag-abat pero malipayon ako!’”

Syempre, diri na kita maghuhulat nga makaeksperyensya pa kita hin magkuri nga mga kahimtang antes kita mag-ampo. Kita ngatanan nakakaeksperyensya hin mga problema, dagku man ito o gudti, ngan may mga panahon nga kinahanglan naton hin bulig para maatubang ito. Makakabulig ba an pag-ampo?

An Biblia nasiring: “Ipasa ngadto kan Jehova an imo pinas-an, ngan bubuligan ka niya. Diri gud niya papabay-an nga matumba an usa nga matadong.” (Salmo 55:22) Makaparig-on gud ito! Salit paonan-o ka mabubuligan han pag-ampo? Kon nag-aampo ka ha Dios ha tama nga paagi, ihahatag niya an imo kinahanglan nga bulig basi maatubang mo an imo mga problema.​—Kitaa an kahon nga “ An Naihahatag ha Imo han Pag-ampo.”