1 Timoteo 5:1-25
5 Ayaw pag-isog kon nagsasaway ha edaran nga tawo. Lugod, pakimalooy ha iya sugad hin imo tatay, ha burobata nga kalalakin-an sugad hin imo kabugtoan,
2 ha edaran nga kababayin-an sugad hin imo nanay, ngan ha burobata nga kababayin-an sugad hin imo kabugtoan nga gintatratar ha bug-os nga kaputli.
3 Tagi hin konsiderasyon an mga balo nga babaye nga totoo* nga balo.
4 Pero kon an balo nga babaye may mga anak o mga apo, kinahanglan mahibaro anay hira pagbuhat han debosyon ha Dios dida ha ira kalugaringon nga panimalay ngan pagbalos ha ira mga kag-anak ngan mga apoy han angay ha ira, kay makalilipay ini pagkit-on han Dios.
5 An babaye nga totoo nga balo ngan waray gud nasuporta naglalaom ha Dios ngan nagpapadayon ha pangamuyo ngan pag-ampo ha adlaw ngan gab-i.
6 Pero an usa nga nagkikinabuhi ha kalaw-ayan ngan kalipayan patay na bisan kon buhi pa hiya.
7 Salit padayon nga ihatag ini nga mga instruksyon, basi magin waray ikasaway ha ira.
8 Kon may bisan hin-o nga diri nagtatagana ha mga aada ha iya poder, ngan labi na ha mga membro han iya panimalay, iginsasalikway niya an pagtoo ngan mas maraot pa ha tawo nga waray pagtoo.
9 Mahimo ilista an balo nga babaye nga diri maminos hin 60 anyos, nga usa la an bana,
10 kilala ha mag-opay nga buhat: kon nagpadaku hiya hin mga anak, kon nagin maabiabihon hiya, kon ginhimsawan niya an mga baraan, kon ginbuligan niya an mga nagsasakit, ngan kon nagin maduruto hiya ha tagsa nga maopay nga buhat.
11 Kondi ayaw ilista an burobata pa nga mga balo nga babaye, kay kon an ira mga hingyap ha pakighilawas nakakaulang han ira pag-alagad ha Kristo, karuyag nira mag-asawa.
12 Huhukman hira tungod kay ira iginsalikway an ira saad hadto.*
13 Labot pa, nababatasan liwat nira an paghinubya, ngan nagpipinanungbalay; oo, diri la mga hubya, kondi mga tsismosa liwat, nagpipinanlabot ha ginbubuhat han iba, nag-iiristorya mahitungod han mga butang nga diri nira angay pag-iristoryahan.
14 Salit karuyag ko nga an burobata pa nga mga balo nga babaye mag-asawa, magkaada mga anak, manginano ha panimalay, ngan diri maghatag hin higayon ha parakontra nga magyakan hin nakakainsulto.
15 Ha pagkamatuod, an iba nahisimang na ngan nagsunod kan Satanas.
16 Kon may babaye nga tumuroo nga may mga paryente nga balo nga babaye, sadang niya buligan hira, basi an kongregasyon diri mabug-atan, ngan basi makabulig ito ha mga balo nga babaye nga totoo gud nga nanginginahanglan.
17 An mga tigurang nga nangunguna ha maopay nga paagi sadang tagdon nga angay han doble nga kadungganan, labi na an mga maduruto ha pagpahayag ngan pagtutdo han pulong.
18 Kay an kasuratan nasiring: “Diri mo takpan an baba han lalakí nga baka kon naggigiok ito han mga uhay”; sugad man: “An trabahador takos han suhol ha iya.”
19 Ayaw pagtuod ha igin-aakusar ha usa nga tigurang, gawas la kon pamatud-an ito hin duha o tulo nga testigo.
20 Sawaya ha atubangan han ngatanan nga nagkikita an mga nagbubuhat hin sala, sugad nga pahamangno ha iba.*
21 Ha atubangan han Dios ngan ni Kristo Jesus ngan han pinili nga mga anghel seryoso nga ginsusugo ko ikaw nga tumanon ini nga mga instruksyon nga waray gud gindadapigan o ginpapaurog.
22 Ayaw gud pagdali-dali pagtungbaw han imo mga kamot ha bisan hin-o nga lalaki ha pagpili ha iya;* ayaw liwat pakigbahin ha mga sala han iba; tipigi nga putli an imo kalugaringon.
23 Ayaw pag-inom hin tubig la, lugod inom hin gutiay nga bino para ha ikakaopay han imo tiyan ngan tungod han imo agsob nga pagkasakit.
24 An mga sala han iba nga tawo hinbabaroan han publiko, ngan nakarawat dayon hira hin paghukom, pero an mga sala han iba naibubuhayhag pag-abot pa han panahon.
25 Sugad man, an mag-opay nga buhat hinbabaroan han publiko ngan an mag-opay nga buhat nga diri hinbabaroan diri padayon nga natatago.
Mga footnote
^ Karuyag sidngon, an nanginginahanglan nga mga balo nga waray nasuporta.
^ Ha literal, “siyahan nga pagtoo.”
^ O “basi mahadlok an iba.”
^ Karuyag sidngon, ayaw pagdali-dali ha pagpili hin bisan hin-o nga lalaki.
